PARA SAYO ANAK (Josh Randel)
by: Randy Bataanon
1
Ginapos ang luha't lungkot ay sinakal
Mahigpit na yumakap... at saka kumaway
Limang buwan ka lang ng una kang iwan
Para sayo anak ang kanyang dahilan
2
Mga pangyayari'y hindi mo pa alam
Di mo pa mabigkas mga katanungan
Bakit ang 'yong ina'y dagli kang iiwan
Matapos na ikaw ay kanyang isilang
3
Umapoy ang lagnat sa murang katawan
Kalinga at yakap ng ina'y kaylangan
Ngunit nasaan ka aking inang mahal
Sa bawat iyak moy siyang katanungan
4
Tahan na anak ko 'wag ka ng magdamdam
Kung di man marinig ang awit ni inay
Kung ang yakap niyay di man maramdaman
Para sayo anak kaya sya lumisan
5
Ayaw kong matulog sa bisig ng iba
Ang nais ko'y sayo, sa bisig mo ina
Oo nabasa ko sayong mga mata
Ang iyong pagtutol ng iwanan ka nya
6
Ngunit aking anak sanay unawain
Puso ng 'yong ina ay naghihirap din
Nais nya nga sanang ika'y makapiling
Sa bawat sandali ikay kalingain
7
Ngunit ang pag-ibig na alay nya sayo
Ay higit sa yakap na madarama mo
Maging ang buhay nya'y handang sakripisyo
Kaya nga't nagtiis na mawalay sayo
8
Siyam na buwang singkad na pinanabikan
Matiyagang hinintay ang iyong pagsilang
Sa sinapupunan ay inaawitan
At sa pagsilang mo'y buhay ang puhunan
9
At ngayong liwanag iyong nasilayan
Kinabukasan mo'y pinaghahandaan
Lungkot man at luha'y di makakahadlang
Para sayo anak dahil ika'y mahal
10
Kaunting tiis pa't muli kang hahagkan
Kahit na sandali'y di kalilimutan
Mahal ka nya anak, mahal ka nyang tunay
Ang lahat ng ito'y para sayo lamang
