سامحيني ... ولكن

الفصل الخامس

#سامحيني_ولكن
للكاتبة #صبا_يوسف

مسائي يكن لكم اجمل الحب والاحترام .. شلونكم ؟! ..
سووا منشن لاصدقائكم يقرون الرواية .

لا تنسون التصويت احبائي ، كلش مهم .

_____________________________

أحببتها وكأنها أخر أحبتي
على وجه الأرض
وعذبتني وكأنني أخر أعدائها
على وجه الأرض

#الراوي

دخلت بسمة لغرفة عسل ، لكتها داتقره .

" عسل .. ماما عندج وقت ؟ " قالتها بسمه بتوتر .

سدت الملزمة وباوعت على امها بعدين قالت
" اي ماما .. اكو شيء ؟ "

" عسولة .. عندي موضوع وياج "

" شنو ؟ "

" باجر .. راح يجي واحد يتقدملج "

" شنو ؟ ، ومنو هذا ؟ ، وثانياً اني مااريد شنو نسيتي يا ماما "

" اسمعيني يا بنتي ، اليوم جنة اجتنه وكالتنه ، اكو واحد من الكلية رايدج .. اسمه فهد .. اكيد تعرفيه "

تذكرت عسل ، شلون من حاجاها ورفضته ومن دزلها على فيس ورزلته وطردته ، وبعد لحد هسه مُصر .

" ماما ... " قالتها عسل بس امها مخلتها تكمل .

" اعرف شتريدين تكولين .. راح نحجيلهم كلشي .. لان الشاب ميتعيب حسب حجي جنة .. والصراحه انت ما الج ذنب بألي صار " قالتها بسمة بهدوء ، بس عسل مكدرت على نفسها وكامت تبجي .

كملت كلامها بسمة " لا تبجين .. يا عيني .. انسي الي صار .. وابدي صفحه جديده .. بلكت هذا الولد راضي بيج بكل حالاتج "

" ماما .. اذا هو ابن عمي عافني .. تريدين هذا ميغير رأيه " قالتها وكامت تبجي قوي وتشهك .

" استغفري ربج .. والله كريم .. وتره احنه راح نسأل عليهم يله نردلهم جواب .. قابل نذبج ذب يا بنتي "

" استغفر الله .. اوكي .. ميخالف الي كاتبه الله يصير " قالتها عسل بقهر .
" عفيه .. ببنيتي " قالتها بسمة بابتسامة .

" ماما ، من هاي بابا صافن وضايج ؟ "

" هاا .. لا مو كتلج علمود الشغل " كذبت بسمة على عسل ، لان خاف تغير رأيها من تشوف ابوها حاير بيها .

ثاني يوم ، فهد فرحان كلش لان حلمه بده يتحقق شوية شوية ، عسل الي تمناها واخيراً راح تصير اله .

لبس قاط وجواه يلك بلون الرصاصي وقميص ابيض ورباط اسود ، وحذاء اسود ، رتب نفسه وشعره ونزل جوه .