مـدافن الألم .. طارق اللبيب

5

اتخيل تلات سنوات ابوي مافكر يوم من الايام يجي يشوفني .. او يسأل مني .. حتى لي وفاة جدي برعي ماجا .. ولاحتي رسل مرسال عشان يعزي امي او يعزي صلاح .. انا بقت تجيني افكار شيطانية .. ياربي احتمال ابوي ده يكون شاكي في نسبتي ليهو؟ يكون ماشايفني ولدو؟ لكن الغريبة انابشبه ابوي اكتر من امي .. صورة نسخة من ابوي .. مرات بنساهو..  واتذكره لمن لمن اشيل المراية..  من شدة الشبه البيني وبينو ..
امي بدت تتضايق من معاملة صلاح لي .. والتحريش البتعمل فيهو نسرين عمران .. وماقادرة تتكلم .. لانو صراحة المراة لمن تكون مطلقة وقاعدة في بيت اهلها .. بتحس بي عدم انتماء
وكانها غريبة .. خصوصا لمن تكون عندها اطفال بتحس انها عبء على اسرتها ..
مع انو امي عندها حق في البيت زيها وزي صلاح .. لكن مرات بتديني احساس انو صلاح متكرم عليها .. ومقعدها في بيتو.. خلي صلاح .. امي شايفة انو نسرين البيت حقها اكتر منها هي .. غايتو الحمد لله ..
انا امتحنت بي كل البلاوي والنفسيات دي .. والحمد لله جبت نتيجة كويسة شديد ..واول مابدت الاجازة نزلت شغل .
ومرت الايام في الفترة دي خالتي بدرية خطبها واحد من ام درمان .. وجونا في البيت واتكلمو طلبوها وحددو مواعيد المناسبة .. بس كانت امي خايفة وبدرية برضو .. ومتوجسين من الزواج ده .. اولا الفشل الحصل لي امي .. امي خايفة علي بدرية يحصل ليها نفس الحصل ..
وبدرية مقلقة ماعايزة تخلي امي وحبوبة براهم..  لانها شايفة انها مسؤلة منهم الاتنين ..
بدرية خالتي  والله افضل من مية راجل .. غايتو عندها قلب حار .. ياسلام والله .. انا دايما بفتخر بيها ..
حبوبتي بقت تودي وتجيب وذاكرتها تعبانة .. واكتر الوقت هي برة الشبكة..  مع انها ماكبيرة شديد .. الدكتور قال عنها زهايمر مبكر .. مرات بتقول لي ياصلاح .. ومرات تصلي العشاء الساعة 12 ضهر .. كانو بقولو انو اثرت فيها وفاة جدي .. لانها مابكت عليهو نهائي ..
وبدرية زي ماحكيت .. هامة بي امي وشايفة انو المسؤليات عليها ح تكتر ودي حقيقة .
ومرت الايام .. والاجازة انتهت وانا قبلوني في مدرسة في الجيلي .. وبدرية اتزوجت وسكنت ام درمان .. وبقت بتجينا كل اسبوع ..
وخالي صلاح يطلع وبقى يشتغل ..بعمل شنو مابعرفو لكن بجيب مصاريفو .. وامي بقت قايمة علينا انا وحبوبتي ..
اها يازول باختصار في نص سنة اولى .. انا حسيت انو المدرسة دي مقابر  لي طموحاتي .. وضعيفة .. الغياب  في  الاساتذة  كتير .. اغلبيتهم  مشو  يشتغلو  في  المدارس  الخاصة في الخرطوم .. والمدرسة مهملة اهمال شديد ..
وانا طبعا دخلت بي مجموع كبير .. وحاسي بانو موضعي مع المدرسة دي ح يكون موش ولابد ..
لكن طبعا ماعندي حل غير المواصلة .. بطلع الصباح بمشي المدرسة بالمواصلات..  وبجي راجع المساء بالمواصلات ودي طبعا ميزانية ماساهلة بالنسبة لينا نحن . الوضع مابستحمل ..
لكن الحمد لله ربنا ممشيها بقدرتو ..
يوم من الصباح قمنا وامي قامت بدري جهزت لي حاجاتي وجهزت الشاي والفطور لي حبوبتي .. وانا لبست وداير اطلع خلاص ..
امي قالت لي عليك الله يافتحي كلم نسرين قولي ليها ماتنسى بعدين تختي الفطور لي حبوبة .. لانها ما بتتذكر فطورها مرات ..
وامي مشت تصحي امها  للشاي ..
انا لمن كلمت نسرين..  وجيت راجع .. وانا لابس خلاص لقيت امي مخلوعة .. وقالت لي كر علي يا فتحي .. صلاح صلاح .. نادي لي صلاح سريع ..
جريت قلت لي صلاح ياخالو امي قالت ليك تعال ..
قال لي في شنو ؟؟انا مستعجل مارق عندي مواعيد .. قلت ليهو والله ماعارف لكن شكلو في مشكلة كدي تعال ..
صلاح جا وانا جيت معاهو .. قال ليها في شنو يا سامية؟ .. قالت ليهو امي ياصلاح .. امي ..
قال ليها امك مالا؟ قالت ليهو ماعارفة تعال شوفها .. ابت تصحى لي .. ماعارفة الحاصل عليها شنو؟
انا خفت خوفة شديدة خلاص.. قلبي بقى يدق دق شديد.. .. صلاح دخل واء طالع ..
قال ليها  .. والله ياسامية .. امي دي شكلها كدا .... قالت ليهو اوعى تقول ياصلاح ..
قال ليها لكن مافي نبض ولافي نفس .. صلاح اتلفت علي..  وقال لي نزل شنطتك دي يافتحي .. وامشي جري لي محمود .. قول ليهو تعال لينا سريع .. خليهوي يجيب معاهو سماعتو محمود ده جيرانا مساعد طبي .. اناجريت كلمت محمود لقيتو كان طالع .. رجع جاب السماعة وجاء .. دخل عليها .. وجاء طالع قال ليهو البركة فيكم ..
والله التقول صبت فوقنا مطرة .. امي دي انهارت .. وكضمت
وانا مشيت قعدت في الواطة .. وفي حاجة قعدت لي في حلقي
ودموعي ديل نزلن .. يعني جدي وحبوبتي الاتنين؟ رحلو وتاني ماح اشوفهم ..
حبوبتي كنت بحس بيها شفيعة لامي (محامي) قدام صلاح ومراتو .. مع انها كانت بتطش لكن مابترضى اي زول يغلط على سامية بتها ..
وكانت بتريدني ريدة ماطبيعية .. وكلما تحضني عليها بتقعد تبكي وتقول لي امي الولد ده محروم من حنان ابوهو لازم تعوضيهو ..
حتى لمن ذاكرتها ضعفت .. بتختني في مكان ولدها الوحيد وبتقول لي تعال ياصلاح .. الله يرحمك يا الغالية ..
طبعا خالتي بدرية وزوجها جو للبكاء.. وبدرية دي بالغت في البكا ..
وامي لمن شافت بدرية بدت البكا من اول وجديد ..
على كل حال حبوبتي رحلت .. وانتهت ايام العزاء .. وبرضو ابوي ماجاء للعزاء .. وانا ماعارف عنو اي حاجة .. وكل ما ادور اسأل منه امي .. اغير راي ..
وامي اصلا ماقاعدة تجيب طريقو .. وانا ماعارف الحاصل عليهو شنو؟ مات ولا حي .. المهم بقى بالنسبة لي زيو زي اي شخصية غريبة ..
بعد العزاء انا وامي بقينا قاعدين برانا .. في القسم الغربي من البيت .. وصلاح باولاده في القسم الشرقي ..
وامي التزاماتها قلت بقت بس علي انا ونفسها ..
يوم من ذات الايام انا سألت امي ..قلت ليها يا امي ابوي اصلا ما اتصل عليك عزاك في ابوك ولا في امك؟؟ .. قالت  لي ماعزاني والله يافتحي ..لكن هو احتمال يكون ماسمع ..
قلت ليها كيف يعني ماسمع؟؟ هسي ده عذر؟؟ .. وليه مابسأل من الناس .. يعني انا هسي ماولده ليه مابسأل مني ؟؟..
قالت لي يا فتحي ابوك مشاغيلو كتيرة..  ومرات بنسى نفسو ..
قلت ليها يا امي الكلام البقولوهو للشفع ده انا بقى مابقنعني ..
عليك الله ماتحسسيني باني شافع ..
قالت لي اها اقول ليك شنو يعني؟؟ اقول ليك سمع؟؟ .. وماعايز يجي ؟ ولا اقول ليك ابوك ماعايز يشوفك؟
انا بظن بيهو الظن الكويس بس .. وهو غايب .. والغايب عذرو معاهو ..الحاصل في الحقيقة شنو ربنا عالم .. وابوك هو المسؤؤل يوم القيامة من تقصيرو ما انا ..
قلت ليها طيب مادام انت هسي رايقة كدا .. انا عايز اسألك سؤال..
ابوي ده سببو معاك شنو؟ يعني انا الكلام ده حارقني من زمااان
ومالاقي اسألك منو .. يعني ليه اليوم داك قال ليك انا ماعايزك في حياتي .. واصلا زمان لمن انا كنت صغير المشاكل الحصلت شنو خلتو يطلقك ..
سكتت مسااافة .. وجرت نفس عميق .. وراهو وجع مدفون في اخر الجوف ..
قالت لي مالك يافتحي ياولدي داير تفتح لي جروح .. وتشيل احقاد انت ماقدرها قلت ليها لو عايزاني ارتاح نفسيا..  احكي لي الحقايق ..
قالت لي كويس اتعدل كويس احكي ليك ..
شفت يافتحي .. يوم انا واقفة مكتبة في الخرطوم .. في زول وقف جنبي ..
وقال لي السلام عليكم ..
قلت ليهو عليكم السلام ..
قال لي انتي سامية برعي؟ .. قلت ليهو نعم .. انت منو ؟؟ماعرفتك ..
قال لي انا ود عمة  ابتهاج .. ابتهاج دي صحبتي .. هسي مسافرة ليها سنين في اوربا ..
المهم كانت بتقرا معاي في الجامعة .. قال لي انا ودعمتها وشفتك يوم في بيت ناس خالي .. اللهو ابو ابتهاج دي ذاتها ..
قال لي كدي انتي اطلعي من المكتبة ونتكلم ..
طبعا انا استغربت في الزول ده .. ولمن قال لي ابتهاج ..اطمنت طلعت معاهو طوالي ..
لانها صحبتي شديد .. زي اختي وبمشي معاها بيتهم طوالي وهي جات معاي هنا كم مرة .. المهم قال لي انا سألت منك ابتهاج  .. وقلت ليها انا عايز البت دي .. وابتهاج قالت لي بي طريقتك معاها ..
والحقيقة انا كنت متابعك كم يوم والليلة بس لقيت لي فرصة اتكلم معاك .. لوعندك فرصة تقعد نتكلم في حتة ولو ماعندك فرصة تديني وقت الاقيك فيهو ..
كان زول جرئ وما متردد .. وانا اول حاجة اتبسطت من شجاعتو ..
قلت ليهو جدا ماوراي حاجة بس دقيقة اخلص من المكتبة واطلع ليك ..
اشتريت حاات العايزاهن من المكتبة وطلعت ليهو .. راكب عربية جديدة وشكلو زول مرتاح وعندو قروش ..
وانا في الحقيقة على حسب ظروف ناس ابوي..  كنت عايزة اتزوج باي شكل كان .. عشان اخفف عليهم العبء والحمل ..
المهم طلعنا قعدنا برة تحت شجرة . على الشارع العام ..
قال لي والله انا عايزك على كتاب الله وسنة الرسول .. وما عندي اي ملعبة وضياع وقت .. لكن في الاول لازم احكي ليك ظروفي . انا متزوج بت خالتي .. اسمها عايدة وعندي منها ولدين وبت .. لكن ما متفقين ..
وانا اصلا ماكنت عايزها..  اتزوجتها مرضاة لي والدتي..
كانت بتتمنى اني اتزوج عايدة بت اختها .. وانا حققت ليها رغبتها .. واتزوجتها وعايدة عارفة كدا كويس .. ومتفق معاها من زمان اني لمن القى الانسانة العايزها  ح اتزوج .. وماعندها اي مانع ..
وانا هسي لقيتك انتي وعايزك .. انا زول الحمد لله ربنا منعم علي بالمال .. عندي املاك .. ومحلات تجارية .. وعندي وعندي .. وساكن في بيت ملك طابقين حدادي مدادي ..
ولو قبلتي بي بيتك جاهز في الطابق الاول في بيتي ذاتو .. عايدة بي اولادة تحت وانتي فوق ..
قلت ليهو لكن انا مستحيل ..اتزوج راجل مراة.. والحاجة المابرضاها لي نفسي مابرضاها لي مراة تانية ..
قال لي والله انا حكيت ليك الحقيقة .. كان بامكاني اغشك واخدعك .. زي مابعملو الرجال .. واقول ليك انا ما متزوج .. وبعدين تتفاجئي بالواقع .. وماح تقدري تتصرفي .. لكن انا كنت واضح معاك ووريتك الحقيقة ..
قلت ليهو خلاص.. انا سمعت كلامك .. خليني  افكر واستخير..  وارد ليك خبر مع ابتهاج..  لو وافقت بكلمها ولو رفضت بكلمها .. قال لي جدا .. وانا منتظرك اسمع منك خبر يفرحني ..
قلت ليهو ربنا يسوي الفيها خير ..
الى اللقاء..