كمبيوتر بغسل في العربية وبغني بي صوت جميل
حن ياقمر وافي لي ميعاده
ده حبيبي خاصمتو لي عاده
ومازن بسمع فيهو وهو متكيف لي صوتو الجميل وكمبيوتر طوالي بردد الاغنية دي
نمت صداقة قوية بين كمبيوتر ومازن وبقا ملازم ليهو طوالي في شغلو وفي البيت وكمبيوتر دايما بحميهو وبدافع عنو وعباسه كان كل همهما انو نهاية اليوم تلم القروش من عرق وتعب الاطفال ديل وهي قاعدة في مكانا زي التور تاكل وتنوم..
وفي يوم من الايام كان مازن مع كمبيوتر في السوق بغسلو في عربات اصحاب المحلات كمبيوتر مشغول في غسيل واحدة من العربات ومازن خلص وقفل العربية وقعد في طرف المصطبة يعاين في الناس والزحمة الشديدة خاصة انو العيد قرب والناس كلها جارية علي الاسواق عشان يقضو حاجاتم .. مازن شاف الموس ومعاهو اتنين تاني وهم من الاولاد الساكنين معاهم في بيت عباسه لكن هو مابختلط بيهم ..وشاف الموس ماشي ورا راجل لابس جلابية وشافو وهو بدخل يدو في جيب الراجل وبشرطو بي موس وبسحب منو قروش بدون ما الراجل يحس بيهو وبسرعة مررا لي واحد من الاتنين المعاهو الاختفو في ثواني بعد ما استلمو منو القروش ووقف الموس علي طرف الشارع لحدي ما الراجل المسروق اختفي وسط الزحمة كل ده حصل ومازن شايف كل حاجة والموس انتبه لي مازن وكمبيوتر وعاين ليهو بنظرة تهديد وجا ناحيتم وكمبيوتر اول ما شاف الموس طوالي قفل باب العربية ووقف يعاين ليهو
* الفاره ده قول ليهو ما تنطط عيونك دي كده.. ولما بشوفنا تاني احسن يعمل فيها رايح
وكمبيوتر نهر الموس
* شتت من هنا عشان يازول ما تجيب لينا هوا
* انا مشتت لكن وري الفارة ده السستم بتاعنا مايقعد يعاين لينا تاتي
وبزهج طوح كمبيوتر بي يديهو قدام الموس
* قلتا ليك شتت من هنا يازول احسن ليك
مازن فهم انو هو المقصود بالكلام والموس عاين ليهو بنظرة تهديد واختفي بسرعة..وكمبيوتر كمل شغلو بدون مايقول اي حاجة لي مازن لحدي ماجات نهاية اليوم وهم راجعين فجأة قال ليهو
* مانفسك ترجع بيتكم
وسكت مازن شوية وبكل الشوق الجواهو لي اهلو الفارقم من زمن طويل
* اكيييد والليلة قبل بكره كمان لكن كيف وانا مابعرف السكة
* انتا بس وريني اسم الحتة الساكن فيها واسم مدرستك وكلها كم يوم واعرف المكان
وبلهفة ونبرة ترجي
* والله لو عملتها يكون ده معروف مابنساهو ليك طول حياتي
* المهم ماتدقس تاني وترجع لينا- واتغيرت لهجتو للجدية الشديدة- الموس والمعاهو خايفين منك اختاهو بعيييبد
