SA 'YONG KAARAWAN
BY: Randy B. Bataanon
Pinkamamahal sa 'yong kaarawan
Hangad ko'y ligaya ang iyong makamtan
Mga pagpapala tuwa't kalusugan
Ang Kanyang biyaya nawa'y masumpungan
Ang Gitnang Silanga'y di ko man lakbayin
Sa ala-ala ko'y lagi kang kapiling
Dagat man at bundok ang pagitan natin
Ngunit sa puso ko'y malapit ka parin
Kung sa dugo't pawis yama'y matagpuan
Kung mga pangarap sa lupa'y matikman
Ngunit kung ang puso sayo'y laging uhaw
Ano pang halagang sa mundo'y mabuhay
Tanging ala-alang nagbibigay lakas
Pangako mong ikaw ay magiging tapat
Tanging larawan mo ang laging kausap
Sa 'yong paglalambing laging nangangarap
Pintig ng Puso mo'y kaylan maririnig
Masayang halakhak at masuyong tinig
Sa matang mapungay mailap na titig
Sa lahat ng ikaw ako'y nasasabik
Malusog maputi at kaakit-akit
Malinis maganda magilas ang tindig
Malambot mabango makinis ang kutis
Siya'y ang mahal kong pinaka-iibig
Higpit ng yakap mo'y laging hinahanap
Tamis ng ngiti mo sa aki'y bumihag
'Sang libong ligaya ang iyong katumbas
Sa piling mo ako'y may ligayat galak
Tingin sa malayo at buntong-hininga
Ang nagpapagising saking ala-ala
Ang mahal ko'y tulad ng isang pantasya
Na sa panaginip ko lang nakikita
Ang lamig ng gabi'y laging nangungutya
Sa tigang na lupang uhaw sa kalinga
Ang binhing naluoy may buhay pa kaya
Kung hindi madilig sa patak ng luha
Ang tanging handog ko sa 'yong kaarawan
Isang pusong tapat laging naghihintay
Kung malayo ka man laging tatandaan
Sa buhay koy laging ang mahal koy ikaw