راحت لدار ميادة بعد ماوصلت منى للدار لي تخدم فيها و عيطت لسورية تبعث الخدامين و دوازن الخدمة...وصلت فتحت الباب و دخلت راحت لبيت الضياف بدلت قشها لبست سروال جين كحل عريض شوية مع بودي بيض و بروتال و puma بيضة...طلعت شعرها حكمتو طمطامة و هكذا ولات مستعدة للخدمة....سمعت تزمير الطونوبيل خرجت لقات الرجال لي يعاونوها فالخدمة لحقو هبطو الماتريال لي يخدمو بيه دخلو كلش للدار و بداو على بركة الله...فهمتهم في كل حاجة واش يخدمو واش يديرو و بداو من بيت الصغار...فاتو ثلاث ايام لينا فالنهار تخدم في دار ميادة و فالليل فالبار مع حسام لي بدا يفتحلها قلبو يحكيلها على اعمالو بعد ما وهمتو بلي هيا حابة تخدم معاه و تكون شريكة فاعمالو....شخصيتها القوية مخليتو ضعيف قدامها لأبعد حدود مسيطرة عليه حتى انو مازال مسيطر على روحو و ماقربلهاش كلما يحاول تصدو و تقولو نتزوجو و كلش ساهل...المسكين معمي على قلبو يوجد للعرس و فرحان المرا لي رفضتو مدة طويلة قريب يتزوج بيها و يدي غرضو منها ملهوف بزاف على زواجو منها حتى انو قرر بلي العرس بعد مايكمل الصفقة الاخيرة للمخذرات و يدخلها للبلاد بأمان.....عُدي مازال ورا ماضي لينا لي محيرو و مدخلو في حيط قضية واعرة و لازملها وقت و جهد كبير باش يقدر يعرف كلش عليها.....اليوم ناضت كي العادة دوشت و لبست و راحت لدار العجزة وين تلقا راحتها احساسها بالامان و هي تحكي مع العم عمر حاجة ماتقدرش تعبر عليها بالكلام فرحة عينيها تكفي تفرغ قلبها و ماتخلي حاجة تقلقها...ترجع بطاقة كبيرة و قوة تخليها تواجه حياتها....وصلت قدام الشجرة لي يقعد تحتها العم عمر وقفت تخزر فيه هذاك الراجل لكبير الشايب علاش تحس فيه حنية و خوف الاب و هو مايقربلها بوالو ماتربطها حتى صلة بيه و مع هذا ينصحها و يحبها و يعتبرها بنتو...اااااه يا دنيا لي من لحمك و دمك يعذبك و يرميك و يخليك تتمنا الموت في كل لحظة و لي مايقربلك بحتى حاجة يحن عليك و يخاف من نسمت الهوا تضرك...سرحت مع افكارها لي هزتها و حطتها حتى فطنها صوت العم عمر من سرحتها
عمر:توبة قداه ناوية تقعد من غير ماتحكي
لينا:ااااه يا عمي عمر(طبست باستو من جبينو و قعدت حذاه شادة في يدو)و الله توحشتك
عمر:هههه توحشتني يا ستوتة علبيها جيت و شفتني
لينا:و الله وقتي محشور النوم و ماعدتش نرقد...ليل مع نهار مش مهنية يا عمي
عمر:الستر عليك ا بنتي غير الخير...احكيلي واش كاين
لينا تبسمت شافت خوفو عليها و لهفتو عليها...قداااه تحبو عمي عمر..._علاش تخاف عليا و تحن عليا و تحبني و تهتم بيا ماني من لحمك و دمك مانقربلك...و علاش لي من لحمي و دمي مارحمنيش عذبني و كرهني في عيشتي على صغرة عمري نكره الحياة و نكره الدنيا و مافيها
عمر:😖😖شكون قال باش نحبك و نحبلك الخير لازم تكون من لحمي و دمي...يا بنتي فالدنيا هاذي تلقا الخير فالبراني و ماتلقاهش فمول الدار....كيما لقيت فيا انت حنية باباك و خوفو لقيت فيك انا حب بنتي و رحمتها بيا...و كان تعيطلي بابا تكمل معايا الفرحة و ماعادش نطلب من ربي يزيدني
ناضت حضنتو و باستو صحيح لي قالو العم عمر البراني تلقا فيه الحب و الحنان و الرحمة و كل حاجة تنقصك...شكون قال خوك خوك لايغرك صاحبك كلامو مش صحيح...انا لقيت فالعم عمر لي عمري مالقيتو في عمي خو بابا من لحمي.....
لينا:ااااااااه يا بابا عمر....عشرين سنة كلمة بابا ماقلتهاش...
عمر:هههههه عيشك بنتي خذيت بخاطري و قلتها الكلمة لي تحرمت منها عشرين سنة
لينا:هههه ربي يحميك و يحفظك ليا يا بابا
عمر:ها بنتي ماقلتليش واش مقلقك مناه مكش مهنية
لينا حكاتلو على لي قاعد يصرا معاها حسام و الزواج المزيف و عُدي و قضية المخذرات...حكاتلو كل حاجة بالتفصيل
عمر:توبة بنتي جبت معاك شي حد؟؟؟
لينا:لا جيت كي العادة وحدي...علاش؟؟😶😶
عمر:ريحة مش موالف نشمها قريبة...قريبة بزاف
لينا دارت شافت من شافت لهيه مالقات حتى واحد..._😮😮ماكاين حتى واحد يا بابا
عمر:خلينا ندخلو مانيش مرتاح...هيا نوض بنتي نوض.
جواد ثلاث ايام يتبع فيها مالقا والو كل يوم من دارها لدار ميادة للبار...ثلاث ايام نفس الروتين ناض اليوم و ماعينوش يتبعها هاي كي العادة من خدمتها ماتخرجش ماتتلاقا بحتى واحد...هز تليفون شاف نهار اليوم لي تروح فيه لدار العجزة ممكن يعرف حاجة...رما الغطا و توكل على ربي نص ساعة وجد روحو و كان حذا دار لينا يستنا فيها وقتاش تخرج...ستنا شوية و شافها خرجت ركبت طونوبيلها و راحت تبعها حتى لحقت لدار العجزة شافها دخلت دخل وراها من بعيد سلمت على كامل لي ثم مدتلهم قضيات شراتهملهم قبل ماتلحق...كامل فارحين بيها ضحكت معاهم شوية و هو واقف بعيد يخزر فيها...شافها خرجت للجنينة وقفت قدام شجرة قاعد تحتها راجل كبير الشيب غزالو راسو سلمت عليه و قعدت حذاه....قرب منهم باش يسمع واش يحكيو قرب و تخبا ورا شجرة و سمع كل كلمة قالوها و سجلهم بتليفونو...بصح الشيخ فاق بلي كاين لي يراقب فيهم ناضت لينا تشوف و جواد تخبا بين الشخر ماقدرتش تشوفو
أنت تقرأ
توبة فتاة الليل
Romanceتوبة او لينا هي فتاة يتيمة عاشت في ظلم و نهب من طرف عمها و زوجته لتكبر و يصبح اهم اولوياتها الانتقام من عمها الذي سلبها طفولتها و حرمها من والديها و لم تفكر يوما في الحب لكن القدر كان له مخطط آخر منى و هي صديقة لينا المقربة ، منى ايضا يتيمة عاشت عند...
