الحلقة السابعة من كرونيك #الندم:
لينة: ( سكت مالقيتش شا نقول بصح حكايتو تقطع القلب و انا مديت عهد لروحي بلي منتزوجش و حياتي كامل باه نربي اولادي، بصح ماقلت والو) اعطيني مدة نخمم بصح مانوعدك بوالو
أحمد فرحان: ان شاء الله
.
.
#لينة:
بهاذ الليام كنت نحوس على خدمة حطيت الملف نتاعي فكامل الشركات بصح راكم تعرفو بلادنا العظيمة و الخدمة فيها، بصح كنت محتاجة دراهم ماحبيتش اولادي تنقصهم حاجة، سورتو مع اولاد خالهم لي كل مرة لبسة و لعبة و راكم تعرفو الطفل صغير ماشي كيما لكبير كي يحب حاجة مايصبرش
سمعت بواحد المنظمة تساعد الارامل و اليتامى رحت سجلت فيها و بعد ايام عيطتلي وحدة رحت ليها، الصراحة استغربت لانو المنظمة لليتامى ماشي للمطلقات المهم دخلت سلمت و قعدت.
الموظفة: حابة نحكي معاك مدام
لينة: اتفضلي
الموظفة: كاين شحال من واحد شافك و عجبتيه
لينة: اسمحيلي بصح مارانيش نخمم فالزواج
الموظفة : يعني مش زواج دائم
لينة: ااااااه
الموظفة: تقدري تقولي متعة
لينة: انتوما صح هبلتو
الموظفة: علاش راكي تحرمي فروحك من حاجة تنفعك
لينة: ماني نحلل و ماني نحرم و ماتزيديش تعيطي منحتاج منكم والو
خرجت من عندها مصدومة بففف مانيش مأمنة ناس تخمم فالجسد برك ماقالوش بلي هادي روح و عندها مشاعر و احاسيس، حسيت روحي دخت دخلت لسوبيرات شريت قرعة جي و انا و خارجة شفت حفافة قدام سوبيرات طالبة خدامة
قلت الله يفتحها بوجهي دخلت قلت السلام جاتني مولات الشيئ سلمت عليها و قعدنا
لينة: راكم تحوسو على خدامة
الحفافة: ايه مي واش تعرفي تخدمي
لينة: نعرف نجبد و نصبغ
الحفافة: اوك ارواحي غدوة و هنا الخدمة من 8 تاع الصبح ل 8 تاع العشياء و نمدلك 35000 فالشهر
لينة: وقت بزاف و شهرية قليلة و انا عندي ذراري مننجمش نخليهم نهار كامل و لاكريش حدو 4
الحفافة: تقدري تجيبيهوم معاك
لينة: فرحت اوك من غدوة نجي
الحفافة: ان شاء الله
لينة( الحمد لله يارب كل ماتغلق باب تفتح ألف باب لك الحمد و لك الشكر المهم لقمة الحلال)
.
.
فجهة اخرى #خالد:
اففف واشبيك كاره ماشي هاذي هي المرأة لي قتلت روحك علا جالها، ماشي هاذي لي خليت اولادك من لحمك و دمك غير باه تكون معاها، هاد المرة غلطت غلطة عمري توحشت اولادي توحشت #لينة صح كنا نرقدو كل واحد وحدو بصح كانت طيبلي تغسلي نغيب تسقسي عليا اه يا #لينة توحشتك
ااااه يا #لينة توحشتك حتى لضرك باه عرفت قيمتك كنت منقيمكش هاكداك و كنت قايمة بيا، #خيرة نظل نحلل باه طيبلي و تغسلي حوايجي، #خالد رجع لعقلك مايجوزش تقارن #لينة ب #خيرة، خيرة حبيبتك و عمرك و لي قلبك بغاها، و لينة غلطت يماك، لينة غلطة فحياتك غلطة، بصح زعما مور هاد السنين كامل كنت نحبها و مافقتش، لاااالاااا لاااا اني نخربط كنت نكرها و ضرك توحشت نشوفها فالدار توحشت نشوفها تلعب مع الذراري توحشت ولادي، اه وين كنت عام ماسقييتش علا اولادي، زعما اولادي توحشوني، ههه كيفاه يتوحشوني و انا جامي عنقتهم و زيد طلقت يماهم اه يا #خالد انت غلطت و لا زم تتحمل.
.
.
#لينة
رجعت نخدم حفافة نرجع فالليل ميتة من العيا هاذي تحب تجبد و ذيك تصبغ و ذيك تقص نهار كامل واقفة رجليا حفاو نرجع ميتة نروح نرقد ديراكت و هاذ الشيي كامل و والديا و دار حمايا ماعلابالهومش بيه
.
.
فاتو 15 يوم من خدمتي حفافة #سيف ولدي انخنق، سيف ولدي واشبيك رجع وجهو ازرق ارفدتو ديراكت لسبيطار و دموعي ويدان جا الطبيب شافو
لينة: دكتور ولدي واشبيه
دكتور:ولدك مستنشق مواد كيميائية انت وين كنت!؟
لينة:واش من مواد كيميائية
دكتور: انت وين كنت مع الطفل
لينة: فصالون تاع حفافة
دكتور: واش ديري فصالون
لينة: نخدم تم
دكتور: تخدمو كيراتين حدا الاولاد
لينة: ايه
دكتور: علاش انت ماعلابالكش بلي ذيك مواد سامة و بسبتهم ولدك راه هنا فالسبيطار، اففف ضرك نعطيك دواء بصح راه غالي بزاف جيبيه و ارواحي. ولدك دوك نديرولو الاكسجين يتنقا صدرو شوي
لينة: دواء غالي منين نجيب الدراهم والديا مايقبلوش يصرفو على اولادي و باباهم لوكان نموت مانقولوش، رفدت لينة تيليفون.
لينة: السلام عليكم
قاسم : و عليكم السلام
لينة حكات لقاسم شا صرا، جا شرالها دواء و خرجو الطفل من السبيطار
قاسم: انت علاش حبستي من الشركة
لينة: استغناو على خدماتي
قاسم: علاش ماجيتيش و ماحكيتيش صرك كيفاش راكم عايشين
لينة: لي كنت مخبيتهم صرفتهم و حتى ذهبي و بعتو باه اولادي مايحتاجو والو و ضرك راني نخدم حفافة
قاسم: خدمة الحفافة انسايها و اقعدي فدارك حتى ندبرلك خدمة
لينة: بصح...
قاسم: ماكانش بصح انت راكي كي اختي و هذا واجبي و هاذو ولاد خويا، و خالد عندي هدرة واحداخرة معاه.
لينة: لا خويا يعيشك ماتخبروش..
قاسم: لا يا اختي ماشي بغرضك انا لازم نهدر معاه واش هادي اب تقول ماعندوش اولاد، يالله اطلعي نلحقك للدار
وصلني للدار راح قضالي و شرا حوايج للاولاد جابهوملي و راح
قاسم: لحقت لدار خالد عيطتلو..
خالد: الو
قاسم: راني قدام الباب ارواح محتاجك بموضوع
خالد: واش كاين
قاسم: ارواح نروحو للقهوة و نحكو
راحو للقهوة و قاسم حكا كلشي لخالد، خالد تشوكا كيفاش وليدي يصرا فيه كامل هاك و انا آخر واحد يعرف و الله يا #لينة غير نكسرلك راسك
قاسم بضبيخ: اقعد و احكم بلاصة ضرك ارجع عندك احساس الأبوة، ماعليش نسقسيك انت من وقتاه ماشفتش اولادك
خالد: حشم على روحو هبط راسو والله منهار ماطلقت يماهم مازدتش شفتهم و ماحوستش عليهم
قاسم: ااااه انت بشر و لا حيوان يا راجل حتى الحيوانات و عندها مشاعر لاولادها اقففف والله لوكان ماجيتش خويا لوكان راني خنقتك
خالد: والله توحشتهم حاب نروح نشوفهم
قاسم:لا متروحش غدوة نجيبهم لدار يما روح شوفهم و اصلا عيب تروح عند امرأة ساكنة واحدها
خالد رجع للدار كاره و بينو و بين روحو يقول انا صح ضلمت اولادي و ظلمت لينة معاهم ااااه يا لينة لوكان تعرفي شخال متوحشك، ايه ديجا #خيرة وينها، خيييرة خيييرة راح لشومبرتها مكاشها راح لشومبرة ذراري لقاهم راقدين هادي وين راهي راح لدوش لقاها متغاشية و الدنيا كامل دم....
#ilina
