ﺣﻦ ﻳﺎ ﻗﻤﺮ ﻭﺃﻭﻓﻲ ﻟﻲ ﻣﻴﻌﺎﺩﺍ ﻣﻨﺎﻣﻲ ﺧﺎﺻﻤﺘﻮ ﻭﻟﻲ
ﻋﺎﺩﺍ
ﻣﺎ ﻏﻤﻀﺖ ﺃﺟﻔﺎﻧﻲ ﺍﻟﻄﺎﻝ ﻣﻴﻌﺎﺩﺍ ﺃﻣﺴﺢ ﺩﻣﻮﻋﻲ
ﺍﻟﺒﻘﺎﻟﻲ ﻋﺎﺩﻩ
ﺃﺭﺟﻮ ﻣﻦ ﺷﻮﻓﺘﻚ ﺍﻹﻋﺎﺩﻩ ﺟﻔﺎﻙ ﺷﻘﺎ ﻭﻧﻈﺮﺗﻚ ﺳﻌﺎﺩﻩ
******
ماريا جابت الشاي لي سيد راجلا وختتو قدامو وهي لاويه بوزا وعيونا مليانة كلام
* مالك خاته الشاي دي كده زي العاملاهو برا نفس
وطوالي صرت وشها وهي بتقول ليهو
* ولدك ده شوف ليهو مكان غير هنا البيت ده بيتي ودايره آخد فيهو راحتي وولدك كبر وبقا راجل
* اوديهو وين يعني!!!?
* كيف يعني توديهو وين!! ..رجعو لي امو
وشال سيد كباية الشاي علي خشمو وشرب منو جقمة ورجعو تاني في الصينية وبكل برود ردا عليها
* زمان حرشتيني علي امو لحدي ماشلتو منها بالمحكمة اسه دايراني ارجعو ليها!
وماريا قامت من مكانا وهي هايجة وختت يديها في نصها
* حرشتا منو ياراجل ما تتصلبط فيني براك قلتا داير تجيب ولدك تقعدو معانا...خلاص شيلو وديهو لي امك المهم الولد ده يمرق من بيتي ..بناتك كبرو وهو اليوم كلو حايم وراهم وفي نصهم
وسيد وشو اتغير لما سمع كلاما الوراهو ألف معني ولو هو ما عارف ولدو كويس وعارف انو ماريا ماطايقاهو ودايراهو يطلع من البيت الليلة قبل بكره كان ممكن يتخيل انو ورا كلاما ده في شي حاصل
* قصدك شنو بي كلامك دي.!!..ولدي بخاف علي اخواتو اكتر مني ومنك ما ترميهو بي كلام مافيهو
وماريا حرقا ردو عليها والغيرة من الولد حارقه قلبا خاصة إنها ما ولدت إلا بنات واسه هي حامل وكانت مأملة في الولد ومشت عملت صورة عشان تعرف نوع الجنين شنو وكان مناها يكون ولد لكن خاب املا واكدت ليها الطبيبة إنها حامل في بنت للمرة الخامسة
* شنو ولدي..ولدي.. قلتا ليك ولدك ده شوف ليهو مكان غير بيتي وإلا انا البفوت اخلي ليك البيت انا وبناتي وشوف ليك زول يخدمك غيري
وشال كباية الشاي وبشرب فيها وهو ما شغال بي هيجتا ونقتا الفاضية وردا عليها بكل برود
* كان طالعة اطلعي براك بناتي بقعدو في بيت ابوهم واخوهم بحرسم... وكلها اسبوع وتجي المره الجديدة تقعد معاهم
ماريا بقت تلطم وتضرب في صدرا لما سمعت من سيد انو عرس فيها وخلاها زي المجنونة
* سجمي وووووووب علي .. انتا عرستا فيني ياسيد
