وقطع صوت موبايل مازن علي منة اي فرصة لمواصلة كلاما وردا مازن علي تلفونو بدون ماينتبه للرقم وقام من مكانو وهو منزعج
* طيب..طيب انتو في ياتو مستشفي...مسافة السكة واكون معاكم
وانتهت المكالمة وشال مازن مفاتيح عربيتو ومنة بتقول ليهو بي خيبة امل لما شافتو طالع
* ماشي وين
* عندي مشوار ضروري
* يا خسارة الاكل التعبتا فيهو..
وسألتو انوار بقلق
* في شنو ياولدي مالك منزعج كده
* زاهر ..زاهر تعبان ونقلوهو المستشفي
* مالو
* قالت تعبان شديد لقوهو واقع قدام الباب ومضروب
وقبل مازن علي منة
* عمي وين?
منة ردت عليهو وهي مغيوزة وختت يدها في نصها
* زاهر. ماعندو زوق مالقا وقت يقع فيهو إلا اسه
وضحكو الاتتين علي كلاما ومازن برجع يقول ليها
* ياجنينة عمي وين ?
وردت بزهج
* في الهول ..في الهول
وطلع مازن بسرعة وسلم علي الناجي واعتذر ليهو عشان مستعجل لازم يمشي المستشفي
منة كان نفسها تعرف منو زاهر الجري ليهو مازن بسرعة كده وخلا الاكل بي سببو
* ماما زاهر ده منو?!
وانوار كانت سرحانة وما انتبهت لي منة وهي بتتكلم معاها
* امي..مشيتي وين
وانتبهت انوار من شرودا
* شنو..مالك دايرة شنو!!
* انتي المشيتي وين..من قبيل بسأل فيك منو زاهر ده وانتي ولا سامعاني
* زاهر..زاهر
وماقالت انوار حاجة تاني وسكتت وطلعت من غرفة مازن ودخلت غرفتا وقغلت عليها الباب وخلت منة مندهشة من تصرفا الغريب ده
( في القضارف )
طه ما خلا عادتو ولسه كل يوم بفطر من يد زينة ويشرب كباية الشاي المظبوط...
* الراجل ده كيف معاك
وابتسمت زينة لما سمعت طه بسأل من كرار
* كرار بقا زول علي يدك..انتا خليتو يتعدل
* كرار زول غشيم كانت عاجباهو قوتو ومالقا سكة عديلة يمشي فيها ولازول يوجهو
* البركة فيك ياطه انتا وقفتا معاهو وخليتو يبقا زول بعد ما كان بلطجي
وابتسم ليها طه بي امتنان..
