أصدقاء لا أزواج .. بقلم : أميرة عادل

الحلقة الخامسة والسادسة

#أصدقاء.. لا أزواج
بقلم : أميرة عادل

الحلقة الخامسه والسادسه

اكرم كان سايق وبيعدي من تقاطع وهو مركز في التليفون مع مريم .. جت عربيه قابلته في وشه .. وخبطته ..
نزل اكرم بيتخانق مع الراجل اللي خبطه .. ورجع مسك تليفونه .. وكلم مريم
مريم : اكرم .. انت رحت فين ..قلقتني عليك قوي
اكرم : متقلقيش يا حبيبتي .. عملت حادثه بسيطه
مريم : طب انت كويس .. اطلبلك الاسعاف .. لحد ما اجيلك
اكرم(بحب) : حبيبتي .. متقلقيش .. انا زي الفل .. العربيه بس اللي اتخبطت جامد .. وهكلم الصيانه يجوا ياخدوها .. وانتي تعالي بقا معلش نروح بعربيتك
مريم : اوك يا حبيبي .. انت فين بالضبط
اكرم : في تقاطع شارع ........
مريم : اوك .. مسافه الطريق واكون عندك
اشترت مريم واكرم الطلبات اللي كانوا محتاجينها للرحله .. ووصلت مريم اكرم علي البيت ... وتحت بيت اكرم
اكرم : مريموم .. هتعدي عليا بكره الصبح عشان نروح النادي سوا
مريم : اكييد يا حبيبي
اكرم : لما توصلي تحت البيت عندي الصبح رنيلي .. وانا هنزلك .. عشان مش هقول لماما اني عملت حادثه عشان متقلقش.. وبتبوظ عليا الرحله
مريم : اوك يا حبيبي
...................................................................................................................................................
يوم الرحله الصبح ...التجمع كان في النادي
عدت مريم وفريده علي اكرم واخدوه  .. وصلوا النادي ..وكان هناك اصحابهم ... فريده لا ارادي دورت بعنيها بين الواقفين علي ياسين ما شافتوش ..
قالت لنفسها : انتي بتدوري عليه ليه .. يجيي ولا ما يجيش .. انتي مالك .. انتي مسافره عشان كرستين وبس .. فوقي يا فريده .. مفيش راجل لازم ياخد حيز من عقلك قبل قلبك كمان هاااا .. فوقي
ركبوا كلهم الباصات .... قعدت مريم جنب اكرم .... واصحابهم ناريمان واحمد و علا وابراهيم جنب بعض .. وقعدت فريده وجه عمر قعد جنبها .. واتحركت الباصات
حطت فريده سماعات الهاندفري في ودانها وشغلت اغنيه لفيروز .. وكانت لابسه نضاره الشمس بتاعتها وغمضت عنيها عشان مش عايزه تقعد تتكلم مع حد
فريده .. سرحت خالص مع كلمات وصوت فيروز ... عمر حد خبط على كتفه
عمر بص لقي ياسين .. اللي غمزله .. فعمر قام وقعد ياسين مكانه .. وفريده كل ده مغمضه عنيها وسرحانه ومش حاسه بالتغير اللي حصل
ياسين مد ايده مسك موبايلها اللي كانت حطاه علي الشنطه وقفل الاغنيه .. فريده بتفتح عنيها تشوف في ايه ..
فريده : ايه يا عمر ... ( لقت ياسين قاعد جنبها بصتله قووي ) ايه ده .. ياسين ..انت جيت امتي وازاي
ياسين (بحب ) : ازيك يا فريده ..عامله ايه .. وحشتيني
فريده (بكسوف ) : ميرسي .. انت جيت امتي
ياسين (بابتسامه ) : جيت من بدري ... وجيت عشانك
فريده ( بارتباك ) : عشاني ... ليه !!!
ياسين ابتسم لها ومسك موبايل فريده ودخل علي youtube  وشغل اغنيه ... كل اللي بيحصل ده وفريده باصاله ومتنحه ...
اشتغلت الاغنيه ( فريده لسه السماعات في ودانها ) ...
عايزه الحقيقه انا معجب بيكى ماعرفش ايه شدنى لعنيكى
من يوم ما شفتك وانا روحى فيكى انتى الى غيرتنى اوام
فى حب يوصل للدرجه دى هتجننينى وانا اصلا هادى
خليكى واقفه شويه قصادى وسبينى اقولك احلى كلام
قربى تكسبى قلبى في صفك تكدبى تكدبى ليه على نفسك
جربى وتعالى ثانيه انا عايزك مين بيحبك قدى انا
ناويلك انا حني ولايميها ماتفرحيني بقى يلا
قوليها بصراحة كده ماهو فيها لا فيها
اصلا مافيش على قلبي ملام
بفرح اوي وعينيكي في عينيا لميتي كل الناس حوليا
تعالي هاتي ايدك في ايديا وبأي حجة ان شاء الله سلام
فريده كانت بتسمع الاغنيه وهي مرتبكه وباصه ناحيه الشباك .. غصب عنها نزلت من عنيها دمعه ومسحتها بسرعه عشان ياسين ميشوفهاش .. بس هو شافها .. بعد ما الاغنيه خلصت ..شالت السماعات من ودانها ..
ياسين (بحنان ) : عرفتي ليه
فريده مرتبكه وبتحاول تجمع وقالت : ياسين .. بلاش ارجوك .. مش عايزه اخسرك
ياسين : تخسريني ... ليه .. هو في حد في حياتك وعشان كده دمعتي
فريده : دمعت !!
ياسين : ايوه يا فريده .. انا خدت بالي علي فكره ..
فريده : لا مفيش حد في حياتي ..
ياسين : طب فهميني..
فريده : عشان انا عمري ما هقدر ابادلك نفس مشاعر .. انا مش بفكر ارتبط بحد .. ولا احب واتحب ..
ياسين : ليه !!
فريده: عشان .. عشان انا مش عايزه اكون ضعيفه .. (وسكتت شويه عشان كانت هتدمع بس حبست الدموع في عنيها ) ياسين ارجوك افهمني .. انا بعزك قوي وبعتبرك اعز صديق ليا .. لا اعز صديق ايه ...  انت صديقي الوحيد .. انا معنديش اصحاب في مصر غيرك انت ومي .. ارجوك ..انا معنديش اي استعداد اني اخسرك .. ياريت تفهمني .. ياريت
بصتله فريده تستني منه رد او كلمه .. وهو كان باصصلها ... وبعدين لف وبص قدامه .. وفضلوا طول الطريق ساكتين و كل واحد باصص قدامه ...
وصلوا الفندق في شرم الشيخ .. واستلموا الاوض .. كانت اوضه مريم وفريده جنب اوضه عمر وياسين و اودامهم اوضه اكرم
وطلعوا كلهم اوضهم يستريحوا
في اوضه مريم وفريده ....
فريده : مريم .. تعالي ننزل نتمشي شويه
مريم : لا يا فري انا تعبانه من الطريق ..هاخد شاور وانام
فريده : طيب خلاص انا هقوم اخد شاور واغير هدومي وانزل اتمشي شويه
مريم : اوك .. as u like
دخلت فريده اخدت شاور ولبست تروكار بيج كتان وعليه بدي كت بينك وكاب بينك ولمت شعرها ذيل حصان .. ولبست نضاره الشمس ونزلت تتمشي علي البحر
فضلت تتمشي شويه وبعدين قعدت علي شيزلونج علي البحر ..وهي سرحانه في ياسين .. وعماله تفتكر مواقف اللي جمعت بينهم سوا من اول مره شافته فيها ..
وقالت لنفسها : مالك يا فريده .. زعلانه ليه من ساعه ما رديتي علي ياسين وقلتيله انكم اصحاب .. مش ده اللي انتي عايزاه ...
- اه ..هو ده اللي انا عايزاه
- بس متنكريش ان في حاجه جواكي اتحركت ناحيه ياسين
- حاجه ايه .. لا طبعا .. الحب ضعف وانا عمري ما هكون ضعيفه ..
- يمكن ده بس عشان اول واحد اسمحله ياخد حيز في حياتي ..ويكون صديق .. طول عمري مش بدي فرصه لاي راجل ايا كانت صفته يكون ليه مساحه في حياتي .. مكنتش بكون صداقات مع اولاد ..
- طب واشمعني ياسين بقا اللي اديتيله الحق ده
- عشان.. عشان كنت عايشه بره في نيويورك ..كان في اختلاف طباع وعادات وتقاليد .. فمكنتش حابه اتفهم غلط
- مممم يمكن
- اه .. صح .. هو كده .. لكن هنا في مصر ..نفس العادات والتقاليد .. ايوه انا اديت لياسين حق يكون صديق عشان كده بس .. ايوه هو كده بالضبط
ارتاحت فريده للي وصلتله واخدت نفس عميق واسترخت
.........................................................................................................................................................
في نفس الوقت كان ياسين بيفكر نفس التفكير ... اخد شاور وغير هدومه
عمر : علي فين يا بني ..مش هتنام شويه
ياسين : لا نام انت ..عايز اتمشي شويه
عمر : مالك يا سينو .. حصل ايه بينك وبين فريده في الباص.. شكلكم وانتم نازلين بيقول متخانقين
ياسين : مفيش حاجه .. هنتخانق ليه .. يالا سلام بقا
ونزل ياسين من غير ما يسمع رد عمر
عمر لنفسه : شكلك مش عاجبني يا صاحبي .. ياريت تفتح قلبك وتفضفض ... هاااا انام انا .. انا كده برنس والله .. ملك زماني .. لا حب ولا خناق ولا بطيخ هههههه
ياسين نزل يتمشي علي البحر وهو متضايق ومخنوق .. وعمال يفكر في فريده ويكلم نفسه ويقول :
- وبعدين معاكي يا فريده ... يعني ياربي البنت الوحيده اللي اتشدتلها تطلع معقده من الرجاله باين ولا ايه
- طب هو انت معجب بيها ولا بتحبها .... لو معجب بيها بس ..يبقى خليكم اصحاب احسن زي ما قالتلك .. لكن لو بتحبها .. يبقي خليك جنبها وبحبك ليها تقدر تخليها تغير رايها في الرجاله وتحبك
- طب انا بحبها ولا معجب بيها بس ...
- انت مش عارف شعورك لحد دلوقتي ... طب ازاي تقولها .. ايه كنت عايز تبقوا اصحاب بقا وكابلز والجو ده ...اخص عليك
- لا طبعا ... عمري ما فكرت فيها كده .. امال ايه .. اعرف شعورك انت الاول يا ياسين ..
قعد ياسين علي الرمل.. بيلعب فيها بايده ..وبيفكر في فريده .. وفي كل المواقف اللي جمعتهم سوا .
وفجأه قال بصوت عالي : بحبها... ايوه انا بحب فريده ... بحبها قوي كمان
ابتسم لما ركز انه بيتكلم بصوت عالي ... وقال : الحمد لله محدش كان جنبي .. قلت انا هتجننيني يا فريده
وقام يكمل مشي وهو لسه بيكلم نفسه : بص بقا يا عم ياسين .. انت خليك معاها لحد ما تعرف او تحس اذا هي بتحبك بس عقدها مانعها من الاعتراف بده ولا لا ... اذا حسيتها مش بتحبك ..يبقي تسيبها في حالها واتمني لها السعاده ... لكن لو حسيت انها بتحبك ..يبقي خليك وراها وراها ..لحد ما تخف من كرهها وخوفها من الرجاله .. وهي ساعتها اللي هتعترف بحبك ... بس خلي بالك ان الموضوع ممكن يطول .. متمسك بيها يبقي لازم نفسك يكون طويل .. تمام كده .. علي بركه الله .. (وكمل بصوت عالي ) الله عليك يا سينو يا جامد
... ( ابتسم ) اتجننت رسمي ههههههه
وهو ماشي شاف فريده قاعده علي الشيزلونج وسرحانه خاالص ... قرب منها
ياسين : فريده .. فريده
فريده (اتخضت لانها كانت بتفكر فيه زي ما شفنا ) :  ياسين .. خضتني حرام عليك
ياسين (بحنان ) : معلش ..معرفش انك سرحانه قوي كده
فريده : لا ولا يهمك
ياسين (بجديه بعد ما قعد علي شيزلونج جنبها ) : بصي يا فريده .. انا بعتز بيكي جداا .. وانا بعتذر عن اللي قلته في الباص .. وانا موافق نكون اصدقاء وبس زي ما انتي عايزه
فريده لما ياسين قال بعتذر اضايقت شويه ومبينتش و لما خلص كلام اتنهدت براحه وقالت : بجد يا ياسين .. انت مش عارف كنت قلقانه ازاي
ياسين (بابتسامه ) : قلقانه ليه .. خايفه اسيبك ولا ايه .. متخافيش خلاص انا هصلح غلطتي هههههههه
فريده (بغيظ ) : تصدق انك رخم .. يالا قوم من هنا متقعدش معايا
ياسين (بضحك ): بهزر معاكي يا ديدا ..مالك ههه
فريده : ايه ديدا دي ان شاء الله
ياسين : الله احنا مش اصحاب .. بدلعك
فريده (بارتباك عشان مش عايزه تزعله) : اصحاب اه .. بس بلاش ديدا دي لو سمحت .. اسمي فريده اوك
ياسين : اوك يا فريده يا مجنناني
فريده اتكسفت و وشها احمر وهي مش عارفه ليه ... رن موبايلها ..ردت
(المكالمه مترجمه)
فريده : كرستين حبيبتي .. فينك
كرستين : انا خلاص هركب الطياره .. بكره الصبح هكون عندكم في شرم ..هنزل في اوتيل ...........
فريده : تمام .. اول ما توصلي هتلاقيني في انتظارك ..باي
كرستين : باي
ياسين : مين كرستين دي ؟؟؟
فريده : هو انا محكتلكش عليها ..اخص عليه .. كرستين دي صاحبتي الوحيده في نيويورك .. بحبها قووي وعلي طول كنا مع بعض في نيويورك .. زيك كده يا ياسين
ياسين ( بخبث ) : زيي ايه .. بتحبيها زيي
فريده : وبعدين معاك يا ياسين .. همشي واسيبك
ياسين (بضحك ) : لا يا ستي .. خلاص ..كملي
فريده : اكمل ايه .. المهم هي جايه تقضي اسبوع معايا هنا في شرم .. وهتوصل بكره ان شاء الله
ياسين (لنفسه : ايه اللي جابها دلوقتي ...يالا مش مهم ) : طيب ابقي خديني عرفيني عليها
فريده : اه اكييد ان شاء الله
ياسين (بغمز وهو حابب يغيظ فريده ويشوف رد فعلها ) : ايوه بقا .. تلاقيها اموره .. خلي القعده تحلو
فريده (بغيظ بتحاول ما تبينوش وهي مش فاهمه سببه ) : اه .. هي امورة فعلا .. وقوي كمان
ياسين : طب زي الفل .. خديني معاكي بكره
فريده : لا طبعا .. اخدك معايا فين .. انا هاروحلها .. وهبقي اجبها معايا ..سلام
ومشيت علي طول من غير ما تستني رد
ياسين (ضحك ) : سلام
وقال لنفسه : تكنش بتغير ... طب والله شكلها بتغير هيييييه...حلو جت مصلحه مجيه كرستين دي ..  لما اشوف اخرتها معاكي يا ست فريده
اما فريده فكانت بتسال نفسها هي اتضايقت ليه .. بس بررت ده بانها مش بتحب الطريقه دي وجو المعاكسه ده
.........................................................................................................................................................
نفس اليوم بالليل .. طلب ياسين  واكرم من الاوتيل عربيتين ايجار عشان يعرفوا يتحركوا بيهم كلهم ...  خرجوا كلهم وراحوا يسهروا في خليج نعمه وقضوا وقت ظريف سوا وفضلوا قاعدين علي البسين يلعبوا سوا لحد وش الصبح طلعوا ناموا شويه كلهم
وصحيت مريم وخرجت مع اكرم يتفسحوا لوحدهم ... اخدها اكرم وراحوا ركبوا banana boat  وقضوا وقت ظريف قووي علي البحر .. لا يخلو من دلع مريم و حب اكرم
اما فريده فصحيت بدري وراحت عشان تشوف صديقه عمرها كرستين ..وصلت فريده الاوتيل واتصلت علي كرستين من ال lobby  نزلتلها كرستين واول ما شافوا بعض حضنوا بعض جامد قووي ووسط دموعهم اللي كانت مغرقه وشهم من الفرحه انهم شافوا بعض تاني .. قعدوا شويه علي الترابيزه يشربوا حاجه ويتكلموا سوا
( كل كلام كرستين والحوارات معاها هتكون مترجمه )
كرستين : فري وحشاني قوووي قووي
فريده : انتي كمان وحشتيني جدااا .. مكنتش فاكره اني بحبك كده كرستين هههههههه
كرستين : لسه دمك خفيف زي ما انتي فريده .. احكيلي ايه اخبارك
فريده حكتلها علي كل حاجه حصلت معاها من ساعه ما جت مصر وكرستين ساكته بتسمعها ... بعد ما فريده خلصت كلام
كرستين : بس انا مش فاهمه انتي ليه زعلانه من طنط سعاد
فريده ( بتأثر) : عارفه .. انا بابا وماما عملولي عقده .. بابا مشفتوش غير لما كبرت .. معرفش يعني ايه اب .. معشتش المشاعر دي .. كنت فاكره ان الرجاله كلهم وحشين وانانين .. بس للاسف طلع كمان الستات مش بيفكروا غير في نفسهم
كرستين : مش كل الرجاله كده ولا كل الستات كده
فريده : لا كلهم
كرستين : بس واضح انك بدأتي تغيري رايك فريده في الرجاله
فريده : انا .. لأ ليه بتقولي كده !! .. انا عمري ما هغير رائي ابداا
كرستين : امال ياسين ده ايه .. حكيتيلي عنه كتير .. اول مره يكون ليكي boy friend  فريده
فريده : لا انتي فاهمه غلط .. ياسين صديق وبس just a friend  مش اكتر ..مفيش اي مشاعر بينا
كرستين : مش عارفه حاسه غير كده .. انتي مش عايزه تقوليلي
فريده : لا صدقيني مفيش حاجه غير انه صديق عزيز وبس ... انتي عارفاني كرستين ... انا مش ممكن اسلم ولا افتح قلبي لراجل عشان يتحكم فيا ويطلع عقدة السيطرة عليا ... انا عمري ما هتجوز واجيب بيبي عشان اسيبه يتعذب في الدنيا لوحده ..( هنا دمعت فريده )
كرستين (بابتسامه ) : خلاص فري .. طظ فيهم كلهم .. لا مش كلهم ... كلهم ما عدا جون
فريده (ضحكت ) : اه صحيح .. هو مجاش معاكي ليه ..مش معقول سايبك كده لوحدك .. ده جون اتغير
كرستين : لا هو بس عنده شغل .. وهيجي كمان يومين
فريده : طب يالا تعالي نروح اعرفك على مريم اختي .. انا متاكده انك هتحبيها
كرستين : اوك .. يالا بينا
.........................................................................................................................................................
اتصلت فريده على مريم وعرفت انهم قاعدين علي البسين ... راحتلهم علي هناك هي وكرستين
فريده : هاااي .. ازيكم .. مريم .. دي كرستين صاحبتي اللي حكتلك عنها
مريم : هااي كرستين
كرستين : هاي مريم .. you look amazing
مريم : thanks my dear
فريده : اعرفك بالباقي .. ( وهي بتشاور عليهم ) علا .. احمد .. ابرهيم.. ناريمان .. اكرم ... عمر .. ياسين
كلهم : هاي
كرستين : هاي
قربت كرستين من فريده وقالتلها بصوت واطي
كرستين : ياسين ده طلع امور قوي يا فري
فريده : ايه !!.. امور!! .. مخدتش بالي .. عادي يعني
كرستين (بغمز ) : فررري
فريده : طيب بس بقا
ياسين قام وقرب من كرستين
ياسين : هاي كرستين ... فرصه سعيده جدااا
كرستين : هاي .. انا كمان مبسوطه اني شفتك .. كنت عايزه اتعرف عليك من كلام فريده عنك
فريده مسكت ايد كرستين جامد في الخباثه ..بمعني ايه اللي بتقوليه ده
ياسين (باستغراب ) : ممم .. فريده حكتلك عني .. قالتلك ايه بقا
كرستين لسه هتتكلم .. راحت فريده قايله : تعالي كرستين نتغدى .. احنا ما اكلناش من بدري .. طبعا انتوا اتغديتوا
مريم : اه من بدري ... يالا اتغدوا انتوا بسرعه وتعالوا عشان عايزين نروح الف ليله وليله
فريده : اوك .. عن اذنكم
مسكت ايد كرستين وراحوا المطعم عشان يتغدوا
اما ياسين فابتسم وكمل قعدته معاهم عادي
.........................................................................................................................................................
بالليل بعد ما خلصوا سهرتهم ... شافت فريده لكرستين حجز معاهم في نفس الاوتيل عشان يكونوا مع بعض .. وراحوا سوا كلهم جابوا شنط كرستين وعملت check out   في الاوتيل القديم
تاني يوم الصبح ... صحي ياسين بدري وصحى عمر ..
ياسين : بقولك ايه ما تيجي ننزل نعوم شويه في الهدوء ده .. تلاقي كله لسه نايم .. ايه رايك
عمر : يالا .. احنا ورانا ايه .. بس مش كنا استنينا شويه عشان نلاقي مزز كده نعوم معاهم
ياسين : اتلم شويه يا بني ..اللي يسمعك يقول مقطع السمكه وديلها .. ميعرفش اللي فيها هههههههه
عمر : ايه يا خويا اللي فيها ... انا بس سايب قلبي نضيف للبنت اللي هتحركه عشان هي دي اللي هتكون مراتي وام ولادي .. مش عايز ادخل اي حد في قلبي وخلاص ... واكييد مش هلعب ببنات الناس عشان ربنا يباركلي في مراتي لما تيجي ان شاء الله وتبقي زيي كده ..انا اول واحد اكتب كلمه بحبك في قلبها
ياسين : يا عم ياعم على الرومانسيه ... ربنا يبعتلك بنت الحلال اللي زيك يا عمور .. عرفتي تربي يا طنط ام عمر
عمر(بضحك) : طبعا .. هو انا اي حد .. ده انت ليك الشرف اني مصاحبك هههههههه
ياسين (ضربه على دماغه ) : طب اخلص يالا خلينا نلحق ننزل .. عمال ترغي ترغي مش ممكن مش معقول ..
عمر : ده انا برضه ... تصدق انت خساره فيك الكلام .. يالا روح انزل لوحدك انا هنام .. مش فاهم ايه اللي يصحيني معاك انا
ياسين : ما خلصنا بقا .. يالا قوم اجهز
في نفس الوقت تقريبا .... صحيت فريده وكرستين بدري .. اللي كانوا بايتين سوا مع مريم ... فضلوا يصحوا في مريم كتير بس مفيش فايده
كرستين : انا عايزه انزل البسين .. تنزلي معايا يا فري
فريده : انزل .. ما انزلش ليه... انا تقريبا منزلتش من ساعه ما جيت مصر هههههه
قامت فريده اتوضت وصلت الصبح .. ولبست مايوه اسود وعليه كاش مايوه اسود في فوشيا و كرستين لبست المايوه بتاعها بيكيني اورانج وعليه كاش مايوه ونزلوا سوا
نزل عمر وياسين وهما ماشين ناحيه البسين وبيقربوا
عمر : شوف انا فيه شئ لله ... حظي في رجلي اهه .. مزتين اخر حلاوه بيعوموا هناك اهه
ياسين (بضحك) : ملكش دعوه بحد .. بدل ما اسيبك واطلع انا بقولك اهه
عمر : ليه بس كده .. ياساتر
واول ما وصلوا عند البسين ... ياسين فتح بقه وتنح لما شاف فريده في المايه ...واتنرفز جداااا انه شايفها لابسه مايوه عادي كده
كرستين شافتهم فقالت بصوت عالي : هاي ياسين .. هاي عمر.. come on
عمر : هواااااا ... وراح قالع التي شيرت بتاعه ورماه لياسين ونط في المايه
ياسين كان واقف زي ما هو ..
ياسين (بصوت عالي و حده ) : فريده ... فريده
فريده : نعم يا ياسين .. صباح الخير
ياسين : بلا صباح الخير بلا بتاع .. تعالي عايزك شويه
فريده : طب لما اطلع نتكلم .. انت مش هتنزل
ياسين ( بحده ) : لا مش نازل .. واطلعي حالا بقولك عايزك
فريده استغربت هو بيتكلم كده ليه .. وقالت تطلع تشوفه عايز ايه ... ولسه بتقرب من السلم عشان تطلع .. كان ياسين جاب فوطه من اللي علي الترابيزه ومدلها ايده بيها وهو باصص الناحيه التانيه
( هو اه ياسين مش متدين قوي .... زي ناس كتير بتصلي وتصوم وعندها اخلاق .. بس برضه لسه قلبه نضيف .. ومحبش يشوف فريده كده )
فريده بصتله واستغربت واخدت الفوطه ولفت نفسها بيها وراحت ناحيه الترابيزه لبست الكاش مايوه بتاعها ... كل ده وياسين واقف مكانه زي ما هو
فريده راحتله ...
فريده : ايه يا ياسين ..عايز ايه ضروري كده علي الصبح
ياسين (بيحاول يهدي عشان مش عايز يتخانق معاها ) : انتي ايه اللي عملاه في نفسك ده
فريده (باستغراب ) : نعم
ياسين : انتي ازاي تنزلي البسين كده
فريده : كده اللي هو ازاي مش فاهمه يعني
ياسين (بعصبيه ) : فريده متستعبطيش انتي فاهمه انا اقصد ايه
فريده : لا مش فاهمه .. واحده نازله البيسين .. طبيعي تبقي لابسه مايوه ... امال هنزل بايه يعني !!!!!! وبعدين انت مالك اصلا
ياسين (بعصبيه ) : انتي مش عملالي فيها سبع رجاله في بعض طول الوقت .. ومبحبش حد يقولي كلمه حلوه .. مبحبش حد يقول عليا حلوه .. والكلام بتاعك ده .. ايه اللي انتي عملاه في نفسك دلوقتي بقا .. ايه منظرك لو حد شافك كده يا هانم .. مش مكسوفه من نفسك .. هو يصح يعني تنزلي كده اصلا وجسمك كله عريان تقريبا .. ازاي تسمحي لنفسك مش فاهم والله .. انتي مش في بيتكم .. انتي في اوتيل يعني في ناس غرب موجودين ... مش فاهم بتفكر ازاي دي
فريده بصتله بعصبيه : انت .. انت ... ازاي تكلمني كده .. ازاي اصلا .. انت ...
( ومعرفتش تكمل كلامها وسابته وطلعت اوضتها علي طول )
ياسين : اوووف
كرستين كانت مركزه معاهم ... شافت فريده بتمشي وهي متضايقه .. طلعت من الميه .. ولبست الكاش مايوه بتاعها وقربت من ياسين
كرستين : ياسين .. في ايه .. مالها فريده
ياسين : مفيش ... معرفش
وراح قالع التيشيرت بتاعه ونط في المايه .. كان عايز حاجه تطفي نار الغيره اللي قادت جواه على فريده .. يهدي زعله انه زعلها .. دي تقريبا اول مره يتكلم معاها كده
كرستين بصتله باستغراب .. وطلعت ورا فريده بسرعه .. لحقتها وهي داخله اوضتها .. اخدتها كرستين عندها في الاوضه عشان يعرفوا يتكلموا براحتهم ويسيبوا مريم نايمه
عمر : هو انت عملت ايه يا سينو .. ها الجو كهرب كده وفريده شكلها ماشيه مضايقه وكرستين طلعت تجري وراها ...عكيت ايه ها
ياسين : عمر انا مش ناقصك .. سيبني في حالي الله يخليك .. اقولك انا طالع ...
عمر : استني بس يا بني
بس ياسين طلع فعلا ..طلع وراه عمر علي طول وهو بيقول : ما هو انا لازم افهم .. مينفعش كده
ياسين (بجديه ) : ريح نفسك لانك لو عملت ايه عمري ما هقولك .. اوك .. اهمد بقا وحل عني
طلع ياسين علي الاوضه .. وعمر قال لنفسه : اسيبه شويه مع نفسه يهدي .. وبعدين ابقي اشوف ماله ده
ونزل عمر تاني البسين
.......................................................................................................................................................
في الاوضه عند كرستين وفريده ...
كرستين : مالك يا حبيبتي .. ايه اللي حصل
فريده : مفيش بس تعبت شويه
كرستين : انتي هتخبي عليا .. الكلام ده مع حد تاني .. ياسين قالك ايه زعلك قوي كده
فريده حكتلها كلام ياسين
كرستين ( بعصبيه ) : ماله ده .. بني ادم غريب بيتدخل في حاجه متخصوش اصلا .. وبعدين انا مش شايفه انك عملتي حاجه غلط واحده نازله ال pool  تنزل بايه !!!!!!!!
فريده : لا هو معاه حق للاسف .. وده اللي خلاني اتلغبطت ومعرفتش ارد عليه .. المفروض مكنتش نزلت كده
كرستين (باستغراب ) : معاه حق !!!!!!!!... انتي طول عمرك بتنزلي كده .. ايه الجديد يعني
فريده : الجديد .. اننا في بلد شرقي .. مش في نيويورك 
كرستين : مش فاهمه ..
فريده : يعني هنا مينفعش البنات يلبسوا كده
كرستين : ياسلام .. انا شفت امبارح بنات كتير لابسين مايوهات عادي يعني .. انتي بتقولي اي كلام .. موضوع اللبس ملوش علاقه بالمكان .. الموضوع ليه علاقه بالشخص نفسه .. انا اللي بحدد ايه اللي البسه وايه لا .. حسب وجهه نظري .. مش اسافر نيويورك البس مايوه .. اجي مصر البس طويل ... كده انتي بوشين فريده
فريده : انا بوشين كرستين ....شكرا
كرستين : متزعليش مني .. مش قصدي .. انتي عارفه انا بتكلم علي طول مش بنقي الكلام
فريده : مش زعلانه منك .. انتي عندك حق ... بس تعرفي انا حسيت اني عريانه .. لما ياسين كان بيتكلم .. عشان كده معرفتش اقول حاجه .. كنت حاسه اني عايزه اجري اغطي نفسي بسرعه ...
كرستين : مش فاهمه ..
فريده : خلاص بقا كرستين مش عايزه اتكلم ... ممكن
كرستين : اوك .. انا هدخل اخد شاور
فريده : اوك .. انا كمان هروح اخد شاور واستناكي في الاوضه .. باي
راحت فريده الاوضه .. ملقتش مريم موجوده .. قالت لنفسها : اكييد صحيت ونزلت .. انا هدخل اخد شاور
خرجت فريده من الحمام ولبست بيجامه قطن برمودا وعليها بدي كت لونها ابيض وفيها خطوط خفيفه باللبني .. وسرحت شعرها .. ودخلت تقعد في البلكونه شويه تستنى كرستين ...
بتبص من البلكونه .. شافت مريم وباقي الشله كلهم بيعوموا في البسين .. ولسه هتقعد على الكرسي .....
شافت ياسين قاعد في البلكونه بتاعته وباصص ناحيه فريده
فريده بصتله قوي ودخلت بسرعه الاوضه وقفلت البلكونه ... وقعدت تفكر بينها وبين نفسها
فريده : هو ايه اللي اداله الحق انه يكلمني كده ... هو فاكر نفسه مين .. لااااا .. انا مش ممكن اسمح بكده ابدااااااا.. انا محدش يتحكم فيا ولا يكلمني بالطريقه دي ... انا مش فاهمه انا ازاي مرضتش عليه لييييه... من امتي وانا بسكت ومبروضش .. لا وكمان بدافع عنه قدام كرستين .... لاااااااا... صبرك عليا يا استاذ ياسين ... ان ما وريتك ..
وهنا خبط الباب وكانت كرستين ..
كرستين : ايه ده .. انتي هتنامي !!!
فريده : اه .. هريح شويه
كرستين :  no way ... انا مينفعنيش كده خاالص
فريده (بضحك) : انتي عايزه ايه طيب
كرستين : هتغيري هدومك دلوقتي وننزل نفطر وبعدين نروح علي الشاطئ .. اوك
فريده : امري لله ... انتي ايه اللي جابك من نيويورك
كرستين : بتقولي حاجه
فريده : هههههه... بقول مجيتيش من زمان ليه
كرستين : هههههههههه
غيرت فريده هدومها وكالمعتاد لبست برمودا بطيخي وعليه بدي نص كم بيج ولمت شعرها كالمعتاد ولبست كاب واسنيكرز بيج وشنطتها علي ظهرها وجت تنزل هي وكرستين علي المطعم
لسه بيفتحوا باب الاوضه .. لقوا ياسين في نفس التوقيت بيفتح باب اوضته ...
ياسين : ايه علي فين كده ؟؟
فريده لفت وشها بعيد عنه ومشيت بسرعه ..
كرستين : رايحين نفطر .. تيجي معانا
ياسين : اوك هحصلكم .. هروح اشوف عمر بس علي البسين واجيلكم
مشي ياسين ...
فريده (بعصبيه ) : انتي ليه قولتيله يجيي معانا
كرستين : انتي مش عايزه يفطر معانا ليه .. عادي يعني
فريده (بحده ) : اوك كرستين .. اوك .. يالا بقا خلينا نخلص
قعدوا فريده وكرستين وبدأوا يفطروا .. شويه وحصلهم ياسين .. وراح قعد جنب كرستين عشان يكون في وش فريده اللي كانت مش بصاله خاالص
ياسين : ها هتعملوا ايه بعد كده
كرستين : هنروح علي الشاطئ شويه ... وبصت لفريده خايفه تزعل انها قالت لياسين
ياسين : طب تمام .. هقولهم ونروح كلنا سوا بقا
كرستين : ياريت ..بس ابقوا حصلونا .احنا هنروح دلوقتي هنسبقكم
فريده : خلصتي فطار يا كرستين .. يالا عشان منتاخرش
ياسين (بحنان واتكلم بالعربي ) : فريده .. انتي لسه زعلانه مني
(حوار ياسين وفريده بالعربي )
فريده : وازعل ليه .. هو كان حصل حاجه تزعل
ياسين : عشان اتعصبت عليكي شويه يعني
فريده (بحده ): بص يا ياسين ... انا مش فاهمه انت مالك ومالي اصلا .. انا قلتلك احنا اصحاب وبس مش اكتر من كده وده مايديلكش الحق انك تتكلم معايا كده .. انا مرضتش ارد عليك ساعتها عشان مااكبرش الموضوع مش اكتر ها
ياسين  (بحده ) : ياسلام .. لأ طبعا بما اننا اصحاب زي ما بتقولي .. يبقي  من حقي لما الاقيكي بتعملي حاجه غلط لازم اقولك انها غلط .. حتي لو هتزعلي مش مهم طظ ... هي دي الصداقه يا فريده .. مش اني اقولك برافو علي الغلط عشان متزعليش .. لا ازعلي بقا
فريده : بس ..
قاطعتهم كرستين(بالأنجليزي) : انا مش فاهمه انتوا بتقولوا ايه ..اتكلموا انجليش يا اما امشوا من هنا ..اوووف
ضحكت فريده : الكلام خلص يا كرستين ..يالا بينا ( وكملت بالعربي ) تحب تيجي معانا يا صديقي
ياسين (بيتكلم عربي )(بغيظ ) : امشي يا فريده من وشي دلوقتي احسن
فريده (بالعربي)(بابتسامه مستفزه ) : ليه في حاجه مضايقاك ... هههه .. سلام يا صاحبي ..
وقامت وقفت وقالت لكرستين : يالا بينا
كرستين : اوك .. ياسين جاي معانا
ياسين : لا .. رايح لعمر شويه ..
وقام ياسين ومشي وسابهم ..
........................................................................................................................................................
باقي اليوم كله .. وفريده وياسين مفيش بينهم اي كلام خالص على عكس الطبيعي
تاني يوم الصبح .... صحيت فريده وحاولت تصحي مريم و كرستين ومفيش فايده ..
لبست فريده بنطلون جينز وعليه تي شيرت ابيض وفي رسومات بالاورنج ولبست اسنيكرز اورنج والكاب ونضارتها واخدت موبايلها ونزلت تتمشي على البحر وتشوف الشروق
خرجت من الاوضه وقفلت الباب ....
صحي ياسين على صوت قفل الباب .. بص لقى عمر نايم ..
ياسين لنفسه : دي تلاقيها فريده او مريم خرجوا
وفاق راح نط من علي السرير ناحيه الباب وفتحه لمح فريده وهي نازله
ياسين لنفسه : رايحه فين المجنونه دي علي الصبح كده
ودخل البلكونه شافها رايحه ناحيه الشط وقعدت علي شيزلونج وحطت الهيدفون في ودانها وبتتفرج علي منظر الشروق علي شط البحر ..حاجه كده تحفه تخلي الواحد يعيش في ملكوت تاني من الجمال وابداع الخلاق .. ونور الشمس وهو بيزوق عتمه الليل عشان يحل محله .. سبحان الخالق المبدع
سرح فيها ياسين وهو عمال يبصلها
يارب يكونلى فيكى نصيب .... واعيش العمر فى عنيكى
واكون ليكى دفا وحبيب ... يحقلك امانيكى واريح قلبك الغالى
واطمن قلبى على حالى ... واشيل منك ومنى الخوف
من الفرقة من التعذيب ... يااااارب يكونلى فيكى نصيب
جميلة الدنيا لما القلب ...يلاقى قلب يتمنا يحققلة امانى العمر
ويبقى لجرحة هوا دواه
لقيت فى عنيكى احلامى.. يا عمرى وكل ايامى
يا معنى لحبى وغرامى ...يا شمس فى عمرى مش هاتغيب
ياااااااارب يكونلى فيكى نصيب.
ياسين لنفسه : يارب يا فريده .. انا بحبك بجد .. ومش متخيل حياتي من غيرك ..
فجأه لقى راجلين بيقربوا منها وهي مش واخده بالها خالص .. و واحد وقف وراها وبيرفع ايده هيحط حاجه علي بقها ..
ياسين (بصوت عالي جدا عشان ينبهها) : فريــــــــده
فريده اتخضت وبتلف تشوف الصوت  ... شافت الراجلين وفي نفس الوقت هما اتخضوا ان حد شافهما فبيحاولوا يكتفوها ويكمموا بقها وهي بتصرخ وعماله تزق فيهم على قد ما تقدر
فريده (بصريخ ) : ياسين .. الحقني .. ياسين
من اللحظه اللي ياسين ندى فيها علي فريده ..جري من الاوضه وطبعا عمر صحي على صوته ..ولسه هيتكلم ..شاف ياسين خارج من الاوضه جري زي ما هو بهدوم البيت والشبشب
عمر(بخضه)  : هو في ايه
ياسين (وهو بيكمل جري) : فريده
عمر : فريده .. فريده ايه .. هو في ايه ..
وسحب محفظته  و موبايله من علي الكومود جنبه ...وقام يجري ورا ياسين يشوف في ايه
كل ده حصل في ثواني.... وصل ياسين عند فريده شافهم مسكوها وكتفوها ... ولسه بيحاول يكمموا بقها .. هي شافت ياسين ..
كأن حد اداها قوه تاني للمقاومه بعد ما كانت تعبت
فريده(بصريخ) : ياسين... الحقني .. يااارب .. يارب
ياسين بيجري باقصي سرعته عشان يحصلهم وفعلا مسك واحد منهم وشده وبدأوا يضربوا في بعض .. بس للاسف الراجل كان اقوي من ياسين .. وضربه علي راسه بايد المسدس ... ياسين بعد الضربه دااخ والدم بقا بينزل من وشه ...بس هو لمح رقم العربيه .. والدنيا اسودت قدامه .. غاب عني الوعي
اما الراجل التاني فركب فريده العربيه وركب .. حصله صاحبه بعد ما ضرب ياسين .. وجريوا بالعربيه ..
في اللحظه دي وصل عمر وشاف صاحبه والدم مغرقه ..
عمر(بخضه ) : ياسين .. فوق ... ياسين ... خليك معايا اوعي تسيبني ها ..
كانت الناس خلاص بدأت تصحي ... شاف عمر ناس بتشتغل في الاوتيل جايين ناحيته ...صرخ فيهم بسرعه عشان يساعدوا
اتصلوا بالاسعاف اللي جت بسرعه الحمد لله .. وشالوا ياسين واخدوا علي المستشفي
ودخلوا ياسين بسرعه علي اوضه الكشف .. وعمر واقف بره علي نار هيتجنن علي صاحب عمره ...خرج الدكتور ...
عمر (بقلق)  : خير يا دكتور ... ياسين ماله .. حصله ايه
الدكتور : اطمن هو هيبقي كويس
عمر : ايوه يعني هو ماله
الدكتور : اضرب بحاجه علي دماغه ..عملته اغماء بسيط .. بس لازم يريح علي الاقل يومين وبفضل تحت الملاحظه لحد ما نطمن عليه .. والباقي مجرد كدمات .. اه علي فكره انا بلغت البوليس
عمر : الحمد لله .. متشكر قوي يا دكتور انا كده كده كنت هبلغ .. ممكن ادخله
الدكتور : اه طبعا اتفضل
عمر دخل شد الكرسي اللي كان في الاوضه و قعد جنب ياسين ... اللي كان بدأ يفوق
ياسين (بصوت تعبان ) : فريده .. فريده
عمر : ياسين .. حمدالله علي السلامه يا اخي خضتني عليك
ياسين (بتعب ) : اه .. انا فين .. فريده .. فريده فين يا عمر
عمر : معرفش ..مشفتهاش خالص .. انا علي ما حصلتك لقيتك انت لوحدك
ياسين : يعني ايه .. الراجلين .. فريده .. العربيه ... انا لازم امشي من هنا حالا
عمر : تقوم فين بس ..الدكتور قال لازم راحه وهتفضل هنا يومين
ياسين وهو بيقوم : ولا ثانيه واحده .. لازم ادور عليها والحقها .. انا مش هسامح نفسي ابدا لو حصلها حاجه .. كان لازم الحقها كان لازم
لسه عمر هيتكلم .. لقوا الدكتور دخل عليهم
الدكتور : كويس انك فقت .. حاسس بايه دلوقتي
ياسين : الحمد لله .. انا لازم اخرج من هنا دلوقتي
الدكتور : طب استريح بس وبعدين نشوف .. الضابط جه بره وعايز ياخد اقوالكم عن اللي حصل
ياسين : كويس
دخل الضابط ...
الضابط : حمدالله علي سلامتك .. الدكتور قدم بلاغ انك اتعرضت لضرب عنيف
ياسين حكي للضابط كل حاجه حصلت بالتفصيل وقاله رقم العربيه
الضابط : خير متقلقش وان شاء الله هنلاقيها .. استأذن انا عشان الحق اشوف شغلي .. وده الكارت بتاعي عشان لو افتكرت اي حاجه تكلمني علي طول
ياسين : ان شاء الله
مشي الضابط
عمر : خلاص بقا اطمن .. اهه الضابط قالك انهم هيدوروا عليها .. ممكن تهدي بقا وترتاح زي ما الدكتور قال
ياسين ( بعصبيه ) : بقولك لازم اروح ادور عليها انت ايه يا اخي .. حس بيه شويه
عمر (بزعل ) : انا برضه .. ماشي يا ياسين .. اعمل اللي يريحك وانا معاك يا صاحبي
ياسين : يووه .. معلش يا عمر متزعلش .. انت مش عارف النار اللي جوايا
عمر : ولا يهمك يا صاحبي .. لو انا مستحملتكش .. مين هيستحملك.. وان شاء الله هترجع فريده بالسلامه
ياسين : طب يالا ناديلي الدكتور خليني امشي من هنا
عمر : طب انت هتدور فين بس .. الله يهديك
ياسين : سيبني يا عمر الله يخليك
وخرج من الاوضه ..
عمر : ياسين .. انت يا بني (وطلع وراه عمر) طب استني طيب .. استناني هنا اروح ادفع حساب المستشفي واجيلك
راح عمر دفع حساب المستشفي بالفيزا .. وجري يحصل ياسين .. اللي مقدرش يستني وكان رايح يوقف تاكسي
رجعوا الفندق .. طلعوا اوضتهم .. غيروا هدومهم ونزلوا تاني .. قابلوا تحت في اللوبي .. مريم واكرم وكرستين
مريم اول ما شافتهم .. جريت عليهم
مريم ( بقلق ) : ياسين مشفتش فريده .. انا مش لاقياها خالص .. وكنت عماله اتصل عليها مبتروضش ..لحد ما واحد من الاوتيل جابلي موبايلها وقالي انه لقاه علي الشاطئ ..
ياسين بصلها ومش عارف يتكلم .. عمر حكالهم كل اللي حصل
مريم (بعياط وانهيار ) : يعني ايه .. اختي فين .. انا عايزه فريده .. هاتولي فريده .. انا مصدقت بقا عندي اخت .. انتي فين يا فريده .. ( اغمي عليها )
كلهم : مريم .. مريم
شالها اكرم بسرعه وطلعها اوضتها ومعاه كرستين (اللي مش فاهمه حاجه لحد دلوقتي لانهم بيتكلموا بالعربي بس كان باين ان في حاجه حصلت لفريده ) وطلبوا دكتور
الدكتور جه وفوقها وكشف عليها .. واداها حقنه مهدئه
الدكتور : هي دلوقتي هتنام شويه .. ولما تصحي هتكون احسن ان شاء الله .... ومشي
كرستين : ممكن بقا اكرم ..تقولي ايه اللي حصل
اكرم قالها كل حاجه
كرستين (بعياط ) : لا مش ممكن .. مستحيل .. مين يعمل كده في فريده .. اه .. فريده حبيبتي
اكرم : الله يكرمك تمسكي نفسك .. انا مش ناقص .. بصي خليكي هنا جنب مريم .. وانا هنزل اشوف ياسين وعمر عملوا ايه .. سلام
نزل اكرم ... كان عمر قاعد وياسين بيكلم الضابط في التليفون  .. قرب منهم
الضابط : احنا استعلمنا عن العربيه .. هي لسه هنا في شرم مخرجتش .. وبلغنا عن رقمها لكل الكماين وان شاء الله هنلاقيها بسرعه
ياسين : امتي بس .. بعد ما يحصلها حاجه
الضابط : انا مقدر قلقك .. ان شاء الله خير
قفل ياسين التليفون وعمال يخبط بايده علي الترابيزه اللي قدامه ..
عمر : اخبار مريم ايه دلوقتي
اكرم : احسن الحمد لله .. الدكتور ادالها حقنه مهدئه
عمر لياسين : يابني اهدي شويه .. انت لسه تعبان ومكنش ليك خروج من المستشفي اصلا
ياسين بدأ يدمع ومبيتكلمش وبعدين قال : انا هقوم ادور عليها .. مش هفضل قاعد كده
عمر : هتدور فين بس
ياسين : في اي حته .. هقلب عليها شرم كلها لحد ما الاقيها .. لازم
عمر : طب استني .. انا جاي معاك
اكرم : وانا كمان ..يالا بينا
ركب ياسين وعمر العربيه اللي ياسين مأجرها واكرم اخد اللي هو اجرها عشان كل واحد يدور في اتجاهه
فضلوا يلفوا في الشوارع ومش لاقين اي اثر للعربيه اللي خطفت فريده ... رن موبايل ياسين برقم ميعرفوش
ياسين : الو
المتصل :.............
ياسين : مين معايا .. انا مش فاضي للعب العيال ده
المتصل :.............
ياسين : فريده!! .. هي فين!! .. انت مين!!
المتصل :.............
ياسين : انطق فين فريده ..
واتقفلت السكه .
ياسين : الو .. الو
عمر : مين ده
ياسين : مش عارف .. واحد بيقول انه عارف مكان فريده وعايز يقابلني لوحدي كمان ساعه في ...
عمر : طب تمام كلم بقا الضابط عشان تقوله
ياسين (بارتباك) : ايه !! ... لا طبعا .. لا مش هكلمه لا.. انا مش مستغني عن فريده
عمر (بتفكير ) : طب تعالي نرجع الاوتيل لحد ما يجي المعاد بتاعك .. وانا هكلم اكرم يحصلنا علي الاوتيل
ياسين : طيب
رجعوا الاوتيل .. فضلوا قاعدين مستين معاد ياسين ..
ياسين : انا مش قادر اقعد اكتر من كده .. انا هقوم اروح دلوقتي
عمر : انا برضه مش مقتنع اننا منبلغش
ياسين : انا خايف علي فريده .. مش عايزه ياذيها .. وطالما اتصل .. يبقي تلاقيه عايز فلوس .. هديهاله وارجع فريده ان شاء الله
اكرم : طب احنا هنيجي معاك
ياسين (بارتباك) : ايه !! ... لا ... هو قال لوحدي .. يالا انا هقوم .. سلام
عمر : سلام .. ( اول ما بعد عنهم ياسين شويه ) يالا يا اكرم بسرعه نروح وراه ده مجنون وهيودي نفسه في داهيه وممكن بدل ما بندور علي فريده بس ندور على الاتنين
اكرم : عندك حق يالا
اتحركوا بالعربيه ورا عربيه ياسين .. لحد الكافيه ... وفضلوا قاعدين في العربيه بيراقبوا ياسين اللي دخل الكافيه وطلب قهوه وجتله مكالمه تليفون رد عليها وخرج من الكافيه ركب عربيته .. طلع وراه عمر واكرم .. بس فجأه اختفت عربيه ياسين من قدامهم .. كأنه فص ملح وداب
..........................................................................................................................................................................
في الفندق ...
صحيت مريم .. ملقتش غير كرستين جنبها
مريم (بعياط ) : فريده .. فريده لسه مرجعتش .. ما لقيوهاش
كرستين (بعياط ) : لا لسه
مريم : انا ما صدقت لقيتها يارب .. احنا مش قريبين من بعض قوي .. بس انا حبيتها .. لقيت حد اتكلم معاه ويكون خايف عليه .. حسيت بجو العيله
كرستين : هترجع .. انا حاسه كده .. ياسين هيتجنن عليها ..
مريم : هما فين صحيح ..
كرستين : اكرم اتصل من شويه علي موبايلك يتطمن عليكي وانا سمحت لنفسي ارد .. قالي انهم بيدوروا عليها وانهم هيرجعوا بيها وقالي اطمنك
مريم : يااارب .. يارب كرستين
رن موبايل مريم كانت علا .. مريم كنسلتها ومرضيتش ترد
ناريمان : ايه يا لولو .. مش بترد
علا : اه مش عارفه اختفوا فين كلهم من الصبح
احمد : يمكن عايزين يكونوا لوحدهم .. سيبوكم منهم وخلينا نكمل يومنا وننبسط
كلهم : علي رايك
......................................................................................................................................................................
في نفس الوقت تقريبا ... في مكان مش معروف ... فريده بدأت تفوق .. حست نفسها قاعده علي كرسي .. ايدها ورجلها مربوطين .. وعنيها متغميه ...
فريده مرعوبه وعماله تعيط وتقول : يارب ... يارب انقذني
سمعت صوت خطوات بتقرب ... خوفها زااد وجسمها كله بقا بيترعش من الرعب .. وعماله تدعي في سرها : يارب خليكي معايا .. يارب استرها معايا يارب
الخطوات وقفت قدام فريده بالضبط ... حست بنفس قريب من وشها .. جسمها بيترعش اكتر .. دموعها شلالات نازله .. لحظات من الصمت المخيف ..من جواها بتررد كلمه يارب .. ... ايد بتقرب من شعرها ... قربت قوي .. مسكت الرباط اللي علي عين فريده وبتفكه بالرااحه .. فريده بتغمض عنيها من الخوف ..الرباط اتشال .. والنفس اللي كان قريب منها بعد شويه
فريده بتفتح عنيها بالراااحه في خوف وقلق ... وفجأه تبرق بعنيها في ذهوول مش مصدقه عنيها .. اللي شايفاه ده حقيقي ... طب ليه ليييه