بهاج وقف عند باب المدخل وصوت بصوته العالي : ياولد فيه احد ؟
فزو تغريد وافنان على صوت بهاج الي ماسمعوه من مده
واتجهو للباب بس سبقهم فِراس الي اتجه لبهاج قبلهم ونزل له بهاج يشيله وهو مبتسسسم وقال : مرحباااا مرحبا ياخالو مرحبا
كان فِراس مايتكلم بس يتحسس وجه بهاج وصوت ضحكاته العاليه
أقبلت تغريد : بهااااج
سلم عليها بهاج وفِراس للحين بحضنه : هلا هلا بأم فِراس
تغريد : وشلونك ؟؟؟ وحشتننني
تقدمت افنان تسلم عليه : وينك اختفيت سمسم ؟ اشتقت لك
بهاج بغمزه : اشتقتي لي ولا للفلوس ؟
ضربته افنان بخفه على يده : حرام عليك تظلمني
تغريد : ماعليك من ذا العياره علمني انت كيفك اخبارك ؟ امي تقول صار لك اسبوع برا الديره وين رحت
بهاج وهو يلاعب فِراس الي بحضنه : كنت بالرياض
سكتو البنات والتفتو لبعض بقلق وهم مفهوم الرياض عندهم يعني اديم
رفع راسه بهاج لهم وشاف كمية القلق الي على وجيهم وتوقع وش خطر على بالهم تدارك الوضع وقال : شريكي عنده شغل ورحت استلم الفرع عنه ( معرض السيارات )
تغرد بزفير : اهاا اجل اشوا انك جيت لازم نقعد قعدتنا تالي الليول ولا نسييت ؟
افنان : ييييوه ياذيك القعده شكثر مشتاقه لها
بهاج بأبتسامه واشر على خشمه وقال : على ذا الخشم بس فيه احد داخل ابي اسلم على امي وجدتي
افنان : ايه عماتي كلهم موجودين ؟
تغريد : انتظر بروح أعطي البنات خبر واجيك
بهاج : زين
وكمل بهاج لعب مع فِراس وهو بحضنه وراحو البنات
تغريد : بنات قومو الغرفه بهاج بيدخل يسلم
البنات قامو وقامت معهم شهد ودخلو الغرفه
تغريد تصوت لبهاج : بهاج ادخل
دخل بهاج ونزل فِراس وبصوت جمهوري : السلام عليكم
قامت ام رعد تتجه له بوله : هلا هلا يابوي
تقدم بهاج وبادلها الحضن : هلا بريحة الجنه
ابتسمت ام رعد ونزلت دمعتها وشافها بهاج وضحك : مو معقوله تراني بس قعدت اسبوع بالرياض ؟
ام رعد : حتى ولو مو انت وليدي ؟
تقدم بهاج يحب راسها ويدها ورجع حضنها
العمه عواطف بضحك : فكي الولد خليه يجي يسلم
ضحكو البنات وتقدم بهاج يسلم على الجده الي كانت جالسه وبيدها العكازه تقدم بهاج ينثني عليها : اهلييين يا مزنه !
ضحكت الجده وحضنته : هلا هلا بالعيار
وتقدم بهاج يسلم على العمه عواطف وبعدها العمه شيخه وقعدو يسولفون معه وهو واقف
ام رعد : ورا ماتجلس يابوي وتقهوى ؟
بهاج : عشانك ولو اني مستعجل
جلس بهاج
العمه شيخه : بسم الله توك جيت وراك مستعجل
بهاج : اشغال والله ياعمه
الفت بهاج لا افنان وتغريد وهم يضحكون واشر لهم ( الله يعين )
افنان بهمس لتغريد : الحمدالله اول شخص طاحت عليه عمتي شيخه بهاج
تغريد : وهي الله يصلحها ماتخلي احد بحاله
اخذ بهاج الفنجال يتقهوى ويسمع سواليفهم الي مشتاق لها
العمه شيخه : ليش نحفان يابهاج ابد مختفي ماتنشاف
بهاج بمزح : عندك اكل توكليني ؟
ضحكو البنات بصمت
العمه شيخه : عندي عروسه اختار الي تبيها وازوجك وهي توكلك
ام رعد : إذا بغى بهاج يتزوج ابد امه عنده تخطب له
سكت بهاج ولوهله جت اديم في باله ونزل الفنجال وقام : أكرمكم الله
العمه عواطف : وين وين ماشبعنا منك
بهاج : بروح اتروش وارتاح شوي ياعمه وانتم اصلاً طول الاجازه هنا ولا أنا غلطان ؟
العمه عواطف بضحك : لا هنا انت صادق
بهاج وهو طالع : يلا سالم
الكل : وعليكم السلام
قرب عند البنات وبهمس قال : قبل ما عمتي شيخه تهذري بنحاش
ضحكو البنات بصمت وضحك بهاج وطلع
__________________
دخل بهاج غرفته في بيت ابو رعد فتح الباب وشافها وتذكر اياااام كان فيها مرتاااح لا هم ولا غم وكل حياته كانت شغل و صلاه وعيال الديره وسعود
تنهد ودخل ياخذ شاور بعد كل الزحمه الي كان فيها
_________________
ومن بكره في بيت الجد حمد الي كالعاده وقت الاجازات ازعاج
صوت راديو الجده كل البيت يسمعونه وريحة القهوه السعوديه الي تضرب في كل البيت واخر الديره يشمون ريحتها والعود وريحة طبخ ام رعد وسوالف البنات بالصاله ويتقهوون ويضحكون
ومعهم شهد الي كانت في قمة السعاده معهم
جلست ساره معصبه من شقاوة بهاج الصغير بعد ماصار يركض ويحوس كل البيت : اوووف
افنان وهي تفضفض بالحب : وجعاه وش فيك
ساره رجعت شعرها ورا : جننني جنني ولدكم ذا
نوره : الله الحين صار ولدنا وانتي مو امه ؟
رمت عليها ساره علبه المنديل : انتي اسكتي
تغريد بضحك : بنااات شفيكم فضحتونا عند شهد ؟
لفو البنات لها شهد خافت من نظراتهم : لالا والله عادي
ضحكو البنات من ردة فعلها
العنود : شفيها خافت !
افنان : شفيكم خلاص أنا عدلت إعدادات شهد على حوستنا وهوشاتنا
شهد بضحك : صح
_________________
اما في جهه ثانيه في بيت ابو سياف
كانت اديم ماتطلع من غرفتها او بالأصل مالها وجه تطلع من الغرفه
والخادمه تدخل لها الاكل وتضطر تاكل كم لقمه وتوقف
وام سياف الي للحين تنظف البيت وشايله هم اديم ودايم تشوف الصينيه ترجع المطبخ مليانه وتتنهد بضيق
اما ابو سياف الي كان جالس بالصاله ويفكر وسياف الي كان يلعب سوني حوالينهم
ابو سياف : يا ام سياف
جت ام سياف : هلا
ابو سياف : اليوم بروح اسلم على ابوي وجهزي لي فراشي باخذه معي بنام بالمزرعه
تنهدت ام سياف : وراه ماتنام عندنا ؟
سكت ابو سياف وقال : لا تسأليني اسئله خابره أجوبتها
سكتت ام سياف ورجعت تدخل وهي تقول : لاحول ولا قوة إلا بالله الله يهديك
________________
وبجهه ثانيه في بيت ابو سعود
الي كان بالصاله ام سعود وابو سعود والهنوف وسعود
والصاله كلها مستمعه لسوالف الهنوف وضحكها ومستحيييل تخلي الجلسه ممله
ابو سعود وهو مندمج معها : جعل محد يسولف ولا يضحك غيرك يا الهنوف
قامت الهنوف : يااااعمري وروحي وقلبي قلبك يابوي وجعل محد يمدحني غيرك ياارجل الرجال
ضحك ابو سعود ولف على سعود الي تكلم
سعود وهو متكي على المركا ومتحمل سوالف الهنوف : الله والسوالف عاد راسي انفجر افتكيت من عيال ريم جتني الهنوف يختي شوي شوي خذي نفس
رمت عليه الهنوف المخده : انت اسكت مالك دخل
ولفت على ابوها : صح ولا لا ؟
ابو سعود وهو يضحك واشر براسه : صحح
ضحكت الهنوف ورجعت تجلس تصب القهوه
ام سعود : إلا على طاري ريم بدت الاجازه غريبه ماجت ؟
سعود بملل : احسن نفتك من الازعاج شوي خلوها لحد يذكرها بالاجازه
ضحكت الهنوف : الصدق ؟ الحين معك حق
ام سعود : اقول اسكتو انت وياها والله والله مايحلى البيت إلا بريم وإزعاج عيالها ولا انتم 24 ساعه نايمين
الهنوف : لا سعود مقسم ال 24 ساعه هذي 12 ساعه نايم و 12 ساعه الثانيه طالع مع بهاج
ضحكو ام سعود وابو سعود
سعود : يا صايدتني
لفت الهنوف : إلا يمه يمه صدق على طاري بهاج ودي اروح للبنات اشتقت لهم
اشرت ام سعود على ابو سعود : شوفي ابوك جالس
الهنوف ابتسمت : اصلاً ابو الهنوف مايرد للهنوف طلب !
نزل ابو سعود نظارته واشر على خشمه : على ذا الخشم دامني ابو الهنوف
صفقت الهنوف بفرح
سعود رفع يده : هيه هيه تراك ابو سعود مو ابو الهنوف
الهنوف : ييييمه يالحسسسد قل اعوذ برب الفلق اقول قم قم ودني
سعود : مو أنا حسود ؟ مايصلح أوديك
الهنوف لفت لابو سعود : يييبه !
ابو سعود : وراك يا سعود ود اختك
سعود بلكاعه : بشرط !
الهنوف بفضول : وش ؟
مد يده سعود : بوسي يدي
تفتحت عيون الهنوف بصدمه ولفت على ابوها : يبه سمعتتت ؟؟
رمى ابو سعود المخده على سعود : تخسي
ضحك سعود ميت من ردة فعلهم
ام سعود : انتي قومي تجهزي وخلصي وهو بيوديك
قامت الهنوف وقال سعود : على حسب
لفت الهنوف راحت تتجهز وهم كملو قهوه وسوالف
___________________
في مزرعة الجد حمد الي كان جالس في الدكه ويتقهوا ومعه ابو رعد ويسولفون عن المزرعه وشغلها
لفو على صوت ابو سياف الجمهوري وهو يقول : السلام عليكم
الجد حمد وابو رعد : وعليكم السلااااام
استغرب الجد حمد من جية ابو سياف بس فرح بشوفته بعد المشكال الي صارت وجا يقوم يسلم عليه بس سبقه ابو سياف وهو يقول : ارتاح ارتاح يابوي
الجد حمد : هلا هلا بطلال يالله حيه
ابتسم ابو سياف وهو يخفي ضيقته وقال : الله يحيك ويبقيك يابوي اخبارك بشرني عنك
الجد حمد : بشوفتي لك ابشرك اني طيب
ضحك ابو سياف : ههههههه جعله دوووم يابو عبدالله جعله دوم
والتفت لابو رعد وتقدم : ابو رعد !! حي ذا الشوووووف
كان ابو رعد منصدم ومستغرب من جية ابو سياف وهو متاكد من بعد طلاق اديم وبهاج وهو يدري انه مارح يطب الديره بس تدارك استغرابه وتقدم وابتسم يخفي فضوله وقال : يا مرحبا يامرحبا بأخوي الغالي
بادله ابو سياف السلام القوي
ورجعو كلهم جلسو وبدو يسولفون لين وصل الموضوع وقال ابو رعد : وعاد غريبه انك جاي يا طلال
سكت ابو سياف ورفع رساله وقال : جيت اسلم عليكم وعلى ابوي
الجد حمد : الله يحييك في مكانك
ابو رعد : وكيف الاهل عساهم بخير وطيبين
اختفت ابتسامه ابو سياف وهو كان ناسي الموضووع بشوفة ابوه وأخوه بس رجع ابتسم على خفيف مايبين عليه وقال : ابشرك بخير وبصحه وموجودين بالديره
استغربو الجد حمد وابو رعد وهنا ابو رعد تأكد ان ورا جية ابو سياف سالفه
الجد حمد بفضول : وينهم فيه ؟
ابو سياف : في بيتي يابوي
الجد حمد : متى جيتو انتم
ابو سياف : امس
لف الجد حمد على ابو رعد وقال : مع جية بهاج !
نزل راسه ابو سياف وماتكلم
ابو رعد ماحب يوتر الجو وقال : اكيد صدفه إلا زين انك جيت وجبتهم معك تغيرون جو عند اهلكم وناسكم
ابو سياف ابتسم بحزن مايوضح لهم : الله يرفع قدرك ويعز شانك
جلسو في جلستهم على آخر العصر وسوالفهم وقهوتهم السعوديه
والجد حمد سعييييد جداً بوجود عياله حوالينه مره ثانيه ويحمد ربه ان طلاق اديم وبهاج ما اثر عليهم
____________________
في بيت الجد حمد مع دق الباب فزت نوره تفتح الباب بلهفه
دخلت الهنوف وبصراخ ضمو البنات بعض ومشتاااااقين لبعض حيل
نوره : ياحيوانه وحشتييييني
الهنوف : والله والله انكم اكثر ماتدرون شكثر اشتقت لكم دقيقه دقيقه خليني ارسل سعود
فز قلب نوره من سمعت اسمه وهي ورا الباب وبانت بسمتها العذبه وهي تسمع صوت الهنوف وهي تقول وتأشر له : سعود سعود خلاص
سعود اشر بيده تسكر الباب
الهنوف : طيب طيب بسكره رح
وسكرت الهنوف الباب ومشى سعود وسمعت نوره صوت السياره وهي رايحه
الهنوف : إذا ماسكرت الباب مستحيل يروح
ابتسمت نوره : تعالي تعالي ندخل البنات بيفرحون فيك
الهنوف : والله اني مشتاقه لهم امشي امشي
ودخلو البنات على جلسة البنات وشهد معهم لفت افنان وفزت على شوفة الهنوف : الهنوووووف !!
ضحكت الهنوف واتجهت لها وتبادلو الحضن
وكملت الهنوف تتسلم عليهم وحده وحده بلهفه لين وصلت عند شهد واستغربت وجودها بس سلمت عليها بأبتسامه : شلونك ؟
شهد : بخير انتي اخبارك
الهنوف : الحمدالله
ولفت على البنات وين خالتي وجده مزنه ؟
تغريد : داخل تعالي تسلمي
جت الهنوف : بدون ما تشاورين بعد وديني
ضحكو البنات وبصراخ قالت افنان : استعجلي ورانا علووووووم
ضحكت الهنوف : طيب طيب
ودخلت تغريد ووراها الهنوف بجلسة الكبار : السلام علييييكم
الجده وام رعد والعمه عواطف والعمه شيخه : وعليكم السلام
تقدمت الهنوف تسلم على الجده : اخبارك ياجده ( احتراماً تقول لها جده)
الجده : بخييييير يامي انتي اخبارك واخبار امك عساكم طيبين
الهنوف : بخير بخير ياعيوني
وتقدمت على ام رعد الي قابلتها وهي تقول : حي اللله من جانا حي الله الهنوف
الهنوف بضحكه : الله يحييك يا خاله
وتقدمت سلمت على العمه شيخه والعمه عواطف ورجعت عند جلسة البنات
دخلت عندهم وتربعت وضربت بخفه على فخذها : يلا انثرو لي العلوم
قامت نوره : دقيقه دقيقه مايصلح كذا على الناشف افنان قومي
قامت معها افنان واتجهو للمطبخ جهزو لهم شاهي وصحن فصفص ( دوار الشمس )
ورجعو وكل وحده معها صينينه
صارخو الهنوف وساره وتغريد : هذاااا المطلووووب
نزلو البنات الصينيه وتربعو وبدو يسولفون ويحشون ومن زمااااان عن ذا الجلسه رغم شهد كانت بينهم إلا انهم كانو متحفظين هالمره بالحش والكلام عكس لما كانت اديم معهم كانو يقولون اي شي ولا يحسبون حساب اي كلمه يقولونها وشهد كانت تشوف كيف جلستهم حنوووونه ومايهمهم المظاهر والكل يضحك ومسفهل ابتسمت بهدوء وهي تراقبهم وكل مده تشاركهم السوالف
___________________
دخل وقت اذان المغرب في كل الديره والكل اتجه للمسجد الي بوسط الديره
ركض بهاج وهو رفع كمومه وتوه متوضي وبيلحق على الصلاه الي بدو فيها وبنفس الشي عند سعود الي كان يحاول يلحق على الصلاه وتقابلو عند الباب المسجد بهاج وهو ينزل كمومه وسعود يمسح راسه قال بهاج : كالعاده متأخر على الصلاه
سعود : توني منزل اختي عند بيتكم إلا انت علم نفسك
بهاج : ادخل ادخل
ودخلو المسجد وبهدوء بدوا يصفون مع الصف وكبرو وصلو وهم جنب بعض
سلمو من الصلاه والي قام يطلع والي جلس يقرأ قرأن التفت بهاج لسعود : ما شفت مطلق ؟
سعود : لا والله من جينا من الرياض ماطاحت عيني عليه مشتاق له الكلب
بهاج : ودي اعرف وش سوا بعد ما رحنا معقول مادق ؟ ماسأل ؟
سعود لف على الي قام وبيطلع من المسجد : شفه شفه هذاك هو
بهاج فز : قم قم
قام بهاج ووراه سعود وطلعو من المسجد يلحقون مطلق
بهاج يصوت وراه : مطلق
وقف مطلق على الصوت الي يناديه من ورا والصوت الي مشتاااااق له بالحيل وصار له أسبوع وشوي ماسمعه بس مالتفت له وكمل مشي
والفت سعود على بهاج بأستغراب : شف ذا ؟
بهاج عند وركض وراه لين مسكه مع يده : ما تسمع انت
مطلق : ابعد عني مستعجل
بهاج : ياولد مريض انت ؟ مو صاحي ؟ صار لك قرابة الأسبوعين ماترد علينا ولا تدق ولا تسأل إذا انت ناسينا ترانا مانسيناك ماتقول وش صار فيهم مختفين
مطلق : لا ماني داق ولاني بسأل اسأل وادق على من ؟ على الي كنت مسميهم اخوياي ؟ اول اخويا لي في ذا الدنيا وخانوني ؟
سعود وهو يأشر على راسه : يا مريض يامريض اخوياك ما خانوك كل الي صار ماعلمناك عشان ماتسوي مصيبه حنا اخوياك وأخوانك ونبي لك الزين تبينا نسمح لك ترتكب في الكلب ضاري جريمه وتدخل السجن لا حنا كذا مو اخوياك عدوينك
بهاج : وبعدين ترا ماعرفنا عن زواجهم إلا وحنا في الطريق ومقبلين على الديره
اخذ نفس بهاج بضيق والي خلاص في هالأسبوعين صارت له مشاكل ماصارت في حياته كلها : يا مطلق يا مطلق ياخوك تراني تعبت والله والله اني تعبت الحق على ذا ولا على ذا ترا انت آخر واحد ابيه يضيق علي انت خويي واخوي بسوي شي يضايقك ؟ ولا بخبي عنك شي ؟ يعلم الله يعلم الله اننا ماسكتنا إلا عشانك
سكت مطلق وهو يسمع أعذارهم وهو حااار من الداخل من جهه يقول انهم صادقين ومابغو يدخلوني في مصيبه وجهه ثانيه يقول لا هم كذبو علي وغدروني
سعود : يامطلق تراك ماتعرف وش صار فينا هالاسبوع رغم اننا كنا بوسط المصايب الا اننا ندق عليك كل شوي وماترد علينا
تفتحت عيون مطلق بفضول وهو يبي يعرف وش صار فيهم وهل فعلاً اختفاءهم فجاه وراه شي ؟ وهو اصلاً بنفسه بأشد الحااااجه لهم سعود بهاج صارو له اكثر من أصدقاء صارو اخوان وقال بصوت شبه مختفي : شكل هالاسبوع ماسوا لا فيني ولا فيكم خير
قطب بهاج وهو قلقان : وش صار فيك ؟
تقدم سعود : ولد تكلم وش فيك وش صار
مسح مطلق راسه وقال : امش انت وياه نجلس
تبادلو سعود وبهاج النظرات وهم في فضول ياترى وش صار في مطلق في غيابنا
وكلهم تحركو متجهين لمكانهم المعتاد الي على مطل الديره
___________________
وبجهه ثانيه في بيت الجد حمد
دخلت افنان بفجعه عند البنات : بناااات
البنات : هاه ؟؟
افنان : مادريتو عن آخر خبر ؟؟؟؟؟
نوره : لا وش فيك
العنود : قووولي؟
الهنوف : شفيك سكتي تكلمي
افنان : يمه منكم تحبون العلوم !!
صارخو البنات كلهم : بببببنننت
افنان : خلاص خلاص بقول تخيلو عمي سياف جاي الديره
تغريد : طيب وش فيها جاي يسلم على امه وابوه
افنان ضربت جبهتها بغباء : لا يا غبيه جاي وجايب عمتي ام سياف وسياف وحتى اديم ؟
البنات بصصصصدمه : وشوووو
افنان : اي والله توني سمعت من جدتي كان عندها عمي يسلم عليها ويقول أهله فالبيت
كانت شهد بينهم تسمع كلامهم وماتدري وش المشكله إذا جا عمهم وهله مو هم كانو يحبون بعض ؟
اما الهنوف الي تدري ان بهاج طلق اديم واستغربت انهم جاين بعد ثلاث شهور الديره وقالت : طيب يمكن جايين عشان الاجازه
ساره بتنحنح وهي تنبه البنات: خلاص بنات الله يحييهم واصلاً مشتاقين لهم
انتبهو البنات بوجود شهد بينهم وتداركو الوضع وبدو يغيرون السالفه وهم من داخلهم كل وحده بيذبحها الفضول ليش جايين وجيتهم اكيد وراها شي
__________________
وبجهه ثانيه في مطل الديره عند مطلق وبهاج وسعود وهم جالسين على كبوت السياره
لف سعود : ورع انت وياه من جينا محد فتح فمه تكلمو لا أعطيكم كوع واحد واحد
بهاج : أنا سكوتك يا مطلق مو مطمني تفضل غرد وش مسوي بغيابنا
مطلق بدون سابق انذار : ضربت ضاري
بهاج وسعود بنفس اللحظه : هاه ؟؟
مطلق كمل بالصدمات : واخذت البنت
مسك سعود راسه وبهاج فتح عيونه من الصدمه : ايييه ؟
كمل مطلق وقال : وابوها مايدري وينها ولاحد يدري وينها إلا شخصين
سعود : حسبي الله عليك مابقى مصيبه ماسويتها
بهاج وهو ماسك أعصابه وحاس بيجي فوق السوالف ذي سوالف تجلط اكثر : وين وديت البنت ؟
رفع نضره مطلق على بهاج وقال بهاج : تكلم تراني للحين هادي
مطلق : في بيتكم
سكت بهاج وقال بعد صمت : قلت شخصين الي يدرون منهم ؟
مطلق تنهد : ابوك وجدك
نزل بهاج طاقيته الي على راسه ومسكها بيده وقام من الجلسه
سعود : متى صار كل ذا ؟
مطلق : قبل ثلاث ايام
لف بهاج عليه : والحين ؟ وش السواة ؟ مارح تترك البنت عندنا للابد صح ؟
سعود : اي صح وش الحل الحين
مطلق : مدري جدك قال بيحل الوضع وبيخطبها لي
لف بهاج على سعود : غريبه جدي وقف ذا الوقفه
سعود : اي والله
مطلق : الحين أنا قلت لكم مشكلتي انتم وش مهببين بالرياض ؟
جلس بهاج ورجع طاقيته على راسه وقال بتنهيده : رحت احاول ارجع اديم
مطلق : والنتيجه ؟
بهاج لف على مطلق وابتسم بحزن وقال : تقدر تبارك لخوك
ابتسم مطلق وحط يده ورا كتف بهاج : عالبركه عالبركه اخيراً شي زين صار
ابتسم سعود وهو يدررررري ويعرف زييين ان بهاج مارح يقول لمطلق كل السالفه مهما وثق فيه مستحيل يعلمه مين نايف ويفضح اديم
مطلق : بس هي ليش راحت للرياض وليش بغت الطلاق من البدايه ؟
مد سعود نظره لبهاج وناظرهم بهاج وقال
بعد تنهيده طوييييييله:
زعلوها ورحلت وأخلت قصور الخالديه..
ضبط جلسته مطلق والتفت لبهاج بكل اذانِ صاغيه اما سعود الي متعود على شطحات وقصايد بهاج التفت يسمع له بأبتسامه مخفيه
ورجع كمل بهاج يقول :
وألحقتني شرهة الزعلان وأخطاني رضاها
سافرت والله ماأخبر اللي يزعلها عليه
وأستباحت لله الخيره سهر عيني وماها
ليتها يوم استباحت دمعة العين الشقيه
ماأستبحات دم قلبي من خلاها في خلاها
رفع نظره للسماء وكمل يقول :
سامح الله ظلمها واطعونها الخضر النديه
والله يسامح خناجرها ويعفوا عن خطاها
عرضتني للهبايب والضمى والمهمهيه
واتركتني للزعل والشوق والكبر وغلاها
والغلا ماهو في يديها ولا في يديه
الغلا شي من الله واشهد إن الله عطاها
أنهى قصيدته بهاج قدام العيال بس هو كملها بداخله وكأنه يقول من شدته غيرته على اديم ( الجزء الي فيه أوصف اديم بس ابي قلبي يسمعه ويملكه)
صفق مطلق بيدينه بحماس : الله عليك صح لسانك
ابتسم بهاج : صح بدنك
اما سعود اكتفى بنظرة لبهاج وابتسامه عذذذبه توصل له شعوره وبادله بهاج النظره
وكملو العيال سوالفهم مطلق وسعود اما بهاج الي رفع عينه للسماء وكمل قصيدته بداخله وهو يقول :
من غلاها لو توردني على حوض المنيه
كنها تسقيني الشهد المصفى من شفاها
من حلاها ماتوصفها الحروف الابجديه
كيف توصف ورده يبري من العله شذاها
الورود تغار منها مزهريه مزهريه
وإن تباهت عذرها معها ويحق لها تباهى
وانهى قصيدته بأبتسامه خفيييه وحتى القصايد اشتاقت لأديم وكأن قصايد بهاج كلها تنتظر رجعة اديم
صحى مطلق بهاج من خياله وحط يده ورا كتف بهاج وحط يده الثانيه ورا كتف سعود وقال : ماتوقعت بيجي يوم من الايام واشتاق لكم !
سعود رفع حواجبه : قايل لك بتموت بدوني
بهاج : عاد بدأ ذا بشوفة النفس
ولف على مطلق : وتبي الصدق والله اني مشتااااق لك
ابتسم مطلق وكأن رجعت له الحياه بعد اسبوووع بدون بهاج وسعود
وكملو سوالفهم وتفاصيل موضوع مطلق ووش بيسوون وطووول ذا الجلسه كل شوي يتذكر بهاج اديم وكل ما تذكرها تنهد بضيقه وهو مايدري كيف حالها الحين
لا تنسون النجمه ورأيكم بالبارت 🌟
أنت تقرأ
احببتك والله يعلم بالخفاء
شِعرروايتنا تتكلم عن الحب القريب وعن طبيعة حياتنا البسطيه الجميله للكاتبه " وجدان "
