الحلقة الاولى من كرونيك #الندم:
دارت الايام بيني و بينو بعد ما كنا حبيبين ، عمري ضاع حبي ضاع و افترقنا بلا وداع...
.
.
مرحبا انا اسمي لينة متزوجة و عندي طفلين #آلاء و #سيف تزوجت زواج تقليدي طبعا و عمري 26 سنة حاليا نخدم محاسبة فشركة للاستيراد و التصدير و زوجي #خالد موضف حكومي
الايام كامل تفوت بشكل روتيني و مملة و كاين بزاف خلافات و مشاكل بيني و بين زوجي بصح انا خلاص كرهت قلبي برد رجعت نتنازل برك باه نريح راسي من الحس و العياط رغم انو هو لي راه مزكر و داير فيا المنكر كرهت من انو انا لي نحاول نصلح العلاقة و هو يخرب فيها
وصلنا لحتى كل واحد فينا عايش بعالم خاص بيه و بعيد كل البعد عن عالم التاني لا هو يسمحلي نفوت بعالمو و لا انا نسمحلو يفوت بعالمي كل واحد فينا عندوا اسرارو الشخصية لي مخبيها على الطرف الثاني، كنت متوقعة انو حياتي راح تكمل هاك...
مرة كنت نتصفح الفايس بوك كي العادة جاني طلب صداقة من طفلة و مخليتلي ميساج ( ممكن تقبلي الطلب لو سمحتي عندي موضوع مهم نحكي فيه معاك )
بصراحة انا استغربت منها و توسوست واش تحب مني هاد البنت، دخلت على صفحتها لاتصفحها و دخلت لقائمة اصدقاءها و هنا كانت الصدمة شفت صورة لشخص عزييز عليا بزاف....
شفت صورة #حسام ... #حسام كان يقرا معايا بالجامعة حبيتو و عشقتو لكن للاسف حب من طرف واحد لانو كان معتبرني كي اختو و كان ديما يقولي #لينة انت اعز اخت ليا، ماكانش عارف هاد الكلمة شحال كانت توجعني كي يقولهالي نموت ألف موتة، حاولت ننساه و تعبت و بعد متخرجت تقدمولي ناس بزاف لكن أنا بقيت رافضة
من بعد اهلي كرهو و ظلو ورايا بحجة انو العمر يمشي و مانيش حا نبقى ديما صغيرة و شابة و لي قدي تزوجو و راهم بأولادهم و انت مازالكي بايرة
رضخت لأمر الواقع و قبلت بأول راجل تقدملي بعدها، راجل بأيام الخطوبة كان يقول نحبك و نعشقك...
حاولت ننسى #حسام و نقنع روحي بلي #خطيبي هو الشخص المثالي و لي راح ينسيني فحبي و فوجيعتي و ظليت نقنع فروحي انو ندي لي يحبني مش لي نحبو أنا و ميحبنيش و اكيد لي يحبني راح يفرحني و يديرني فعينيه هذا كان تخمامي وقتها....
.
.
.
.
#خالد
السلام عليكم انا #خالد عمري 30 سنة كنت و مازلت نحب بنت عمي #خيرة اللي حرموني منها و زوجوها #لخويا بعد ما عشنا انا و هي قصة حب من الصغر انجبرت تتزوج خويا لانو هو كان خدام و واجد على عكسي أنا لي كنت مازالت نقرا و ماكنت موجد والو لا دار لا خدمة ...اكيد واحد ماهوش عارف انو تشوف حبيبتك بين يدين خوك
كنت و مازال و راح نبقى نحبها لآخر يوم فحياتي
المهم بعد فترة من زواج #خيرة تقدمت #للينة طفلة حبوبة يما عجبتها و هي لي خيرتها، منقولكمش حبيتها لانو انا قلبي ملك #لخيرة برك و مننجم نمدو لحتى وحدة لكن فترة الخطوبة كنت نقول #للينة حبي و حياتي و عشقي بصح الكلام هادا عمروا ماطلع من القلب كنت نطمع فالطفلة
المهم اتزوجت انا و #لينة و بعد فترة من الزواج منجمتش نكمل و نطمع الطفة فباطل و ماقدرتش ننسى #بنت_عمي
صح مرتي إنسانة مثقفة و واعية و أخلاقها عالية بصح تبقى #خيرة هي الاصل مانقدرش نحب غيرها و الله حاولت بصح مقدرتش شوية شوية بديت نبعد على #لينة حتى كي رجعت #أب ماهمنيش الموضوع و كأنو دوك الملائكة مش اولادي، و ماحبيتش نظلمهم كيما راني ظالم امهم
بعد مكرهت من #لينة و حسيت بيها بلي مش حا تقدر تنسيني #فخيرة رجعت نصوحب و نتمعشق مع بنات من الفايس كل يوم وحدة نحكي معاها و نتمعشق معاها و نسهر معاها و مرتي اهملتها كامل حتى وصل الموضوع بيناتنا انو كل واحد فينا يرقد فشومبرة وحدو
.
.
.
#لينة
صورتو رجعتلي كل الشوق و الحنين و اللهفة و الذكريات الله شاهد انو بعد زواجي من #خالد نسيت #حسام و قلت بلي صح نسيت بصح كي شفت صورتو حسيت بالوحش و الحنين لي فقلبي ليه، حابة نشوفو حدايا و نشم من ريحتو و نشوف فعينيه لكن الله غالب كلشي بالمكتوب
من بعد رجعت لتفكيري شكون هاد الطفلة و واش تحب مني، وافقت على طلب صداقتها و راسلتها
لينة: اهلا وسهلا تفضلي شكون معايا !!؟
أمينة: السلام عليكم حبيبتي حابة نتلاقا معاك نشوفك و نحكو ؟
لينة: أنا منعرفكش حتى انت شكون كيفاه نجي و نشوفك
أمينة: تعيشي ارواحي و الله هادا موضوع مهم و لوكان مش مهم منطلبكش و نقولك نشوفك
لينة: ( شكونها هادي و واش تحوس زعما حسام فاتح حساب طفلة ... لا منضنش ) اوكي ادا تلاقينا بمكان عام كيفاه نعرفك و تعرفيني ..!
أمينة:أنا نعرفك و شايفة تصاورك
لينة: ( تفاجأت و راني حابة نعرفها شكون) اوكي نتلاقاو بمطعم .....
لحق الموعد ديت فترة ساعتين من الخدمة اجازة و خرجت للمطعم....
#ilina
