قدر كمبيوتر يوصل لي المكان الكان عايش فيهو مازن مع ابوهو وانوار وعرف انو سيد والد مازن مختفي من فترة طويلة وما معروف اذا كان حي ولا ميت وانو انوار زوجة ابوهو خلت البيت تحت ضغط ابوها وانو ابوها طلقا من سيد ابو مازن وانها اتزوجت من فترة طويلة .. ومافي زول عارف عنوانا وين ..واصبح من الصعب الوصول لي العنوان ده عشان كده فضل كمبيوتر انو يفضل ساكت ومايوري مازن انو عرف حاجة عن مكان سكنو وعن زوجة ابوهو انوار لأنو وصل لي طريق مسدود وواقفة قدامو حيطة عالية ماعارف يتخاطاها كيف
اتسلل الموس واصحابو قريب الفجر هو واتنين من جماعتو وهم شايلين ومحملين ومبسوطين بعد ما دخلو واحد من البيوت الفاضية وسرقوها اثناء غياب صاحبا التاجر الثري هو وزوجتو الكانو في الحج ... دخل الموس وهو متكيف ونافخ ريشو وبفمر انو بكرة بعد ما يبيع الحاجات دي ح يمشي يتغدا غدو رهيبة ويشتري هدوم جديدة ويمنجه نفسو تماااام هو واصحابو...وفجأة دوت صوت صفارات الشرطة وداهمو البيت وقبضو علي اغلب الفيهو بمافيهم عباسة وقدر كمبيوتر ومسمار ومازن يطلعو منها بي قدرة قادر وده لأنهم بطلعو من قبل الفجر ويمشو علي موقف المواصلات من بدرررري وبعدها بمشو السوق
ووصل الخبر لي كمبيوتر وهو في السوق من بعض الاولاد القدرو يهربو من البيت قبل ما الشرطة تقبض عليهم.. وشال هم كبير..وين ح ينومو الليلة بعد ما الشرطة داهمت المكان الوحيد الكان بلمهم ... لحدي ما اتذكر حاجة خلتو مبسوط ولكن اول شي لااازم يكلم مازن بالتفاصيل العرفا عن حياتو السابقة
* خلاص بيت عباسه مافي طريقة تاني نخشو الطارة جات وعملت كشة ورفعوهم كلهم
ومسمار كان اكتر زول متضايق من الحكاية دي لانو عارف الشارع والبلاوي الفيهو ولو نامو في الشارع ممكن الشرطة تحي تقبض عليهم
* الليلة نوم مافي ولا كيف
اما مازن فما عرف يقول شنو ورغم الفترو العداها في بيت عباسة الا انو ما كان بعرف يتصرف زي كمبيوتر ومسمار وكان متكل عليهم ونوم الشارع ده جربو مرة واااحدة لما طلع من بيت امو و ماكان عارف الشارع والمخاطر الفيهو..وردا كمبيوتر
* الليلة ح ننوم ..وكمان في بيت نضيف وسراير مفرشة ومافي زول تاني معانا
ضحك مسمار ومازن علي كلام كمبيوتر
* اووووو كمبيوتر الليلة ضارب سلس ولا شنو وشغال تهضرب فينا
وردا عليهم كمبيوتر بكل هدؤ
* ح تشوفو كلامي جد ولا هضربة..كملو شغلكم وبالليل ح نمشي بيتنا الجديد
وفضل مسمار ومازن اليوم كلو يضحكو ويتريقو علي كلام كمبيوتر وهو ما شغال بيهم وساكت وهو بعاين ليهم بدون ما يعبرم بي اي كلمة
