أصدقاء لا أزواج .. بقلم : أميرة عادل

الحلقة الأولي والثانية

#أصدقاء..... لا أزواج
#بقلم : أميرة عادل

الحلقة الأولي والثانيه ..............

في  مدينه نيويورك ..... فتحت عنيها بنت غايه في الجمال ... شعرها اصفر بلون الذهب .. بيضه ...عيونها عسليه ... ذات قوام ممشوق
سعاد: يالا يا فري يا حبيبتي اصحي
فريده ( فري) : سيبيني شويه يا مامي ..مش عندي حاجه النهارده
سعاد: لا قومي عشان انا عايزه اتكلم معاكي شويه
فريده : طب لما اصحى يا مامي
سعاد : لا الموضوع ميستناش .. قومي يالا خدي شاور وصلي وتعاليلي عشان عايزاكي ضرورى
فريده : اوك
قامت فريده ..اخدت شاور وصلت وغيرت هدومها وطلعت تقعد مع مامتها
سعاد : تفطري الاول وبعدين نتكلم
فريده: لا...انتي عارفه انا مش بحب افطر علي طول كده ..خير ايه الموضوع المهم
سعاد: انتي لازم تنزلي مصر
فريده( بصدمه) :  what !!! ...  why !!!
سعاد : بصي يا بنتي يا حبيبتي...باباكي  كلمني و عايزك تنزلي تعيشي معاه ومع اختك مريم ... وانا وافقت
فريده (باستغراب) : وافقتي!! ...وافقتي ازاي!! ...انتي خلاص مش عايزاني اعيش معاكي
سعاد: لا يا حبيبتي ..اوعي تقولي كده .. انا على عيني اني اسيبك تعيشي بعيد عني
فريده ( بدموع ) : طب وافقتي ليه ...i’m sorry مش هسافر .. مش عايزه اعيش معاه
سعاد : اسمعيني بس ...انتي هتسافري تكملي كليتك هناك ...وانا كلها سنه بالكتير هصفي الحاجات اللي ليا هنا وانزلك على طول .. اشتري شقه وترجعي تعيشي معايا تاني
فريده : طب ننزل سوا لما تخلصي ..انا مش حابه اقعد معاهم ...ومش عايزه اسيبك لوحدك .. وبعدين انا مرتاحه هنا قووي
سعاد : مش انتي بتحبيني
فريدة: شور
سعاد : يبقى تسمعي كلامي انا عارفه مصلحتك اكتر منك
فريده : بس يا مامي
سعاد : مفيش بس .. واعملي حسابك السفر كمان شهر عشان تلحقي السنه دي في الكليه هناك ومتضعش عليكي سنه
فريده بتعيط ومش بتتكلم ... سابت مامتها ودخلت اوضتها
سعاد لنفسها : سامحيني يا بنتي ... بس بكرة تعرفي اني عملت كل ده لمصلحتك
فلاش باااك
يوسف : انا عايز بنتي تنزل تعيش معايا ..اظن احنا اتفقنا انها تفضل معاكي لحد ما تدخل كليه .. واهي بقالها 3سنين في الجامعه ومنزلتش
سعاد : بس يا يوسف انا مقدرش اعيش من غيرها
يوسف : بقولك ايه ..الاتفاق اتفاق وفي بينا ورق مكتوب فيه الكلام ده ..متخلينيش الجأ لطريقه متعجبكيش ..انا مش مطمن وبنتي بعيد عني وبتتربى في بلاد الخوجات
سعاد : بنتى متربيه احسن تربيه وعارفه دينها كويس وعارفه ايه الصح والغلط مش معني انها عايشه بره تبقي عايشه بتقاليدهم ... لا انا كنت مصرة انها تتربي بعادتنا احنا وتتكلم عربي كمان
يوسف : انا ميهمنيش كل ده دلوقتي .. كل اللي يهمني ان بنتي تنزل تعيش معايا
سعاد (بدموع) : بس يا يوسف ...هي مش هترضى تسيبني ...ولا انا هقدر اعيش من غيرها .. انت عندك مريم ربنا يخليهالك ..سيبلي بقا فريده
يوسف : انا مش هقعد اتكلم كتير في الموضوع ده ... فريده تكون عندي بالكتير كمان شهر عشان الحق اخلصلها ورق الكليه ... انا تعبان وعايز اعيش باقي عمري مع ولادى ..اظن ان ده من حقي
سعاد : مش دي فريده اللي رفضتها من قبل ما تشوفها ورمتني عشان مرضتش انزلها
يوسف (بحده) : انا مش هتكلم في القديم .. اللي قلته يتسمع .. وخلص الكلام
باااك
.........................................................................................................
في مصر في فيلا في المعادي ...
يوسف : دلال .. انتي يا دلال
دلال : افندم يا يوسف بيه
يوسف : روحي ناديلي مريم ..عشان عايزها
دلال : بس يا بيه هي تلاقيها لسه نايمه
يوسف : صحيها مش مهم
دلال (بتردد ) : بس يا بيه
يوسف : يالا يا دلال ولا هعيد كلامي ميه مرة
طلعت دلال تصحي مريم وهي بتدعي ربنا تعدي علي خير
دلال : ست مريم ... ست مريم
مريم : عايزه ايه يا دلال ...انا مش ميه مره قلت لما اكون نايمه محدش يجي يصحيني ..اطلعي بره يالا
دلال : بس يا ست مريم ...يوسف بيه عايزك ضرورى ومصر اني اصحيكي
مريم : يووووه ... طيب قوليله جايه حاضر
خرجت دلال من الاوضه ...وقامت مريم وهي متضايقه غسلت وشها ونزلت لبابها
مريم وهي بتبوسه : صباح الخير يا باشا .. خير
يوسف : ايه باشا دي .. قلتلك 100 مرة .. اسمها بابا
مريم (بضحك) : ولا تزعل ..صباح الخير يا بابي
يوسف : ومالك نازله زي ما انتي .. مغيرتيش هدومك حتى ...  شوفي لو دلال تجبلك فطارك هنا عشان عايزك ضرورى
مريم : لا مش مهم فطار ..انا هتكلم معاك وارجع اكمل نوم اصلا
يوسف : طب اسمعي بقا ...اختك جايه تعيش معانا
مريم: اختي مين !!!
يوسف : انتي نسيتي اختك ولا ايه .. فريده
مريم : اها .. ودي ايه اللي فكرها بينا
يوسف (بحده ) : مريم .. متتكلميش على اختك كده
مريم : طب المطلوب مني ايه
يوسف : مفيش حاجه مطلوبه .. انا بس بعرفك .. واعملي حسابك عشان نبقى نروح نجيبها من المطار ..
مريم : ان شاء الله ...حاجه تانيه .
يوسف : لا .. ربنا يهديكي يابنتي
مريم : طب تصبح على خير
وطلعت مريم على اوضتها وهي بتكلم نفسها : ودي اللي هيجبها تاني دي ..وياتري جايه لوحدها ولا معاها مامتها