قرر طه انو ينزل الخرطوم هو واولادو ومرتو منها يغيرو جو شوية ومنها يفتش عن اي حاجة ممكن تدل علي شخصيتو وتوصلو لي اهلو..واتصل علي الناجي عشان يشوف ليهم بيت يأجرو ليهم لفترة شهر عشان يقعدو فيهو
* طالب منك خدمة
* قول ياصاحبي ..والله يقدرني واتستر معاك
* انا جاي الخرطوم ومعاي اولادي وعايز لي بيت او شقة مفروشة لمدة شهر..لو لقيتا لي تكون ما قصرتا واي مبلغ يقولو صاحب البيت انا حاضر
وردا الناجي وهو فرحان بي جية طه
* اووووو معقولة اخيرا ح تجي الخرطوم
* ايوه نويت ...ما بتذكر اني جيتا قبل كده
* ابشر ..اديني يومين تلاتة وبكون لقيت ليك البيت
* اهاااااا...اهما حاجة لاااازم تجيب لينا اولادك وتجي تزورنا...مادام ماجبتهم لينا في بلدنا اها..جيناكم لحدي الخرطوم
* وانتو كمان لازم تجونا ..خلي الاولاد يتعارفو
* خلاص بستني منك خبر البيت عشان اجي وراسي عديل
* ماعندك مشكلة
وانتهت المكالمة بين الصديقين وانوار شافت الناجي مبسوط ويتبسم بعد مكالمتو مع طه
* الليلة اكيد جابو ليك خبر سعيد عشان كده مبتسم وفرحان
* آااي والله ..طه صاحبي جاي هو واولادو الخرطوم قال داير يغير جو شوية من قعدة القضارف والشغل..وداير ليهو بيت يقعد فيهو الفترة دي وانا من بكرة.ماشي اشوف مكتب العقارات عشان يشوف لينا شقة مفروشة ولا بيت
* مكتب عقارات شنو..وشقة شنو..انتا ناسي بيت مازن..مقفول ومافي زول قاعد فيهو غير الغفير
* الله يفتح عليك والله مهما فتشنا مابنلقا بيت زيو..نضيف وواسع وجاهز من كلو.. لكن خلينا نشاور،مازن اول
وسمع صوت مازن الجا داخل اثناء ما الناجي بتكلم مع انوار عن موضوع البيت
* بقيتو تتشاورو من وراي وبعتوني
وسلم علي الناجي وانوار وقعد وقبل مايردو عليهو جات منة ووقفت ليهم
* هو انتا فاضي لينا ..بقيت اليوم كلو مع اخواتك وناسينا
وردا عليها ابوها ونهرا
* الناس بتقول السلام عليكم حتي بعد كده تتكلم
* شوف يا ابوي انا مسافة اقول السلام عليكم بلقاهو مرق ليهو علي حته
وضحكو علبها كلهم واتغاظت منهم
* تضحكو علي..طببيب تاني قولو لي اعملي وسوي
* بابت اسكتي حبة خليني اتكلم مع اخوك ده
