لينا:واش ننسا يا عم عمر...اااه قولي تراش نقدر ننسا يما و بابا لي كل مانحط راسي على المخدة نشوفهم...يبدا حلم جميل و يخلاص كابوس يرهب نقدر ننسا عمي واش دار فيا و كيفاش عيشني عيشة الكلاب ارحم من معيشتي...قريب ناخذ بثاري منو و يخلاص كلش قريب نلحقلو وين راه
عمر:هو انسان مايخافش ربي علاش تحوس ترجع كيفو...ترضاها لنفسك تكون في مستوى واحد مع شخص حقير كيفو؟؟عايشة من بار لبار و كلام الناس لي مايرحمش اخطيك يا بنتي
لينا تنهدت و قالتلو:كلام الناس كامل ماجاش نقطة فالكلام لي قالو عُدي قاسني بزاف يا عمي عمر جرحني و خلا جرحي ينزف
عمر:عُدي؟؟؟هذا تاني من الذيابا لي طامعين فيك
لينا:ذيب من نوع خاص...ضابط فالبوليس حاب يستغلني باش نجيبلو معلومات على واحد...بما اني بنت ليل في عينيه.
دخل جواد البيرو و قالو بلي ماقدر يلقا حتى معلومات على لينا ناصر كل لي قدرو يعرفوه هو انها كل ليلة فالبار و عندها مكتب ديكور عايشة في دار مع صحبتها منى...لا تزور حد ولا يزورها حد متطوعة في عدة جمعيات خيرية تدعم حقوق الطفل و المرأة و اهم حاجة زياراتها لدار العجزة
عُدي:باهي و منى صحبتها ماعرفتو عليها والو؟؟
جواد:منى توفاو والديها في حادث قبل 18 سنة عاشت عند جدتها حتى لحقت لعمر 19 وين توفاة الجدة و خالها حب يزوجها غصب عليها...هربت من الدار و عاشت في دار لينا قرات هندسة معمارية و تخدم في مكتب الديكور..
عُدي تنرفز و طلعلو الضغط للراس المعلومات لي لقاوهم مافيهم حتى فايدة لازم يلقا حاجة يضغط بيها عليها و تخليها توافق تتقرب من حسام...عندو ثلاث ايام يروح ليها و يطلب منها تخدم معاه و تعاونو و هي رافضة...يا الزح علاش ترفض و هي غاطسة فالخماج و العفن حتى لقطوشتها على الاقل تخدم خدمة باهية لبلادها و تعاونهم يلقيو القبض على واحد من رواد عالم المخذرات....خمم يا عُدي مابقاش وقت بزاف لازم تلقا حل....الامر و الطلب مافادوش معاها بقالو غير التهديد
عُدي:دبرلي كمية من الكوكايين اليوم نحتاجها عندي
جواد مخلوع:كوكايين؟؟؟ واش راه يدور في راسك
عُدي:من بعد تعرف...المهم نحتاجها قبل مانخرج من هنا فهمت عليا جواد؟؟و حط واحد يعس لينا مايخليهاش تخفا على عينيه دقيقة وحدة نحب نعرف عليها كلش من نهار زدادت لليوم.....لازم يكون انسان موثوق فيه هاذي المهمة لازم تكون سرية و حتى واحد مايعرف عليها
جواد:ربي يستر من لي راك تخمم فيه...خرج و خلاه يخمم اذا القرار لي خذاه صحيح ولا غالط..هو مابقالو حتى حل غير هذا هي لي جبرتو يدير هكا من غيرها مايقدر حد يتقرب من حسام هي الورقة الرابحة لي في يدو.
لينا بعد مازارت دار العجزة و حكات مع العم عمر رجعت لطبيعتها فرغت الشحنة السلبية و تعمرت طاقة و عزيمة هدفها محال تتخلا عليه و راح تاخذ حقها من لي ظلمها مهما كان...ثلاث ايام تواجه في عُدي بنفس الطريقة الباردة و اللامبالات رافضة انها تعاونو...دخلت للبار و عالم الفساد باش تحقق انتقامها و غير تكمل واش كاين في راسها تخرج من هاذ الخماج لي اجواءو تخنقها...
قاعدة فالبيرو مع منى يتناقشو وقتاش باش يبداو الخدمة في دار ميادة
منى:ابدا انت فالخدمة انا مازال ماكملتش من الدار لي راني فيها
لينا:حتى انا قلت هكا نخدم انا نكمل و خدميلها الصالون كيما طلبت...اااه فكرني البيوت واش خيرتلهم
منى تكسلت على الكرسي و قالتلها:وجعتلي راسي و ماخيرت والو...قدرت نعرف شوية واش تحب و راح نستغلو الامر باش نخدمو خدمتنا...جبدت ورقة و مدتهالها..هذا واش تحب المدام ميادة ههههه
حكمت الورقة و تقرا فيها:تحب اللون الابيض و تحب البرك و البحيرات و الانهار...تحب الرالي(سباق السيارات)..تحب الصحرا و عاداتها و تحب الورد الاحمر.......ههههه عندك ماتخمم باش تقدر ترضيها يا لينا شمر على ذرعيك و ابدا الخدمة
لينا:بففففف الحالة صعيبة....خلي نعيطلها نروحو نشوفو الدار و من بعد ساهلة
هزت تليفون البيرو و كلمت ميادة خبرتها بلي لازم يشوفو الدار قبل مايبداو الخدمة..تفاهمو باش غدوة يتلاقاو و يروحو
أنت تقرأ
توبة فتاة الليل
Romanceتوبة او لينا هي فتاة يتيمة عاشت في ظلم و نهب من طرف عمها و زوجته لتكبر و يصبح اهم اولوياتها الانتقام من عمها الذي سلبها طفولتها و حرمها من والديها و لم تفكر يوما في الحب لكن القدر كان له مخطط آخر منى و هي صديقة لينا المقربة ، منى ايضا يتيمة عاشت عند...
