الحلقة الثالثة من كرونيك #الندم:
هو دخل و شافني بديك الهيئة دور وجهو و تشنف
خالد: واش راكي دايرة فروحك تقول بنت ليل
لينة: حبيت نبدل فروحي شوي، بصح خالد ربي يخليك قولي فاش راني غلطانة معاك شا درتلك انا باه تعاملني هاكدا
خالد: لا مدرتي والو بصح انا منحبكش و شوفي يا بنت الناس ادا حبيتي تروحي لدار والديك روحي و ادا حبيتي تطلقي نمدلك حقوقك كاملة
لينة: وي عندك الحق انا الحمارة لي هبطت من قيمتي و جيتك
خليتو و رحت دخلت لشومبرتي مسحت ماكياجي و دموعي ويدان ماعرفتش علاش نبكي علابالي بلي انا منحبوش بصح حسيت كرامتي نداست، خممت الصبح نروح لدار والديا نريح و نعاود نرتب حياتي
.
.
خالد: دخلت للدار صبتها حاطة ماكياج و متهلية فروحها كانت طالعة تهبل تقول قمر هابط من السماء بصح والله مقدرت نحبها الله غالب قلبي مالكاتو امرأة اخرى رحت رقدت و الصبح كي فطنت لقيت الدار كالم رحت حوست عليها و على الذراري مالقيتهومش الظاهر كرهت و راحت لدارهم هناتني، فتحت تيليفوني لقيت ميساج من صاحبي #محمد عارضني للفطور قلت نروح نحي علا خاطري كملنا فطرنا و انا جيت راجع للدار يصوني تيليفوني جبدتو نلقى #الوالد استغربت قلت ديجا راحت #لينة شكاتلو
ريبونديت عليه حتى سمعتو يبكي قالي يا ولدي اجري خوك و #خيرة مرتو و ولادهم راهم دارو اكسيدو و راهم فالسبيطار...
انا كي سمعت لخبر تقول نصب عليا بيدون تاع ماء بارد رحت نجري و تخمامي مابين خويا و مابين المرأة لي حبيتها..
وصلت للسبيطار سقسيت #الوالد عليهم قالي الاولاد و #خيرة الحمد لله سلامات بصح الضربة الكبيرة جات فخوك انظر من راسو و حنا هاكداك و يخرج الطبيب...
قالنا عظم الله اجركم الدنيا تقلبت ضبيح و بكا و انا فرحت اخيرا راح نتزوج بالمرأة لي نحبها ما خممت فحتى واحد غير فروحي، جاز العزاء و #خيرة راحت لدارهم راهي فايام العدة طبعا مقدرتش نتلاقاها او نشوفها...
#ilina
