احببتك والله يعلم بالخفاء

بارت 49

شعور اني اكتب من بعد غيبه حلووو وشعور
اني انتظر تعليقاتكم الحلوه احلا

قراءة ممتعه ❣️

طلع بهاج يركض يوقف بعيد عن البيت احتياط وركض وراه سعود
سعود : ياولد ياولد انت مصيبه
جلس بهاج في زوايه وجنبه سعود لف بهاج شماغه على وجه ( تلغثم )
وهو ساكت وقلبه يشتعل نااااااار وحقد على نايف يبي يمسكه بإي طريقه
سعود وجو جالس جنبه : بهاج اسمع زي ماقال مشاري فكنا من شرك
بهاج كان سسساكت ومارد على سعود ابد هز راسه سعود بيأس وجلس ينتظر معه مجبور
وبعد 15 دقيقه بينت سياره صغيره سودا مغيمه من كل الجهات
( نايف ) وهو بداخل السياره تلفت للاطراف وماشاف احد والوضع هدوء
غمض بهاج بحقد كبيييير وعروق وجهه وضحت وزادت وسعود خايف من بهاج اكثر من انه خايف عليه وبداخله يقول ( الله يسترويعديها على خير )
نزل نايف بهدوء وهو يتلفت للأطراف ورجع اخذ من السياره منديل مخدر وقرب عند الباب واخذ جواله وكتب " أنا برا اطلعي بسرعه مشتاق لك "
لاحظ بهاج انه اخذ شي من السياره بس مايدري وش هو وبسرعه جت الرساله على جوال اديم الي كان مع بهاج واول ماقرا الرساله انجننننننت جنوووووونه ماعاد يشوف احد قدمه وبسرعه رمى الجوال وفز يركض لجهة نايف وسعود ورا ركض يحاول يمسكه ولاحظهم مشاري من بعيد وبسرعه ركض لجهة سيارة نايف والفريق كله ركض معه وقبل يوصل بهاج لنايف ركض مشاري واخذ مفتاح السياره
التفت نايف للأصوات وسريع إلا وشاف واحد يركض له متلغثم بشماغ وواضح ناوي له على نيه وفز نايف يبي يركب السياره بس سريع ماشاف المفتاح مو فيها وبسرعه ألجمه بهاج على خده وهو يقول بصوت عالي وكله قهرررررر وغبببنه : وييييين بتروح يا ابن الكلب من يدي وييييين بتروح
بدا نايف يرتعد وبسرعه اخذه بهاج للأرض يضرب فيه يمين ويسار
طلع ابو سياف من الباب بعد ماعرف ان مسكو نايف طلع وهو ناوي يشرب من دمه بس وقت اول ماشاف هول المنظر والدم الي على صدر نياف وعلى يد بهاج وثوب نايف الي انشق
قرب سعود لبهاج بس أبعده بهاج بسرعه : ابببببعدددددد ابببعد والله لا اشرب من دمه والله
ركضت اديم للشباك بعد ما سمعت الاصوت الي تخوف بس ماكانت تشوف بهاج وتسمع صوته الي يخوف وصراخ نايف ومحاولة سعود ومشاري يمسكون بهاج لان الواضح خلاااااص بيموت على يد بهاج
مشاري : بهاااج بهاااج اسمعني لاتدخل نفسك في مصيبه بسبب ذا السافل يا ابن الحلال خلاص
كان بهاج معمي عن العالم مايشوف إلا نايف قدامه وكل ماتذكر ان اديم تركته بسببه وسبب تهديداته تسود عيونه ويضرب اكثر
ليييين تدخل مشاري واشر العسكر يمسكون بهاج واخذو بهاج من نياف بالغصب وبهاج يتنفس بسرعه ماعاد له نفس والدم صار في كل مكان
وسعود كان خايف من ذا الشي بالذات غمض عيونه بقهر من بهاج
بهاج بصوت مهدود الحيل وهو يحاول يفتلت منهم : اتركونيييي ابعععد
مشاري : انت الي أجبرتني اسوي كذا يابهاج شف وش سويت فيه
سعود راح لبهاج وبعصبيه قال: صاااحي انت ؟؟؟ صاحي ؟؟؟ مجنون ؟ انهبلت ؟ تبي تورط نفسك انت عشان واحد مثل ذا
بهاج وهو يحاول يتنفس : اتركوووووني اقتله اتررررررررك
سعود : تعقب ماني سامح لك تدخل نفسك في ورطه
ولف على مشاري الي كان يتأكد إذا نايف حي ولالا : مشاري حي ؟
كان بهاج ينتظر يقول انه مات بس خيب اماآله يوم قال : لا حي للحين
بسرعه اطلبو اسعاف
بهاج بقهر : ااااه فكوني اذبحه فكووووني
سعود وهو يحاول يمسك بهاج مع العسكر : مشاااري خلهم يكلبشونه
امرهم بسرعه مشاري للعسكر وجا العسكري واخذ يد بهاج بالقوه وقفل عليها
بهاج : مشاري فكننننني يامشاري والتفت لسعود وقال : واللله ماخليك ياسعود واللله
كان بهاج مهدود حيله ووجه معرق وازارير ثوبه متقطعه
سعود : يااااااامريض عشانك استوعب ؟؟؟؟ يلا فكيناك وذبحته وش استفدت ؟؟ مصيرك السجن بيكووووون
كان بهاج يتعور من يده الي تورمت من ضرب نايف ومن الكلبشه الحديد
رفع نظره لباب البيت وشاف سياف الصغير واقف بعييييييد وخااايف
انهد حيل بهاج بعد ماشاف نظرة الخوف بعين سياف وقال لسعود بصوت خافت ومهدود حيله : الولد لا يشوفني كذا يا سعود تكفى
انصدم سعود من هدوء بهاج المفاجىء ونبرة صوته المكسوره والتفت وشاف ابو سياف جالس على الرصيف ماله وجه ومهدود حيله من كل ذا القصص الي صارت حتى كلام ماعاد له حيل يتكلم او يتكلم وش بيقول ؟ والتفت وسياف الي كان داخل البيت بس يطل من الباب وخايف من منظر بهاج
وبسرعه ركض سعود يقفل الباب وراح لابو سياف : قم يا عم قم واذكر الله
جلس بهاج على الرصيف ويده عليها الكلبش وجت سيارة الإسعاف يأخذون نايف الي مغمي عن الوعي
وبداخل البيت
مشاري قرب لابو سياف الي كان جالس بالرصيف القريب عند باب البيت وبجمبه بشكل بعيد بهاج : ياعم بنوديه المستشفى وبعدها للتحقيق إذا تبي ترفع عليه شكوا تفضل معنا
ابو سياف : مو بس ارفع شكوى إلا ابيه يخيس بالسجون
وقام ابو سياف مع مشاري الي التفت لبهاج الي كان هادي بعد نظرة سياف الصغير وماهتم لعوار يده كثر مااهتم بالكسره الي وضحت على عيون سياف الصغير هز راسه مشاري بيأس ومشى مع ابو سياف
عند اديم الي من هول الأصوات ماقدرت تصبر وجنت جننننت راحت يمين ويسار تبي احد يعطيها خبر يعطيها شي محد موجود ونزلت من الدرج مسرعه لباب الشارع تبي تسمع اي شي لان الأصوات فجاة اختفت وشافت سياف يبكي وجالس عند الباب
اديم بتوتر ودموع : س س سياف سياف وين بابا وين راحو ؟
سياف بصوت مصدوم وخايف : ب بهاج كان معصب ويده كلها دم الشرطي حط حديد بيده كان يخوووف مرا ماعاد ابيه ماعاد احبه
انصدمت اديم ونزلت دموع عيونها اربع اربع من دون صوت لين قرب سياف وحضنها واديم للحين تبكي بحرقه وصمت كل مافكرت وين ودت بهاج للمصايب هذي وكيف هدمت حياته بسببها والحين بيروح السجن بسببها ؟ ماكنت تعرف ان مشاري صديق بهاج وان كل ذا عشان يوقفه
كانت تبكي بصمت ودموعها تنزل اربع اربع ومن دون ايييي صوت حتى سياف الي حاضنها ماحس انها تبكي بس فجاءه شهقت ذيك الشهقه الي قطعت شرايينها ورفع عينه بهاج اول ماسمع الشهقه الي جت من داخل الحوش وهو كان قريب من عند الباب رجع نزل بهاج راسه وحط يده على راسه بعد ماسمع شهقه اديم الي كان واثقققق مثل اسمه انها شهقت اديم
وبدت اديم تبكي بحرقه وصوت عالي وركضت تدخل داخل لغرفتها
وبهاج سمع وليته ماسمع مااااات من بعدها ولا حيا
قرب سعود ومعه قارورة مويه ومدها على بهاج الي منزل راسه وجلس جمبه : خذلك اشرب شوي نفسك راح
بهاج بصوت مبحوح : خلهم يفكون يدي
تأكد سعود ان نايف ركب الإسعاف وبدت سياره الإسعاف تمشي واشر على مشاري ومشاري فهم وارسل واحد يفكها وركب معه ابو سياف واتجهو لمركز الشرطه
فك العسكري يد بهاج واستوجعت بهاج بس مو كثر وجعه وحرقه الي بداخله براكيييييييين ماكان يقدر يتنفس منها واخذ المويه وشرب وباقي العلبه كبها على راسه ووجهه وسعود يطالع فيه ساكت وهو يدري بكمية النار الي بداخله
بهاج قام وفز سعود : وين وين
مارد عليه بهاج وكمل للسياره لحقه سعود وسكر باب السياره الي فتحه : ياولد تراك تعبتني معك وين رايح ؟؟
بهاج : للقسم ابعد
سعود : وخير ان شاءالله وش بتسوي بالقسم
بهاج : ماني بمرتاح لين اشوف حكم الشيخ على الكلب
سعود : ايه ومنها خل الشيخ يمسكك بعد ولا انت ناسي انك ضاربه لين انغمى عليه !
بهاج بصوت هادي ومبحوح : لا اخذ الكلب جزاه ومحاكمته واخذت حق اديم وحقي وحق عمي وعمتي منه ذيك الساعه نفسي ماهمتني راضي بالي يجيني والحين ابعد عني ياسعود ترا واصله لين هنا ( واشر على خشمه )
بعد سعود عن الباب وركب بهاج وراح سعود يركب معه
وسكت بهاج والتفت له
سعود : تناظر ولا ماتناظر ماني تاركك لحالك إذا بتروح للقسم بنروح كلنا
___________________
وفي بيت الجد حمد تحديداً في بيت الحريم
في المطبخ وافقه افنان على الغاز تضبط الشاهي
وساره جالسه تحط المكسرات وقدامها بهاج الصغير جالس بالطاوله
افنان : والله يابنت كل يوم اكتشف الديره ظالمه نفسها وظالمه حياتنا قطع جالسين بس بهالبيت ووناستنا الوحيده جلسة الحوش وشاهي ومكسرات إلى متى ؟؟
ضحكت ساره : احمدي ربك غيرك مالقاها
افنان : والله ماأقول شي الف الحمدالله بس أمنتك بالله متى آخر مرا سافرنا فيها ؟؟ قبل زواجك برعد !!! هذي حياة هذي ؟ ولا طلعه ولا شي واذا طلعنا طلعنا للسوق ورجعنا حتى البنات من بدت الدوامات ماعاد شفناهم
ساره نزلت المكسرات : تبين الصدق ؟ اي والله ملينا ودي أفاتح رعد بموضوع السفر يمكن يوافق يسفرنا بالاجازه الجايه ؟
افنان : اتمنى بس ماضن
ساره : ليه ؟
وقفت افنان الشغل الي بيدها : تعرفين سالفة بهاج واديم مارح يرضى رعد يسفرنا وهو يشوف ضيقة بهاج مسسستحيل
ساره : إلا صدق وش صار على سالفتهم ؟ مارح يرجعها ؟
افنان : مادري بس اتمنى تهقين يقدر يرجعها وهو مطلقها ؟
ساره : إلا اكيد ماطلقها إلا طلقه وحده
افنان : شيلي شيلي ورعك تعالي نسأل جدتي يجوز يرجعها ولا لا
شالت افنان صينية الشاهي والمكسرات ووراها ساره وبحضنها بهاج الصغير
دخلت افنان على جلسة الجده وام رعد : السلااااااام عليكم
: وعليكم السلام
نزلت افنان الصينيه وهي تتبادل النظرات مع ساره ولفت للجده الي بيدها السبحه : إلا ياجده بسألك
رفعت الجده راسها : وش بغيتي
توهقت افنان خايفه الجده تلعن شكلها : الحين يجوز الواحد إذا طلق زوجته يرجعها ؟
التفتو ساره وافنان على الجده بهدوء وفضول
ام رعد : أنا قايله ماجلستي هالجلسه إلا وعندك علم
افنان : انتظري يايمه تكفين ها ياجده يجوز ولالا ؟
الجده : والله مدري وش علمك بس بمأنك سألتي ايه يجوز إذا الزوجه ما انتهت من العده يقدر رجالها يرجعها
بلعت ريقها افنان وحزنت وهي تعرف ان بهاج واديم منفصلين قرابة ال 3 اشهر ولفت على ساره بضيقه
ساره : طيب ياجده واذا انتهت عدتها ماتقدر ترجع له ؟
الجده : إلا بس بقعد جديد ومهر جديد
ابتسمت افنان وبادلتها ساره الابتسامه
افنان بفزه : يعني يقدر بهاج يرجع اديم ؟؟؟
صار صمت بالغرفه ولفت ام رعد عليها : انتي الحين وش تبين بذا العلوم ؟ مالك دخل فيها لا تشوشرين على الناس
افنان : اوووف يمه وش قلنا
مسكت بيالتها افنان وشربت وما أمداها تشرب الا وقفت الشرب من الصدمه الي قدامها
لفو كلهم على دخلة الجد الحمد والبنت الي معه متغطيه !!
الشيخ حمد : يا ام رعد يااام رعد
فزت ام رعد وهي مستغربه من البنت الي معه ؟؟؟ : سم سم ياعمي
كانت شهد من تحت الغطا خايفه خااااايفه وشايفه ملامح الصدمه عليهم كلهم ومتفشششششله
الشيخ حمد : جاييكم ضيوف جهزو لهم غرفه واكرموهم بعيونكم لمده
الكللللل انصدم ولفت ساره الي بحضنها بهاج يلعب على افنان وافنان تطالع بصدمه
الجده : الله حيهم الله حيهم من معك يابو عبدالله
الشيخ حمد : معي بنت الشيخ عبد اللطيف شهد بنت عبد اللطيف
شرقت افنان وقامت تتصنع الابتسامه تخفي صدمتها فيها وقربت تسلم عليها : هلا هلا والله
قامت ساره وراها تسلم : كيفك وشلونك ؟
شهدد متوتره وردت عليهم بقدر سؤالهم
الشيخ حمد يلا أنا أترككم وتراها أمانتكم !
ام رعد : بالحفظ والصون ياعمي
التفت الشيخ حمد على شهد : خذي راحتك يابنتي ترا هذا يعتبر بيت جدك الثاني وانا بحسبة جدك
طلع الشيخ حمد وشهد للحين في مكانها وغطوتها على راسها
افنان : اء خذي خذي راحتك يا شهد محد فالبيت
شهد : بس ابغى دورة المياه
افنان : ابشري تعالي معي من هنا
ودتها افنان لدورة المياه وفي راسها مية علامة استفهام
ورجعت للجلسه وبصوت خافت : يمه هذي صدق جايه تنام عندنا كم يووم ؟
ساره : ليه ؟
الجده : اسسسكتن بتسمعكم الحين
ام رعد : مالنا دخل بليه وكيف هي ضيفه على عيننا وراسنا مدام جابها عمي اكيد عنده علم ومصير ابو رعد بيعلمني
افنان : يمه تكفين لا علمك ابوي علميني ولا بموت من الفضول !!
ام رعد : حامض على بوزك
افنان : ييييمه !!
_________________
وعند شهد اول مادخلت دورة المياه شالت الغطوه على وجهها تتحسس الألم الي فيه وهي مقابلة المرايه وهي بداخلها تقول : الحمدالله مو واضح شي غير جرح الخياطه الي على جبيني وش اقول لهم الحين ؟؟
طحت ؟ شكل مالها إلا طحت وصقعت راسي
غسلت شهد وجهها بالمويه وهي متضااااايقه جايه في بيت ناس غريبين بالنسبه لها وماتعرفهم إلا من بعد لبعيد وجابتهم بهذي الحاله المبهذله ولحالها وش يقولون عنها ؟ وش بيفكرون ؟ ومطلق برا رحت ولا ادري عنه اي شي
تنهدت بضيييييقه : ياااارب يارب سهلها يارب
سكتت وطلعت بهدوء ودخلت عليهم : السلام عليكم
الكل : وعليكم السسلام
ام رعد : تعالي تعالي ياحبيبتي هنا ارتاحي
صبت ساره القهوه لها ومدتها واخذتها شهد بتوتر خايفه من انهم يسألون شي ساعتها وش بتجاوب عليهم ؟ أنا منحاشه من زوجي الي ضربني وعذبني وجيت مع مطلق ؟؟
_________________
وعند مطلق الي ماجلس ابداً وواقف ينتظر الجد حمد يرجع له
ابو رعد : استرح يا مطلق ابوي بجي الحين
لف عليه مطلق ومارد ووقف مكانه ولا كأن في احد يكلمه
هز راسه ابو رعد بأسف ودخل الجد حمد
فز مطلق : وش قررت ؟
الجد حمد جلس : استرح استرح أتفاهم معك
تنفس مطلق بغضب وجلس : تكلم
الجد حمد : بكرا بروح أنا وابو رعد نتفاهم مع الشيخ عبد اللطيف وبنقول له العلم كله
مطلق : زين وانا معكم
الجد حمد : وييين بتروح يامطلق الله يرضى لي عليك ولا انت نسيت ان الشيخ عبد اللطيف مايدانيك على وجه الارض ؟ ( ما يحبه )
ابو رعد : ابوي صادق يا مطلق خلنا حنا نتفاهم اول
مطلق : وانا كيف أثق فيكم ؟
الجد حمد : مالك إلا تثق فيني وانا ان عطيت وعد وفيت به انت رح بيتك وارتاح وبكرا مايصير خاطرك إلا طيب
مطلق سكت وماله حل إلا يسوي كذا ومن جهه ثانيه شايل هم شهد البنت الي قعدت لحالها عندهم واكيد انها خايفه من الأحداث ومنحرجه منهم ورفع راسه وده يوصيهم عليها وسبقه الجد حمد : البنت بحسبة حفيداتي بالحفظ والصون وانت توكل على الله
قام مطلق : اول ماتطلعون منه عطوني خبر
هز الجد حمد راسه : ان شاءالله
وطلع مطلق من المجلس ومن البيت كامل وترك قلبه بداخل ذا البيت خايف منه وعليه وبداخله يقول : ياليت بهاج فيه على الاقل يعطيني أخبارها
ركب السياره وتوجه لبيته الي مايسكنه إلا هو وجدته
___________________
وفي الجهه الثانيه في قسم الشرطه
نزل بهاج من السياره ووراه سعود ومع دخولهم باب القسم شافهم مشاري وهو يتكلم مع واحد من الجنود عن الحادثه وفز راح لهم
وبصوت خافت : وين وين جايين انتم ؟
سعود : لا تكلمني كلم ذا الي مايفهم
مشاري لف على بهاج الي على ثوبه دم نايف ويده متجرحه من ضربه : لا يابهاج انت مو صاحي ؟ جاي القسم وانت الي ضارب نايف وموصله هذي الحاله ودمه على ثوبك ؟؟ تبيهم يأخذونك انت ولا لا
بهاج : اترك هالكلام الحين علمني بينحكم كم سنه ؟
مشاري مسح وجهه : الرجال..
قاطعه بهاج : لا تقول عنه رجال يعقب
كمل مشاري : المهم ماهو هنا الحين فالمستشفى في العنايه المركزه واذا قام يصير لكل حادث حديث
سعود : شلون فالعنايه المركزه ؟
مشاري : نفس الي فهمته فالعنايه المركزه ووضعه حرج ننتظره يوم بس ويتعافى وبينتقل للمحكمه
بهاج : جعله مايقوم
سعود : ايه وعشان يسجنونك بداله
طلع بهاج من القسم وخلاهم
ولف سعود على مشاري : إلا صحيح يا مشاري ماسألو من وصله لذي الحاله ؟؟
مشاري : إلا اكيد اسألو
سعود بفزه : وش قلت بهاج بيجيه شي ؟؟
مشاري ابتسم ابتسامة خبث : افا يجيه شي وانا موجود ؟
ابتسم سعود : كيف دبردت الوضع
مشاري : كتبت فالتقرير وصل نايف بيت العم ابو سياف وهو مضروب اصلاً احتمال كان طالع من مشكله ويوم وصل ومسكناه قاوم الشرطه وعشان يمسكونه عطوه كم ضربه وانغمى عليه
سعود ضرب كتفه : احلااا مارح ننسى معروفك ذا يا مشاري اشهد انك رجال
ابتسم مشاري : ابد ماسويت شي انت اخوي وبهاج صار صديق واكثر
انتم الحين وش بتسوون بترجعون الديره ؟
سعود اخذ نفس : والله مدري عن ذا المجنون بس الواضح انه مارح يرتاح ولا يرجع الديره إلا إذا تأكد نايف الكلب انحكم عليه
مشاري : الله يعين
سعود : يلا تأمر شي ؟
مشاري : ابد سلامتك ماتشوف شر
سعود : بينا تواصل
مشاري ابتسم : ان شاءالله
وطلع سعود وشاف بهاج جالس على الرصيف وشابك يدينه في بعض ويفكر ويهوجس ونظره على الارض
جلس جمبه سعود وهو يشد على كتفه ولف عليه بهاج وقعدو كلهم ساكتين
وبعد ربع ساعه تكلم سعود : ماودك نقوم ؟
بهاج اخذ نفس : إلا يلا خلني افتك من ذا الثوب الي عليه دم الخسيس
سعود : اجل مشينا
وركبو السياره واتجهو على الفندق وكانت الساعه على حدود 4 الفجر
دخل بهاج واخذ له شاور وطلع ولبس ملابسه النظيفه وكب الثوب فالزباله وهو يشوف الدم الي عليه وتذكر كيف كان يضرب نايف لين خلاه طريح فراش الغيبوبه ولا من صوت بكاء اديم الي مايفارق صميم أذنه غسل وجهه وطلع وبدا يصلي الفجر هو وسعود جماعه وبعد التسليم لف سعود على بهاج الي حتى وهو مايتكلم واضح الهم في عيونه قام وطاح بهاج على الفراش واخذ له نفس عمييييييق ينهي اليوم فيه وقام سعود يطفي اللمبات لين ما اظلمت الغرفه تمااااااماً اظلمت الغرفه وزاد الظلااام الي بداخل قلب وصدر بهاج صحيح انه منسدح ويستعد للنوم فالظلام بس أشرقت الشمس وهو يهووووجس ويفكر وماغمضت عينه أبداً ابداً وهو بس نظره فالسقف وكأنه يشوف وجه اديم قدامه وتنهد بعمق وهو يقول : وش سويتي فيني يا اديم وش سويتي
وقام اخذ نفس عميييييق وهو يشوف سعود في سااابع نومه
شرب له مويه ورجع يتقلب يحاول ينام ولو ساعه
__________________
اما في جهتنا الثانيه جهة الكسر والخوف والهم
كانت اديم مقابله شباك غرفتها تبكي ليييين ما أشرقت الشمس وهي ماسكتت وكل ماتتذكر نظرة بهاج لها وانكساره فيها تبكي اكثر ولا من نظرة امها الي كلها عتب ولا نظرة ابوها الي كلها ( افا )
نزلت الارض تبكي بحررررقه دموعها تحرق خدودها من حرارتهم وصدرها ينشووووي الم وتتنهد ب ( اخخخ ) اخ بحرقة نار صدرها واخ لأنهزاز ثقة اهلها امها وابوها فيها الي كانو مايشوفون إلا اديم بنتنا الوحيده وااخ لليوم الي تعرفت فيه على نايف وكلمته وتواصلت معه وارسلت له صورها وأكبرررر أخخخ لليوم الي شافت بهاج فيه وحبته وتعلقت فيه وحسته هو البقعه الوحيده النظيفه في حياتها وبسببها وصخت هالبقعه بنفسها
مارف على جفن ولا هدت ولا سكتت انهارت انهيار مابعده انهيار وتفكر ( أنا الي خربت على نفسي أنا الي خنت ثقه أهلي أنا الي خنت بهاج اناااااا الي خنت الوعد الي عطيته اياه اناااااا )
مر من جمب الباب ابو سياف وسمع صوت بكاء اديم والشهيق ونزل راسه بيأس ويهزه يمين ويسار وبأنكسار وكمل مشي دخل الغرفه وقابلته ام سياف : ياطلال البنت قطعت قلبي عيونها ماذاقت النوم من امس
ابو سياف هز راسه بيأس : وش تبيني اسوي قولي لي واسويه
ام سياف : ماادري المهم ندور حل للمشكله
ابو سياف حك دقنه وهو يفكر وقال بعد صمممممت طويييييل وتفكير : جهزو أغراضكم بنطلع للديره ونبعد شوي عن المدينه لين ننسى الي صار وندور حل
ام سياف بتفكير : تبي الصدق ؟ البعد مو شين بس إذا سألونا ليش جيتو قبل الاجازه تبدا وش نقول ؟
ابو سياف : مانقول شي جينا وبس
ام سياف نزلت رأسها بيأس ماتدري من وين جت المشاكل لهم
قام ابو سياف يطفي النور : أنا بنام واذا قمت بنمشي عطي الخدامه خبر تجهز الاغراض وسياف
ام سياف : واديم ؟
بدون ما يلتفت ابو سياف على ورا وبصوت ثقيييل ومليان عتب : قلت كلنا
وارتمى ينام بعد الي صار لعل ينسى
وقامت ام سياف تطلع متجهه تعطي الخدامه خبر والتفتت لغرفة اديم ودخلت بشويش وشافت اديم جالسه بالارض بقلة حيله
رفعت اديم نظرها لامها ونزلتها بسرعه من الفشله والخجل ماودها تحط عينها بعين امها ولا ابوها
ام سياف بصوت ثقييييل : جهزي أغراضك بكرا بنمشي
والتفتت تطلع ووقفت على صوت اديم المبحوح والمختفي من كثر البكاء : وين بنروح ؟
ام سياف : بكرا بتعرفين
وطلعت بسرعه ماسمحت لها تتكلم وسكرت الباب وراها ونزلت دمعة اديم الي ماتدري وش بيصير في حالها ولا تدري عن حال بهاج ولا وين بيروحون بكره
__________________
ومن بكره الساعه 11 الظهر في الديره تحديداً في بيت الجد حمد
في المطبخ ام رعد وساره وافنان يصلحون الغداء
وفي الصاله الجده ومشغله الراديو وصوت القران يعتلي فالبيت
افنان : إلا يمه ماقال لك ابوي وش قصدة شهد بنت الشيخ ؟
ساره : إلا صدق يا خالتي ماقال لك شي عنها ؟
ام رعد وهي تطبخ الغداء : إلا قال
افنان بفزه : وش قال ؟؟؟
ساره مسكتها : انتظري خلي خالتي تتكلم
ام رعد : الشيخ عبد اللطيف وزوجته رايحين مكه يعتمرون وترك بنته عندنا مايثق إلا في جدكم وفي عايلته
افنان بتفكير : اهاااا كذا قال لك ابوي ؟؟
ام رعد : ايه هذا الي قاله لي
ساره : اصلاً جيتها مالها تبرير إلا كذا
ام رعد سكرت القدر : أنا بروح الصاله وانتم خلصو شغلكم يلا عشان نحط الغدا
وطلعت ام رعد وقابلت شهد الي دخلت قدامها : صباح الخير
لفو البنات وام رعد : صباح النور
ام رعد : بشري ياحبيبتي عساك ارتحتي بالنومه
ابتسمت شهد بخفه : الحمدالله ياخاله كل شي منكم حلو
ام رعد : إذا احتجتي شي ولا شي قولي لا تستحين تراك في بيتك وبين اهلك
شهد بأحراج : اكيد ابشري
وطلعت ام رعد من المطبخ وتقدمت شهد : بنات تبون أساعدكم ؟
ساره : لالا ياقلبي اصلاً خلصنا خلاص بس تعالي اجلسي افطري
شهد : لالا بس الحمدالله
افنان : لا بس ولا غيره اجلسي يلا حتى أنا بفطر معك توني صاحيه
ابتسمت شهد وجلست
وجابت افنان الفطور ونزلته بالطاوله وجلست معهم ساره
افنان : حياك حياك سمي
بدو البنات ياكلون على شوي شوي
شهد لفت على ساره : ليش ماتاكلين معنا ؟
ساره بأبتسامه : بس ياحبيتي أفطرت بدري أنا
افنان بطقطقه : ساره يومياً تفطر هي ورعد قبل يطلع لدوامه حركات متزوجين
ضربتها ساره بخفه : ياحيوانه
ابتسمت شهد
لفت افنان على شهد : الا شهد ليش مارحتي مع اهلك ؟
هدت شهد فجاءه بتوتر : و وين اروح ؟
افنان : مو اهلك راحو مكه يعتمرون ونزلوك عندنا ؟ اقول ليش مارحتي معهم ؟
زفرت شهد براحه وتطمنت وعرفت ان الجد حمد قال لهم كذا لين تهدا الأمور : اهاااا
افنان بأبتسامه : ايه اجل وش كنتي تحسبين ؟
شهد : لالا ماكنت احسب شي بس سجيت
ساره : طيب ليش مارحتي معهم صدق ؟
شهد حاولت تطلع لها عذر بسرعه : أنا مابغيت اروح خط يتعبني الطريق واصلاً اعتمرت قبل شهرين هالمره دور امي
وساره : اهاااا عشان كذا
ابتسمت شهد بتوتر : ايه
افنان نزلت نظرها تحت وقالت بحزن : ذكرتيني ببنت عمي تحب تسافر خط
شهد : مين ؟
ساره : بنت عمي سياف اديم ماضن تعرفينها
شهد : لا ماعرفها شخصياً بس كنت اشوف وحده معكم بالزواج ذاك كانت جممممميله مره هي ؟
ابتسمت افنان بحزن : اي هي اديم أجمل ماخلق ربي لدرجة جدتي ملقبتها شبيه القمر هههههههه
ابتسمت شهد : وينها الحين طيب نادوها نسولف مع بعض
تبادلو ساره وافنان النظرات ورجعت ساره تقول : ماهي موجوده بالرياض
شهد استغربت من كلامهم وعلى حسب الي تعرفه ان اديم متزوجه ببهاج شلون الحين بالرياض ؟ بس ماحبت تضغط عليهم وقالت بأبتسامه : خساره المرات الجايه ان شاءاللله
افنان وساره رغم انهم يعرفون مافي مره جايه ولا اديم بتطب الديره : ان شاءالله

عطوني رأيكم بالبارت