اليوم داك الوحيد انا شعرت بي قلق من تصرف معين .. وكل ما اتذكر.. اني ح اهرب قلبي بضرب . وحاسي بي خوف من المجهول .. لكن عدم المبالاة برضو غالب على قلبي .. بالليل وبعد العشاء .. امي دايما بتراجع معاي دروسي.. ومرات بتحكي لي قصة ..
اليوم داك لا راجعت لي .. ولا حكت لي.. بس ساكتة وسارحة وظاهر عليها غم يضيق منه البحر ..
قالت لي ماتنوم يافتحي ..النقوم اعمل عمل ليك عشاء.. قلت ليها انا هسي موش اكلت قبل المغرب؟ ..
قالت .. ياتو اكل ده ؟ ياها الطحنية بالزبادي .الخليتها في مكانها دي ؟ ..
لي انت اليومين ديل يافتحي اكلك كعب .. بتقوم تعيا..
قلت ليها بس انا نعسان عايز انوم ..
قالت لي خلاص نوم .. ولو صحيت من النوم جيعان .. صحيني اقوم اعمل ليك حاجة تاكلها .
طوالي عملت فيها نايم .. بعد مسافة كدا .. عايز اشوفا نامت ولاصاحية .. قلت ليها يا امي؟
قالت لي ايوة يا فتحي.. مالك ؟
قلت ليها نحن بنمشي لي ناس جدو برعي متين؟.. جدي برعي ده ابوها ..
قالت لي في الاجازة حبيبي .. البلد بعيدة ..
قلت ليها طيب.. ماهدي خالتي بدرية بتمشي كل يوم وتجي .. قالت لي بس المسافة بعيدة شديد.. وخالتك بتتعب شديد .. في المشية والجية ..
قلت ليها طيب ابعد بلدنا.. ولا ابعد الدويم؟
قالت لي لالا.. ابعد الدويم.. بلدنا ساعة وشوية.. بتصل برااحة .. لكن الدويم سفر عديل ..
لكن انت الدويم سمعت بيها وين يافتحي ؟
قلت ليها عندي صاحبي اسمو محمد حاتم في المدرسة.. اهلو من هناك ..
قالت لي طيب طيب .. نوم باكر وراك مدرسة .هسي انت ماقلت نعسان . قلت ليها ايوة ..
طبعا انا حولوني في مدرسة قريبة هنا .. من المدرسة الفي بلدنا
.. ولسه انا ماتميت 4شهور في المدرسة دي.. ابوي عايز يطفشنا تاني .. ويرجعوني هناك تاني للمدرسة الفي البلد ديك ..
يعني في سنة واحدة اتحول من المدرسة واجيها راجع .. يعني بهدلة شديدة ..
تاني بعد مسااافة كدا تقريبا نص ساعة .. براحة كدا قلت ليها يا امي ؟
ماردت لي.. خلاص كدا اتأكدت انها نامت ..
براحة قمت فتحت الاوضة.. نحن كنا نايمين في البرندة انا وامي بس .. ومتربسين البرندة .. لكن الاوضة مقفولة بالاوكرة بس ..
فتحت الاوضة براحة عشان ماتجيب صوت .. ومشيت على الدولاب .. فتحت الدولاب .. وطلعت الشنطة حقت امي .. ولقيت فيها قروش ماكتيرة ..
المهم شلت زي نصهم كدا .. مابتذكرهم كانو كم بالضبط .. وختيتن في جيبي .. ولميت هدوم من ملابسي .. لفيتهم في فنيلة .. وطلعت براحة .. فتحت الباب وسبحان الله انا متخيل امي اليوم ده بالذات ما حتنوم ..
لكن اصلا ماصحت بي .. بس بعد ماطلعت من باب البرندة .. بقيت متحير .. اخلي الباب فاتح وامي براها؟ ولا اقفلو من برة ؟ والصباح ماتلقى زول يفتحو ليها ..
المهم اتوكلت على الله وتاكيتو ليها .. وقلت مابتجيها عوجة يعني الحرامي مايجيها الا الليلة؟
اتخيل انا شايل جزمتي البمشي بيها المدرسة في يدي .. و حاضن لفافة الهدوم كدا تحت اباطي .. فتحت باب الحوش وطلعت واصلا الرزة بتاعتو بتتقفل من جوة ..
نحن ساكنين في نص بيت في بحري (كوبر) قريب للميدان الفيهو المصحة ..
والبيت مؤجر من مراة لئيمة لأمة .. انا من اشوفها مابتبشر خير.. هي ساكنة في النص التاني .. يوم واحد في الشهر الساعة 6 صباحا بتدق الباب .. يا ياسامية ياسامية .. الشهر جاء يختي.. وانا عايزة حق الايجار ..
امي تقول ليها خلاص لي بعدين لمن يجي الامين .. تقول ليها وانتي ماعارفة التاريخ؟ .. مالك ماشلتي القروش منو امبارح؟
تقول ليها والله ما اتذكرت يا عزيزة .. لكن الشهر الجاي كان الله حيانا بشيلا ليك من من بدري .. وكل شهر بالطريقة دي
يعني نحن مابنستاهل يشتري لينا بيت صغير قدرنا كدا.. يكون ملك حقنا ومافي زول يجي يطلب مننا حق الايجار؟
وهو عندو قروش الناس مابتاكلها ..
مشيت قطعت الشارع .. عشان امشي على جيهة السوق .. اسأل من العربات البمشن الدويم .. وانا كنت متخيل ممكن الزول يسافر الدويم بالليل عادي .. لانو الوقت كان قريب الساعة 11 ونص
اول زول لاقاني سألته.. قلت ليهو انا عايز المواصلات البتمشي الدويم ..
قال لي الدويم شنو ياولد؟
قلت ليها انا اهلي من الدويم.. ماشي الدويم ..
قال ياولد كدي تعال فهمني .. ده شنو الشايلو ده؟
قلت ليهو دي هدومي..
قال لي اهلك وين.. ؟؟ قلت ليهو اهلي خلوني هنا وسافرو.. انا ماشي محصلهم ..
الزول قعد يعاين لي .. ويتلفت طب قبضني من يدي .. وقال لي لو ما اتكلمت الحقيقة .. انا بوديك بسط الامن الشامل.. يقفلوك في الحراسة .. والعساكر يدقوك فوق راسك الماكن ده ..
قلت ليهو لو قلت ليك الحقيقة بتساعدني؟
قال لي ايوة بساعدك ..
قلت ليهو انا هارب ماعايز اقعد في بيتنا ..
قال لي جدا مافي مشكلة.. ارح معاي البيت وبكرة الصباح اوديك لي مواصلات الدويم .. الدويم بعيدة وبالليل مافي ليها مواصلات ..
وانا طبعا" .. مشيت مع الراجل .. لانو زول شكلو زول صالح..
الراجل كان جاي من على المحطة .. شايل ليهو كيس بتاع عيش ومعاهو حاجات في كيس تاني ..
قال لي نحن موش بقينا اصحاب؟ وانا ح اساعدك؟ .. وريني اسمك منو؟
قلت ليهو اسمي فتح الرحمن الامين ..
وساكنين وين انتو؟ قلت ليهو ساكنين بيهناك قدام .. وصفت ليهو قال لي ساكنين في بيت عزيزة؟
قلت ايوة انت بتعرفها ؟
قال عزيزة في زول في كوبر مابعرفها؟ .. دي مراة تحفة الله يعينكم عليها ..
قال لي تمشي معاي البيت.. واديك شنطة صغيرة.. تخت فيها هدومك .. وتلبس كويس عشان مافي زول يعرفك هارب .. وباكر الصباح اركبك المواصلات تمشي الدويم .. مافي اي مشكلة ..
الكلام ده كلو ونحن ماشين على بيتو ..
لمن وصلنا البيت.. لقيت اولادو نايمين .. ومراتو صاحية .. لمن شافتني قعدت تسأل فيهو .. ده منو يا الطاهر؟
قال ليها ده زول ضيف صاحبي .. قالت ليهو سجمي صاحبك شنو كمان الشافع ده ..
واهلو وين حايم بالليل كدي ؟
قال ليها اصبري بحكي ليك .. تعالي قومي ا لينا عشا .. ودخل معاها على جيهة المطبخ كدا.. اظنو حكا ليها عني ..
اخدو مسافة بتكلمو مع بعض.. وانا قاعد في السرير .. منتظرو يجي يقول لي نوم .. وفرحان اني لقيت لي زول يساعدني .. وخلاص بقت افكاري في طريق السفر ..
لمن جا طالع قال لي نحن موش بقينا اصحاب ؟
قلت ليهو اصحاب شديد .. قال لي يلا انا اسمي الطاهر .. قلت ليهو عارف ..
قال لي عرفت من وين؟ ..
قلت ليهو هسي خالتو دي قالت ليك يا الطاهر.. قعد يضحك .. وقال لي انت والله ماهين ..
اها ياصاحبي .. ممكن تحكي لي سبب الهروب .. ولا بتدس على صاحبك السر؟ ..
قلت ليهو خلاص بكلمك براك .. يعني عشان المراة ماتسمعني ..
قلت ليهو ابوي عايز يطلق امي . وهسي هي مابيه تمشي . .. عشاني انا .. يعني قاعدة معاهو غصبا عنها عشاني انا.. وهو بشاكل معاها .. وبضربها عشان ماعايزها .. وانا عايز اهرب عشان هي تمشي اهلها
عاينت للراجل .. عيونو اتملن دموع .. وقال لي ولايهمك ..
لو عايز انا براي بي نفسي ممكن اوديك الحته العايز تمشي ليها .... لكن انت معاك قروش؟؟
قلت ليهو ايوة معاي قروش ..
قال لي كدي اشوف .. لمن طلعت ليهو القروش.. قال لي دي بسيطة مابتعمل ليك حاجة .. انا بديك قروش زيادة ولمن تجي من الدويم ترجعهم لي كويس؟
قلت ليهو كويس..
المراة جابت العشاء من جوة عيش بي لبن ..
قال لي انت اتعشى ونوم ماتنتظرني .. انا في زول عندي معاهو قروش امشي اجيبهن منو واجي ..عشان اديك منهن ..
قلت ليهو كويس ..
طلع وخلا معاي المراة .. وانا قاعد اتعشى مطمئن .. بعد اقل من ربع ساعة .. الراجل دق الباب .. وزوجتو مشت فتحت ليهو .. جا وجاب معاهو امي !!!!..
لاحول ولاقوة الا بالله .. متين مشى ليها .. وصحاها وجابها وجا ؟؟..
امي تبكي.. وقلبها مقطوع.. ونفسها قايم.. ولابسة سفنجة ومالابسة توبها كويس ..
الى اللقاء .
أنت تقرأ
مـدافن الألم .. طارق اللبيب
Poetryكان في الوكت داك .. قبل عشرين سنة .. انا كان عمري عشرة سنوات تقريبا.. وانا كنت ذكي ولماح وفصيح . وعندي عدم مبالاة غريب .. وما بخاف زي الاطفال .. وبتصرف كاني زول كبير .. .. يوم سمعت النقاش داير بين امي وابوي .. و امي قالت لي خش جوة يا فتحي . اامي...
