الحلقة الثانية من كرونيك #الندم:
ديت اجازة لمدة ساعتين و خرجت من الشركة، رحت للمطعم قبل الموعد بمدة، خيرت طابلة و قعدت نستنى و فجأة نشوف قدامي طفلة واش من زين و واش من حطة مافيها حتى شي ينعاب سلمت عليها و قاتلي شوفي #لينة انا #أمينة زوجة #حسام زميلك لي كان بالجامعة
هي غير قالت #حسام انا مت من داخل جسمي كامل رجع يرعش حسيت قلبي راح يخرج من بلاصتو، ( حسام تزوج و زوجتو واش تحوس مني) قعدت نتنفس بسيف و بدات #أمينة تحكي: انا و حسام مخطوبين من مدة حسام كان يحبني يموت فيا بصح وحدة الله يسامحها كانت تقرا معاه داتلو عقلو و قلبو و داتو مني ( لينة من الصدمة مقدرت تحكي ولا حرف) انت يا #لينة لعبتي براس راجلي و خليتيه يحبك و يعشقك صح هو تزوجني بصح قلبو ديما معاك، انت دمرتيني هو كل يوم يجبد تصاوركم تاع الجامعة و يقعد يخزر ليهم و مرات نلقاه يبكي بصح ماكنتش علابالي علاه حتى نهار لي لقيت مذكراتو بالصدفة و قريتهم و قريت شا كاتب عليك و علا عشقو و حبو ليك و كتب بلي امو هي لي غصباتو يتزوجني انت و هو دمرتوني انا ضرك راني عايشة مع راجل عقلو و قلبو مع امرأة اخرى نحكي معاه ما يرد لانو طول الوقت يخمم فيك و أنا شغل ماكاش كامل فحياتو..
أمينة ببكاء: انا امرأة عندي قلب و عندي مشاعر تعرفي شو احساس انو راجلك يغلط فاسمك و يعيطلك باسم امرأة اخرى و كل مرة يخمم و علابالي بلي يخمم فيك الله لا تربحك انت و ياه دمرتوني كرهتولي عيشتي حسبي الله و نعم الوكيل فيكم
لينة: حبيبتي والله العظيم ماكاين شي بيني و بين راجلك انا راني متزوجة و ام لطفلين و حتى ادا انا فيوم حبيت حسام فهادا كان بالماضي انا ضرك نحب راجلي و مستحيل نخونو و حتى ادا كان هو يحبني كيما راكي تقولي كان يظل معايا علاش مقاليش هو!!؟
انا و هو كي الخاوة و الشي لي راكي تحكي فيه مستحيل، حاولي تحلي مشاكلك انت و راجلك بعيد عليا مع السلامة، خرجت من المطعم و حاكمتني الخنقة ماعرفت نضحك و ماعرفت نبكي يعني #حسام كان يحبني و مازالو يحبني و يتفكرني يا ربي اعطيني الصبر برك، رجعت لخدمتي و الدموع فعينيا ويدان و تخمامي رجع ل 6 سنوات كان العام الثاني ليا بالجامعة تفكرت كيفاه كان يقولي نحبك يا اعز اخت...
فطنت من دموعي تعوذت من الشيطان و فكرت روحي بلي راني متزوجة و الشي لي راني ندير فيه حرام و يتسمى خيانة و اصلا حسام انسان مايسواش لانو لوكان صح حبني كان عمل جهدو باه مايخسرنيش....
كملت خدمتي فت للروضة ديت #آلاء_و_سيف و انا اعصابي بركان و عيانة، قررت نروح لصحبتي هي الوحيدة لي تنحي عليا لانو اذا رجعت للدار و تقابضت مع #خالد راح ندير مشكلة مالها اول و لا آخر، بعتله ميساج قتلو بلي رايحة لحبيبتي و هو كي العادة مكلفش روحو حتى يعاود يرجع ميساج.
.
.
في دار #صوفيا:
صوفيا: اهلا و سهلا يا الكلبة ماتقولي صحبتي عايشة و لا ميتة و ماتسقسي ..
عانقت #صوفيا و بديت نبكي و حكيتلها كلشي فرغت قلبي
صوفيا: #لينة هاد السوجي انسايه اصلا حسام لوكان كان فيه خير لوكان راه حوس عليك ماشي يتزوج و بعد عشرة باه يبان و ادا تحبي نخلي راجلي يحكي معاه
لينة: لا ماكالاه مانيش حابة مشاكل
صوفيا:ايه و راجلك مازالو على طبايعو!؟
لينة: ايه والله كرهت منو انسان جامد مايعجبوش العجب المعجب كي درت معاه مش هاكداك
و انا مش حاباتو يحوس عليا بصح علا الاقل يحوس علا ولادو مانيش امهم وحدي ياك هو تان باباهم بصح مايحكي معاهم ما يلعب معاهم استغفر الله تقول ولاد حرام
صوفيا: عندي فكرة واش رايك تبدلي فروحك و فشكلك دوخيه شوي خليه يطيح فيك و يعشقك بلا ميحس
لينة: يا حبيبتي اني نقولك راجلي حجرة جامد مايحس ما يشعر
صوفيا:خلينا نجربو مارانا خسرانين والو
لينة:ايه نجربو بصح خليها لغدوة نخلي اولادي عند يما و انت جيبي رونديفو من الحفافة و نروحو
صوفيا:اوك متفاهمين
.
.
رجعت للدار دخلت قلت السلام مرجعليش، حطيت العشا و طبعا مش مع بعض لانو راجلي العزيز يحب ياكل وحدو المهم عشيت ولادي و رقدتهم
.
.
غدوة من داك حطيت الاولاد عند يما و رحت انا و #صوفيا للحفافة، قصيت شعري و بدلت لونو و درت ليماش و زدت لقطت حواجبي رجعت نهبل و هبطنا من بعدها للسوق شريت حوايج جدد غيرت ستيل لبسي كامل، رجعت للدار رقدت ولادي وجدت عشاء شباب، دوشت و تعطرت زدت لبست و مكيجت و قعدت نستنا...
#ilina
