BANGON PILIPINAS (pusong pinoy)
By: Randy Bataanon
Ang patak ng luhay hindi mapigilan
Sa mga balitang aming napagmasdan
Sa bagyong sinapit ng mahal kong bayan
Hindi na mawaglit sa aking isipan
Sa ibayong dagat na kinalalagyan
Ang mga naganap aming nasaksihan
Mga kapamilya kapusot kaybigan
Ang daing ng bayan aming naramdaman
Bawat kabahayang nalubog sa baha
Ang bawat bukiring winasak ng sumpa
Ang bawat sikmurang gutom sa kalinga
Daing ng ulila paano na kaya?
Hindi pa naka ahon ay muling hinampas
Sa lakas ng bagyo'y hindi naka ligtas
Gumuho ang lupa kay daming nawasak
Tumaas ang tubig buhay ay napitas
Malalayong bansay hindi naka tiis
Dumugo ang puso sa ating sinapit
Ang bayang nalugmok sa bawat hagupit
Paano babangon, saan pa kakapit?
Ano kayang gamot na magpapa ampat
Sa sugat ng bayang pilay na at bagsak
Sa naghihingalo, lugmok na sa hirap
Manhid na sa gutom pag-asay naagnas
Kung ang aking bayay magpapakumbaba
At kung hahanapin ang banal na mukha
Kung mananalangin, magsisising kusa
Daing ay diringging ng Dyos na may awa
Bangon Pilipinas bayang minamahal
Bangon kababayan sa pagkakabuwal
Ipunin ang lakas sa tulong ng Dasal
Hindi natutulog ang Dyos na Maykapal