منة.بتعاين لي شكلها في المراية بعد ما خبيرة التجميل خلصت شغلا. بعد ما عملت ليها مكياج بسيط وناعم. اظهر جمال وشها وملامحا الجذابة الما كانت محتاجة لاي زينة فهي جمالا طبيعي خلقة ربنا..وتسريحة شعرها النازل بشكل متموج بطول يصل لي منتصف ضهرا منة بقت تعاين لي روحا وهي مبسوطة وفرحانة ودخلت عليها امها
* ماشاء الله تبارك الله تسلم ايدك يامدام مريم
ومريم خبيرة التجميل الحست بالفخر علي ثناء انوار علي شغلا
* والله بتك جمالا طبيعي وما محتاجة لي اي حاجة ما شاء الله عليها
* وانتي ماقصرتي شغلك جميل وراقي
* الحمد لله اول عروسة تقعد مستسلمة بدون ما تعنل حركات وتتنرفز
* معقولة منة قعدت هادية كده
وردت عليها منة
* موش قلتي لي خليك تقيلة. وانا عملتا بي تصيحتك
وشالت مدام مريم شنطتا
* يلا استأذنكم انا لازم امشي بعد كده
وانوار مسكت فيها عشان تقعد
* معقولة ...لاااا لازم تقعدي وتحضري معانا المناسبة
* اعذروني ..عندي عروسة تاني ماعايزة اتأخر عليها
* لا خلاص مادام عندك ارتباط تاني ح نعذرك
وغادرت مدام مريم ورجعت انوار لي بتها
* اجهزي سريع الناس ديل شوية وبجو عايزاك تكوني جاهرة لما اقول ليك تطلعي
* طيب يا امي..نادي لي مها صاحبتي من بره خليها تحي تساعدني في لبس الفستان
* مها. جاياك..بوصيك بعدين اوعك من الشلاقة والخفة
* هوي يا امي هو انا من اسه الوقفة غالباني وبطني واجعاني..خفة شنو وشلاقة شنو...صوووووووت مني ما ح تسمعيهو
وطلعت انوار عشان تشرف علي آخر التجهيزات قبل ما يوصلو ضيوفا... وغمزت منة لي روحا في المراية وهي بتقول
* عسسسسسولة يامنة..لكن يارب اععجبو
وفي بيت نجوي اطلقت زغرودة فرح وهي بتسمي بي اسم الله لما شافت مازن وهو في كامل اناقتو وهو لابس بدلة سودا انيقة وباس يدها وهو بسمع منها كلمة مبروك الطلعتا منها بكل فرحة وسعادة
* الله يسعدك ويهنيك ياولدي
* ويخليك لي يا امي
* اخواتك وماريا ح نغاشهم في طريقنا
* انا رسلتا ليهم عربية مخصوص تجيبم ومتفق مع الح يجيبم نتلاقا في الشارع بره قبل بيت عم الناجي عشان نخش سوا
