سامحيني ... ولكن

الفصل الثامن

#سامحيني_ولكن
للكاتبة #صبا_يوسف

مساء الماس يا اغلى الناس .. شلونكم ؟! ..

سووا منشن لاصدقائكم يقرون الرواية ..

قبل القراءة صوتوا احبائي .. التصويت كلش مهم .

_____________________________

" اتدري من انت ..
انت تلك النبضات التي تلاحقني اينما حللت
انت #ترياق_روحي بك تعلقت
ولك استسلمت
قبس من شهاب يضيء ليلي
وفي القلب تعمقت
روح في سمائي تمطرني
من العشق فارتويت "

#عسل

ضليت يومية اروح لفهد وره الدوام ، حته اشوفه واطمن عليه ، لحدما صار شهر .

طبعاً اهلي بعدهم ميعرفون ، احاول اروح وارجع على السريع حته ميعوفني الخط .

الحمدلله صحته تحسنت شوية شوية ، وهو من يشوفني اشوف الفرح بعيونه ، نضل نسولف ونضحك .

بالبداية ، جانت حالتة كلش سيئة ، احجي وياه يجاوب على كد السؤال ، بس بعدين كمت اكوله ليش كاعد هنا امشي نطلع بالحديقة ، او مرات من اجي اكول لدينا تكوله خلي هو ينزل ، ومرات قليلة جداً طلعنه بمنتزهات حته يغير جو .

ضليت اسولف واجيبله سوالف واخبار ، واقنعه يقطع اجازته ويرجع للدوام ، حرامات خاف يفصلوه . شوية شوية تحسنت حالته بس بعده ممقتنع يرجع للدوام يكول ما بيه حيل للشغل .

دينا معاملتها تحسنت ويايه ، من شافت حالة فهد النفسية تحسنت .

اما اني فمشاعري تحولت لاعجاب وتعلقت بي كلش ، يعني انتظر اخلص محاضرات بفارغ الصبر حته اروح واشوفه . من اشوف لهفته عليّ كلش افرح واتأكد بعده يحبني ويريدني .

تندمت لان عاملته بقساوة وطردته المفروض انطي فرصة لان يجوز يقبلني بكل حالاتي لان يحبني .

بيوم من الايام ، جنت اني ووياه كاعدين بالحديقة ، قلتله
" فهد .. راح تبدي امتحانات الفاينل .. يعني مراح اكدر ازورك هاي الفترة .. بس وعد من اخلص راح اعزمك على مكان حلو .. اوكي "

" اوكي .. اقري زين حته اطلعين تقدير زين .. تدرين راح افتقدج كلش .. بس ميخالف الدراسة اهم .. استحمل ايام الامتحانات .. اتمنالج النجاح "

" اوكي .. انشالله يا رب "

سكتت شوية بعدين قلتله
" ممكن اطلب منك طلب وتنفذه لخاطري "