شنو قصده هاااا شنو يقصد منو رفضه اني:فاطمة شنو يقصد ؟؟؟
فاطمة : اني أسالج المفروض شنو يقصد؟؟
اني : والله معرف
فاطمه : هو مو من نوعية يلعب وياج اكيد وراه سالفه اتصلي وافهمي السالفه زينب يلا اتصلي
اني ؛:: ما ما
فاطمه ولج اتصلي
مااااااااا
طلعت فاطمه بعد ما ملت مني مامني فايدة
صار العشاا الكل ياكل الا اني تاخذني الحسباات واجيبني الحسبات
خلصنا صعدت لغرفتي واجتني فاطمه
فاطمه :: مراحب هل لي ان ادخل
اني : طبي وسدي الباب
هي : اشونه ابو الاخضر هههههه
باوعتله صفح
فاطمة :اي هيج ليش ما لبستي تراك كدامه ومن زمان وفضتيه
اني : شنو ولج
فاطمة: غبيه هو شافج منا الولد داخ ههههههه مدوختهم بالاخضر
اني ؛: وجع وجع اطلعي برة
ذكرتني هو شافني اليوم سفري وهسه خابر خرب اني اشون بعد اصادفه والله استحي .
هي :: ثول ما خليتينا نفهم شي ام الكمل ضليت بحسرتي اريد اعرف شيقصد .. طبعا بعد هاي المكالمة بعد ابد ما دك واني كل مايدك الموبايل عبالي هو واطفر للموبايل ويخيب ظني
كعدت اسمع اغنية الاماكن هي كولش متوالمة وياي وخاصه مقطع كنت أظن وكنت أظن وخاب ظني وما لكيتك ..
مرت ايام واني العن نفسي على ثولي وغبائي ضليت كل ما اشتاق اله اباوع للرسايل وحتى رقمه حفظته ع الغيب
مرة اسبوع واني بحصرتي .. والاسبوع صار شهر وامير انقطعت اخباره وحتى اخوتي يواعدهم بره مايجي لبيتنا ..
والشهر صار اثنين وثلاثه ... ب يوم فاطمه راحت لكربلاء المقدسة تزور هي وعلي طبعا حبلت فبابا اخذهم واخذ ماما وياه يخاوفون على فاطمه لان بداية حمله ... اما حسين طالب بالدوام وحسام بالدوام مالته يعني البيت فضى عليه اني وسحر .. سحر دخلت للحمام واني رحت اشنك العجين جانت الساعه ب 10 واشويه واسمع سحر تون واتصيح الي
اني رحت اركض للحمام فتحت الباب لكيته واكفه ولازمه خاصرته وتعصر والدم واكع ع رجليه طلعت كوة برة ولبسته ثوبه ونومته ورحت اتصلت على حسام كالعاده مايرد وخاصه بالدوام يحطه ع الصامت ويشتغل .. دكيت ع حسين وجان اسمع موبايله يدك بالهول طلع ناسيه رقم امه كتله انطيني رمز فونج خل اتصل بأمج اتصلت بأمه هم ماترد حيرتني شسوي ماكو حل غير اتصل على امير طبعا اتصلت من موبايل سحر كالعاده دوم جاهز للمحتاج
ااني :الو حتى ما اخرعه سلمت بهدوء
هو : وعليكم السلام زينب كاله بأستغراب ؟؟؟؟ واني هم انصدمت ابسرعه عرف صوتي اني ؛: خويه بلا زحمة تكدر تجينا؟
هو : اي خير صاير شي
اني لا خير سحر دتولد واني وحدي بالبيت ومعرف شسوي
هو : دقايق وجايكم ..
ومرت نص ساعه وسحر تون وتصيح بصوت عالي يمه بعد مكدر حموت الحكوني
اني :: كولي يالله يا مسهل سهل
ندكت الباب اني جنت محضرة نفسي طلعت فتحت والله كنت مشتاقه اله عبالك دهر ما شايفته . دخل هو وامه هم اخذو سحر وامه كالت تعاي وياي اني ماكدر لوحدي كلبي ضعيف ورحت وياهم طبعا لمستشفى اهلي . امه ضلت كاعده بالردهه هي وامير واخذو سحر اتصيح يمه لا تعوفيني .
اني باوعت لأم سحر كتله خاله الجهاز مو عدكم ليش ماجبتي شي وياج شنو يلبس الطفل؟.
امير كبل طلع موبايله واتصل باخوه يجيبه واني توسلت بالممرضه ادخلني اعرف سحر خوافه ودلوعه ولازم واحد يوكف وياه الا تتشجع بالكوة الا رضت ادخلني دخلت ومن شافتني ردت روحه لزمت ايده وضليت اقرة اية الكرسي ودعاء لتسهيل الامر . وبعد عناء خطية الا ولدت بنوته ونزلت على اديه قطعه ورديه كبل شمرته على صدر امه المشهد جان جدا مؤثر وحلووو اخذو الطفله ينضفوهه واني لبست عدلت سحر بعد الولاده وطلعوهه من صاله الولادة الى صالة الامهات .طلعت ادفع بسحر وهي كاعده بكرسي متحرك وبته بحظنه وشفت حسام واكف قلقان هو واخوة سحر وامه كعدوا وارتاحو واخذت صور سلفي مع سحر وبته و كمت اسولف لحسام عن حجايات سحر واشون تغلط عليه وهي تطلك وهو شبعان ضحك
واني هم اضحك من كل كلبي ونسيت اكو اعيون عسلية دتراقبني وتراقب اي تحرك مني بالصدفة صارت عيني بعينه جان حاط ايده على فكه ويلعب بالحيته فديته ابسرعه درت وجهي خجلت منه
رجعت للبيت بعد ما طلعوا سحر واخذه اخوه لبيت اهله
..
مرت ايام
واجه امير لبيتنا يوصل سحر وبته وامه وياهم لان حسام ما يكدر بدونهم .
فكعد بالاستقبال وحده لان حسام عافه وراح يم بته
اني بالمطبخ وجان اشوف فاطمه لابسه عبايته ونازله من الدرج
اني اتعجبت ورحت وراهه اشو هاي دخلت للاستقبال على امير وسلمت عليه اني كلت هاي تخبلت اشبيه على لحظه يشوفه زوجه الخبله
رحت اصنت عليهم من ورة الباب
فاطمه :: اشونك خوية
امير ابسرعه وكف هلا اختي الحمدلله
فاطمه:خوية بس اريدك بموضوع؟؟؟
امير :: اتفضلي
فاطمه:: اني زينب اعتبره اختي وروحي واكثر هم من روحي اخاف عليه
هو ضل ساكت وهي كملت
مخابرتك شنو تقصد بيه ممكن تفهمني
هو:: اني اسف ولحد الان خجلان منه ومن نفسي واعتذر منه ومنكم وعد بعد متتكرر اني مو من هاي النوعية
هي : خوية اني مجاية الومك ولا اريد اعتذار اني اريد اعرف شنو تقصد بكلمة رفضتيني ؟؟
طبعا فاطمه اني صحيح اعرفه جريئة بس متوقعته لهذا الحد توكف كدام واحد صاك وتحجي بثقه ولا خايفه من احد يدخل..
هو:: راد يحجي اني دكيت الباب عليهم هي رأسأ طلعت وشافتني كتله وجع علي شفته اجه للبيت اخاف يشوفج طلعت ابسرعه ..
وضليت بحصرتي وشكرت فطومه على موقفه وياي ضلعه فديته ...
اني وفاطمه ضلينا نصنت عليهم انتظرنا لحد ما علي راح يغير ملابسه ويرجع لأمير . فاطمه تعمدت تلبس عبايته وتمشي من كدام باب الاستقبال حتى امير يشوفه بلكت يصيح اله وتفهم ؛خطط تعبانه بس شنو نسوي ماعدنا غير اني لو اموت ما اخابر شاب وهو بايع ثكل وما خابر وحتى لو خابر اني تجيني حالة انثوال ماعرف ليش مع اني من كنت بالدوام اصادف زملائي واسلم وعادي بس هذا شي ثاني .. صدك نجحت الخطة وصاحه وهي ماصدكت ودخلت كال اله شنو الي مافهمتي اني الي اريد افهم ليش كل ما اتقدم اله ترفضني!!!!!!!
فاطمة : شنو انت اشوكت تقدمت اله لخاطر الله محد من اهلهة كال اله هيج شي ؟؟؟؟
هو: لا ماتقدمت بشكل رسمي بس وصيت سحر تفاتحه بالموضوع وتجس نبضه قبل لا اتقدم اله بشكل رسمي حتى اذا موافقت ماصير الي احراج كدام صديقي ..
فاطمه فتحت حلكه 108 صدك تحجي انت
هو: اي وسحر كالت هي ماتريد تزوج وممفكرة بالزواج واستغربت ورة فترة قصيره انخطبت ووافقت وعليه لا ضجت حيل . ومع هذا من انفسخت خطوبته ما قطعت الامل وهم خليت سحر تاحجيه وهم رفضتني وذاك اليوم من شفته العصر بالليل اتهورت وخابرته بس اريد افهم اني ليش ترفضني؟؟ كاله ولزمته العبرة ... وترخص وطلع
مهما كانت شخصية الانسان قوية تجي لحظه ويضعف من احد يمس كرامته وكبريائه ... اهنا طلع امير لسيارته ..
وفاطمة جرتني من يم الباب لان واكفه مثل الصنم من الكلام الي سمعته
اني :: امير طلع راغب بيه ويريدني والله ممصدكه
فاطمة :: الله لا يوفقه هاي الغيورة عالدكته
اني :: دمرتني ؛ وكمت ابجي على حظي وفاطمه تواسي بيه
فاطمه: روحي اصعدي لغرفتج فضحتينا
امير طلع برة وخابر امه تجيه يم الباب وودعوهم اخوتي وراحوا ..
نايمة بغرفتي واقرة برسالته الي كتب بيه ليش رفضتيني . سودة عليه حزت بنفسك لان رضيت بقاسم ابو كرش وعفتك والله لو ادري مجان ابد ضيعتك من ايدي اوف ياربي نمت ع ضهري واباوع للسكف واذكر صوته اشون كان من يحجي مع فاطمه بحركه وبالاخير كولش ضاج من نفسه حس بالذل من ورة عملت اخته .
دخلت فاطمه عليه
فاطمة:: كبد حبي لا اضوجين والله العظيم اذا مصار امير من نصبيك فلا اسمه فاطمه بت ابوية
اني:: صدددك اشون بيأس كولته
كالت مدام هو رايدج راح يتفهم من اكوله على عمايل اخته الناقصه ...
اني : الله لا يحرمني منج
فاطمة : تشكرااات بوسي ومدت اديه
ضحكت وياه فديته اني وجنت وهي خلتني اضحك ..
فاطمه :: شفتي من كتلج مفعول الاخضر الحصاري قوي ما تصدكين عمي خلاه يخابر ويتنازل خبل الولد
.اني :: يومه فدددددديته طلع يفكر بيه والله ابد مصورت هذا الشي يوومه الحب يومة
فاطمه:: ههههههه اروح لعلاوي احسن الي
طلعت فاطمه واني ضليت سارحه بفكاري اذكرت من طحت وشالني وصار راسي على صدره ومن وصلنا للمستشفى اشون اهتم بيه عبالي من باب الانسانية طلع من باب #العشق . واذكرت اشون كانت نظراته نظرات انكسار من شفته يباوع الي بالمراية واني اغسل واذكرت من اصر يوصلني كل هذا طلع حب طلع يتمناني مثل ما اني اتمناه صار نص الليل واني منايمه كمت اتعوذت من الشيطان وصليت صلاة الليل واول مرة ادعي الله يكون امير من نصيبي دعيت من كل كلبي . ونمت على امل انجمع بأمير ...
