أصدقاء لا أزواج .. بقلم : أميرة عادل

الحلقة التاسعة

#أصدقاء_لا_أزواج
#بقلم:#أميرة_عادل

الحلقة التاسعه:
وقفنا الحلقة اللي فاتت لما مريم دخلت مكتب مدحت وهو سالها
مدحت : ولا يهمك ... المهم فكرتي في الكلام اللي قلتهولك
مريم : بصراحه لا لسه
مدحت : ليه ؟؟؟
مريم : حصل شويه ظروف كده .. وانا واكرم سيبنا بعض
مدحت (عينه لمعت لمعه انتصار ) : طب دي حاجه جميله خالص .. كده تفكري من غير ضغط .. يومين وهستني ردك .. تمام
مريم : ربنا يسهل .. عن اذنك
خرجت مريم من المكتب وهي عماله تفكر يا تري اللي عملته كان صح ولا غلط .. ياتري مدحت احسن فعلا ولا اكرم
..........................................................................................................................................................................
نفس اليوم اكرم قاعد في اوضته مارحش الشغل وعمال يفتكر كلام مريم لما كانت معاه في المطعم اخر مره
فلاش بااك
اكرم : متقوليش كده يا مريم انا مقدرش اعيش من غيرك .. ادي نفسك فرصه واديني فرصه .. مش ممكن الحب الكبير اللي بينا يتهد في لحظه .. ارجوكي يا مريم .. ارجوكي
مريم : عموما انا خلاص فكرت وقررت
اكرم (بحده لاول مره ) : هو ايه اللي فكرت وقررت .. مش بمزاجك على فكره .. لازم اعرف ايه اللي غيرك كده مره واحده
مريم : اوك ... انا مكنتش عايزه اجرحك .. مدحت اتقدملي
اكرم : نعم يا ختي .. اتقدملك ازاى يعني .. (ومسك ايدها اللي فيها الدبله جامد ) امال ده ايه .. اللي في ايدك ده ايه
مريم : سيب ايدي بتوجعني ..( وسحبت ايدها منه ) اكرم ..بلاش نخسر بعض .. خلينا نفضل اصحاب احسن .. بلاش تدمر كل حاجه حلوه كانت بينا
اكرم (بدموع ) : انا يا مريم .. انا اللي بدمر كل حاجه .. انا اللي بعت يا مريم  ... امشي يا مريم .. امشي
مريم بصتله باسف وطلعت علبه الشبكه من شنطتها وحطت فوقها الدبله
اكرم (بابتسامه مكسورة بالدموع ) : ده انتي مرتبه كل حاجه بقا وجايبه الشبكه ..
مريم بصتله تاني ومشيت
اكرم مسك الدبله في ايده .. كان حاسس ان روحه بتتسحب منه .. نفسه يصرخ بعلو الصوت علي قلبه اللي اتكسر قدام عنيه
دفع اكرم الحساب ... واخد العلبه والدبله وروح البيت .. سابهم في العربيه عشان مش عايز مامته تساله عن حاجه دلوقتي
بااااااك
عدي يومين .. واكرم علي نفس الحال مبيخرجش من اوضته ولا بيروح شغله .. دخلت منال علي اكرم اوضته
منال : انا عايزه افهم انت عامل في نفسك كده ليه ؟؟؟
اكرم : عامل ايه يا ماما ما انا كويس اهه
منال : كويس ايه بس .. بص لنفسك في المرايه .. هو ده اكرم ابني
اكرم : سيبيني يا ماما لوحدي ارجوكي .. انا مش قادر
منال (بعصبيه) : انت عامل في نفسك كده ليه .. وياريت عشان واحده عدله تستاهل .. لكن دي واحده باعتك عشان راجل تاني .. انت ايه مبتفهمش
اكرم (باستغراب ) : انتي .. انتي عرفتي منين!!
منال : هو ده اللي يهمك .. مش هامك انها فضلت عليك واحد تاني .. ياخساره علي الرجاله
اكرم : بقولك عرفتي منين يا ماما
منال : عرفت منها .. كنت صعبان عليه بقالك كام يوم من ساعه اللي حصل وانت قافل علي نفسك .. حتي الشغل ما بتروحوش .. كلمتها قلت احاول اصالحكم ... لقيتها بتقولي انكم سيبتوا بعض و انها خلاص هتتخطب لصاحب الشركه .. يعني باعتك وباعت حبك بالفلوس يا راجلي .. هي دي اللي فضلتها عليه واتحدتني عشانها .. اهه مع اول راجل شاورلها بفلوس رميتك ومشيت .. فوق بقا .. الحمد لله اننا لسه علي البر ولا كنتوا اتجوزتوا ولا حاجه .. انا اصلا من الاول مكنتش مرتاحه للجوازه دي
اكرم : اه باعتني .. ارتاحتي كده .. وعايزه تعرفي كمان ... لو مريم فسخت خطوبتها .. لا مش بس لو فسخت خطوبتها .. دي لو اتجوزت واتطلقت ورجعتلي .. هرجعلها واتجوزها .. عشان انا بحبها وعمري ما حبيت ولا هحب غيرها
منال (بصدمه ) : انت ايه يا اخي .. اللي بيجري في عروقك ده نوعه ايه .. مش ممكن يكون دم .. انت لا عندك دم ولا نخوه ولا حاجه ابدا .. الله يرحمه ابوك .. كويس انه مات قبل ما يسمع ويشوف ابنه كده .. اتفو عليك راجل .. بلاش قرف
وخرجت متنرفزه  وسابته
.........................................................................................................................................................................
رجعت مريم من الشغل .. ودخلت اوضه المكتب ليوسف
مريم : بابا فاضي شويه
يوسف : خير يا مريم ... عايزه فلوس
مريم : لا معايا شكرا .. انا بس كنت عايزه اقولك ان انا واكرم سيبنا بعض
يوسف (بحده ) : ايه .. سيبتوا بعض ازاى .. وازاي يسيبك كده مع نفسه .. مش هو واخدك من بيت ..لازم كان يرجعلي قبل اي قرار .. ده قليل الادب وما اترباش
مريم : بابا .. اولا اكرم متربي .. ثانيا انا اللي سبته مش هوا .. عن اذنك
يوسف : تعالي هنا .. هو ايه اللي عن اذنك .. قوليلي حصل ايه .. زعلك في ايه .. وانا اجبلك حقك ثالث ومثلت ..
مريم : هو مزعلنيش في حاجه .. انا اللي سبته ومش هتكلم في حاجه .. عن اذنك بقا عشان عايزه ارتاح .. اه ومتتصلش بيه تعرف في ايه .. لانه مش هيقولك حاجه .. ده قراري انا وزي ما بلغتهولوا بلغتك انت كمان .. تصبح علي خير
طلعت مريم من غير ما تستني اي كلمه من باباها .. يوسف بصلها وهي ماشيه وضرب كف علي كف
.........................................................................................................................................................................
عدي يومين .. اكرم نزل الشغل وبيحاول ما يقابلش مريم .. مفيش اي حوار بينه وبين مامته ... مريم المفروض بكره هترد علي مدحت بخصوص الجواز
تاني يوم الصبح .. في الشركه عند  مريم ومدحت
دخلت مريم مكتب مدحت
مريم : مدحت بيه
مدحت : قولي مدحت بس .. ها فكرتي
مريم : اه فكرت
مدحت قام من علي المكتب ولف قعد قدامها ... : ها و النتيجه ايه ههه
مريم (بدلع) : انا موافقه ... شوف هتيجي تكلم بابا امتي ؟
مدحت وهو بيشرب سيجارته : واكلم بابا ليه !!
مريم (بدهشه ) : عشان نتجوز .. امال هنتجوز ازاي .. ولا انت رجعت في كلامك !!!
مدحت : انا قلت هتجوزك .... بس الموضوع ملوش لزوم اكلم يوسف بيه يا مريم
مريم : مش فاهمه
مدحت (وهو بينفخ دخان سيجارته ) : يعني هنتجوز عرفي
مريم (بصدمه وقامت وقفت ) : نعــــــــــــــــــم !!!!!!!!
مدحت : اقعدي بس .. انا واحد ليه اسمي وسمعتي في السوق .. الناس تقول عليه ايه لما يلاقوني بتجوز واحده صغيره زيك
مريم : والله .. ليه انت فاكرني ايه .. انت متخيل اني ممكن اوافق علي الهبل اللي انت بتقوله ده
مدحت (قام بيلف حواليها ) : فاكرك ايه!! .. فاكرك ايه!! .. اه .. واحده انتهازيه .. بتحب الفلوس .. عارفه مصلحتها فين وبتدور عليها ... عارفه  امكانياتها وبستخدمها كويس ... وسابت خطيبها اللي بتحبه وبيحبها اول ما شاورتلها بالفلوس ... وهتوافقي طبعا .. هو انتي هتعملي نفسك محترمه ولا ايه .. لا يا هانم ... شوفي طريقه تعاملك مع الناس ودلعك وهزارك مع الكل  .. شوفي طريقه لبسك عامله ازاي .. وانتي تعرفي الناس شايفاكي ازاي .. انتي يادوب الواحد يدلع نفسه معاكي شويه كده .. ولما نزهق كل واحد يشوف طريقه ... اما الجواز الرسمي ليه ناس تانيه خاالص
مريم (بصدمه وهي بتقف ) : انت انسان حقير وسافل وانا  ..( وجت تضربه بالقلم .. راح ماسك ايدها جامد )
مدحت : ايدك متتمدش عليا انتي فاهمه .. واتفضلي اطلعي بره مكتبي ملكيش شغل عندي
مريم (باستهزاء ) : انت فاكر انك كده بتلوي دراعي .. انا مريم يوسف .. انا بشتغل بس عشان اتسلي .. ومرضتش اشتغل مع بابا عشان حابه اتعامل لوحدي .. انا اصلا ميشرفنيش اشتغل مع واحد حقير زيك .. وانا هقول لبابا عشان يعرف يتصرف معاك
مدحت (بضحكه استهزاء ) : وهو بابا لو كان فاضيلك .. كان سابك تخرجي وتدخلي براحتك بالمنظر ده واللبس ده والمكياج ده والدلع ده .. ابقي سلميلي علي بابا ههههه
خرجت مريم من مكتبه وهي بتعيط .. قابلت اكرم في وشها ..
اكرم (بخضه ) : مالك يا مريم .. حصل ايه
مريم : مفيش يا اكرم .. ارجوك سيبني لوحدي
اكرم (بحب) : لا مش هسيبك .. هاتي حاجتك وتعالي نروح نقعد في اي حته .. نشرب حاجه وتحكيلي
خرجوا سوا وقعدوا في كافيه جنب الشركه .. ومريم حكتله كل كلام مدحت وهي بتعيط .. اكرم مد ايده ومسح دموعها
اكرم : اوعي تزعلي من كلامه يا مريم يا حبيبتي .. انا معاكي .. وعمري ما هسيبك .. وهنرجع لبعض ونكمل حياتنا سوا .. انا مكنتش عايش الفتره اللي فاتت دي
مريم : اكرم هو انت لسه عايزني بعد اللي عملته فيك
اكرم : انت بتسألي !! .. انا كنت مستنيكي ترجعيلي .. قلبي كان بيقولي انك راجعه تاني ..
مريم : انا بحبك قوي يا اكرم .. يارب اقدر اسعدك
اكرم : انا كمان بحبك قوي .. انا هروح اقول لماما ونرجع لبعض تاني
مريم : ماشي يا حبيبي
..........................................................................................................................................................................
فريده ومي في الكليه .. فريده ومي كان عندهم سيكشن مع ياسين .. بعد ما خلصوا ولسه بيخرجوا من الباب لقوا في وشهم عمر
مي اتكسفت وبصت في الارض .. وقلبها كان بيدق جامد قوي وهي مش عارفه ليه
فريده : ايه ده ..عمر ازيك
عمر وهو باصص لمي : الحمد لله انتي اخبارك ايه .. ازيك يا انسه مي
مي : الحمد لله بخير .. عن اذنك .. يالا يا فريده
فريده (بابتسامه ) : يالا .. باى عمر
مشيت فريده ومي .. فريده (بغمز) : هو ايه النظام
مي : نظام ايه
فريده : لا ابدااا هههههههه
مي : بتضحكي ليه .. يالا وصليني عشان ما اتأخرش
فريده : يالا ...
خرج ياسين من السكشن بعد ما لم حاجته .. لقى عمر واقف بيبص علي فريده ومي وهما ماشين
ياسين ضربه علي كتفه : بتعمل ايه هنا
عمر (بخضه ) : خضتني يا اخي حرام عليك
ياسين : ايه اللي جابك هنا
عمر : وحشتني يا سينو جيت اشوفك
ياسين : لا يا راجل .. وده من امتي
عمر : من دلوقتي .. ويالا سلام عشان انا مستعجل مش فاضيلك
ياسين : هو ايه اللي جاي وايه اللي سلام .. ما تفهمني
عمر : طيب بس بشرط
ياسين : شرط ايه
عمر : انا عايز اتجوز مي
ياسين : علي طول كده
عمر : ايوه .. ها هتكلمهالي ولا اكلمها انا
ياسين : لا اصبر انا هكلم فريده اسألها الاول مش يمكن يكون في حد في حياتها
عمر : ايه !!.. لا مش ممكن .. ان شاء الله مفيش حد ... طب يالا كلمها
ياسين : اكلمها ايه دلوقتي .. هكلمها بالليل
عمر : اتصل دلوقتي واخلص .. مش هفضل في القلق ده لحد بالليل
ياسين : دلوقتي هيكونوا مع بعض .. انا بالليل هكلمها واكلمك .. اتقل شويه
عمر : طب اول ما تكلمها تقولي علي طول .. تمام
ياسين : تمام ..
عمر : يالا سلام بقا .. قلتلك مش فاضيلك .. ياساتر
ياسين : هههههههه
..........................................................................................................................................................................
وصل اكرم البيت بتاعه..
اكرم : ماما .. ماما .. انتي فين
منال : انا في المطبخ .. تعالي
دخلها اكرم المطبخ ..
اكرم : ماما حبيبتي .. انا بحبك قوي
منال : خير يا ابني .. ايه اللي مفرحك قوي كده
اكرم : باركيلي يا ماما .. مريم رجعتلي تاني
منال (لفت وشها و وقعت الفوطه اللي كانت مسكاها ) : رجعتلك ازاي
اكرم(بفرحه) : يعني مش هتتخطب لمدحت ولا حاجه خلاص .. وهنرجع لبعض
منال(بتتغير ملامح وشها ) : تصدق بالله انا معرفتش اربي
اكرم : ليه بس .. انا قلتلك.. قبل كده اني هستناها لما ترجعلي .. واهه رجعت ليه عايزه تطفي فرحتي .. ليه مش عايزه تشوفيني سعيد
منال (بتريقه) : انا .. هو في راجل .. ها.. راجل يقبل علي نفسه خطيبته تقوله معلش سوري لقيت واحد معاه فلوس اكتر منك  وهروحله وانت بقا معطلكش .. لا وكمان الراجل اللي كانت رايحاله يسيبها .. فهي ترجعلك يا حرام ..(وكملت بحده)  ايه يا عره الرجاله اللي انت فيه ده .. لا رجاله ايه .. انت حتي محصلتش عيل برياله .. دي بتلعب بيك .. عملاك شخشيخه في ايدها .. ماشي وراها تنفذ اللي هي عايزاه بالحرف .. سابتك وحطيتك احتياطي ورجعتلك تاني .. ياخساره تربيتي فيك
اكرم : ايه الكلام اللي بتقوليه ده .. طب يكون في علمك اني هتجوز مريم ..
منال (بتحدي) : وانا مش موافقه .. مش موافقه يابن بطني .. مش عايزه اشوفك خرع كده
اكرم : وانا مش هتجوز غيرها
منال : احسن خليك من غير جواز ... بلا قرف
وسابته ودخلت اوضتها ورزعت الباب وراها
......................................................................................................................................................................
فريده رجعت البيت ...
فريده : دلال يا دلال
دلال : ايوه يابنتي .. حمدالله علي السلامه
فريده : الله يسلمك .. ممكن تحضريلي الاكل بسرعه لاني هموت من الجوع
دلال : بس كده من عنيه .. وبالمره اشوف مريم هتتغدي ولا لا
فريده : ايه ده هي مريم رجعت بدري
دلال : اه جت بدري ومش زي عوايدها .. ومن ساعه ما رجعت وهي في اوضتها قافله عليها الباب
فريده : طب حضري انتي الاكل لينا احنا الاتنين وانا هطلع اشوفها
طلعت فريده وخبطت علي باب اوضه مريم ..
فريده : ممكن ادخل
مريم : اكييد .. تعالي
فريده : مالك .. انتي تعبانه .. دلال بتقول انك رجعتي من بدري
مريم : ابدا .. اصلي سيبت الشغل
فريده : ايه!! .. سيبتيه ليه ..
مريم :عادي يعني .. زهقت
فريده : قلبي بيقولي ان في حاجه .. اتكلمي يا مريم انا اختك .. ومحدش هيحبك ويخاف عليكي قدي
مريم ..كانها ما صدقت سمعت كلام فريده .. وبدأت تحكيلها كل حاجه من ساعه ما مدحت طلبها للجواز .. لحد كلامها مع اكرم انهم يرجعوا لبعض وهي بتعيط
فريده : اقولك الحق ومتزعليش
مريم : قولي .. مش هزعل
فريده : بصراحه كده .. لو مدحت ده فكر فيكي كده ليه حق
مريم (بعصبيه ) : ايه اللي بتقوليه ده
فريده (بهدوء ) : قولتلك متزعليش .. بصي يا روما ... اولا سيبتي خطيبك اللي بيحبك وبتحبيه عشان واحد جه قالك انا معايا فلوس اكتر مع اننا مش محتاجين وبابا مكنش هيخليكي تحتاجي حاجه ... ثانيا ... انتي كل لبسك مفتوح قوي وقصير ..ده انا بنت .. وبتلفتي نظري اتفرج عليكي .. مابالك بالاولاد .. كمان انتي بتدلعي علي الكل .. وطريقه كلامك كلها دلع واغراء .. يعني من الاخر حطيتي نفسك في وضع شبهه ...
مريم : ياسلام ... وانتي بقا البنت الملتزمه اللي مفيش منها
فريده : انا لا ملتزمه ولا حاجه للاسف ... بس اهه اديني بحاول .. انا كنت بصلي علي سطر واسيب سطر زي ما بيقولوا .. بس بعد اللي حصلي ده الحمد لله بقيت بصلي علي طول .. اه مش محجبه لسه .. بس ناويه .. عشان مش عايزه اتحجب وارجع اقلعه تاني .. مش عايز اعمل زي ناس كتير متحجبين من سنين .. وقدام شويه كلام عن الموضه واللبس اتنازلوا عن حجابهم وقلعوا .. مش عايزه اعمل كده .. عايزه البسه وانا مهما شفت ومهما اتقالي عمري ما افكر مجرد تفكير اني اقلعه .. مش بقرا قران للاسف غير نادرا او في رمضان بس كمان .. بس اديني بحاول واحده واحده .. وانا متاكده ان ربنا مش هيسبني كده عشان هو عارف اني نفسي اكون احسن
مريم سكتت ومرضتش .. وبعدين قالت : فريده معلش ممكن تسيبني لوحدي شويه
فريده : بصي انا اسفه لو زعلتك .. بس انا كده طول عمري tuff
مريم : مش زعلانه منك ولا حاجه ... بس بجد عايزه اقعد لوحدي
..........................................................................................................................................................................
نفس اليوم بالليل ... رن موبايل فريده
ياسين : فريده ازيك
فريده : الحمد لله .. انت اخبارك ايه
ياسين : تمام .. بقولك عايزك في موضوع مهم جدااا وحيوي جداااا
فريده (بضحك ) : خير .. قول
ياسين : اصلي بفكر اتجوز
فريده (بحزن ) : الف مبروك
يايسن : انتي ايه رايك في مي ؟؟
فريده (بخضه ) : مي !!
ياسين  : ايوه
فريده (بحزن) : مي انسانه مهذبه ومتدينه ومحترمه وبنت ناس وتستاهل كل خير .. ربنا يسعدكم
ياسين ( بضحك ): مش انا العريس على فكره
فريده : امال ايه .. مش انت بتقول
قاطعها ياسين : برخم عليكي يا حبيبتي .. اعترفي بقا انك بتحبيني وغيرتي عليا .. يالا
فريده (بغيظ ) : بحبك ايه وغيرت ايه .. ايه الكلام ده .. ياسين احنا اصحاب مش اكتر .. وبلاش الكلام ده تاني .. ممكن
ياسين (اتنهد جامد قوي ) : طب خلينا في المهم ... عمر عايز يتجوز مي .. هي في حد في حياتها
فريده (بفرحه ) : لا طبعا مفيش حد في حياتها ... ربنا يسعدهم يارب .. عمر يستاهل كل خير .
ياسين : طب اساليها كده لو معندهاش اعتراض علي عمر .. عشان هو عايز يروح يتقدم علي طول
فريده : مممممم
ياسين : ايه هو الموضوع صعب كده
فريده : لا .. بس انا عندي فكره احلي
ياسين : قولي يا شارلوك هولمز هههه
فريده : اتريق براحتك .. المهم احنا نخليهم يتقابلوا ويتكلموا سوا وهو يسألها عن رأيها بنفسه
ياسين : ده ايه الدماغ الحلوه دي يا صاحبي .. تستاهل بوسه
فريده (وشها احمر واتكسفت ) : نعم!! .. هو ايه اللي .. ايه الكلام ده
ياسين (بضحك ) : مش احنا اصحاب .. وبعدين مالك يعني ... انا مش شايف بنت بكلمها .. انت صاحبي الولد المز .. عادي يعني
فريده : بقا انا ولد يا ياسين .. متشكره قوي .. يالا اقفل بقا
ياسين : استني بس .. خلينا نظبط هنقابلهم ببعض امتي
فريده : هشوف ظروف مي .. وارتبها وابقي اكلمك .. سلام
ياسين : سلام يا مجنناني
قفلت فريده مع ياسين وجواها مشاعر متلغبطه .. فرحانه علي زعلانه علي مكسوفه علي مضايقه ... طنشت كل ده
واتصلت علي مي .. عشان تبدأ تنفيذ خطتها
فريده : ميوي حبيبتي
مي : فريده ..  خير .. احنا لسه قافلين مع بعض من ساعه .. ومبرتحش لميوي دي ههههههه
فريده : طب وحبيبتي بترتاحيلها عادي
مي : ههههه .. مبرتحش لحاجه منك .. عايزه ايه خلصي
فريده : اصلي عايزه اروح النادي بكره وعايزاكي تيجي معايا
مي : اشمعني
فريده : هو ايه اللي اشمعني .. زهقانه ومش لاقيه حد اخرج معاه ولا ارخم عليه غيرك .. امري لله
مي (بضحك ) : هو عشان بابا وافق مره .. هيوافق علي طول ولا ايه ... انسي
فريده : مي يا حلوه .. روحي زني علي عمو زي اي بنت مصريه اصيله  لحد ما يوافق .. اوك .. مفيش اعذار
مي : خلاص هقول لبابا .. وارد عليكي بكره .. اوك
فريده : اوك
..........................................................................................................................................................................
تاني يوم الصبح راحت فريده كليتها .. حضرت محاضرتها هي ومي وروحت علي طول .. ويادوب فريده وصلت البيت وطلعت اوضتها لقت موبايلها بيرن
فريده : ازيك يا ياسين عامل ايه
ياسين : اهلا يا فريده .. فينك مشفتكيش النهارده يعني
فريده : عادي بقا
ياسين : طب عملتي ايه في موضوع مي
فريده : باباها وافق بالعافيه .. انها تخرج معايا يوم الخميس .. هنروح النادي .. تمام كده .. الباقي عليكم بقا
ياسين : ماشي يا معلمي
فريده : رخم قوي
ياسين : عارف
.................................................................................................................................................................
عدت يومين علي مريم وهي قافله عليها اوضتها ... مش بتتكلم مع حد ولا بتخرج ولا حتي بترد علي تليفونات اكرم اللي كان هيتجنن
لحد ما قررت انها هتغير استيل لبسها كله وتغير طريقه تعاملها مع الناس ... فكانت عايزه تنزل تشتري هدوم جديده .. فتحت الدولاب بتاعها وفضلت واقفه قدامه مش طايقه هدومها ومش عارفه تلبس ايه .. رمت كل هدومها علي الارض ... ومش لاقيه حاجه تلبسها
راحت خبطت علي فريده في اوضتها ... ملقتهاش .. كلمتها في التليفون
فريده (بخضه ) : الو يا مريم .. خير يا حبيبتي في حاجه
مريم : ايه يا فريده مالك اتخضيتي كده ليه
فريده : لا ابدا .. بس مش متعوده انك تكلميني الصبح كده
مريم : كنت عايزه استاذنك ف حاجه
فريده : اامري يا مريوم
مريم : ممكن استلف من عندك هدوم عشان عايزه انزل ومش لاقيه حاجه البسها خالص
فريده : امال هدومك راحت فين يا بنتي .. ده انتي عندك هدوم ولا المحلات هههه
مريم : خلاص يا فريده .. مش عايزه حاجه .. سلام
فريده : استني بس .. مش قصدي والله .. الدولاب قدامك اهه خدي اللي انتي عايزه  في اي وقت مش محتاجه تستاذني اصلا
مريم : متشكره قووي يا فري.. باى
فريده : باى
أخدت مريم من عند فريده بنطلون بجي بيج واسع وعليه تى شيرت نص كم ولمت شعرها ومحطتش ميكب اب خالص ونزلت راحت مول .. اشترت هدوم كتيير قوي ورجعت تاني علي البيت
مريم : دلال .. يا دلال .. تعالي عيزاكي
دلال : نعم يا ست مريم
مريم : انا اسمي مريم بس .. وتعالي معايا الاوضه عايزاكي تساعديني
دلال طلعت مع مريم وهي مستغربه لانها اول مره تقولها اسمي مريم بس !! وشالت معاها الاكياس الكتير اللي شارياها .. واول ما دخلت الاوضه لقيتها مقلوبه
مريم : لمي كل الهدوم اللي في الارض دي .. وخدي منها اللي انتي عايزاه .. والباقي حطيه في الشنطه اللي هناك دي وشيليها
دلال : حاضر ... بس انا مش عايزه حاجه
مريم : خلاص لميهم كلهم
بدأت دلال تلم الهدوم اللي علي الارض وتحطهم في الشنطه .. ومريم بترص هدومها الجديده في الدولاب وهي مبسوطه قوي .. خلصت دلال ونزلت .. وخلصت مريم ودخلت اخدت دش وخرجت لبست فستان طويل فيه الوان كتير متداخله .. لبست عليه جاكت جينز .. وحطت ميك اب .. ولبست ايشارب قعدت تربط فيه ساعه 
ونزلت عشان تتغدي معاهم تحت .. كانت فريده لسه ما وصلتش ويوسف في المكتب
دخلتله مريم ..
يوسف اول ما شافها استغرب قووي وقال : انتي اتحجبتي !!!
مريم : اه ايه رايك؟
يوسف : زي القمر يا مريم .. ربنا يهديكي يارب
مريم : شكرا ... اه صحيح انا سبت الشغل ... وبدور علي شغل تاني
يوسف : طب ايه رايك تيجي تشتغلي معايا
مريم : لا يا بابا .. انت عارف رائي في الموضوع ده .. انا احب اعتمد علي نفسي
يوسف : طب ايه رايك .. في واحد صاحبي كان بيدور علي مديره مكتب .. اكلمهولك
مريم : ممم طيب خلاص ماشي
رجعت فريده من الكليه .. دخلت علي مكتب يوسف كانت مريم لسه معاه
فريده مبرقه : مريم .. مش ممكن .. مش معقول
مريم (بسعاده ) : ايه اللي مش ممكن مش معقول
فريده : ابدا .. بس اصل .. مستغرباكي
مريم : طب كده احلي ولا الاول
فريده : لا كده طبعا .. شكلك زي القمر يا مارو ... مبرووك الف مبروك
مريم : ميرسي .. عقبالك
فريده : يارب
..........................................................................................................................................................................
عدت يومين ومريم اشتغلت في شركه صاحب باباها .. ولسه هي مش بترد علي اكرم وهو هيتجنن مش عارف مالها وليه مش بترد عليه
اكرم لسه زي ما هو زعلان مع مامته .. وفي يوم بعد ما  رجع من الشغل ..
منال : انت هتفضل كده لحد امتي
اكرم : كده اللي هو ازاي
منال : هتفضل زعلان مني .. يابني انا خايفه عليك .. انا عايزه مصلحتك ..
اكرم : وانا  عارف مصلحتي كويس .. واطمني انا مش هتجوز من وراكي ولا غصب عنك .. عشان كده انا قاعد معاكي اهه
ودخل اوضته وسابها ... واتصل علي مريم ..واخيرا ردت
اكرم (بلهفه) : مريم .. انتي فين .. انتي كويسه .. طب مبتروضيش عليه ليه .. انتي وحشاااني قووي
مريم : معلش يا اكرم .. انا محتاجه اكون لوحدي شويه الفتره دي
اكرم : بس انتي وحشانى قووي
مريم : وانت كمان .. بس بجد انا محتاجه افكر في حاجات كتير واعيد حساباتي من الاول في كل حاجه في حياتي .. قبل ما نرجع لبعض ..
اكرم : انا بحبك يا مريم .. ليه بتعذبيني .. ليه بتبعدي عني
مريم : انا مش ببعد عنك .. انا بحاول الاقي مريم الاول
اكرم : مش فاهم
مريم : مش مهم .. يالا سلام دلوقتي
اكرم : بس يا مريم
مريم : خلاص يا اكرم .. نتكلم بعدين .. سلام بقا
اكرم (بحزن )  : سلام
..........................................................................................................................................................................
يوم الخميس ... عدت فريده علي مي واخدتها وراحوا النادي
فريده قاعده مع مي وعماله تبص لموبايلها كل شويه
مي : في ايه يابنتي .. انتي مستنيه مكالمه ولا ايه
فريده : ها .. اه .. اصل كرستين المفروض تكلمني .. بس متصلتش
مي : طب ما تكلميها انتي
فريده : تصدقي صح
اتصلت فريده بياسين .. (بتتكلم انجليزي )
فريده : الو كرستين
ياسين : كرستين ايه .. انا ياسين يا بنتي
فريده : عارفه .. مكلمتينيش ليه كل ده .. ده انا قاعده في النادي انا ومي في الكافيتريا
ياسين بضحك : اها .. طيب احنا قدامنا دقيقتين وهتلاقينا قدامك
فريده : اوك .. متتاخريش عشان هنمشي ها .. باي
مي باصلها وهي بتتكلم .. واول ما قفلت
مي (بنص عين ) : فريده .. انطقي وقولي في ايه دلوقتي حالا ...
فريده : بصي يا مي ... بصراحه كده ..عمر عايز يتكلم معاكي شويه عشان عايز يتقدملك وهو جاي دلوقتي
مي (بارتباك و وقفت ) : ايه اللي بتقوليه ده .. لا مينفعش ابداا .. انا ماشيه
فريده (بتقف ) : استني بس
مي بتلف عشان تمشي ... لقت عمر في وشها .. مي ارتبكت قووي و وشها احمر جداا
عمر : ازيك يا انسه مي
مي (بصوت مش طالع ) : الحمد لله
عمر : انتي ماشيه ولا ايه
مي : اه .. عن اذنك
عمر : طب ممكن اخد من وقتك 5 دقايق بس
مي (بكسوف وارتباك ) : لا .. ما هو اصل .. يعني
عمر (بحنان)  : ارجوكي .. 5 دقايق مش اكتر
مي : طيب .. اوك .. اتفضل
عمر : طيب ممكن نقعد عشان مبعرفش اتكلم وانا واقف
مي (ابتسمت ) : بس
فريده مسكتها من ايدها وقعدتها : اقعدي بقا .. وانا هروح اقعد علي الترابيزه اللي جنبك دي
مي : فريده ...
بس فريده كانت مشيت ومدتهاش فرصه
عمر قعد قدام مي ...
عمر : احم احم ... بصي يا انسه مي .. من غير لف ولا دوران عشان انا مش بعرف ازوق الكلام .. انا عايز اتجوزك
مي اتكسفت ومرضتش
عمر : ها قلتي ايه ؟؟؟
مي (بكسوف ) : اشمعني انا .. يعني انت متعرفنيش ولا انا اعرفك
عمر : مش هخبي عليكي .. انا كنت بدور علي بنت مؤدبه ومحترمه ودول موجودين كتير لو دورنا .. بس انا اللي شدني ليكي ... (وابتسم) معرفش هو ايه الصراحه ههههههه
مي ضحكت ...
وكمل عمر : من ساعه ما شفتك وانا حاسس بحاجه شداني ليكي قوي ... قلبي بيقولي هي دي اللي بتدور عليها .. وعايز تكمل حياتك معاها .. تعرفي اني رحت كلمت ماما عنك علي طول يوم ما شفتك ... اه ماتستغربيش اصل انا وهي اصحاب .. وهي مستنياني اقولها علي المعاد عشان نيجي نطلب ايدك من عمو .. بجد انا هكون في منتهي السعاده لو وافقتي تكوني شريكه حياتي
مي (بكسوف ) : لو زي ما بتقول فعلا ... روح كلم بابا
عمر : افهم من كده انك موافقه
مي وهي بتقوم : معرفش بقا .. عن اذنك
علي الترابيزه التانيه ....
ياسين : ازيك يا فريده .. وحشتيني
فريده (بضحك ) : ما انا عارفه
ياسين : لا والله .. ايه الغرور ده
فريده : اتاخرتوا كده ليه .. مي كانت عايزه تروح
ياسين : ابدا .. عمر كان بيلبس اللي علي الحبل ويستعد بقا مش عريس
فريده بصت ناحيتهم : ربنا يسعدهم ياارب
ياسين : يارب ويهدي اللي في بالي
فريده لفت بصتله .. لقيته باصصلها قوي .. عنيها جت في عنيه ..لاول مره فريده تركز في عنيه .. كان لونها ازرق شبه مايه البحر الصافيه .. فيها دفا وحب وحنان مشافتهومش قبل كده .. ارتبكت انها باصله قوي كده .. وبصت في الارض
ياسين ابتسم ابتسامه خلت وشه بقا احلي من كل الاوقات : فريده .. انتي لسه مش عايزه تريحيني
فريده رفعت راسها بتبصله : اريحك ازاي!1
ياسين (بحب وثقه ) : فريده .. انا بحبك .. ومتأكد انك بتحبيني
فريده (بابتسامه عشان تداري كسوفها وارتباكها ) : ده ايه الثقه دي .. جبت التاكيد ده منين
ياسين وهو بيبص في عنيها : من عنيكي العسلي اللي عامله زي العسل الصافي .. قاليتلي الحقيقه .. قاليتلي انك بتحبيني زي ما انا بحبك
فريده (بارتباك وبتبعد عنيها عنه ) : ياسين .. انت صديق غالي عليا قوي .. وصدقني انت راجل ممتاز ويابختها اللي هتكون من نصيبك .. بس المشكله عندي انا .. انا عايشه  بمبدأ اصدقاء لا ازواج .. مشفتش قصه حب وجواز سعيده .. ولا كملت علي خير .. لازم يكون ليها ضحايا .. انا مش عايزه اكون ضحيه .. ومش عايزه اخلف واجيب بنت كل ذنبها في الدنيا انها جت بين اب وام هيسيبوا بعض ... (دمعت فريده وهي بتتكلم ) ياسين انا مش عايزه حد يكسرني .. ارجوك افهمني (وعيطت جامد )
ياسين (صعبت عليه فريده قوي وقال بحنان ) : طب ممكن متعيطيش .. فريده انا بحبك وعمري ما هجرحك او اكسرك صدقيني .. محدش بيكسر نفسه يا فريده .. وانتي نفسي .. ادي نفسك فرصه ومتخافيش انا معاكي وجنبك .. مش كل الرجاله زي بعض ولا كل الستات زي بعض .. ارجوكي يا فريده ..متخافيش ..
فريده (ابتسمت ابتسامه مكسورة ) : انا مش عارفه اقولك ايه .. ياسين انت .. انت اغلي حد عندي .. انا بجد ارتحت لك .. وفتحتلك قلبي .. وعشان كده بقولك انا بح ..
وهنا جت مي وعمر ...
مي : يالا بينا يا فريده
ياسين (في سره ) : اعوذ بالله .. ياساتر عليكي .. ايه اللي جابكم دلوقتي بس ياربي
فريده : اه يالابينا .. باى ياسين ..باى عمر
ياسين (بغيظ ) : سلام
مشيت فريده ومي .. وقعد عمر قدام ياسين وهو مبسوط
ياسين : مش قادر تطول شويه يا اخي
عمر : ليه ها .. ليه .. كنتوا بتقولوا ايه
ياسين : من غير ليه .. المهم عملت ايه
عمر (بحب ) : هكلم باباها واروح اخطبها  وهتجوز .. هتجوز
ياسين (بضحك ) : مبروك يا عمور
عمر : حبيبي يا سينو .. عقبالك
ياسين : يديني ويديك طوله العمر
في العربيه عند فريده ومي ....
مي : ده موقف تحطيني فيه يا فريده .. ماشي
فريده : ليه بس يا حبي ... ده عايز يتجوز ... مش بيلعب يعني .. المهم قلتيله ايه
مي : قلتله كلم بابا ... واخد رقم بابا
فريده : ايوه بقااا .. مبروك يا ميوي يا قمر انتي
مي : الله يبارك فيكي .. عقبالك
فريده : لا .. انا مش عايزه اتجوز
مي(بغمز) : ولا ياسين ... امال كان وشك احمر ليه كده وشكلك مكسوفه لما جيتلك
فريده : احمر ايه .. ومكسوفه ايه .. بطلي تهيؤات .. ده انتي يا روحي اللي كنت عامله كده .. ليه هو عمر قالك ايه بالضبط
مي : مش هرد عليكي علي فكره
..........................................................................................................................................................................
عمر كلم بابا مي .. وراحولهم هو ومامته واتفقوا يعملوا خطوبه يوم الخميس بعد اسبوعين والفرح اول ما مي تخلص امتحانات ... وفريده مشغوله مع مي بتجهيزات الخطوبه ...
اكرم كل ما يكلم مريم ترد عليه نفس الرد .. محتاجه اكون مع نفسي شويه .. مريم مبسوطه جداا في شغلها الجديد .. الشركه بالنسبه ليها حياه غريبه عليها .. لاول مره تشوف ناس اول ما تسمع الاذان يسيبوا اللي وراهم ويتجمعوا في مكان صاحب الشغل مخصصه للصلاه .. بيصلوا كلهم ورا نفس المهندس .. اللي كانت عماله تسمع عنه من كل اللي بيشتغلوا في الشركه عن طيبته وشطارته واخلاقه وطريقه تعامله مع الكبير قبل الصغير .. كان لافت نظرها ان ممكن حد الناس كلها تجمع عليه انه كويس للدرجه دي .. ليه ...
في يوم كان عندهم شغل في الشركه متأخر عشان بيجهزوا لمؤتمر .. المغرب اذن .. الموظفين اللي في الشركه راحوا عشان يصلوا .. ومريم كالعاده .. بتروح قريب من المصلي وتشوفهم .. مريم سمعت صوت المهندس ده وهو بيقرا قرآن ... كانت حاسه انها مرتاحه قوووي .. صوته في قراءه القرآن .. كأنه بيغسل قلبها ويريحها .. كان نفسها تتعرف عليه قوي .. وتتكلم معاه وهي مش عارفه ليه .. بس اللي عرفته عنه انه مش بيكلم اي زميله ليه خارج حدود الشغل ...
وف مره شافته وهو ماشي في الشركه ... ندت عليه
مريم : لو سمحت يا بشمهندس احمد
احمد وهو باصص في الارض : افندم يا انسه خير
مريم : كنت عايزه اقولك . (وكملت بتردد وكأن الكلمه مش راضيه تطلع من على لسانها ) أناا...