مـدافن الألم .. طارق اللبيب

15

غايتو كلام معاذ كلام زول صادق .. وشكله كدا مابحترم ابوي كلو كلو .. وبتكلم عنه باسلوب .. اصلا ماممكن زول يتكلمو عن ابوهو .. ياخي انا الظالمني ومعاديني.. مابتكلم عنه بالطريقة دي ..

انا انتهيت من المكالمة بتاعة معاذ.. وقررت امشي طوالي.. واليحصل يحصل .. امي قبل كدا قالت لي انت راجل.. واتصرف زي ما عايز ..

بمسك ليها في الكلمة دي.. لو اكتشفت اني مشيت .. وممكن اقول ليها مشيت أساله .. اقول ليها انت قلت لامي شنو في التلفون؟؟؟ لانك انتي ابيتي توريني ..

ديل حجتين..

اهاابعد الغداء قلت لي بدرية .. يا خالتي انا عندي مشوار ضروري .. قالت لي بس ماتتأخر انا براي .. قلت ليها انتي براك مالك بتخافي؟؟ .. انتي والله تساوي الرجال ..

اها يازول ركبت مشيت .. وانا وصف البيت عااارفو.. ومؤكدو تمام .. ركبت نزلت في السامراب.. في المحطة القصاد البيت .. الكلام ده كان زي الساعة 4 ونص .. واتصلت على معاذ .. قلت ليهو انا وصلت السامراب .. ياسر موجود؟.. قال لي موجود انا ماسكو ليك ...

قلت ليهو ابوي برضو موجود؟؟

قال لي ايوة موجود قاعد .. ارح انحن منتظرنك ..

انا بتكلم مع معاذ وانا ماشي على البيت ..

دقيت الباب .. فتح لي الباب ياسر .. وسلم علي بي كل فرحة ودهشة .. ودخلت..

ابوي لمن شافني زي الصبت فوقو مطرة.. بقى يتململ .. اصلا ماكان متوقع.. انو انا ممكن اتجرأ.. واجيهو في البيت .. دخلت سلمت على معاذ .. وسلمت علي ابوي..ابوي سلم على سلام كدا زي التقول انا كاتل ليهو ابوهو ..

معاذ قال لي اتفضل يا فتحي .. يا ياسر عليك الله جيب الغداء ..

قلت ليهو لالا .. والله متغدي وشارب الشاي .. قال لي لازم تشرب حاجة .. قلت ليهو اديني موية ساده عليك الله ..

ابوي داير يقوم يمشي .. معاذ قال ليهو قايم وين يا ابوي؟ .. اقعد عليك الله لو سمحت ..

ابوي قال ليهو الزول ده .. القال ليهو تعال هنا منو ؟

معاذ قال ليهو الزول منو؟ .. ده فتحي اخوي يا ابوي.. انت موضوعك شنو بالضبط كدا؟؟ فهمنا ممكن ؟؟..

الزول ده انا قلت ليهو تعال .. اها رايك شنو؟

وانا طبعا" قاعد متمحن بعاين بعيوني .. عايز اشوف اخرو شنو؟ قال ليهو طيب.. دام انت ناديتو.. انا علاقتي شنو بالموضوع .. عشان تقعدني ..

قال ليهو عليك الله يا ابوي.. اقعد النتفاهم .. ماتفور لي دمي .. طوالي قعد .. ولا كأنه شي.. قال ليهو طيب يا ابوي .. عشان نحن نختصر الوكت.. ونشوف البنينا من العلينا .. انت فتحي ده مشكلتك معاهو شنو؟.. قال ليهو ماعندي معاهو اي مشكلة ..