Curves & Edges

Chapter 8 - Gala

NAKATAAS ang kilay niyang sinundan ng tingin si Ryan habang papunta ito sa tinutuluyan nitong unit sa hotel na iyon na katabi lang naman ng unit niya. Nang makapasok na si Ryan sa loob ng unit nito ay saka naman niya isinara ang pinto ng kanyang unit. Pumasok siya sa kuwarto at pabagsak na humiga sa kama.

Ilang saglit na siyang nakahiga nang maisip niyang sampung araw silang magkakasama ni Ryan sa bansang iyon. Bukas ay alam niyang magiging abala na si Ryan sa mga aktibidad ng sasalihan nitong kompetisyon. At siguradong pati siya ay magiging abala na rin dahil siya ang hahawak ng schedule nito at kasama rin siya sa lahat ng mga pupuntahan nito.

Wala pala siyang oras para makapamasyal. Akala pa naman niya ay masusulit niya ang oras habang nandito siya sa Singapore.

Napatingin siya sa kisame habang nag-iisip. Mamaya pa'y bumangon siya at nagpalit ng damit na panglakad. Alas-kuwatro pa lang ng hapon. Puwede pa siyang gumala at sulitin ang natitirang oras na hindi pa siya abala.

Hindi na siya magpapaalam kay Ryan, naisip niya. Saglit lang naman siya. Babalik siya kaagad. At saka hindi naman siya lalayo. May nakita siyang park kanina na malapit lang dito sa hotel. Walking distance lang. Iikot lang siya sa paligid. Maliit lang naman ang Singapore.

Dala ang kanyang shoulder bag ay lumabas siya ng tinutuluyang unit. Siniguro niyang nai-lock niya ang pinto bago siya nagtungo sa elevator.

Pagdating sa ground floor ay pasimple siyang naglakad papalabas. Ngumiti pa nga siya sa nadaanang receptionist.

Paglabas niya ng hotel ay mabilis siyang naglakad papalayo roon. Iba ang kasiyahang nararamdaman niya. First time ito na gagala siyang mag-isa at sa ibang bansa pa. Kahit sa Pilipinas ay hindi naman siya umaalis nang mag-isa. Lagi siyang may kasama--- ate niya o kaya naman ay mga kaibigan.

Humanga siya sa ganda ng Singapore. Napakaprogresibo ng basang ito. At napakalinis! Nakakahiyang magtapon ng basura dahil wala man lang siyang makita kahit isang piraso ng kalat sa kalye.

Sa kalalakad niya ay nakarating siya sa isang tila ba public park na maraming nagkalat na pigeons sa kalye. Naaliw siyang panoorin ang maaamong mga ibon.

Umupo siya sa isa sa mga bakanteng bench doon at pinanood ang nagkukumpulang mga ibon. Sa mga foreign movies lang siya nakakakita ng ganitong eksena na ang mga ibon ay nasa isang lugar lang at magkakasamang tila ba nakikihalubilo sa mga tao sa paligid.

Napansin niya ang dalawang teenager na umupo sa bench na katabi ng inuupuan niya. May dalang sandwich ang mga ito na binili sa kiosk na nasa kabilang bahagi katapat ng bench na inuupuan niya. Mukhang sarap na sarap ang dalawang teenager sa kinakaing sandwich kaya naengganyo siyang tumayo para bumili. Mabuti na lang at pinaalalahanan siya ng ate niya na magpapalit ng Singaporean dollar bago pa man sila bumiyahe ni Ryan patungong Singapore. Sabi ng ate niya, mas magandang may Singaporean dollar na siya pagdating pa lang ng Singapore para hindi hassle kung may biglaang gusto niyang bilhin.

Nang nakabili ng sandwich ay bumalik siya sa bench kung saan siya nakaupo kanina. Agad niyang nilantakan ang sandwich na ang pangalan ay Classical Reuben Sandwich. May corned beef o 'di kaya naman ay turkey filling ito. Pinili niya ang corned beef. Masarap nga pala talaga. Hindi naman pala siya lugi dahil sa napakamahal na presyo ng sandwich na iyon na dalawang slice ng rye bread na pinalamanan ng corned beef, three slices of Swiss cheese, thousand island dressing, sauerkraut at soft butter.