أصدقاء لا أزواج .. بقلم : أميرة عادل

الحلقة الرابعة

#أصدقاء... لا أزواج
بقلم : أميرة عادل

الحلقة الرابعه:

اكرم (باحراج ) : لا طبعا .. مريم روحتها من زمان جدااا .. ورجعت انا كملت السهره مع الشباب اصحابنا...  وبعدين ايه رقاصه دي يا ماما
منال (بحده) : ايه مخدتش بالك وهي بترقص ولابسه فستان ولا قميص النوم .. ولا مشفتش اصحابك وهما قاعدينلها على الارض وبيصقفولها ... ولا مشفتش بيصوا عليها ازاي ..ايه اتعميت
اكرم : يا ماما هي كانت فرحانه بس .. وبعدين البنات كلهم لابسين كده دلوقتي
منال : هو انت ايه يا خي .. مفيش نخوه خااالص كده .. مفيش دم بيجري في عروقك .. جتك القرف انت وهي ...
وسابته ودخلت اوضتها وهي بتقول لنفسها : ربنا يهديك يا اكرم يا بني وتفوق من اللي انت فيه ده
دخل اكرم علي اوضته واتصل علي مريم من قبل حتى ما يغير هدومه
اكرم : وحشتيني
مريم : كداب
اكرم : ازعل كده .. بقا انا كداب
مريم (بدلع ) : اها عشان بتقول وحشتيني واحنا لسه كنا سوا
اكرم (بحب ) : يا حبيبتي .. انت بتوحشيني وانتي معايا .. نفسي اغمض وافتح الاقيكي معايا علي طول
مريم : بجد يا اكرم
اكرم : بجد يا عيون اكرم .. انا مكنتش عايش قبل ما اعرفك ..عمري ابتدا من يوم ما عرفتك ..انتي صالحتيني علي الدنيا وعرفتيني عليها وحبيتها عشانك انتي وبس
مريم ( بدلع ) : بحبك قووي يا اكرم
اكرم : يالهوووي علي اكرم .. قوليها تاني كده
مريم (بدلع اكتر) : بحبك يا أكرم
.........................................................................................................................................................
تاني يوم الصبح (يوم الجمعه ) صحيت فريده ومريم ونزلوا يفطروا مع يوسف علي غير العاده... وهما بياكلوا
يوسف : فريده حبيبتي .. في عريس متقدم لك
فريده : وانا مش موافقه
يوسف : مش لما تعرفي هو مين الاول يمكن توافقي
فريده : عرفت ... مش كريم برضه ... وعموما كريم او غير كريم انا مش عايزه اتجوز دلوقتي
يوسف : ليه بس يا بنتي .. ده كريم شاب كويس وابوه راجل محترم وداخل معايا في شغل
فريده ( بسخريه ) : كريم شاب كويس !!!! طب كويس هههه ... انا مش هتجوز خاالص ريح نفسك ..عن اذنكم
قامت فريده وطلعت تقعد في الجنينه
يوسف بص لمريم اللي كانت سامعه الحوار بس مقالتش ولا كلمه لانها شايفه ان الموضوع ميخصهاش
يوسف : مش سامع صوتك من الصبح يعني
مريم : بابا سيبها براحتها .... سيبها لحد ما تلاقي اللي تحبه وساعتها هي اللي هتيجي تقولك عايزه اتجوز
يوسف : ممممممم جايز برضه ... وانتي يا هانم التاخير بتاع امبارح ده لو حصل تاني .. مش هيحصل كويس .. انا عديتها بس عشان منكدش عليكي يوم خطوبتك .. وانا ليه كلام مع اكرم لما اشوفه
مريم : بابا .. لو سمحت متتكلمش مع اكرم ف حاجه ...انا  خلاص وعدت حضرتك اني مش هتاخر تاني .. عن اذنك
وطلعت مريم علي اوضتها تكمل نوم
يوسف لنفسه : انا دلعتك قوي يا مريم عشان محسسكيش انك من غير ام .. وادي النتيجه .. عايشه بدماغك وبس .. كل ده لازم يتغير ..
يوسف بصوت عالي : دلال ..انتي يا دلال
دلال ( جت جري ) : افندم يا يوسف بيه
يوسف : شيلي الاكل ده خلاص
ودخل اوضه المكتب ..
دلال لنفسها : ده ايه الناس المجانين اللي انا عايشه معاهم دول ... توب علينا يارب
.........................................................................................................................................................
فريده بعد ما سابتهم علي الفطار خرجت تتمشي في الجنينه شويه .. قعدت علي كرسي قدام البسين ..وسرحت لزماااان
فلاش باااك..
في نيويورك....
فريده عندها 7 سنين و راجعه من المدرسه تعيط
سعاد : مالك يا فري يا حبيبتي بتعيطي ليه
فريده : عشان النهارده كل اصحابي كان معاهم باباهم في ال father day  وانا لا ..اشمعني انا .. فين بابى
سعاد وهي بتتبطب عليها واخدتها في حضنها : انا قتلك ان بابا سابنا وانتي كنتي لسه في بطني .. وانا سافرت بيكي علي هنا عشان كان جايلي شغل هنا
فريده : وهو ليه سابنا .. هو مش بيحبنا
سعاد ( بحزن وغل ليوسف ) : لا هو مكنش بيحبنا ..
باااااك
فاقت فريده من ذكرياتها على صوت رنه موبايلها..
فريده : الو
ياسين : صباح الخير
فريده : صباح الخير يا ياسين .. خير في حاجه ولا ايه ؟!
ياسين : يادي الكبسه .. لا ياستي مفيش حاجه .. قلت اصبح عليكي بس عشان امبارح ما سلمتش عليكي وانا مروح
فريده : والله .. طب صباح الخير يا سيدي
ياسين : صباح النور يا ستي
فريده ضحكت
ياسين : بقولك ايه .
فريده : ايه!
ياسين : انتي جايه النهارده النادي ؟؟
فريده : غالبا اه ان شاء الله .... ليه في حاجه ولا ايه
ياسين : ابدا !!.... بس اصلي عايز العب اسكواش والواد عمر مش فاضي وانا مش لاقي حد العب معاه
فريده ( ابتسمت ) : مممم .... اعتبره ماتش يعني
ياسين : اينعم
فريده : ولما تخسر!!!
ياسين : انا مش ممكن اخسر ابدا
فريده : really!! .. انت نسيت اخر مره ولا ايه هههههه
ياسين : انا سيبتك تكسبي بمزاجي علي فكره
فريده : لا بجد !!.. طيب اوك .. هنشوف مين اللي هيكسب
ياسين : تمام ..هقابلك علي الساعه 6 في صاله الاسكواش ..اوك
فريده : اوك .. bye loser
ياسين  : ههههه هنشوف .. باي
قفل ياسين وهو علي وشه ابتسامه مش عارف مصدرها
لقي تليفونه بيرن وكان عمر
ياسين : عايز ايه ع الصبح يا بني
عمر : دي صباح الخير يعني .. لا اخص عليك اخص .. لا حقيقي اخص اخص اخص هههههههههه
ياسين : هههههه صباح الخير ياسيدي
عمر : صباح النور يا سينو .. مشيت امبارح لوحدك ليه .. حتي من غير ما تقولي
ياسين : معلش حصلت حاجه كده خلتني مشيت على طول .. محبتش اقعد
عمر( بضحك) : ده انت سيبتها  من هنا والدنيا ولعت من هنا ..رقص ومسخره ههههههه... وحاجات من اللي قلبك يحبها
ياسين : انت عارف انا مليش في الجو ده اساسا
عمر (بضحك) : ولا انا .. ها قولي بقا اللي حصل امبارح ... هي فريده هزقتك تاني ولا ايه هههههههه
ياسين ( بغيظ ) : ايه هزقتك دي ... وبعدين من امتي وانا في بنت تقدر تتكلم معايا وحش اصلا
عمر : يا واد يا حمش ... على يدي ههههههه... ده انت من اول ما شفتها وهي مظبطاك
ياسين : عمر .. غور من هنا واقفل بدل ما اطلعهم عليك
عمر : خلاص يا سينو .. قلبك ابيض ..مش قصدي .. هي في الاول كانت بتبهدلك هههه ... دلوقتي لا ..خلاص ارتحت كده
ياسين : عمر
عمر : خلاص بقا .. قولي طيب ايه اللي حصل امبارح وانا هسكت خالص
ياسين : اصل شفت الواد كريم اللي عندي في الكليه في الحفله وحصل (...... وحكي لعمر كل حاجه )
عمر (بخبث) : طب وانت ايه اللي يضايقك يعني ويخليك تمشي .. يحبها يخطبها انت مالك
ياسين (بارتباك ) : مالي ازاي يعني .. مش بقولك هي مش بتطيقه واتخانقت معاه قبل كده قدامي كذا مره
عمر : مش طايقاه .. بس طايقاك انت صح ...
ياسين : مش فاهم
عمر : يعني بس كده هو ده السبب
ياسين : ايوه امال هيكون ايه يعني
عمر (بغمز) : يعني تكون بتحبها مثلااا .... غيرت عليها مثلاا
ياسين : بحبها !!!!!!!!!
عمر : ايوه كل تصرفاتك وكلامك بتقول كده
ياسين : مش عارف ... تفتكر
عمر : اه افتكر ونص كمان .. بس مش مهم انا اللي افتكر المهم انت ... المهم هتعمل ايه النهارده .. الحاجه ام عمر امي يعني ..عزماك علي الغدا النهارده .. اصلك صعبت عليها وقالت تكسب فيك ثواب وتأكلك بدل الرمرمه اللي بتاكلها دي
ياسين : حبيبتي يا ام عمر
عمر : يالهوووي . بتحب ام عمر كمان .. فريده وام عمر اتنين يا مفتري
ياسين : ههههههه ... انت عايز ايه .. يالا اتكل وانا هصلي الجمعه واجيلكم هوااا
عمر : هههههههههه اوك .. يالا سلام
ياسين : سلام
........................................................................................................................................................
صحي اكرم من النوم قبل الجمعه بشويه واتصل علي مريم
اكرم : صباح الخير يا حبيبتي
مريم : صباح النور يا كيمو
اكرم : صحيتي امتي؟
مريم : من بدري وفطرت مع بابا وفري .. ونمت تاني
اكرم : طب ايه اللي صحاكي بدري كده.
مريم : عشان ما يتخانقش معايا تاني
اكرم : هو اتخانق معاكي امبارح ولا ايه
مريم (بدلع ومياصه ) : اه عشان اتاخرنا امبارح ... وكان عايز يكلمك انت كمان ... بس انا قلتله انها مش هتتكرر تاني
اكرم : هو ليه حق بصراحه .. احنا اتاخرنا قوي .. عموما ان شاء الله مش هتحصل تاني ابدا
مريم : ان شاء الله ... (وكملت بدلع ) هتعمل ايه النهارده يا حبيبي ..انت وحشتني قوي
اكرم (بحب ) : انتي اللي وحشتيني اكتر .. انا مبقتش اقدر يعدي عليه يوم.. لا يوم ايه ... ساعه من غير ما اشوفك فيها .. ايه رايك اعدي عليكي بعد الجمعه نخرج نتغدي سوا
مريم : اوك .. معنديش مانع .. ولا اقولك ..استني اقول لبابا واكلمك عشان مش عايزاه يزعل تاني اوك بيبي
اكرم : اوك يا عيوني ... هستني تليفونك.. سلام
مريم : بااي
قفل اكرم مع مريم وخرج من الاوضه عشان يشوف مامته وياخد شاور
خرج اكرم من الاوضه ..لقى مامته في المطبخ بتجهز الاكل
اكرم : صباح الخير يا ست الكل
منال : صح النوم .. ايه النوم ده كله
اكرم : معلش بقا.. وبعدين النهارده اجازه مش ورايا حاجه
منال (بفرحه ) : بجد فاضي النهارده .. اخيرا هنقضي يوم سوا زي زمان ..وناكل سوا ونقعد نشرب الشاي قدام التلفزيون واحنا بنتكلم مع بعض ... انا مبسوطه قوي
اكرم بيمسح بايده علي شعره : هو يعني .. اصل ...
منال (انكسرت فرحتها ) : وراك حاجه ولا ايه .
اكرم : لا بس متفق مع مريم اعزمها علي الغدا بره ..وممكن بعدها نطلع علي النادي لسه مش مقرر
منال ( بكسرة نفس ) : ولا يهمك ... تتعوض ان شاء الله .. المهم تكون مبسوط .. (وكملت بضحكه مكسورة ) يالا الحق ادخل خد شاور علي ما احضرلك شاي مع الكيك تفطر عشان تلحق الجمعه
اكرم قرب من منال وباس راسها : ربنا يخليكي ليا يا ست الكل انتي .. وانا هعوضك عن النهارده وهفضي نفسي يوم مخصوص ليكي انتي بس
وخرج اكرم من المطبخ.. منال قعدت علي الكرسي اللي عندها في المطبخ تكمل تقطيع الخضار اللي كانت بتعمله .. وعنيها مليانه دموع .. هربت دمعه من عنيها غصب عنها ..وبسرعه مسحتها ... كان صعبان عليها نفسها قوي .. ابنها الوحيد اللي ضيعت عمرها عليه مبقتش بتشوفه ... تقريبا طول الوقت بره ولما يرجع في اوضته علي طول ... يالا سنه الحياه هتعمل ايه
........................................................................................................................................................
في بيت عمر ...
ياسين : يالا يا عمر .. البس واخلص هتاخر كده
عمر : تتاخر علي ايه ... انت عندك معاد ومش قايلي
ياسين : لا عادي .. متفق مع فريده علي ماتش النهارده
عمر(بغمز)  : فريده ... قلتلي بقا .. وانا اقول الواد ده بقاله كتير مقاليش تعالي نلعب سوا .. قلت انت بطلت ولا ايه ..اتاريك بتلعب من ورايا
ياسين : تصدق بالله
عمر : ونعم بالله
ياسين : انت رخم .. انا ماشي ومش هاخدك معايا اساسا
عمر : استني بس يا جدع ايه ده .. انا خلاص خلصت اهه .. يالا بينا
خرجوا من اوضه عمر ..
عمر لمامته : عايزه حاجه يا ست الكل احنا نازلين شويه ومش هتاخر عليكي يا جميل انت
مامته : براحتك يا حبيبي ... خليك مع اصحابك متقلقش عليه
عمر : انتي عايزه توزعيني النهارده يا جميل ... عشان تستفردي بكيس اللب الاسمر اللي انا جايبه صح ..لااااا ميحصلش ابدااااااا .. انا هروح اخبيه لحد ما ارجع
مامته ( بضحك ) : مخلفه مجنون يا ربي ... شوف صاحبك يا ياسين
ياسين ( بابتسامه ) : هنعمل فيه ايه يا طنط بس .... انا بقول ندخله الخانكه ونخلص منه ... ايه رايك .. وانا هجبلك كيلو لب كامل يا جميل انتي
عمر : خونهههههههه ... كل اصحابك خانوك يا هتلر
مامته : ربنا يسعدك يابني ويخليك ليه ويرزقك ببنت الحلال اللي تستاهلك
عمر : لا ادعي لسينو الدعوه الاخيره دي ..شكلها قريب ها
مامه عمر : ربنا يريح قلبك يا بني ويسعدك ... ربنا يعلم انا بعتبرك زي عمر ابني بالضبط
ياسين باس ايدها : ويخليكي ليا يا ام عمر يا عسل انتي
عمر : واقف قرطاس انا ولا ايه .. يالا يا حبيبي ..هنتاخر هااا ( وطلعله لسانه )
ياسين ضحك : مع السلامه يا طنط
عمر باس راس مامته : سلام يا جميل .. اعمليلنا شويه فشار او جيلي حاجه تسلينا جنب اللب .. وشوفي هنتفرج علي ايه في التلفزيون
مامته : همك علي بطنك علي طول ..انا ناويه الاعبك النهارده دور طاوله اكسبك بيه واعوض خسارتي
عمر : هنشوف يا ام عمر .. سلام يا حبيبتي
مامه عمر : مع السلامه يا ولاد ... ربنا يسعدكم ياارب .. ويكرمكم دنيا واخره
........................................................................................................................................................
نزلوا وركبوا عربيه ياسين .. عمر شاف حاجه محطوطه علي الكنبه اللي ورا
عمر : ايه ده يا سينو... لوحه ولا ايه
ياسين : اه .. عندك مانع
عمر : ايوه بتاعه مين يعني .. هات اتفرج
يبلف عمر عشان يفتح الورق اللي مغطي اللوحه .. راح ياسين مسك ايده ..
ياسين : انت مالك بقيت حشري كده ليه اليومين دول
عمر : حشري !! ... لا يبقي لازم اشوفها
ياسين : لا مش هتشوف حاجه ..اقولك انا هنزلك هنا وانت ارجع البيت لاحسن طنط تخلص اللب
عمر (بضحك) : هههههههه ... والله و وقعت يا سينو ومحدش سمى عليك .. وشكلها هتجننك قريب يا صاحبي
ياسين ابتسم ومتكلمش
وصلوا النادي ...
ياسين : طب يا عمور ..شوف طريقك انت بقا .. وانا لما اخلص هكلمك تمام
عمر : طريقي ايه بس ..انا جاي معاك
ياسين : معايا فين ؟
عمر : اتفرج
ياسين : تتفرج علي ايه!!
عمر (بخبث) : علي الماتش .. الله
ياسين لسه هيرد .. شاف فريده جايه عليهم
فريده : هاي ... ازيكم
عمر : الحمد لله ..ازيك انتي يا فريده .. مشفتكيش امبارح في الخطوبه
فريده : معلش كنت مصدعه شويه فمقعدتش كتير
عمر : سلامتك
ياسين : ازيك يا فريده .. ها جاهزه
فريده ( بابتسامه ) : انت اللي جاهز للخساره
ياسين : هنشوف .. يالا بينا
فريده : يالا .. احنا نقسمها علي ماتشين .. يعني انت وعمر مثلا واللي يكسب يلعب معايا او العكس ..ايه رايكم
عمر : لا متعملوش حسابي .. مش طالبه معايا لعب وفرهده النهارده
فريده : طب خلاص تعالي حكم بينا
لسه عمر هيرد ... لقى ياسين قال : لا عمر وراه حاجه مهمه دلوقتي .. مش انا قلتلك انه مش فاضي يلعب معايا لما كلمتك .. مش كده ولا ايه يا عمر
عمر كان باصصله وعلي وشه علامه استفهام كبيره وابتسامه
عمر : اه كده يا سينو ..كده .. سلام دلوقتي وعلي تليفون بقا
وقرب من ياسين وقاله في ودنه ...: بقا قلتلها اني مش فاضي العب هااااااا .. حسابنا بعدين
مشي عمر .. وراح ياسين وفريده يجهزوا عشان الماتش...وبدأوا اللعب .. ياسين اللي كسب المره دي
ياسين (بابتسامه ) : hard luck ... قلتلك هكسب
فريده (بابتسامه ) : يالا مره من نفسك مش مهم
ياسين : مره من نفسي .. يابنتي المره اللي فاتت سيبتك تكسبي بمزاجي عشان ما احبطكيش بس
فريده (بضحك ) : ماشي يا سيدي .... يالا باي
ياسين : تعرفي ان ضحكتك حلوه قوي
فريده اتكسفت و وشها احمر : طب يالا سلام .. هروح اغير واروح
ياسين (بتردد ) : فريده
فريده : نعم
ياسين : ممكن تغيري ونتقابل في الكافيتريا عشان عايزك
فريده : عايز ايه ..خير
ياسين : لما تيجي هقولك .. هستناكي اوك
ومشي من غير ما يستني ردها
فريده بصتله وهو ماشي ومستغربه وراحت تغير هدومها وتروح له الكافيتريا
ياسين غير هدومه وراح علي العربيه يودي الشنطه واخد اللوحه .. ولسه بيلف شاف فريده رايحه ناحيه عربيتها تودي شنطتها
ياسين (بابتسامه ) : كنتي هتزوغي ولا ايه
فريده : لا والله كنت هودي الشنطه واجيلك  .. عايز ايه بقا
ياسين : طب حطي شنطتك وتعالي نروح نقعد ... هنتكلم واحنا واقفين كده!
فريده : معلش مره تانيه .. قول عايز ايه .. لاني مستعجله ورايا حاجات كتير عايزه اخلصها عشان الكليه بكره ولا نسيت يا دكتور
ياسين : لا منستش ..( مد ايده ليها باللوحه ) ممكن تقبلي مني دي
فريده (باستغراب ) : لوحه ايه دي .. وايه المناسبه
ياسين : افتحيها بس وشوفيها
فتحت فريده اللوحه .. كانت اللوحه اللي ياسين رسمها لفريده لما كانوا في حديقه الازهر فاكرينها ... الورده اللي متحاوطه بشوك بس ياسين كملها
فريده : woooow .. حلوه قوى قوى ... ايه ده انت كاتب عليها اهداء .. (قرأت فريده الاهداء) الي الورده الجميله التي تحاول ابعاد الناس عنها .. فريده
ياسين : انتي الورده دي يا فريده
فريده : انا ...
ياسين :  انتي الورده الجميله اللي مش بتبين جمالها وعامله سور من شوك حواليكي عشان محدش يفكر يقرب منها ولو حد فكر يقرب يتعور فيبعد بسرعه
فريده سرحت مع ياسين وهو بيتكلم وبعدين قالتله : شكرا قوي يا ياسين .. دي احلي هديه جاتلي في حياتي
ياسين (بابتسامه ) : علي ايه بس .. اعتبريها تعويض عن خسارتك في الماتش النهارده
فريده (بابتسامه ) : وانت كنت ضامن انك كنت تكسب يعني
ياسين (بحنان ) : كنت حاسس .. وانا احساسي عمره ما كدب عليه
فريده : ماشي .. هديه مقبوله .. عايز حاجه ...همشي انا عشان الحق اروح
ياسين : لا شكرا .. اشوفك بكره يا تلميذتي النجيبه
فريده (بضحك ) : اوك يا دكتور .. باي
راحت فريده ناحيه عربيتها ... وياسين مشي عشان يشوف عمر ...حطت الشنطه واللوحه ولسه هتركب لقت كريم في وشها
كريم : مش تقولي انك جايه كنا جينا سوا
فريده : يا ساتر علي الغلاسه ..  انت ايه يابني .. ما تفكك مني وحل عني بقا
كريم : افكني منك .. مش تربيه نيويورك خالص
فريده : اوووووووف .. وسع من وشي خليني امشي
كريم : لا مش قبل ما تقولي موافقه
فريده : موافقه علي ايه .. انت مجنون يابني .. وسع بقا .. ولا شكلك عايز تتضرب تاني .. يوووه قصدي ثالث
كريم (بعصبيه ) : تعرفي انا هتجوزك .. مش حبا فيكي ولا حاجه ... انا اساسا مش شايفك ست .. لكن بس عشان اطلع عليكي القلمين اللي اديتيهوملي يا حبيبتي
فريده زقته وراحت تركب  .. .. كريم مسك ايدها جامد
كريم : انتي ما بتتهديش ولا ايه .. مش كريم اللي تعملي معه كده ..انا لحد دلوقتي صابر عليكي وبعاملك كويس متخلينيش اوريكي الوش التاني
فريده معرفتش تسحب ايدها منه .. بس اتكلمت بصوت عالي وزعيق ولا كأنه قال حاجه : سيب ايدي يا حيوان انت
كريم : حيوان .. لا ده انتي متربيتيش وشكلك عايزه تتربي من اول وجديد
شد كريم من قبضته علي ايدها ولفها ورا ظهرها جامد وهي بتزعق : سيبني يا حيوان انت
لسه كريم هيتكلم لقى حد ضربه بوكس في وشه .. فساب ايد فريده
كان ياسين قريب وسمع صوت فريده وهي بتزعق بصوت عالي .. فرجع بسرعه يشوف في ايه ويطمن عليها
ياسين (بعصبيه ) : مش بتقولك سيبها .. ايه مبتسمعش ... (وبص لفريده ) انتي كويسه
فريده (وهي ماسكه ايدها وجعاها) : اه كويسه متشكره قوي يا ياسين
كريم بكل عصبيته ضرب ياسين بوكس في وشه وهو بيقول : انت فاكرني هسكت لك ولا ايه .. مش كريم محمود اللي يسكت عن حقه ابدا .. ولا تكون فاكرني هخاف منك يا دكتور.. احنا مش في الكليه هنا .. فوق
ياسين مسكه من هدومه وبدأ يضربه ...
راحت فريده قايله : ياسين ..خلاص ارجوك
ياسين مستمر .. فريده : عشان خاطري يا ياسين بقا كفايه .. هو ما يستاهلش
ياسين اول ما سمع عشان خاطري .. بص لفريده قوي.. وساب كريم من ايده
كريم : اسمع يا دكتور انت .. ما تتدخلش تاني بين واحد وخطيبته مفهوم
فريده : خطيبته ايه يا مجنون انت .. نجوم السما اقربلك
جه علي صوتهم اصحاب كريم اللي كانوا قريبين بس مرضيوش يتدخلوا عشان خايفين من ياسين
ياسين : اركبي انتي يا فريده وامشي
فريده : بس.....
قاطعها ياسين (بحده) : بقولك اركبي وامشي
ركبت فريده عربيتها ومشيت ..
ياسين بص لكريم : اللي انت عملته ده هعديه بمزاجي وقسما بالله لو شفتك اتعرضتلها تاني لتشوف هعمل فيك ايه ..فاهم
كريم : ايه هتسقطني في مادتك يا دكتور
ياسين : لا يا حبيبي .. هعلمك الادب ازاي بايدي
لف ياسين عشان يروح يركب عربيته ..
كريم : هو انت بتحبها ولا عجباك ولا ايه النظام
ياسين لف ورجعله ولسه هيمسكه عشان يضربه ... جري اصحاب كريم عليه و وقفوا قدامه
اصحابه : خلاص يا دكتور ... معلش هو ميقصدش .. سامحه المره دي يا دكتور عشان خاطرنا بس
ياسين بصله بقرف وتف عليه ومشي
راح كريم مع اصحابه علي الكافيتريا وهو متنرفز قووي
محمد : تصدق هو عنده حق .. حد يعمل كده يابني
كريم : انت اللي بتقول كده
محمد : ايوه .. انت زودتها معاها قوي يا كريم
حاتم  : ولا زودها ولا حاجه .. خليه ياخد حقه
كريم : قوله يا حاتم
حاتم : المهم هتعمل ايه لو رفضتك يا معلم
كريم : معتقدش .. باباها في شغل بينه وبين بابا واعتقد هيوافق عشان ميخسرش الشغل ده
محمد : باباها كبير في السوق .. ومش هتفرق معاه الصفقه اللي بينه وبين باباك
كريم : اه ... بس رجال الاعمال مبيحبوش يخسروا ابداا
محمد : مش على حساب بنته
حاتم : هههه مبروك يا عريس .. ده احنا هنشوف ايام لوووز
كريم : اصبر بس .. ده انا هوريها اللي عمرها ما شافته قبل كده بنت ال..... بنت عم يوسف ههههههههههه
.......................................................................................................................................................
تاني يوم في الشركه عند مريم ... طلب منها المدير تجيبله مجموعه اوراق
(المدير/ مدحت ... رجل في اوائل الاربعينات .. اعزب )
مدحت : شكرا يا مريم علي الورق
مريم : تحت امرك يا فندم .. ايه خدمه تانيه
مدحت : شكرا ...
مريم جت تمشي..
مدحت : اه صحيح ..مبروك الخطوبه ..
مريم : ميرسي .. الله يبارك ف حضرتك
مدحت : بس كده تتخطبي فجأه ومن غير ما تقولي .. مش يمكن كان عندي ليكي عريس احسن
مريم (بدلع ) : معلش بقا يا فندم ..كل شئ نصيب
مدحت : اه طبعا... بس خساره .. اكرم لسه شاب في اول حياته مش هيعرف يسعدك ويحققلك كل اللي بتحلمي بيه ... ولا حتي يعيشك في نفس المستوي اللي انتي عايشاه
مريم سكتت شويه وقالت : بس اكرم بيحبني وانا كمان بحبه
مدحت : اه طبعا .. بس الحب مش كل حاجه .. يعني مش هتاكلوا وتشربوا حب ولا ايه ..هههه .. عموما انتي لسه علي البر ..راجعي نفسك تاني برضه .. وربنا يسعدك
مريم : هاااا .. ربنا يسهل .. حضرتك تأمر بحاجه تانيه
مدحت وهو بيولع دخان سيجارته : لا شكرا .. تقدري تتفضلي
بعد ما مريم خرجت .. مدحت ابتسم ابتسامه خبيثه ....
مدحت لنفسه : هتيجي ...شكلها بيقول كده ... ما انا مش هضيع واحده جامده كده من ايدي .. انا الغلطان اني مخدتش اكشن من بدري  ... بس مش مهم بكره تحلو ههههههههه
اما مريم خرجت من عنده وكل كلمه قالها بتتردد في ودانها تاني ... لقت اكرم في وشها
اكرم (بابتسامه ) : صباح الورد علي حبيبتي
مريم (بدلع ) : صباح الخير يا حبيبي
اكرم : الجميل عامل ايه النهارده؟
مريم قربت منه وبتعدله الكرافت بدلع : الجميل عايز يخرج
اكرم مسك ايدها وباسها : بس كده .. انتي تامري وانا انفذ .. يا قلب وعقل اكرم .. بعد الشغل نخرج زي ما انتي عايزه ..
مريم (بدلع) : ربنا يخليك ليا يا حبيبي
موبايل اكرم رن .. كانت منال مامته
منال : ها يا حبيبي .. لسه قدامك كتير ولا خلصت شغل
اكرم : لا قربت اخلص خلاص
منال : طب كويس عشان انا خلصت الغدا ومرضت اكل لوحدي قلت ناكل سوا
اكرم : اتغدي انتي يا ماما .. عشان هاخد مريم ونتغدي سوا
منال (بغيظ) : اها .. طب هاتها معاك يا حبيبي نتغدي كلنا سوا وبالمره اتعرف عليها اكتر انا مشفتهاش غير مرتين ولا انت مش عايزنا نبقي اصحاب !!!
اكرم : هااا .. لا طبعا .. خلاص هقولها وارجع اكلمك تاني
منال : ماشي يا حبيبي مستنيه تليفونك ..سلام
اكرم : سلام
بعد ما قفل ....
مريم : ايه يا حبيبي في حاجه ولا ايه
اكرم : لا بس ماما كانت عايزانا نروح نتغدي معاها ايه رايك ؟؟
مريم : انا معنديش مانع .. بس خليني اتصل على بابا اقوله الاول
كلمت مريم بابها و وافق ... بعد الشغل ركبت مريم مع اكرم عربيته و وصلوا عند منال .. اللي رحبت بيهم قووي .. وقامت مريم تساعدها في تحضير السفره ... وهما بياكلوا ...
مريم : الاكل طعمه حلو قوي يا طنط ولا اقولك يا نونا احلي
منال ( بضحك ) : قولي اللي انتي عايزاه
مريم : خلاص انا هقولك نونا عشان ما اكبركيش .. وانتي لسه شباب يا جميله انتي
ضحكت منال .. وفضلت تتكلم هي ومريم واكرم علي الاكل ..  و كل شويه مريم تاكل مره اكرم في بقه ومره تاكل منال .. وقضوا وقت ظريف سواا.. وكانت مريم طول الوقت عماله تدلع في اكرم ومامته وتاكلهم وتهزر معاهم
منال ..هديت نسبيا من ناحيه مريم وحست انها بنت كويسه فعلا زي ما اكرم قال بس ملقتش حد يوجهها
وقالت لنفسها : ان شاء الله اكرم يعرف يغير فيها طريقه اللبس دي ويخليها تقرب من ربنا اكتر ..
مريم : انا مضطره اسيب قعدتك الحلوه دي يا نونا واروح .. هتوحشيني
منال : نورتيني الشويه الصغيرين دول يا بنتي .. وابقي تعالي تاني
مريم : اكييد يا نونا ..هجيلك لحد ما تزهقي مني .. سلام يا نونا يا قمر
منال : تعالي انتي بس وانا مش هزهق متخافيش ..
اكرم : عايزه حاجه من بره يا ماما
منال : لا شكرا ...... هتتاخر؟؟
اكرم : غالبا لا .. هوصل مريم وارجع علي طول ..يالا يا روما .. سلام يا ماما
منال : سلام يا ولاد
بعد ما نزلوا .. منال بتكلم نفسها : ياختي البت عماله تدلع فيه علي الاخر وتتمايص ..ما هو الواد ليه حق يتهبل عليها .. اذا كان انا انبسطت بشويه الدلع ما بقالك هو ... ههههه .. ياختي ده انا مكنتش بنت علي كده .. الله يرحمك يابو اكرم مشفش الحاجات دي ههههههههه
.........................................................................................................................................................
محمود بيكلم يوسف في التليفون عشان يعرف رده علي طلب الخطوبه
محمود : ايه يا يوسف باشا .. مرضتش عليا في طلب كريم
يوسف : والله يا محمود بيه ..مش عارف اقولك ايه .. بس كل شئ قسمه ونصيب .. البنت رافضه الجواز دلوقتي خالص ..
محمود : دي خطوبه بس ..ولما يتخرجوا نبقي نعمل الفرح
يوسف : معلش كدا احسن .. خليها تركز في مذاكرتها الاول ... وبعد ما يتخرجوا يا سيدي لو ليهم نصيب في بعض يبقي اهلا وسهلا
محمود : خلاص اللي تشوفه يا يوسف باشا
وكملوا كلامهم عادي في الشغل .. بعدا ما قفلوا ..كريم دخل علي باباه المكتب
كريم : ازيك يا بابا
محمود : اهلا يا كريم .. راجع بدري يعني
كريم : ابدا ..اصل نويت اروح الكليه بكره .. فقلت ارجع انام شويه عشان اعرف اصحي
محمود : ربنا يهديك يا بني
كريم : المهم ..مفيش اخبار
محمود : اخبار ايه
كريم : اخبار الخطوبه يا بابا انت نسيت ولا ايه
محمود : اه .. يوسف بيقول البنت مبتفكرش في الجواز دلوقتي
كريم (بعصبيه ) : يعني ايه .. ها
محمود : انت عايز تفهمني انك بتحبها مثلا ... الموضوع ده في حاجه وانا مش عارفها
كريم (بارتباك ) : هاا .. حاجه ايه ..لا ابدا عادي .. خلاص مش مهم هما الخسرانين ... عن اذنك
طلع كريم علي اوضته وهو متنرفز جدااا وعمال يفكر ازاي ياخد تاره من فريده ومن ياسين كمان .....
........................................................................................................................................................
عدت الايام و مفيهاش جديد... وبدأت اجازه نص السنه فريده...
في يوم مريم كانت هي واكرم في النادي ....
مريم (بدلع ) : حبيبي هنطلع رحله شرم مش كده
اكرم (بحب ) : رحله ايه ؟؟
مريم : ايه يا بيبي .. الرحله بتاعه النادي لشرم الشيخ لمده اسبوع... دي الشله كلها طالعه
اكرم : لا مش هينفع انتي عارفه الشغل وكمان صعب اسيب ماما لوحدها واسافر
مريم (بزعل ) : خلاص براحتك .. عموما انا طالعه
اكرم : حتي لو انا مش طالع !!
مريم (بدلع قوووى ) : حبيبي انا كان نفسي نطلع سواا .. بس انت عشان حرام متسيبش طنط لوحدها مش هتيجي .. بس انا زهقانه وهطلع اغير جو .. وهابقي اكلمك كل شويه
اكرم (وهو بيمسك ايدها وبيبوسها ) : وانا مقدرش علي بعدك طول المده بتاعه الرحله .. خلاص هطلع معاكي يا قلبي
مريم (بفرح) : بجد يا حبيبي .. ربنا يخليك ليا
........................................................................................................................................................
في نفس اليوم ... مريم دخلت علي فريده اوضتها
مريم : فري يا فري
فريده : ايه يا مريم مالك في ايه ..
مريم : في رحله لشرم تبع النادي كمان اسبوع .. ايه رايك تطلعي معانا
فريده : لا مليش مزاج
مريم : ملكيش مزاج ولا مش بتحبي الشله بتاعتي
فريده (بضحك) : الاتنين ...
مريم (بخبث) : علي فكره ياسين طالع ..عمر قالي
فريده : وانا مالي ومالو .. يطلع ولا ميطلعش ما يخصينيش
مريم : بجد ... طيب انا قلت اقولك بس ..يمكن تغيري رايك يعني ..عشان هتلاقي حد تنبسطي معاه
فريده : علي فكره انا فهماكي كويس .. ومفيش حاجه من اللي بتفكري فيها دي .. ياسين مجرد صديق وبس لا اكتر ولا اقل
مريم : هو انا قلت حاجه يا فري هههه
وهما بيتكلموا رن موبايل فريده .. 
فريده : الو
كرستين : فري.. I miss u soo much
فريده : ohhh , my lovely christen I miss u too
( باقي المكالمه مترجمه )
كرستين : تمام .. اخبارك ايه .. بقالك كتير مش كلمتيني
فريده : معلش بس كان عندي امتحانات .. انتي اخبارك ايه واصحابك هههههه
كرستين : انا وجون هنتخطب قريب خلاص
فريده : بجد ... I’m sooo happy for u
كرستين : طنط كلمتني .. بتقول انك مش بتكلميها خالص ..ليه ؟؟؟
فريده : كرستين حبيبتي كبري دماغك من الموضوع ده
كرستين : انا كنت بكلمك عشان اقولك اني هاجي ازور مصر كمان اسبوع ..مكان اسمه شرم الشيخ .. انتي فيها ولا جنبها .. انا عايزه اشوفك
فريده ( بسعاده ) : بجد .. شرم .. طب خلاص نتقابل هناك اوك
كرستين : اوك .. اول ما اوصل هكلمك ..  see u
قفلت فريده مع كرستين .. وبصت لمريم ..
فريده : مريم .. مارو .. حبيبتي
ومريم عامله نفسها مش سامعها
فريده ( بصوت عالي ) : مااااارو
مريم ( بضحك ) : ايه الصوت ده حرام عليكي ... سمعت علي فكره ..(وكملت باستهبال) انتي رايحه شرم !!.. كويس والله .. اشوفك هناك بقا
فريده : مريم بطلي غلاسه .. انا هطلع معاكي الرحله .. وربنا يصبرني علي اصحابك لحد ما كرستين تيجي
مريم : ما انا قلت من الاول ياسين طالع ههههههههه
فريده (بتضربها علي كتفها ) : ياسين ماله دلوقتي !!! .. انا طالعه عشان اشوف كرستين .. وفرصه اعرفك عليها ..هتحبيها قوي .. اصلها فيها شبه منك
مريم : ازاي ؟؟
فريده : يعني مهتمه قوي بالفاشون .. والميك اب .. والحركات دي ..زيك كده
مريم (بضحك ) : وصاحبتك ازاى هههههههه
فريده : بقا كده .. طب يالا بره ... عايزه انام
مريم : اوك ..تصبحي علي خير
مريم وهي خارجه وقفت عند الباب ... وقالت : برضه ياسين طالع يعني مش هتكون لوحدك يا جميل ههههههه
فريده ( وهي بترميها بمخده ) : برررررررررررررررره
.........................................................................................................................................................
في مكان تاني خالص .. بيت ياسين .. كان قاعد هو وعمر اللي عمال يقنعه يطلع الرحله
عمر: يا عم تعبتني .. ما تطلع الرحله تغير شويه وتنبسط
ياسين : ريح نفسك مش طالع .. بفكر استغل الاجازه واسافر لندن اشوف اخبار الشغل هناك ايه مع عمو
عمر ( بخبث ) : طيب .. انت حر .. عمال اتحايل عليك من بدري .. عموما هبقى اسلملك علي فريده .. يالا سلام يا سينو عشان الحق احجز .. بااي ... تليفونات بقا
وجه عمر يقوم .. راح ياسين شاده من ايده قعده وهو بيقول
ياسين : يا عم اترزع اقعد .. مستعجل علي ايه
عمر ( بخبث ) : عشان الحق مكان في الرحله قبل ما باب الحجز يتقفل
ياسين : هو انت قلتلي الرحله دي امتي
عمر : كمان اسبوعين .. كان نفسي تطلع معايا يا سينو .. بس يالا مش مهم .. هقعد مع مريم وشلتها وفريده
ياسين ( وهو بيلعب في شعره ) : طب خلاص صعبت عليه .. هطلع معاك
عمر ( بغمز ) : لا يا شيخ ما يصعبش عليك غالي ... لا خليك براحتك
ياسين : ماخلاص بقا متقرفناش .. روح احجزلنا يالا
عمر : شغال عندك انا
ياسين : اه واذا كان عاجبك
عمر : طب اعترف الاول وانا اروح احجز جري
ياسين : اعترف بايه يابني ..
عمر : انك بتحب فريده
ياسين : بحبها !!!! ... مش عارف ..هو اعجاب يمكن .. لكن حب .. مش عارف حقيقي
عمر : ايوه بقا ... اعجاب اعجاب ..همشيها كده دلوقتي
ياسين : هههههه طب يالا قوم اخلص ..اه ومتقولش لحد انى هطلع ها
عمر : ليه هاا ليه
ياسين : انت مالك ....ايه الزن ده ..
.........................................................................................................................................................
اليوم اللي قبل الرحله ...
اكرم لبس وكان خارج ...
منال : انت خارج يا حبيبي
اكرم : اه يا ماما .. اصلي عايز اشتري شويه حاجات للرحله
منال (باستغراب ) : رحله .. رحله ايه ؟؟
اكرم (بارتباك ) : ايه ده هو انا مقولتلكيش ... الواحد دماغه بقت مش فيه
منال (بحزن ) : خير خير .. قولي بقا رحله ايه وامتي
اكرم : رحله لشرم  الشيخ .. لمده اسبوع
منال : طب والشغل يابني
اكرم : لا ما انا اخدت اجازه
منال : كمان .. وامتي الرحله بقا ان شاء الله
اكرم : الرحله.. بكره الصبح هنتحرك
منال (بصتله والدموع في عنيها ) : وانا ... انا يا اكرم اخر من يعلم
اكرم (قرب منها وباس راسها ) : لا طبعا يا ست الكل .. انا معرفش ازاى نسيت اقولك بس
منال : نسيت تقولي .. ولا مرضتش تقولي !!!!!!!!
اكرم (بارتباك لانه عارف ان مامته فاهماه كويس ) : ايه ... لا نسيت طبعا .. مش هقولك ليه يعني
منال : عشان ممكن ما اوافقش .. عشان انت عمرك ما سبتني لوحدي .. عمرى ما عرفت انام غير لما اطمن انك رجعت البيت ومطمنه عليك... عموما يا بني .. انت حر ... اللي عايز تعمله اعمله
اكرم معرفش يقول ايه ..كل ما يحاول يقول حاجه يحس ان الحروف مخنوقه جواه ومش راضيه تطلع .. فضل شويه باصص لمامته وهي كمان باصاله بعتاب وحسره ...كسر اكرم الصمت ده
اكرم: طب انا هنزل عشان متاخرش .. مش عايزه حاجه من تحت
منال (بصتله قووي ) : ربنا ميحوجنيش لحد ابدا
وسابته وقامت دخلت اوضتها
اكرم اتنهد قوووي .. ونزل ..
منال لنفسها والدموع في عنيها : يا خساره يا اكرم .. يا ميه خساره عليك .. بس انت الحق مش عليك .. الحق عليا انا .. انا اللي دلعتك زياده عن اللزوم .. كنت ب ابديك علي نفسي .. كل اللي انت عايزه بيكون عندك .. كنت بعمل المستحيل عشانك وعشان متحسش انك من غير اب .... عمري ما قلتلك علي حاجه لا .. بس كنت فاكره انك لما تكبر هتقدر ده .. لكن للاسف ..طلعت اناني قوووي قوووي يا بني .. علمتك تاخد من غير ما تدي .. مبقتش بتحس بيا .. كل همك اكرم وبس ... انا السبب ..انا السبب
ينزل اكرم ويركب عربيته وهو مستعجل .. مسك الموبايل اتصل بمريم ...
اكرم : الو ... حبيبتي .. جاهزه .. انا في الطريق هعدي عليكي
مريم : اه يا حبيبي .. وكتبت كل الحاجات اللي هنشتريها ... ( وكملت ) اه نسيت اقولك .....
مريم : اكرم ... اكرم .. انت معايا
وسمعت صوت فرامل وخبطه جامده ... واكرم مبيروضش