قصة حياتي

قصة ساحر

توقفت معك سيدي القارئ الكريم عندما إعترفت لي مني بالسبب وراء ذهابها للسحره و الدجالين. و ذهابي معها للساحر شندويلي
قال الساحر : انت مين
قلت له : مش هما كفوك و وفوك خليهم يقولون لك انا مين
قال لي : انت ازاي بتكلم سيدك كده؟
قلت له : سيدي هو الله و رسوله غير كده عبد
قال لي : ما انا فعلا عبد، مش عايز القوه و المعرفه و الفلوس
قلت له : أيوه
قال لي : انا ممكن اعلمك أصول السحر الاسود و اخليك قوي
قلت له : أفكر
قال لي : منتظرك بكره بعد أذان المغرب
خرجت من البيت الي بيتنا ثم أكلت ثم دخلت غرفتي و انا افكر في العرض حتي نمت
****
في اليوم التالي
قالت امي : انت مؤمن يا حبيبي خليك بعيد عن شندويلي
قلت لها : شندويلي مين؟
قالت لي : شندويلي اللي انت و مني رحتوا له
قلت لها وانا مستغرب : ازاي عرفتي ؟!
قالت لي : مش مهم عرفت ازاي، بس يا ابني انا هاحكيلك قصة الراجل ده و اسيبك انت تختار
قلت لها : طيب بس بعد كوبايتين شاي حلوين من ايديك
عملت امي الشاي و قالت : صلي للي يشفعلك
قلت : عليه أفضل الصلاة والسلام
قالت : القصة بدأت من أيام جدك خالد، كان في شيخ إسمه كرم،  كان الناس كلها بتحبه، كان متجوز مراه اسمها حسنيه، كانت ست مفتريه، تتخانق مع كل الناس حتي الشيخ الطيب، لكن حصل أن الست بقت حامل
رشفت امي رشفه من كوب الشاي ثم أكملت : لكن أسلوبها اتغير بقت تود الناس و تبارك في الأعياد والمناسبات،  حتي حصلت الفاجعة
هجم بعض اللصوص علي منزل الشيخ و قتلوا حسنيه و سرقوا الصيغة و حاجات تانية خالص،  لكن ربنا كتب للطفل انه يعيش
رشفت امي رشفة أخري من كوب الشاي ثم أكملت : حزن الشيخ كرم علي موت مراته، لم نعد نراه في المسجد ولا في الشارع إلا قليلا، حتي شمت الناس رائحة كريهة  من بيت الرجل
دخلت الناس بيت الرجل لتجد دماء و أشلاء ناس و قطط و كلاب، بحثت الناس في كل مكان، لتجد رسومات علي الحائط لنجوم و مثلثات و مربعات و أرقام حتي وجدوا الرجل يقول : مراتي رجعت ، انا نجحت يا شندويلي ، حسنيه حبيبتي، ثم طعن نفسه بالسكين و هو يضحك بجنون
قلت لها : وايه حصل بعدين؟ !
قالت لي : جت الحكومة و شمعوا البيت، الناس بحثت عن الواد شندويلي لكن لم يجده أحد، بعد 15 سنه جه شاب من مصر ، جه زي المصيبة 5 رجاله ميتين  لقيهم الناس في المقابر و عليهم آثار تعذيب معاهم ورقة مكتوب عليها نحن قاتلي حسنيه و كرم
و بعديها بيومين عرفنا أن الشاب ده هو شندويلي و فتح بيت أبوه و أمه، بعديها بكام يوم عرفنا انه بيمارس السحر و الشعوذة، الناس حاولت تطرده لكن اللي حصل أن الناس تصرخ و يخرج من اذنها و أنفها دماء ثم تموت، علشان كده بقولك يا ولدي خليك بعيد عنه
منتظر تعليقاتكم و نقدكم