مـدافن الألم .. طارق اللبيب

8

قلت ليها . انا عايزك تتزوجي .. موش ممكن؟ عارفة ليه؟ عشان اشوفو بجي يسوقني كيف؟ والله لو اتزوجتي تفشيني فشة .

انا كبرت يا ااستاذة . انتي قايلاني صغير زي زمان يجيي يسوقني؟.. والله ما امشي معاهو ..

صح انا عمري مافايت 15 سنة ..لكن بعرف كيف يعني زولة في عمرك ده .. تدمر حياتها قصاد طفل واحد ..وتقعد تربي فيهو وتمتنع عن الزواج.. عشان خايفة عليهو يضيع من يديها ..

انا لازم اقيف معاك زي ماوقفتي معاي ولا مافيني فايدة ..

عارف ردت علي قالت لي شنو؟

قالت لي انت ياود ما نصيح؟ ده اخر ما توصلت ليهو؟ منو هو الراجل البتزوجني بعد كدا ؟ الفتوات ماليات البلد. البتزوج ليهو عزبة ولدها صبي منو؟

قلت ليها مافي شي بعيد على ربنا . وانا ماقلت ليك امشي فتشي .. بس عايزك توعديني من الليلة ..لو جاك اي انسان محترم واتقدم ليك. ماترفضيهو .. انا ماعندي اخوان ولا اخوات .. عايزك تجيبي لي اخو او اخت. يكون لي رفيق في الدنيا دي ..

وهي طبعا تضحك .وتقول لي والله البسمع كلامك يقول عمرك 40 سنة .. عليك الله سيبني في حالي .انا هسي ماناقصة وجع راس .. كمان راجل تاني لالا بعيد بعيد ..

قلت ليها طيب عندي اقتراح تاني .. خليني امشي لي ابوي اشوفو وين واسلم عليهو ..واطالب بحوقوقي .. انا موش عندي حقوق ؟ والمفروض يديني حقي زي اخواني ؟

قالت لي والله كدا زعلتني يا فتحي .. هسي انت محتاج لي حاجة؟؟ .. تمشي تشحدو عشان يقول المراة جوعت لي ولدي واهملته؟

انا مابمنعك تمشي تشوفو وتسلم عليهو.. لكن انت لو محتاج لي حاجة.. يبقى فعلا انا مافيني فايدة ..

قلت ليها والله ماقصرتي معاي ابدا .. وماعارف انا اعمل شنو في الدنيا دي ..عشان اقدم ليك ذرة من بحر التضحية العملتيهو معاي.

قالت لي انت ياولد الكلام ده بتحيب فيهو من وين؟ ..

قلت ليها انا ود الاستاذة ..

قالت لي خلاص انا بكلم صلاح يمشي معاك تشوف ابوك وتسلم عليهو وبس ..تجي راجع حتى لو مدا ليك قروش توعدني ماتشيلا منو .. واوعك تقعد هناك ولايوم وخالك يكون معاك انا من الشفتو تاني مابكون مطمئنة عليك .. قالو ياولدي في المثل (المابخاف من الله .. اولالك تخاف منو)..

طبعا انا مشيت البيت ده قبل كدا مرتين تلاتة مع ابوي .. لمن كنت في كوبر . بس مابقعد هناك كتير .. لكن مالاحظت لاي تعامل كعب

امكن لاني كنت صغير شوية ومابلاحظ لي حاجات كتيرة ..

اها يازول مرت الايام وماكلمت صلاح .. وكلامي القلتو ليها اني عايز اشوف ابوي ده ما اشتغلت بيهو.. وانا ابيت اٍسألها تاني .. في نهاية السنة دي .. قالت لي اسمع يافتحي طبعا انت طلبت مني تمشي تشوف ابوك .. وانا قلت احسن تمشي في الاجازة لانو مامعروف احتمال يمسكك معاهو يومين تلاتة .. عشان كدا انا بخليك تمشي في الاجازة ..