مـدافن الألم .. طارق اللبيب

16

انا وكت شفت ياسر طالع بي زوجته .. وماسك ليهو ولد بي ايدو وفي طفل صغير شايلاهو امه العمياء .. قلت ليهو دقيقة يا ياسر .. انت ح تخلي البيت لمنو؟ والوالدة؟؟ .. معاذ قال لي خلي ابوي يتصرف بي طريقتو.. موش عايز يعيشنا على اعصابنا ؟.. بالمناسبة انت ماقادر تتصور الكلام القالو ده خطير كيف؟

قلت ليهو يعني يا معاذ.. ح تكون حسيت احساس اسوء من احساسي انا .. انا عندي يقين انو الكلام ده كذب .. ومستحيل.. حسب معرفتي بي امي.. لكن متحسر ..انو ابوي يكون عايش عمرو كلو.. وهو مفتكر عني دي .. والله ده اسوء احساس .. بس الحمد لله انو كان بعيد مني .. وجواي ماعندو وجود كأب ..

(ده كلو ونحن لسه جنب الباب .. وابوي هنا يعاين لينا ماسامع لكن ولاقال كلمة .. انا قلت لمعاذ ..

بس انا يامعاذ .. هسي طالب انو ياسر يرجع بي اولادوه .. ياسر اصر .. قال لي مابرجع.. انا معاك .. انت لو ماعايزني ..

سوق معاذ وامشو انا بشوف لي اي جيهة تانية .. انا تاني مابقعد هنا .. والله نفسي كشت ..

قلت ليهم ياجماعة امكم ذنبها شنو؟

معاذ قال لي انت بس ارح وانا بحكي ليك الفكرة .. المهم ركبنا مشينا .. وصلنا البيت لقينا بدرية قاعدة وسلمو عليها .. وقلت ليها ديل اخواني.. انتي مابتعرفيهم صح؟.. ده ياسر وده معاذ ودي زوجة ياسر معزة .. زولة جميلة .. طيبة طيبة غايتو .. ربنا يعوضها في عيونها ..

المهم بدرية في البداية كانت مرتبكة .. ومتوترة .. ومامرتاحة لي جية الناس ديل هنا ..

قامت عملت لينا الشاي باللبن .. وهم كانوا مرتاحين ويتونسو .. بدرية ومعزة دخلن جوة.. ومعاهن الاطفال ..ونحن التلاتة قاعدين برة ..

قلت لي معاذ انت فهمك شنو يعني خليتو الوالدة براها؟؟ ..

قال لي اول حاجة طبعا سهير موجودة في البيت .. ومامحاجين لينا نحن .. خليهو هو يتصرف .. يقوم بالشي الكنا قايمين بيهو وبالاصح الكان قايم بيهو ياسر ..

بعدين كلها يومين.. وبغلبو البسويهو.. وبجي براهو يكوس لينا.. واشارطك ح يعترف بالزول القال ليهو كدا ده منو ؟..

ونحن والله الموضوع ده ما ح نخليهو.. الا نوصله اخره .. ياسر قال ليهو ياخي الموضوع ده بخلق بلبلة .. وبعدين سمعة ماحلوة في حق فتحي وامه ..

معاذ قال ليهو ياسر اخوي.. والله انا ممكن اقسم بالغيب.. انو فتحي اخونا .. ودي حاجة انا بحس بيها وانت حاسي بيها .. وفي النهاية الحق بظهر انت بس اصبر ..

اتاريها في نقاشنا ده.. بدرية خالتي كانت راخية اضانها .. وسمعت كل شي .. جات طالعة .. قالت لينا انا ماشة الدكان ده.. وجاية خلو بالكم للاولاد ..

طلعت اتصلت على امي.. وحكت ليها الرصة من طق طق للسلام عليكم .. وجات راجعة زي الكانو مافي شي ..