احببتك والله يعلم بالخفاء

بارت 51

وفي الجهه الثانيه عند مطلق الي دخل البيت وشماغه على كتفه وعقاله براسه دخل الصاله وشاف جدته جالسه وصوت الراديو مالي البيت تقدم وسلم على راسها : سلام يا امي
جدة مطلق : وعليكممم السلامممم هلا بحبيبي كيفك طيب ؟
ابتسم مطلق بضيق وهو ضااااااايقه فيه السريعه : بخيير بخير وشفتك صرت احسن انتي أكلتي ؟
جدة مطلق : أكلت أكلت الحمدالله خير الله واجد
مطلق : اجل أنا بروح احط راسي شوي ( انام ) سامحتلي ؟
جدة مطلق : رح يابوي ارتاح
قام مطلق وسلم على راسها ودخل غرفته بهدو نزل ثوبه وشماغه على طرف السرير وارتمى بتعب وهو مايدري وش صاير فيه آخر فتره بهاج الي اختفى هو وسعود ومكالمات سعود الي ماتوقف ووده يرد ويسأل عن حالهم بس يرجع يعصب عليهم ومايرد وهو مشتاااااق مشتاق حيل لبهاج ومشتاق لمناقراته مع سعود حط يده تحت راسه وهو يتمعن السقف ويتذكر شهد اييييييه شهد الي أكلت قلبه وروح شوي شوي وبدون مايحس طاح فالحفره حفره مالها نهايه ! وبكل فضووول وش تسوي الحين ؟ كيفها ؟ مرتاحها ؟ ولا متضايقه وزعلانه وللحين تفكر بالي صار ؟
وقعد مطلق يهوجس لييين ما انغمى عليه ونام من التعب
___________________
وبجهه ثانيه تقدم ابو عبدالله للجد حمد : يبه انت متأكد ؟
الجد حمد وهو ماسك عكازته ومتجهز بيطلع : ايييه متأكده البنت عندنا وابوها مايدري عنها مايصير أنا الحين بروح اكلمه وأفهمه بالي صار كله وانت بتجي معي
مشى ابو رعد ورا ابوه : شورك وهداية الله
ركبو السياره واتجهو لبيت الشيخ عبد اللطيف
__________________
وبجهة الرياض وقفت سياره بهاج قدام بيت ابو سياف وهو معه سعود واخذو كل اغراضهم من الفندق وجاهزين يطلعون للديره
سعود : اخيراً بنرجع والله كأني عن الديره دهر !
كان بهاج ساكت وهو مركز نظره على سيارة ابو سياف الي شنطتها فاتحه و الخادمه تشيل الشنط والأغراض بشنطة السياره يستعدون للمشي ويهوجسس بردة فعل اديم وهل هي موافقه تروح للديره ولا لا
سعود وهو يأشر بيده : ياهووو صاحبنا معنا ؟
بهاج وهو للحين مركز عينه : هممم
سعود : ولددد
لف عليه بهاج : نعم نعم يا سعود ماتسكت شوي انت ياخي ارحمني من صوتك شوي كم يوم وانا اسمعه
سعود : لا انت رسمياً غادي بالهواجيس كمل كمل
بهاج رجع يراقب بصمت لين فز على طلعت سياف من البيت ونزل من السياره : اررررحب
التفت سياف وهو صاير يخاف من بهاج من بعد آخر مره شافه وثوبه مليان بدم نايف
تضايق بهاج من ردة فعل سياف الي كان واقف ماتحرك وهو بالعاده يفز يركض يضمه تقدم بهاج لسياف ونزل له يسلم عليه بحراره يحاول ينسيه الي شافه ويوصل له رساله ( أنا بهاج القديم الي تحبه ويحبك والي مايضرك مهما صار )
بهاج بأبتسامه لسياف : هلا هلا كيفك يا حبيبي طيب ؟
سياف بصمت يناظر فيه وهز راسه ب ( ايه )
بهاج : تبي أوديك البقاله قبل نروح الديره ؟
سياف الي كان وده يقول ( ايه ) قال : لا
سكت بهاج وشاف ابو سياف طالع من البيت وقام تقدم له يسلم عليه : جاهزين يا عمي ؟
هز راسه ابو سياف وهو واضحه عليه الضيقه : ايه ايه
بهاج : اجل أنا وراكم ترا
رح بهاج يركب السياره وهو عينه على الباب ينتظر طلعت اديم وشوفها على احر من الجمره الين مافز قلبه زي كل مره يشوف اديم فيها
طلعت اديم من باب البيت وهي ماسكه شنطتها بيدها وكلها ثقلللل رجلها ثقييييله على الخطوه وعلى المشيه ماودها تتحرك ولا تروح الديره
ماكان عندها خبر ان بهاج بيروح معهم بس انه في سياره ثانيه وهذي السياره واقفه بعيييد شوي عن الباب والي داخلها يراقب بصممممت وبعيون تعبااااانه وهو يعرف إذا اديم تبي الروحه ولا لا بس من مشيتها وهدوءها اخذ نفس بضيييييييقه وتنهد وفز نظره على لفت اديم عليه الي ماكنت تدري هذا مين الين ما استوعبت وعينها جت بعين بهاج رغم المسافه الي بينهم والبعد إلا ان عيونهم وقلوبهم تلامست في بعض وكل عيون تشكي للثانيه وكل نبض قلب ينبض للقلب الثاني اخذت نفس اديم بصدمه وطاحت دمعتها وبسرعه كملت مشي وركبت السياره خلف مقعد السواق وركبت ام سياف وابو سياف وسياف والخادمه السياره وكلهم تجهزو للمشي بدأ يمشي ابو سياف ووراه سيارة بهاج
__________________
وفي بيت الشيخ عبد اللطيف الي وقف يستقبل ومستغرب بجية الجد حمد وابو رعد
الجد حمد بصوت جمهوري : السلام عليكم
رد الشيخ عبد اللطيف هو وجهه اسود ومصفوق : وعليكم السلام حياكم حياكم الله تفضلو
والتفت يصوت للصبي : القهوه ياولد
دخلو المجلس والشيخ عبد اللطيف يحاول يخفي ملامح وجهه المنصفقه وهو للحين مايدري شهد بنته وين ارضها من سماها
جلس ابو رعد : كيفك ياعم عساك بخير
الشيخ عبد الطيف : الحمدالله الحمدالله وانا ابوك
الجد حمد : أنا بدخل بالموضوع ياعبد اللطيف على طول ولاني لاف ولا بدور
تلبك الشخ عبد اللطيف بخوف إن فضيحة بنته انتشرت بالديره : عسى خير ؟
سكت ابو رعد وهو يراقب ابوه والشيخ عبد اللطيف بكل توتر
الجد حمد : أنا جيتك يا عبد اللطيف قبل فتره وقلت لك وانا اخوك وانت اخوي نبهتك اكثر من مره لا تزوج بنتك بضاري ولد ابو ضاري
سكت الشيخ عبد اللطيف ونزل نظره للأرض وكمل الجد حمد : بس الواضح ان غرتك الدنيا على بنتك
رفع نظره الشيخ عبد اللطيف بغضب للجد حمد ورفع يده الجد حمد : خلني انهي كلامي
سكت الشيخ عبد اللطيف وكمل الجد حمد : غرتك الدنيا على بنتك يا عبد اللطيف وهذا مايرضى الله ولا رسوله والحين انت بتدفع ذنب بنتك المسكينه
أنا مادري وصلك الخبر ولا لا بس أنا جيت اقولك ضاري الي شاد الظهر فيه وفي فلوسه جا بنتك سكران ! و ضرب بنتك لين قال امين وانغمى عليها ولا اكتفى بكذا فالمستشفى قال لهم انها طاحت وكل ذا صار وانت ماتدري عن بنتك ولا سمعت بكلام رفيق دربك لك
توسعت عيون الشيخ عبد اللطيف بصدممممممه وانكتمت انفاسه معقوله ؟ معقوله كل ذا يصير ببنتي وانا السبب ؟؟؟ وبصدمه بدأ يتكلم : ب بنتي وييين ؟؟ وينها الحين
الجد حمد التفت لابو رعد ورجع التفت للشيخ عبد اللطيف : بنتك عندي وعند بناتي فالبيت ماقويت اخليها عند الي مايخاف الله ولا بغت ترجع لابوها الي باعها برخص التراب
قام الشيخ عبد اللطيف بغضببب وضرب عكازه بالارض : بنتك في بيتك وماعلمتني يا حمد !
قام الشيخ حمد وقام وراه ابو رعد : بنتك ما اخذتها إلا امس وهذاني جيت وعطيتك خبر ولو ابي اخلي عنك شي تأكد لتقضي السنه وانت مادريت بس مهماً كان انت ابوها ومهما بعتها على حس اراضي وأموال جيت وعطيتك خبر
ابو رعد : استريح ياعمي يا يبه اذكرو الله استهدو بالله ياجماعه
جلس الشيخ عبد اللطيف وهو يردد : لا حول ولا قوة إلا بالله
والفت ابو رعد للجد حمد : اجلس يبه اجلس وريح
جلس الجد حمد وهو معصب من تصرف رفيق دربه في بيته
وكمل بهدوء وقال : إذا تبي تلافي خطاك وتستر على بنتك طلقها من الي مايخاف الله فالنهايه هي بنتك وذمه في رقبتك طلقها واقبل خطبتي لبنتك
رفع نظره الشيخ عبد اللطيف بصدمه للجد حمد: وش تقصد ؟
تبادلو الجد حمد وابو رعد النظرات ورجع قال الجد حمد : أنا اخطب منك بنتك شهد لمطلق بن نمر
قطب الشيخ عبد اللطيف وهو مايتذكر واحد اسمه مطلق إلا مطلق الداشر ! : مطلق من ؟
رجع كرر الجد حمد : مطلق بن نمر ابن عجلان محد في ذا الديره مايعرفه الله يهديك
الشيخ عبد اللطيف بصدمه وعدم إستعاب: مطلق الداشر ماغيره ؟؟
هز راسه الجد حمد بيأس : ومن قال لك انه داشر مطلق الي اعرفه أطيب الطيبين وسيرة ابوه نمر بن عجلان معروفه في كل ذا الديره
عبد اللطيف بأندفاع : ايه ابوه معروف وجده معروف بالطيبه والشهامه والرجوله بس مطلق ماجا ولا طلع لا على ابوه ولا على جده وانا ماعندي بنت اعطيها الدشير
استوعب الشيخ عبد اللطيف وبأندفاع وعصبيه : لايكون الي سمعته صحيح ؟؟؟
تبادلو الجد حمد وابو رعد وقال ابو رعد : وش سمعت ياعمي
الشيخ عبد اللطيف : بنتي كيف جتك في بيتك ياحمد ؟ من الي جابها
عرف الجد حمد وش يقصد وقال : أنا الي افتكيتها من يده وانا الي اخذتها وجبتها عند بناتي وش صاير ؟
التفت ابو رعد لابوه وهو مافضح مطلق ولا قال الحقيقه
حك دقنه الشيخ عبد اللطيف : الكلام الي عندي ماعندي بنت أعطيها الدشير انتهى
ضرب الجد حمد عكازته بالارض بعصبيه وقال : مطلق ارجل واشهم واحد في ذا الديره بس اهل الديره ظالمينه وهو واحد مايسكت عن حقه إذا فيه احد أذاه يصلي به شرق والناس قبله واذا فيه احد احتمى به خلاه خلف ظهره ولو يتجمعون كل اهل الديره يضرونه والله مايمسون منه شعره دامه خلف ظهر مطلق ابن نمر ابن عجلان انت ماعرفته زين ولا عاشرته وانا كنت مثلك الين ماقريت بداخل الولد وانت إذا بنتكلم عن الدشاره فانت زوجتك بنتك بداشر كلاب سكير ونكير واذا بنتكلم عن داشرة مطلق فأنها داشره تطلق الوجه مايسكت عن حقه وسميتوه داشر والكلب ضاري الي مافي ادشر منه من فلوسه صار ارجل واحد
قام بعصبيه وقال : أنا قلت الي عندي يا عبد اللطيف بنتك في بيتي وعند اهلها وفي بيتها وانت فكر بالي قلته لك استر على بنتك وطلقها من ذا الكلب ضاري واقبل خطبتي وأنا إذا خطبت لاحد اعرف اني اعرفه زييين ومستحيل اظلم بنتك فيه
قام وراه ابو رعد وطلعو من المجلس وجلس الشيخ عبد اللطيف بصدمه
والصدمه الأكبر الي كانت على ام شهد الي شهدت وسمعت كل الي صار دخلت بعصبيه : بنتي صارت مضحكه عند الناس بنتي انضربت وانهانت وانت السبب انت اسمع يا عبد اللطيف إذا الدنيا والأراضي والفلوس غرتك على بنتك فا أنا بنتي اغلى ما عندي طلقها من الكلب واسمع كلام الشيخ حمد وأستر على بنتك يا عبد اللطيف استر عليها وخاف الله فيها يا رجال
رح اخذ بنتي من بيت الناس وطلقها من الي زوجته اياه برخص التراب وأرضى على كلام الشيخ حمد
قام الشيخ عبد اللطيف بعصبيه وطلع وضرب الباب وراه وجلست ام شهد تبكي بحرقه على بنتها
_________________
وفي جهه ثانيه عند سيارة ابو سياف وهي بطريق السفر ووراهم سيارة بهاج ومع غروب الشمس وبهاج سااااكن وهادي ويراقب سيارة ابو سياف بتفكيييير عمييييق
لف عليه سعود : وش ناوي تسوي الحين ؟
بهاج بصوت ثقيل وهو ماشال نظره عن سيارة ابو سياف ابداً : و ش اسوي برجعها اكيد
سعود : واذا رفضت ؟
لف عليه بهاج بنظره فيها شك وقال وهو مو متأكد : ماهي رافضه
ورجع مد النظر على سيارة ابو سياف الي قدامه
سعود : واهلك مارح يدرون بالسالفه ؟
بهاج : لا ابداً أنا وعمي اتفقنا برجعها بهدوء ومحد بيسأل الكل بيعرف انه تطلقنا ورجعنا وموضوع عادي
سعود هز راسه برضى ورجع يطقطق بالجوال
اما فالسياره الثانيه سيارة ابو سياف الي كان الصمت محاوطهم
واديم مو متعوده تسافر مع اهلها وتكون ساكته وحزينه ومنكسره كذا بالعاده تضحك وتمزح وتقول قصص لفت راسها وشافت سياره بهاج للحين وراهم وتدلعت ومسحت دمعتها بهدوء بدون احد يحس عليها وابو سياف الي كان صاااامت وضااايق وكل تفكيره إذا اهل الديره بيحسون بشي ولالا وكذالك عند ام سياف الي كان قلقانه وش بيقولون اهل الديره اما سياف الي كان نايم ببرأءه
__________________
كانو البنات متجمعين في جلستهم المعتاده كل ما تجمعو في بيت الجد حمد وهالمره بوجود شهد الي كانت معهم اما الجده وام رعد والعمه عواطف جالسين بالمقلط يسولفون ويتقهوون بهدوء
العمه عواطف بعد تردد : يمه ماعندك خبر عن طلال ؟ ( ابو سياف )
هزت راسها الجده بضيق وقالت : من بعد ماتطلقو بهاج واديم ماعاد شفته
ولا سمعت صوته ولا ادري وين ارضه
لفت ام رعد على العمه عواطف وبادلتها العمه عواطف النظر وقالت : معليش التهى بذا الدنيا ومصيره يجيك طيب شيخه ماجتكم ؟
ام رعد :  عاد ام مشعل ناويه تجينا اليوم وشكلها بتصادف جيتكم
العمه عواطف : زيييين اجل خلينا نشوفها من زمان عنها
إلا انتم اخباركم اخبار اهل جده
العمه عواطف: كنا نتحرى الاجازه تجي على احر من الجمر متشوقين لشوفتكم والحمدالله جت
ام رعد : عاد هالاجازة مطوله بتقعدون عندنا كلها الله يعينكم
ضحكت العمه عواطف : يوووه انتم الي الله يعينكم علينا
ضحكت ام رعد ودخلت عليهم العمه شيخه : سلااام عليكم
الجميع : وعليكم السلام
قامت ام رعد والعمه عواااطف يسلمون
واتجهت العمه شيخه تسلم على الجده : كيفك يمه عساك طيبه
الجده : بخيير
والتفتت للعمه عواطف وبعدها ام رعد تسلم عليهم وبادلوها السلام وجلسو
صبت العمه عواطف الفنجال واخذته العمه شيخه : تسلمين اخيراً شفناكم يأهل جده
ابتسمت العمه عواطف : اي والله يقول من طول الغيبات جاب الغنايم
إلا وين البنات ماجبتيهم معك ؟
العمه شيخه : خليتهم عند أبوهم
قامت ام رعد تنادي البنات يسلمون على العمه شيخه ودخلت عليهم وهم يسولفون ويضحكون : يابنات يابنات
تغريد : سمي يمه ؟
ام رعد : قومو سلمو عمتكم شيخه جت
افنان طاحت على حضن نوره : يووووووه ياقدمي
ام رعد رمت عليها الشبشب : بنت ياقليلة الأدب
فزت افنان على ضربة الشبشب : ااااه يمه
ام رعد : قومي جيبي الشبشب
قامت افنان وهي تتحلطم والبنات يضحكون عليها وقالت بصوت خافت لنوره قبل تمشي: تضربني به وتخليني ارجعه لها
ضحكت نوره : روحي روحي بس
تقدمت شهد للعنود : مين شيخه ؟
العنود : هذي عمتي الحين بتتعرفين عليها
قامو البنات كلهم متجهين لجلسة الحريم الكبار ودخلو وبدو يسلمون وحده وحده على العمه شيخه والعمه. شيخه تبادلهم السلام جلست نوره جنب افنان : غريبه ماجو بناتها
افنان بصوت خافت : احسن فكه
ضحكت نوره ورجعت التفتت لهم
استغربت العمه شيخه بوجود شهد وقالت : انتي بنت الشيخ عبد اللطيف ؟
شهد بتردد : ايه
ابتسمت العمه شيخه بفضول وكلمت وقالت : ووش جابك هنا ؟
لفو البنات بصدمه على بعض وقالت ساره : لا مستحيل للحين ماخلت وقاحتها
تغريد : شوفي شهد مسكينه ماعاد عرفت تتكلم
قالت الجده الي انقضت موقف شهد : اهلها راحو يعتمرون ونزلوها عندنا
العمه شيخه الي كانت متأكده انها شافت ام شهد قبل كم يوم : ايييه مشاءالله
___________________
وصل الجد حمد وابو رعد المجالس وكلهم يفكرون وش بيرد عليهم الشيخ عبد اللطيف والتفت ابو رعد على دخلة سلطان ومعه حمد : سلام عليكم
الجميع : وعليكم السلام
تقدم حمد يسلم على الجد حمد الي جالس: سلام يا جدي
الجد حمد : هلا هلا مرحبا بسمي جدي
وتقدم يسلم على ابو رعد : حي ذا الشوف
حمد : والله مشتاقين لكم ماصدقنا الاجازه تجي عشان نجيكم
ابو رعد : عسى جبتم بنيتي معكم بس
ضحك حمد وقال سلطان : لو مجابها علقناه بمدخل الديره
ضربه حمد بمزح : عن الغلط
الجد حمد : وين امك والبنات
حمد : داخل ياجدي
قام الجد حمد ومعه ابو رعد يسلمون عليهم داخل وطلعو من المجلس ودخل رعد وبصوت جمهوري ومستانس : سلاااااام عليكم
جلس سطان وبيده بيالة الشاهي وبملل قال : جا الثاني
تقدم له حمد وهو يحضنه : الله حيه
رعد : ويييين الناااس
حمد : ابد جينا عندكم وماحنا ماشين ليييين تنغث كبودكم
رعد بضحك : حلالك يا بعد قلبي أنا لازم اروح اسلم على عمتي وغروده
حمد : تو جدي وخالي دخلو يسلمون الحقهم
رعد : يلا شويات واجيكم
والتفت لسلطان الي جالس : قم صب القهوه لضيوفك
وطلع رعد وقعد سلطان يستوعب الكلمه : من الضيف ؟ ليكون انت ؟
حمد جلس : ليه ماني مالي عينك
قام سلطان وهو يهز راسه : لالا محشوم بس ترا هذي اول مره
حمد : وين بهاج ؟
سلطان : رايح هو وسعود الرياض عندهم شغل
حمد : ليته يجي والله مشتاق له
_________________
داخل في بيت الحريم قامت شهد تدخل الغرفه بعد ماسمعت صوت الجد حمد وابو رعد ودخل الجد حمد ووراه ابو رعد وقامو البنات واتجهت العمه عواطف تسلم على ابوها بحراره ووراها ابو رعد
وقامت العمه شيخه تسلم عليهم ووراها البنات الي يسلمون وحده وحده
دخل رعد ودخلو نوره والعنود الغرفه عند شهد وهو بصوت عالي ينادي : أنا ابي غروووووده بس اختي وييين ؟
ضحكت تغريد وتقدم رعد بضحك يسلم على العمه عواطف وعلى العمه شيخه وتقدم بعدها يحضن تغريد : هلاااا والله بأم فِراس يالله انك تحيها
تغريد بأبتسامه : هلا بحبيبي اخوي اخبارك ؟
رعد : انتي الي خبارك طمنيني عنك
الجده : اجلسو اجلسو تقهوو
الجد حمد : لالا بنطلع المجلس وانتم نادو البنات واخذو راحتكم
رعد : وين تو ياجدي بسولف مع اختي
الحمد : اقوووول امش بس
ضحكت تغريد : ماعليك آخر الليل تعال
طلعو الجد حمد وابو رعد ورعد متجهين يرجعون للمجلس
وصوتت افنان للبنات يطلعون وطلعو البنات ورجعو يجلسون ويسولفون ويضحون
كذالك عند جلسة الرجال الي كانو بوسط القهوه وبين السوالف
___________________
وقت اذان العشاء
دخلت سيارة ابو سياف الديره واديم مدة نظرها للديره الي كانت توصل لها مستانسه ومليانه شغف هالمره ؟ ودها تنحاش منها ومن الضيقه الي عانت صدرها
وقفت سيارة العم ابو سياف عند باب بيته الي بالديره ووراه سيارة بهاج الي كملت متجهه لبيت سعود عشان ينزله
وقف بهاج سيارته ونزل سعود : إذا بغيت شي كلمني
بهاج : زين
ومشى بهاج راجع وهو ملياااان فضول وشايل هم اديم وقف وماحصل إلا الخادمه تنزل الاغراض وابو سياف عند الباب التفت يدور اديم بس ماحصلها واكيد انها دخلت هي وسياف وام سياف
نزل بهاج من السياره وتقدم عند ابو سياف : ياعمي مارح تجي تسلم على جدي ؟
ابو سياف وهو مكسور خاطري : وش اقول له ؟
نزل راسه بهاج وقال : انت ماسويت شي غلط ياعمي أنا جيتك وطلبت اني ارجع اديم وانت وافقت هذي كل السالفه ومحد بيعرف شي ثاني وسع صدرك كل شي بيزين
خبط ابو سياف على كتف بهاج : هذا العشم يا ولد اخوي هذا العشم الله يجعل من رباك للجنه
ابتسم بهاج بضيق وقال : لا تحسب اني قلت كذا عشان بستر عليك ولا على بنتك أنا قلتها وقلبي كله رجاوي والله شاهد اني بغيت ارجع اديم عشاني مو عشان احد
ابتسم ابو سياف بضيق وقال : رح ارتاح وانا عمك وانا ان شاءالله بكره بجي عند ابوي اسلم عليه ونتفاهم
بهاج وهو وده يشوف اديم قبل يروح : ابشر
اما عند اديم الي دخلت البيت الي آخر مره دخلته قبل ثلاث شهور ومغبر
راحت فوق متجهه لغرفتها فتحت الباب وطاحت دمعتها اول ماشافت الشباك الي يتجهه على بيت الجد حمد وتقدمت له وفتحته وبكت اكثر بعد ما شافت المنظر وقفى بهاج الي كان يمشي متجهه للبيت وبشهقه وقف بهاج مشيه وبدت نبضات قلبه تزيد وهو سمع الشهقه وهو عاااارف زين من ذا الصوت الي كم له ماسمعه في الديره  شد على يده والتفت ورفع نظره للشباك الي صفق بقوه وتسكر
طاحت اديم تبكي بحرقه بالارض وكانت الايام على بداية الشتاء نزل راسه بهاج بيأس وتلغثم بالشماغ وكمل مشي
___________________
دخل بهاج البيت واتجه للمجلس الي كان فيه الجد حمد وابو رعد ورعد وسلطان وحمد ومحمد عيال العمه عواطف بهاج وهو مستغرب وجودهم ناسي الاجازه : سلااام
الكل : وعليكم السلام
تقدم بهاج ينزل يسلم على الجد حمد : اخبارك يا جدي
الحمد : حبيت الكعبه الأخبار عندك
تقدم بهاج يسلم على ابو رعد وبعدها على العيال واحد واحد لين وصل عند حمد : غريبه جايين يأهل جده
حمد : غريبه ! وينك ياخوي عن العالم بدت الاجازه
رفع حواجبه بهاج وهو حرفياً ناااااسي كل شي هالايام : في ذمتك ؟
حمد بضحكه : اي والله
بهاج : اجل زين انكم جيتو
ابو رعد : انت هالحين ليش ماتقول لي وش وداك الرياض وكم لك يوم ماشفناك
جلس بهاج : اشغال يابوي
ابو رعد وهو شاك انه رايح عشان اديم : والله ماندري عن إشغالك بس الله يستر
سكت بهاج ورفع نظره لرعد الي كان يأشر له ( انت بخير ؟ ) ورد له الجواب بهزت راس بهدو
ورعد يعرف جووووف بهاج وحاس انه شايل هم وحمل بس مايقدر يقول شي قدام الكل
قام بهاج : أنا بروح اسلم على امي وجدتي واجيكم
طلع بهاج واستوقف على صوت رعد الي وقفه : بهاج
لف بهاج وتقدم رعد يحضنه بدون مقدمات ابتسم بهاج وبادله الحضن : لهدرجه مشتاق لي ؟ ماهقيت رعد يطلع رهيف كذا
رجع رعد وضربه بخفه على كتفه : عن الاستهبال الحين ماتقول لي ليش رحت الرياض بسرعه كذا بدون ماتعلم احد ولا قاعد اسبوع كامل ماندري عنك شي
جا بهاج بيرد بس وقف على رفعة حواجب رعد وهو يقول له : لا تحاول تخبي عني شي تراني فاهمك وحافظك
بهاج : اي والله انك فاهمني وحافضني بس تكفى يارعد بعدين اعلمك واصلاً بتعرف قريب
ماحب رعد يزيدها عليه وقال بهدوء : طيب
بهاج بمزح : تسمح لي اروح ؟
رعد بضحك : اذلف
ومشى بهاج وهو مبتسم ورجع رعد المجلس

لاتنسون النجمه 🌟