#أصدقاء.. لا أزواج
#بقلم: أميرة عادل
الحلقة السابعه:
ياسين في الكافيه قاعد مستني حد يجيلوا ...
رن موبيل ياسين ..
ياسين : الو .. انت فين
المتصل : كنت بطمن يا دوك بس .. بس انت طلعت شاطر وجيت لوحدك .. روح لغايه المكان ...... وكلمني
ياسين : حاضر
خرج ياسين من الكافيه وركب عربيته .. واتحرك و وراه اكرم وعمر ..,وفجاه اختفي ياسين من عنيهم
اكرم : ايه ده هو راح فين
عمر : حاول تعدي العربيه اللي قدامك دي خلينا نشوفه راح فين؟؟
اكرم عدي العربيه اللي قدامه
عمر : اهه . اهه ... عربيه ياسين اهه داخل يمين .. بسرعه شويه خلينا نلحقه
حصل اكرم عربيه ياسين وفضلوا ماشين وراه .... شويه ووصل ياسين مكان تاني و وقف
عمر : اكرم .. بس اقف هنا ... متقربش قوي .. واقفل نور العربيه .. خليك بعيد عشان لو بيراقبوه ما يحسوش بينا
اكرم : هو انت مهندس ولا ضابط ههه
عمر : يابني .. المهندسين دول بتوع كله ..
اتصل ياسين بالراجل اللي كلمه
ياسين : انا وصلت
الراجل : تمام .. في واحد .... هيركب معاك دلوقتي وهيجيبك لحد عندي
لسه ياسين بيقفل الموبيل .. لقي باب العربيه اللي وراه بيتفتح و واحد بيركب
ياسين : فريده فين يا حيوان انت
الراكب : انا مش مسموح لي باي كلام .. اخلص وامشي زي ما بقولك
ياسين .. سايق العربيه زي ما بيوجهه
علي الجنب التاني ..
اكرم : الحق يا عمر .. في واحد بيقرب من عربيه ياسين
عمر : ايه ده!.. ده ركب معاه .. ده بيتحرك .. هما رايحين فين .. وراهم يا اكرم بس سيب مسافه كبيره بينا
اكرم : اوك ... ما نتصل نبلغ الضابط بقا .. الموضوع شكله كبير
عمر : هنكلمه اول ما نوصل للمكان عشان نقوله العنوان .. دلوقتي هنقوله ايه .. بنلف من حته لحته
..........................................................................................................
فتحت فريده عنيها بذهول
فريده : كريم !!!!!!!
كريم : ايه رايك في المفاجأه دي ؟؟ بذمتك مش حلوه
فريده : انت مجنون ... انت عايز مني ايه
كريم (ببرود وهو بيولع سيجاره ) : تؤ تؤ .. ايه مجنون دي .. عيب يا عروستي
فريده (بتحاول تبين انها مش خايفه مع انها ميته في جلدها من الخوف ) : عروسه ايه .. ما تفوق ... انت اتقدمت واترفضت .. خلص الموضوع .. ايه لازمه جو الخطف والحركات ده .. لو فاكر اني كده هخاف وهوافق علي جوازنا تبقي بتحلم
كريم (بيلف حوالين فريده و وقف قدامها وطلع دخان سيجارته في وشها ) : ايه اترفضت دي .. مش كريم محمود اللي واحده زيك ترفضه .. انا اشاور بس والف مين يتمناني ... وبعدين مين قالك اني جبتك هنا عشان اضغط عليكي توافقي هههههههه دي انتي علي نياتك قووي
فريده (بقلق) : امال انت عايز ايه !!!
كريم وقف جنبها : عايزك انتي يا حلوه ( وشدها من شعرها جامد بس هي مصرختش وتحملت الالم) انا هدفعك تمن ايدك اللي اتمدت عليا دي غالي قوووي ( وعمال يحسس بايده علي وشها )
فريده(بعصبيه) : ابعد ايدك عني .. انت حيوان
كريم بعصبيه ضربها بالقلم وفضل يضرب فيها بالاقلام لحد ما شفتها ومناخيرها بقوا بينزلوا دم وهي بدأت تفقد وعيها تاني
كريم (بهدوء عجيب بسرعه بعد العصبيه اللي كان فيها ) : شفتي بقا .. خلتيني اعمل ايه .. واعورك ازاي .. اخص عليكي .. وانا اللي كنت عايزك حلوه النهارده .. دي النهارده دخلتك يا عروسه ههههههههه
فريده خافت قووي وبان عليها وانكمشت علي نفسها
كريم : خايفه مني مش كده ... هههههه ... بس مش دلوقتي .. هروح اجهز نفسي عريس بقا .. اه وكمان محضرلك حته مفاجاه هتعجبك قوي .. اقولك عليها دلوقتي ولا استني ...(وسكت شويه وهو بيبصلها) هقول وخلاص .. اصل انا عزمت حبيب القلب معانا النهارده .. لازم يحضر الليله الحلوه دي هههههههه
فريده : انت انسان مريض .. انا مبحبش حد اصلا افهم بقا
كريم (بضحكه مستفزه) : ههههههههه باي يا عروسه
خرج كريم من الاوضه اللي فيها فريده وقفل عليها بالمفتاح .. وقال للراجل اللي كان واقف علي باب الاوضه : خليك بره انت .. في واحد هيجي دلوقتي مع صاحبك ..عايزكم تروقوهولي كده قبل ما تدخلوهولي
اما فريده ففضلت تعيط جامد قوي وتدعي ربنا ..
فريده لنفسها : يارب .. انا عارفه انك مش مبسوط مني .. ومليش وش اطلب مساعدتك ...بس انت ياربي الغفور الرحيم .. انا حاسه انك مش هتسيبني لوحدي ... ساعدني يارب واحميني ..
..........................................................................................................
وصل ياسين والراجل اللي معاه .. وقابلوا التاني علي باب شاليه في حته مقطوعه .. ياسين اول ما شافه افتكره لان ده هو الراجل اللي ضربه قبل كده ..جري ياسين عليه عشان يضربه وهو بيصرخ : فين فريده ... عملتوا فيها ايه
بس طبعا الراجلين ضربوا ياسين جامد .. وكتفوا ايده ورا ضهره و شدوه وهو متبهدل من كتر الضرب ودخلوه لكريم
ياسين اول ما شافه : كريم !!!!!!
كريم : مفاجأه مش كده ... هو انتوا كلكم بتتفاجوا كده ليه ههههههههه
ياسين : انت اكييد مجنون .. فين فريده انطق .. عارف لو كنت لمست شعره منها هعمل فيك ايه
كريم (باستفزاز) : لا بجد .. وكمان بتهددني .. انت ايه يا دكتور .. مش مقدر الموقف صح ولا ايه .. ولا شكل الضرب الي اخدته اثر علي دماغك .. انت هنا تحت ايدي .. وبين رجالتي
ياسين (بزعيق) : فريده فين بقولك
كريم بيكلم رجالته : هاتوه
فتح كريم باب الاوضه اللي حابس فيها فريده ..
ياسين اول ما شاف فريده .. وشاف الدم نازل من وشها .. جري عليا بسرعه
ياسين : فريده .. انتي كويسه
فريده (اللي كانت مغمضه عنيها كانها كده بتحمي نفسها .. فتحت عنيها بسرعه ولهفه اول ما سمعت ياسين ) : ياسين ... الحمد لله يارب .. الحمد لله انك جيت .. خرجني من هنا ارجوك
كريم (بضحك ) : الله ... حلو لقاء العشاق ده ... ههههه
وقال للرجاله : هاتوه هنا وكتفوه علي الكرسي ده
قعدوا ياسين علي كرسي في وش سرير وكتفوه عليه ..
كريم : تمام كده .. يالا سيبونا انتوا بقا واستنوا بره الشاليه .. وفتحوا عنيكم كويس
..........................................................................................................
في الوقت ده ... كان اكرم وعمر وصلوا قريب من الشاليه ووقفوا لما شافوا ياسين وقف بالعربيه ونزل
اكرم : متهيالي كده هو ده المكان
عمر : اه اعتقد كده .. انا هكلم الضابط اقوله العنوان ونستني احنا هنا
نرجع تاني عند فريده في الاوضه ..
ياسين (بعصبيه) : والله لادفعك تمن اللي انت عملته فيها ده يا حيوان
كريم : انت لسه فيك حيل تتكلم .. وبعدين انا لسه هعمل .. ده انا كنت مستنيك يا دكتور عشان تعرف اني بحبك هههههههه
ياسين : كريم .. سيب فريده تمشي وانا معاك اهه .. خلينا نتفاهم راجل لراجل
كريم قرب من فريده وبيحرك ايده علي وشها بالراحه وهي بتلف وشها بعيد عنه
ياسين (بعصبيه ) : ابعد ايدك عنها يا حيوان انت
كريم : تؤ تؤ .. مش حلو كده .. (وكمل وهو بيفك فريده من علي الكرسي ) اصل النهارده دخلتنا يا دكتور وانا كنت عازمك تتفرج ... ايه رايك .. مش بفهم في الاصول برضه هههههههههههههه
ياسين (بعصبيه ) : هقتلك يا كريم هقتلك .. اياك تلمس شعرها منها انت فاهم
اول ما فريده اتفكت جريت بسرعه ناحيه الباب بس كريم حصلها بسرعه وشدها من شعرها جامد وسحبها لحد السرير وزقها عليه وهي بتحاول تهرب منها وبتصرخ وهو بدأ يقرب منها ويبوسها وهي بتزقه بكل قوتها وبتصرخ
وياسين بيحاول يفك نفسه من علي الكرسي اللي متكتف عليه وهو بيشتم في كريم
كريم بيقطع هدوم فريده بغل ..
فريده بصراخ : ياااارب .. سيبني يا حيوان .. حرام عليك
ياسين .. عرف يفك رجله بس من الكرسي وقام بيه ولف ظهره ورجع بالكرسي علي ظهر كريم بسرعه
كريم بعد عن فريده خالص وراح ناحيه ياسين .. بيضربه .. وبالرغم من ان ياسين لسه ايده مربوطه في الكرسي .. بس خوفه علي فريده .. كان مديله قوه جباره .. خلته زق كريم و وقعه علي الارض وبرجله فضل يضرب فيه جامد قووي في اي حته وفي كل مكان في جسمه .. وكريم مش قادر او مش لاحق يقوم من كتر وقوه وسرعه الضربات ... في وسط اللي بيحصل ده سمعوا صوت سارينه عربيه البوليس .. وصوت ضرب نار
كريم اترعب : انت بلغت البوليس ازاي .... (وبدأ يضعف زياده نتيجه الرعب اللي حصله )
ياسين (بزعيق وهو لسه بيضربه) : احسن عشان يلم الاشكال اللي زيك .. بس انا مش هسيبك ليهم .. انا هقتلك بايدي يا كلب يا حقير
وياسين لسه عمال يضربه .. اتفتح الباب ودخل عليهم الضباط .. ووراهم عمر واكرم
عمر بيمسك صاحبه : خلاص يا ياسين سيبه ليهم .. هيموت في ايدك
ياسين : يستاهل ..
قبض الضابط علي كريم واخدوا عشان يركبوا البوكس .. وعمر فك ياسين ...
ياسين : ايه ده !! فريده راحت فين
اكرم وعمر طلعوامن الاوضه يدوروا عليها
فريده .. اول ما سمعت صوت البوليس .. مكنتش عايزه حد يشوفها بالمنظر ده .. زقت نفسها جامد جنب السرير .. وفضلت تعيط من غير صوت .. ياسين هيتجنن مش عارف راحت فين ..سمع صوت عياط واطي .. مشي وراه .. لقاها منكمشه علي نفسها ومغمضه عنيها وبتعيط بس وماسكه بايد حتت التي شيرت اللي كانت لابساه تغطي بيها نفسها
ياسين قرب منها وقعد علي رجله جنبها ... ومسك ايدها اللي كانت عماله تترعش
ياسين (بحنان ) : فريده .. فتحي عنيكي .. متخافيش محصلش حاجه .. ارفعي راسك .. خلاص اهدي
فريده (بصوت مش طالع متلجلج ) : ياسين ... انا .. شفت اللي ... وكملت عياط جامد بصوت عالي
ياسين : اهدي يا حبيبتي .. خلاص متخافيش .. اوعي تخافي وانا معاكي
قلع ياسين التي شيرت اللي كان لابسه ولابسها لفريده .. وهي لسه عماله تترعش جامد قوى ومنهاره في العياط
ياسين : يالا قومي معايا عشان نمشي من المكان ده .. يالا
ياسين حاول يوقفها .. يادوب وقفت علي رجلها و وقعت من طولها اغمي عليها
ياسين (بخضه ) : فريده .. فررريده
جه جري عمر واكرم علي صوته ... ياسين شالها بسرعه وخرج بيها وهما وراه .. وركبها العربيه علي الكنبه وركب بسرعه وطلع جري علي المستشفي
و وراه اكرم وعمر بيركبوا العربيه .. الضابط نادلهم
الضابط : معلش انا عارف الظروف .. بس لازم تيجوا معايا القسم عشان نكمل المحضر
اكرم : نطمن عليها بس وهنيجي لحضرتك .. عن اذنك دلوقتي عشان نلحقهم
الضابط : اه طبعا اتفضلوا .. وانا كده كده هحصلكم علي المستشفي لاني لازم اخد اقوال الانسه فريده
وصل ياسين المستشفي وشال فريده ودخل يجري بيها وهو بيزعق وبينادي اي حد يساعده
ياسين : دكتور بسرعه
جت الممرضه ودكتور الطوارئ علي الصوت .. اخدوها منه ودخلوها اوضه الكشف
وصل عمر واكرم ..
عمر : ايه الاخبار .. فريده عامله ايه
ياسين : معرفش معرفش .. اخدوها مني في اوضه الكشف
اكرم : ان شاء الله خير ..
خرج الدكتور ... جريوا عليه كلهم
ياسين : فريده عامله ايه يا دكتور
الدكتور : هي عندها انهيار عصبي .. انا اديتها حقنه منومه .. وان شاء الله لما تصحي تكون احسن ..
ياسين : ممكن ادخل لها
الدكتور : اه ممكن .. بس الاول انا شايف في جروح كتير في وشك وجسمك
ونادى الممرضه : تعالي خدي الاستاذ وطهريله الجروح اللي عنده .. ولو في حاجه محتاجاني ناديلي
الممرضه : حاضر يا دكتور .. اتفضل معايا يا استاذ
راح ياسين واكرم وعمر ورا الممرضه اللي طهرت لياسين الجروح اللي في جسمه و وشه ولفتهمله.. بعد ما خلصوا
اكرم : انا هسيبكم واروح الاوتيل اطمن علي مريم واطمنها علي فريده ..
عمر : طب بالمره خد مفتاح الاوضه بتاعتنا .. وهات معاك تي شيرت لرامبو اللي معانا ده ههههههه
ياسين سابهم بيتكلموا ودخل عند فريده .. جاب كرسي وقعد جنبها ومسك ايدها .. شايفها نايمه وعنيها عماله تنزل دموع
ياسين مد ايده مسح دموعها وهو بيعيط هو كمان : يااااه يا فريده .. كنت هتجنن عليكي .. مكنتش هسامح نفسي ابداا لو كان حصلك حاجه لا سمح الله ولا الحيوان ده كان قدر يعملك حاجه .... ربنا كبير قوي وبيحبنا قوي .. بس احنا بنعمل حاجات كتير تغضبه .. لازم نرجع لربنا ونقرب منه .. هنقربله واحده واحده .. هنقربله سواا .. انا مش ممكن اسيبك ابدااا .. انا بحبك قوي .. عمري ما كنت اتخيل اني احب وحبيتك .. النهارده بس عرفت اني مش بس بحبك انا بعشقك .. انتي النفس بتاعي .. انتي الدم اللي بيجرى في عروقي .. فوقي يالا وارجعيلي .. ارجعي وانا موافق اننا نفضل اصحاب وبس .. المهم تكوني معايا وجنبي ومطمن عليكي ..
فريده وهي نايمه : ياسين .. متسبنيش يا ياسين
ياسين (بفرحه ) : فريده .. فريده .. انا جنبك .. انتي سامعاني
بس فريده مرضتش لانها في عالم تاني ...
الباب خبط .. ياسين مسح دموعه وساب ايد فريده ..
ياسين : اتفضل
عمر مد راسه من الباب : ادخل
ياسين : ما تدخل علي طول
عمر (بصوت واطي ) : عامله ايه دلوقتي
ياسين : زي ما هي .. مش حاسه بحاجه
عمر طبطب علي كتف ياسين ..: ان شاء الله هتبقي زي الفل واحسن من الاول كمان ... مش هتيجي تستريح شويه
ياسين : مش هرتاح غير لما اطمن عليها الاول
سكت عمر وقعد ..شويه وياسين بدأت دماغه توجعه .. وحس بدوخه وزغلله
ياسين : عمر .. الحقني .. (واغمي عليه)
عمر : ياسين ... يالهوووي علي اليوم اللي مش راضي يخلص ده .. ربنا يستر
نده عمر علي الدكتور بسرعه ... واخدوا ياسين كشف عليه الدكتور وعمله اشاعه بسرعه علي الجمجمه
الدكتور : هو كان مخبوط في دماغه واتخبط فيها تاني
عمر : هو اتخبط النهارده الصبح اه وكان هنا في المستشفي ..
الدكتور : وازاي يخرج من المستشفي .. مين الدكتور اللي كتبله خروج ده
عمر : لا هو اللي اصر يمشي الدكتور ملوش ذنب .. المهم يعني هو ماله
الدكتور : عنده ارتجاج في المخ ... وانا حجزته هنا يومين لحد ما اطمن عليه خالص .. احمد ربنا ان الموضوع خفيف .. واحد تاني بكل اثار الضرب اللي في جسمه وراسه كان زمان الموضوع هيبقي اكبر من كده بكتير
عمر : الحمد لله .. طب هو لسه ما فاقش لحد دلوقتي ليه
الدكتور : انا اللي مديله حقنه منوم عشان يفضل نايم لان الحركه الكتير غلط عليه دلوقتي واحنا مش عايزين ندخل في متاهات ..
عمر : اه .. طيب شكرا يا دكتور قوي
الدكتور : ده واجبي .. عن اذنك
خرج الدكتور .. واتصل عمر علي اكرم
عمر : انت فين يابني
اكرم : لسه واصل الاوتيل اهه .. هو حصل حاجه تاني ولا ايه
عمر : ياسين تعب وطلع عنده ارتجاج في المخ .. انت فين تعالالي
اكرم : خلاص ..انا كلمت مريم وانا في الطريق وطمنتها وحكتلها كل حاجه ...فهستني مريم وكرستين بيلبسوا واجبهم واجي علي طول
عمر : طب تمام متتاخرش عليه بس
..........................................................................................................
وصل اكرم ومريم وكرستين المستشفي ... وراح اكرم يقعد مع عمر عشان يطمن علي ياسين .. اما مريم وكرستين فدخلوا عند فريده
تاني يوم .. فريده بدأت تفوق
فريده (بصوت تعبان ) : ياسين .. ياسين
مريم (بسعاده ) : فريده .. انتي كويسه .. طمنيني عليكي
فريده (بتعب ) : الحمد لله .. ربنا ستر .. ياسين فين .. انا كنت سامعاه بيتكلم جنبي
مريم (بارتباك ) : ياسين تعبان شويه
فريده : ماله ؟؟؟
مريم (بارتباك) : ابدا .. ارهاق يمكن
فريده سكتت متكلمتش .. وقالت لنفسها : ارهاق .. هو مش عايز يشوفني تاني .. لا ازاي .. انا كنت سامعاه متاكده .. اكييد مكنش حلم يعني
كرستين : فريده .. انتي كويسه
فريده هزت راسها بمعني الحمد لله وراحت في النوم تاني
عدي يومين مفيهومش جديد ...
مريم وكرستين دايما مع فريده مش بيسيبوها خالص .. وهي مش بتتكلم مع حد الا قليل قوي .. اما ياسين فكان علي طول الدكتور بيديله منومات عشان يفضل نايم ويمنعه عن الحركه... وعمر معاه علي طول .. اكرم كان ما بينهم الاتنين يطمن عليهم ويجيبلهم اي طلبات محتاجينها .. وطبعا باقي شله الصحاب كانوا مع نفسهم بيقضوا رحلتهم بسعاده .. اصل الصحاب بتبان وقت الشده .. وقت الحزن .. وقت الضعف .. وقت الاحتياج .. مش وقت الفرح وبس .. ودول كانوا اصحاب مصلحه و وقت جميل وخلاص
المهم .. يوسف بيكلم مريم ..
يوسف : الو .. انتوا فين يا بنتي .. بقالي يومين بحاول اكلمكم مش بترودوا خالص لا انتي ولا اختك .. قلقتوني عليكم
مريم : معلش .. اصل فريده .. في المستشفي
يوسف (بقلق ) : مستشفي .. مستشفي ليه .. مالها اختك يا مريم
مريم حكتله كل الاحداث اللي حصلت في اليومين دول
يوسف (بقلق) : انا علي اول طياره هتلاقيني عندكم دلوقتي .. انت ازاى ما تقوليليش من ساعه ما اتخطفت مش فاهم
مريم : اعمل ايه .. مكنتش في وعيي اصلا .. وبعدين ياسين اتصرف هو وعمر واكرم
يوسف : مش مهم الكلام ده دلوقتي .. انا جاي علي طول .. يالا سلام
..........................................................................................................
وصل يوسف المستشفي .. واول ما دخل اوضه فريده .. جري عليها واخدها في حضنه ... فريده بقا لاول مره تسيب نفسها في حضن باباها ..ومتبقاش عايزاه يبعد عنها ويمشي .. وفضلت حضناه وتعيط في حضنه ... لاول مره تحس بحنان الاب واحتياجها ليه .. لاول مره تحس بالضعف بس لما بقت معاه وفي حضنه حست انها رجعت قويه تاني .. كانت خايفه من كل حاجه .. حست بامان العالم كله وهي بين ايديه وهو بيطبطب عليها ..
فريده : بابا .. انا محتاجلك قووي
يوسف (بحنان ) : حبيبتي يا بنتي .. انا معاكي ... وعمري ما هسيبك تاني .. انا عملت غلطه زمان ودفعت تمنها بعد وكره وجفا منك ليه .. اطمني يا حبيبتي .. انا ماصدقت لقيتك .. مصدقت اخدك في حضني واحس بيكي وتحسي بيا .. انا معاكي .. ومحدش هيقدر يجي جنبك تاني .. وانا هجبلك حقك من الحيوان اللي اسمه كريم ده هو وابوه .. هربيه
مريم تقاطعهم ..
مريم (بضحك) : علي فكره من ساعه ما دخلت وكانك مش شايفني يا يوسف بيه .. انا كده هغير علي فكره ..
يوسف (بضحك وهو بيفتح دراعه لمريم اللي اترمت في حضنه ) : انتوا الاتنين اغلي حاجه عندي .. ربنا يخليكم ليا وميحرمنيش منكم ابدا
كرستين كانت قاعده بتبص عليهم وبتدمع من الدفا اللي حسيت بيه لما يوسف اخدهم في حضنه .. هي مفهمتش بيقولوا ايه .. بس حست .. وفي احساس بيبقا اقوي من الكلام بكتيييير
باب الاوضه خبط .. كان الضابط
الضابط : السلام عليكم .. انا عرفت من الدكتور ان حالتك استقرت ونقدر ناخد اقوالك .. عشان عايزين نقفل المحضر ونحول المتهم للنيابه
يوسف : اتفضل حضرتك .. انا والدها
الضابط : اهلا وسهلا بحضرتك ... ممكن معلش تسيبونا لوحدنا عشان التحقيق
يوسف : معلش يابني .. حضرتك عارف الحاله النفسيه اللي هي بتمر بيها .. خليني انا معاكم
الضابط : مفيش مشكله
يوسف : يالا يا مريم .. خدي صاحبتكم واطلعوا استنوا بره
خرجت مريم وكرستين ..
الضابط : نبدأ .. عايز حضرتك تحكيلي كل اللي حصل بالتفصيل
قعد يوسف جنب فريده علي طرف السرير وضمها لحضنه .. وهي بدأت تحكي للضابط كل حاجه من ساعه ما كانت علي البحر .. لحد اللحظه اللي اغمي عليها فيها .. وهي بتعيط وجسمها بيترعش .. كل ما تفتكر وتحكي .. بس وجود يوسف باباها جنبها كان بيطمنها شويه ..
الضابط : احنا كده خلاص .. هنقفل المحضر ونحوله للنيابه .. واتطمني الحكم مضمون خصوصا مع اعتراف الراجلين اللي كانوا معاه
يوسف : متشكر لحضرتك جدااا
الضابط : ده واجبي عن اذنكم ...
بعد ما خرج الضابط ...
يوسف : يا حبيبتي يا بنتي .. كل ده مريتي بيه وانا مكنتش جنبك ... ربنا يحفظك دايما ..
فريده : بابا ... انا اسفه قووي .. اسفه اني مكنتش ..
قاطعها يوسف : متقوليش حاجه يا بنتي .. انتي طريقه معامتلك ليا كانت رد فعل طبيعي للي انا عملته زمان .. غلطتي ودفعت ثمنها .. والله ندمت عليها وحاولت كتير عشان ارجع امك وارجعك .. بس هي كانت خلاص قفلت من ناحيتي .. كانت بترفض دايما ..يالا مش هيفيد بحاجه الكلام دلوقتي .. بلاش نتكلم في اللي فات ..خلينا في اللي جاي وان شاء الله هيكون احسن واحلي طول ما انتي ومريم معايا وفي حضني
فريده : انا بحبك قوي يا بابا ..
يوسف : وانا كمان بحبك قوي يا روح وقلب بابا .. اول ما الدكتور يكتبلك علي خروج هاخدك معايا مشوار مهم جداااا
فريده : مشوار ايه ؟؟
يوسف : لما تخرجي بالسلامه
فريده : ماشي يا بابا اللي تشوفوا
باسها يوسف .. ومسك موبايله .. اتصل بالمحامي بتاعه
المحامي : اهلا يا يوسف بيه
يوسف : كنت عايزك في حاجه مهمه جداا .. عايزك تركز معايا
المحامي : تحت امرك
يوسف : عايزك تروح للزفت اللي اسمه محمود .. ولا اقولك متروحلوش .. تبعتله جواب بفض العقد اللي بينا
المحامي : بس كده خساره لينا... في شرط جزائي
يوسف : مش مهم الفلوس .. ادفع الشرط الجزائي وخلص كل حاجه .. بكره الصبح ميكونش لينا علاقه بشركه محمود خالص انت فاهم
المحامي : اللي تشوفه حضرتك
يوسف : تمام .. يالا خلص وكلمني طميني عملت ايه
المحامي : حاضر .. سلامو عليكم
يوسف : وعليكم السلام
بعد ما يوسف قفل ...
فريده : انت هتفض شغلك مع بابا الزفت ده
يوسف : اكيد طبعا مش محتاجه كلام
فريده : بس هتخسر فلوس كتير ..
يوسف : ملايين العالم كلها متساويش دمعه من عينك انتي واختك ... يالا بطلي رغي انا هقوم اطمن علي ياسين واشكره علي اللي عمله معاكي .. ده راجل بجد .. ربنا يحميه لشبابه
فريده (بتردد) : بابا .. هو انا ينفع اجي معاك .. عايزه اشكره بنفسي
يوسف : اكييد ينفع ده واجب .. بس استني هروح اشوف فاق ولا لسه .. وارجعلك اوك
فريده : اوك
يوسف خرج من الاوضه ... بعدها بشويه مريم رجعت
مريم : ايه ده امال بابا راح فين ؟
فريده : راح يطمن علي ياسين .. تعرفي هو عامل ايه ؟
مريم : اه فاق من شويه .. انا كنت عنده انا وكرستين .. ومشينا عشان كانت عايزه تروح الاوتيل تلم حاجتها وترتب شنطتها عشان مسافره بكره خلاص
فريده : اووف .. ملحقتش افسحها ولا اقعد معاها خالص .. اه صحيح هو جون جه
مريم : لا .. بتقول كلمها وقالها مش هيعرف ييجي عشان عنده شغل كتير
..........................................................................................................
في اوضه ياسين .. يوسف بيخبط علي الباب وبيدخل
عمر : اهلا وسهلا يا عمو .. حمدالله علي السلامه
يوسف : الله يسلمك يا حبيبي .. ازيك يا ياسين عامل ايه يابني
ياسين : الحمد لله يا عمو بخير
اكرم : ازيك يا عمو .. حمدالله علي السلامه
يوسف : ازيك يا اكرم .. والله يا ولاد .. انا مش عارف اقولكم ايه ولا اشكركم ازاي .. علي اللي عملتوه مع فريده بنتي ..ربنا يحميكم يارب
عمر : احنا معملناش حاجه يا عمو .. فريده اختنا واي حد مكانا كان هيعمل كده
اكرم : فريده اختنا يا عمو .. واحنا بصراحه معملناش حاجه .. ياسين هو اللي قام بالواجب الصراحه
ياسين : انا معملتش حاجه يا عمو .. المهم ان فريده بخير ... .... ايه يا عمر انت واكرم مش هتجيبوا لعمو حاجه يشربها ولا ايه
عمر فهم ان ياسين عايز يكلم يوسف لوحدهم فغمزله واخد اكرم وخرجوا
يوسف : كويس انك خرجتهم .. عشان كنت عايز اتكلم معاك لوحدنا
ياسين : تحت امرك يا اونكل .. خير
يوسف : الاول .. انا بجد مش عارف اشكرك ازاي علي اللي انت عملته مع فريده .. لو اي حد مكانك كان قال وانا مالي .. وبلغ البوليس وخلاص هما يتعاملوا .. لكن انت عرضت نفسك للخطر وخاطرت بحياتك عشان تنقذ بنتي .. انت...
قاطعه ياسين : معلش من غير ما اقطع كلام حضرتك ...انا مينفعش مكنتش اعمل اللي عملته اصلا .. وانا مش شايف نفسي عملت حاجه فظيعه .. لو اي حد مكان فريده كنت هعمل كده برضه ولو اي حد مكاني كان عمل كده واكتر كمان .. ما بال حضرتك بانها فريده .. انا فريده بالنسبه لي مش طالبه عندي .. ولا صديقه وبس .. عمي انا بحب فريده ..واتمني من كل قلبي انها تكون مراتي
يوسف : انا حبيت فيك صراحتك .. بس انت عارف فريده كويس .. وعارف انها رافضه فكره الجواز دي خالص
ياسين : عارف .. علي فكره انا قلتلها بس اني معجب بيها .. قاليتلي خلينا اصحاب احسن .. وانا موافق علي ده مؤقتا
يوسف : بص يا بني .. انا اعجبت بيك وبشخصيتك وحبيتك لله ف لله ... وشايفك راجل قد المسؤليه وهكون مطمن علي بنتي وهي معاك .. بس الاول عايز اعرف انت بتحبها بجد ومستعد تستحملها وتتعب شويه ولا لأ
ياسين : ايوه طبعا بحبها بجد .. وحلم عمري انها تكون مراتي وشريكه حياتي .. ومستعد استناها لاخر يوم ف عمري
يوسف (بابتسامه ) : جميل .. بص يا سيدي .... فريده اتربت متعقده من الرجاله كلهم بسببي وبسبب كلام والدتها اللي زرعته فيها من صغرها ... معرفش انت تعرف ولا لا .. والمفروض مقولش الكلام ده بس انا واثق فيك .. بص يا سيدي ( وحكاله يوسف علي كل اللي حصل زمان بين يوسف وسعاد مامه فريده .. لحد ما جت فريده تعيش معاه ) والباقي طبعا انت عارفه ...كمان بعد جواز والدتها ..بقت علي طول شاكه في حب الناس ليها .. مبقتش تعرف تصدق حد .. مبقتش تحب تتعلق بحد او تحب حد عشان متاكده انهم في الاخر هيسيبوها ويبعدوا ... عشان كده مبقتش عايزه تاخد حاجه حلوه من حد لان معندهاش حاجه تديها قصادها .. قلبها قفل من جوه ....
ياسين : انا مقدر كل ده وعارفه .. بس انا مش عارف هي مش عايزه تديني فرصه ليه .. متخيله انها مش مهمه في حياه حد .. مع انها اهم واحلي حاجه في حياتي ... نفسي اقولها اني عمري ما هسيبها .. عمري ما هقدر اعيش من غيري او ابعد عنها .. عايزها تتطمن اني عمري ما هجرحها او اكسرها ...
يوسف : عارف ... عارف انا قلتلك الكلام ده ليه
ياسين : ليه
يوسف : عشان حسيت ان فريده جواها حاجه من ناحيتك بس بتكابر ومش عايزه تعترف بده .. ده انا عرفت انها ندت عليك اول ما فاقت .. هههه .. عشان كده يا بني بقولك اصبر واستحملها
ياسين (بسعاده ) : يعني انا احساسي كان صح .. مكنتش بوهم نفسي .. الحمد لله يارب الحمد لله
يوسف (بضحك) : انت خفيف كده ليه .. لا مينفعش كده خالص .. فريده محتاجه تحس بالراجل في حياتها .. راجل بجد .. تقيل كده وراسي .. مش بيستسلم بسهوله .. اد كلمته .. (كمل بحزن ) نوعيه ما شافتهاش قبل كده وما كانتش تتخيل ان ده هو الراجل بسببي ( وسكت شويه وكمل ).. واعتقد ان ده اللي شدها ليك وخلاك تحتل مكانه صديق عندها .. وانا اللي اعرفه ان مفيش حد قدر يوصل حتي انه يكون صديق في حياتها .. فدي خطوه كويسه جدا .. اوعي تتراجع وهي تحس بده .. هتبقي خسرتها ... فاهمني
ياسين : فاهمك يا عمو .. متقلقش
يوسف : طب انا هروح اجيب فريده .. عشان عايزه تيجي تطمن عليك .. والكلام اللي حصل بينا مش عايز حد يعرف عنه حاجه .. تمام يابني
ياسين : اكييد يا عمو
خرج يوسف من الاوضه .. وراح جاب فريده ورجع لياسين تاني .. فريده اول ما دخلت اوضه ياسين فضلت باصاله وساكته خالص مش عارفه تقول ايه ..
ياسين (كان مبسوط قوي انه شافها قدامه تاني بخير ) : ازيك يا فريده .. عامله ايه
فريده : الحمد لله .. انت عامل ايه
وقربت قعدت علي كرسي كان جنب السرير بتاع ياسين
يوسف : طب انا هطلع ثواني بس اعمل تليفون مهم وارجعلك يا فريده ..اوك .. عن اذنك يا ياسين
ياسين : اتفضل يا عمي
خرج يوسف عشان يسبيهم يتكلموا براحتهم
ياسين بص لفريده .. لقاها باصه في الارض .. ياسين مد ايده بالراحه ورفع وشها ليه وبص لعيونها ... لقاها مدمعه
ياسين ( بحنان ) : فريده .. انا عارف ان اللي حصل كان صعب جداا عليكي .. بس الحمد لله جت سليمه .. يبقي نبطل عياط ونرفع راسنا زي ما طول عمرنا رافعينها ونقول الحمد لله .. ومتخافيش من اي حاجه ولا من اي حد طول ما انا جنبك يا فريده
فريده (بدموع ) : ياسين .. انا .. انا مش عارفه اقولك ايه .. كلمه متشكره هتبقي قليله قوووي قوي عليك .. مش عارفه من غيرك كنت هعمل ايه ولا كان زمان الحيوان ده ..(وسكتت وانهارت في العياط )
ياسين : خلاص بقا .. انسي كل اللي حصل .. عايز ارجع من تاني اشوف فريده صاحبتي الجدعه .. وبعدين انا ناوي اخسرك ماتش اسكواش اول ما نرجع ان شاء الله .. جهزي نفسك واتمرني كويس لو بتفكري تكسبيني
فريده (بابتسامه من بين دموعها ) : بس كده .. ده انا اخسرلك مخصوص
ياسين (بضحك ) : لا انا احب اكسب بمجهودي ... (كمل بحنان ) اوعديني تعدي الموقف ده وتنسيه خالص
فريده (بهدوء) : اوعدك
ياسين : ايوه كده .. (كمل بضحك) وبعدين فين يا هانم التي شيرت بتاعي .. شكلك طمعتي فيه عشان هو addidas وهتبيعيه بقا وتاخدي فلوسه .. لااا مينفعش كده .. ولا تكوني بتفكري تقليبيه مني وتلبسيه .. ها .. انا عارف شكله كويس
فريده ( بضحك ) : متقلقش عليه قوي كده .. لما تخرج بالسلامه هغسله بنفسي واكويه واجبهولك لحد عندك
ياسين (بحب ) : لا انا عايزه زي ماهو كده من غير ما تغسليه .. (كمل بضحك ) لحسن تبوظيه ولا حاجه .. انا هتصرف فيه بمعرفتي
فريده : تصدق انا غلطانه .. انا اصلا مش هرجعهولك ها .. هخليه عندي .. ايه رايك بقا
ياسين (بحب ) : ياسلام احنا نطول .. التي شيرت وصاحب التي شيرت تحت امرك يا فندم
اتكسفت فريده و وشها احمر .. وهنا دخل يوسف بصلهم شاف البسمه علي وشهم هما الاتنين
ابتسم وقال : معلش اتاخرت عليكم .. يالا يا فريده عشان هتخرجي النهارده .. انا لسه كنت عند الدكتور وكتبلك علي خروج
ياسين : الف مبروك يا فريده .. عقبالي
فريده: اوك يالا بينا يابابا .. سلام يا ياسين .. هاجيلك بكره اتطمن عليك
ياسين (بابتسامه) : ان شاء الله
وخرجت فريده من الاوضه ... يوسف بص لياسين وغمزله وضحك
ياسين : مع السلامه
بعد ما خرجت فريده ويوسف ...
دخل عمر عند ياسين وقفل الباب
عمر : ما هو بص بقا .. انا لازم افهم كل حاجه بالتفصيل الممل
ياسين : حاجه ايه
عمر : انت توزعني انا واكرم .. وتقعد تتكلم مع عمو يوسف لوحدكم .. وبعدين هو يروح يجيب فريده تطمن عليك .. ويخرج هو ويسبكم لوحدكم .. وقبل ده كله انت كنت هتججن عليها ... كل ده .. ولما اسالك .. تقول مبتحبهاش .. افهم لحسن خلاص برج من دماغي هيطير .. اعترف احسن لك لاني ممكن اضربك خليك تفضل هنا علي طول
ياسين (بضحك ) : ده انت مراقب الاوضه بقا ههه .. وبعدين مين قال اني مبحبهاش .. انا بحبها قوي قوي كمان
عمر (بفرحه ) : اخيرا ياسين بيه اعترف واقر ان في واحده قدرت تدخل قلبه .. لوووولوووووي
ياسين (بضحك) : هتفضحنا يا مجنون
عمر : مش مهم .. خلينا نفرح .. ها قولي بقا اتفقتوا الخطوبه امتي ؟
ياسين(بحزن ) : مفيش خطوبه .. الموضوع مش زي ما انت فاهم
عمر : امال ايه !!!
ياسين : فريده عايزانا نفضل اصحاب وبس
عمر : نععععععععم ... ليه دي شكلها بتحبك هي كمان .. دي اول ما فاقت ندت باسمك
ياسين (بابتسامه ) : وانت عرفت منين ؟
عمر : كرستين حبيبتي قاليتلي
ياسين سكت ومتكلمش
عمر : طب انت ناوي علي ايه .. قال اصحاب قال
ياسين (بتفكير ) : ناوي اخليها تعترف بحبها لياا
عمر : ايوه اللي هو ازاي يعني!!
ياسين : انت مالك انت .. حاشر نفسك في كل حاجه .. ياساتر ايه ده
عمر (بتمثيل) : هي بقت كده .. ياخساره قعدتي جنبك ليل نهار .. وفي الاخر تحب غيري يا وحش
ياسين (بضحك) : ههههه خلاص يا ام العيال .. القلب وما يريد ... زي ما دخلنا بالمعروف نخرج بالمعروف
..........................................................................................................
يوسف اخد فريده ومريم وركبوا مع اكرم عشان يرجعوا الاوتيل ..
يوسف : اكرم .. اطلع بينا علي القسم
فريده ومريم واكرم بيبصولوا بذهول
أنت تقرأ
أصدقاء لا أزواج .. بقلم : أميرة عادل
Romantikعندما يتوجب عليك الاختيار بين الحب والصداقه .. ماذا تختار روايه باللغه العاميه
