سامحيني ... ولكن

الفصل السادس

#سامحيني_ولكن
للكاتبة #صبا_يوسف

مساء الزهور واحلى العطور على قرائي الحلوين .. شلونكم ؟! ..
سووا منشن لاصدقائكم يقرون الرواية ..

اي شخص يفتح الفصل خلي يتابعني @sab_oo_sh

قبل القراءة صوتوا ، ارجع واكول التصويت كلش مهم يا جماعة

_____________________________

" أشعر بالذنب لحبه المهدور لأجلي ،
ذنب يلاحقني للأبد ،
يطوقني للأبد "

#دينا

سكتت شوية افكر بعدين مسحت دموعي وقلت بحدة
" اني اريد اروح "

" وين تروحين ؟ " سألني حسين بتعجب .

" للبيت .. كلش تعبت .. ونعسانة "

" اوكي .. اوصلج اني "

" لالا .. اني اروح وحدي .. انت ضل هنا خاف فهد يكعد .. هسه أأجرلي تكسي "

" اوكي " قالها حسين .

طلعت من المستشفى ، من شفت فهد حقدت على عسل كلش ، بسببها متمدد بين الحياة والموت شنو ذنبه ، بس لان يحبها .

اخذت تكسي ورحت لبيت عسل ، طبعاً صايرة اعصاب ، البيت مو بعيد عن المستشفى ، المهم وصلت .

" انتظرني شويه .. هسه اجي " قلتها للسائق لمن وصلت ووكفت السيارة كدام بيتهم ، نزلت من السيارة .

دكيت الجرس ، كارهة هاي لبنية كلش وبقلبي كومة كلام بس اشوفها انفجر بوجهها .

فتحتلي الباب امها ، من شافتني استغربت اني واكفة كدامها

" مساء الخير خالة .. عسل موجودة ؟ " قلتها من وره خشمي ابينلها ضوجتي منهم .

" مساء النور ام جنى .. اي موجودة هستوها كعدت من النوم .. ليش واكفة بالباب ، تفضلي "

" لا خالة شكراً مااكدر .. صيحيها اريد احجي وياها "

" اي هسه " قالتها ودخلت جوه ، انتظرت شوية ورجعت وياها عسل .

" اهلاً... " قالتها عسل بس مخليتها تكمل .

صايرة نار من عدها ، لو بيدي هسه انتف شعرها .

" ساعة السودة من شافج فهد وتعرف عليج .. الله لا ينطيج العافية .. ولج ارتاحيتي هسه .. كلامج الغبي الي كلتي بارحه .. خله فهد فاقد الوعي .. وهسه هو بالمستشفى بين الحياة والموت " قلتها بصياح حته الجيران يمكن سمعتني .

من كلت هيج ، فكت عسل عيونها على كبرها وتجمدت بمكانها ، ما حجت ولا كلمة ، انصدمت من كلامي .