GARA2 RM10

Part 10

  PART 10

Mama sa p buka tu tingkap truss dia kasi renjis2 ba tu air tobitua (holy water), ngam2 dia simpan d poket dia.
"Oooooakkkk... oaakkkkk.. oakkkkkkk..." bunyi burung terbang. Heran juga, 1st time sa dingar burung d luar tingkap malam2. Confirm jelmaan tu gompi.
"Bosuon punya bulung." mama sa marah2 tu burung.
"Suda2 la tu Lu. Jangan ko tlampau ikut tu hati ko. Kalo ko dingar len2 pun ko jangan buat ja ba. Tpaksa lagi sa kawan ko tidur cni ni malam nanti len2 lagi ko buat kalo kena biar." blang mama sa.
Kami tidur la malam tu d bilik sa tapi badan sa tetap rasa panasss betul. Tu pun pusing sana pusing cni sa tidur. Ndak selesa. Ada juga sa dingar bunyi len2 tapi sa tutup ja mata, tambah sa p dakat mama sa tidur.
Bisuk pagi, badan sa susah suda mau bergerak.
Kaki pun macam susah tul mau berdiri, tpaksa kana pigang kalo mau jalan.
Adalah jam 10 pagi gitu, bunyi tu atur kami.
Mama sa p sambut trus macam lama2 juga dia diam trus dia jawab "Emm.. ba" tu ja trus tutup fon.
"Napa mak? Sepa yang kol?" sa tanya mama sa.
"C Inot mantad Kampung E yang kol. Dia suruh p rumah mama dia skrang. Nokoungou ih hal diozu trus brabis zi Inot mokituhung zi ama dau manampasi diozu. Apandai nogi ih zi ama dau mogubat tuhun. (Dia terdingar pasal ni hal kamu trus c Inot minta tulung mama dia kasi selamat kamu. Mama dia pandai plak kasi ubat orang.)Ba.. sisikapon minangaung doino. (Ba.. cepat2 pakai baju sna) Mau p amik diorang Ah Vui sma mama dia lagi ni." blang mama sa.
Okaayyy... sa ndak tau plak mama c Inot pandai kasi ubat orang.
Tba2 adik sa c Nia muncul "Kamu mau p mana? Sa mau ikut. Boring ba cni rumah," aik.. bagaya juga ni budak mau ikut2 sana.
Naik ja kreta kami (Rusa Silver time tu ok) trus tambah berat sma panas badan sa.
Mau p amik lagi diorang Ah Vui sma mama dia tpaksa lagi limpas rumah Andy sma rumah mentua c Cy.
Limpas rumah Andy, sa tinguk ckit ja orang berjaga sna. Besa la, slalu malam yang ramai orang.
Time limpas tu rumah Andy, sa cakap la dalam hati "Siou noh belum lagi p tinguk2 ko." Nokolomou mato sa tapi capat2 sa lap.
Skali limpas rumah mentua c Cy, sumaad trus sa rasa. D cni la suma dia start. Kalo kami tidak akun kasi bersih tu stor aritu ndak kami camni skrang sama c Andy masi lagi hidup. Trus sa terpkir, takkan mentua c Cy ndak tau tu stor diorang jadi tempat tinggal gompi. Start suda sa suspek sumtin wrong.
Ndak lama pastu kami smpai la sna rumah Ah Vui. Mama dia duduk d depan sma mama.
C Ah Vui sa tinguk pun pucat ja ni. Suda la kurus, makin kurus plak dia.
Bagagar-gagar c Ah Vui. Jalan pun membongkok.
"Ko OK ka ni?" sa tanya dia.
"Aiii Lu, mau gila suda sa ni. Blakang sa sakit betul. Asal petang2 mau malam suda tu, sna la sa start dingar macam2. Suara c Andy panggil2 sa pun sa ada dingar ba." blang c Ah Vui.
"Huh?? Ko pun ka??? Sa ingat sa ja yang kana. C Ken? Ko ada dingar pa2 berita dari dia ka? Macam sunyi ja dia lepas yang kamu datang p sna rumah aritu." takajut sa dingar c Ah Vui pun kana macam sa juga.
"Teda oh. Macam dia diam ja tu. Calling2 pun teda. Tu ari sa fon dia bwa jalan dia cakap dia tidak bole tlampau jalan nanti bapa dia marah." jawab c Ah Vui.
Hurmmm... macam sa tau suda sepa kana cakap aritu time tu gompi masuk mama Japan. Napa sa ndak prasan selama ni ah. Tapi kalo butul la c Ken yang kana cakap tu, napa dia tidak gtau kami. Sma2 juga kami p kasi bersih tu stor.
Crita punya crita ndak sedar smpai suda d rumah c Inot.
Ada 1 orang aunty sa nampak sna bawah puzut diorang. Dia tinguk saja sa sma Ah Vui trus dia signal suruh naik atas. Mama Inot kin ni sa blang dalam hati. Mama kami pun kana suruh ikut naik.
Time kami naik atas tu ada 1 lagi aunty. Dia suruh sa sma Ah Vui duduk d tangah2 ruang tamu tu.
Duduk ja kami sna tangah2, tba2 kami dingar suara nangis2 dari arah blakang.
Tau2 tu aunty M.I (Mama Inot) naik dari pintu blakang trus p duduk sabalah kami.
"Huhuhuhuuuu... huhuhuuuuuuu... tulung saaaaaaaa" dia nangis2 sambil tu tangan dia turun macam ndak bole bergerak ja ni. Macam yang dia kena ikat. Sa bole rasa, sa punya semangat la tu yang kena ikat macam yang aunty M.I buat skrang ni.
Tba2 aunty M.I berdiri trus dia cakap "Mana ko mau lari suda.. huh??? Mana ko mau lari!!! Hahahahaha.."
Trus aunty M.I merangkak lagi "Awuuuuuuuuuuuuuuuuuu.. awuuuuu.. awuuuuuuuuuuu" aik.. macam bunyi anjing atau serigala lagi ni kali.
Pastu aunty M.I berdiri trus cakap sma sa "Ko baca 1 Tama Za, 3 Ave Maria sma 1 Kobontugan"
Sa baca la dalam hati apa yang kana suruh tu. "Ave Maria, noponu do grasia, miampai diau ih Kinoingan....."
Sambil sa baca2 apa yang kana suruh trus aunty M.I nangis "Huhuuuu.. huhuhuuuuuuu... tulung sa inaaa...." "Ko lemah semangat ba ni cu. Ehmhmhmhmm... punya sadap niiii daging ko. Nyum nyum nyum... punya sadap sosok2 kicap daging ko ni. Atukkkkoiiiiii... pinotoh daging ko ni." trus sa teringat time yang ninik moyang kami masuk mama Japan part c Andy kana makan tu.
"Sepa suruh kamu cabar kami!! Kamu bakar rumah kami, bunuh keturunan kami!!! Sial ko noh saviavi!!! " c gompi kin ni marah2 suda.
Ni kali aunty M.I macam pahlawan. Dia libas2 tu tangan sna lantai macam putung rumput atau kayu panjang.
"Hoooiiiiiiii.... ko p mana tu. Sial punya kurus, camna dia buli talapas tu. Capat bagi sa tu kayu, mau kasi jatuh dlu tu kurus." trus aunty M.I buat macam dia umban barang.
Trus aunty M.I jatuh d lantai "Aduiiii..... tuluuuungggg... tulung sa Lu... Sa tidak mau jadi macam Andy. Lu....." macam semangat c Ah Vui ni.
"Hoiiiii... mana ko mau bawa dia tu. Arrrghhhhhhhhhh..... mari cni!!! Brani kamu amik dia!! Pigi bubut tu kurus... capattttt!!!!"
Trus aunty M.I buat aksi panah memanah. Macam butul ja diorang berpanah-panah sna. Skijap p kiri, skijap p kanan.
Suma yang ada sna tinguk ja aunty M.I beraksi. C Nia pun diam ja brabis duduk rapat sabalah mama sa. Tulah brabis mau ikut kan.
"Awuuuuuuuuu... awwuuuuuu... awuuuu..." brabis aunty M.I lari2 merangkak smbil cari bau sumtin.
Tba2 aunty M.I nangis2 "Huhuhuuuuu... huhuhuuuu... ... cuuuuu.... Mari ikut nenek plang cu.... Mari ikut nenek plang cu.... Huhuhuuuuuu....." ni kali karas ckit dia cakap "CUUUUUU!! MARI IKUT NENEK PLANGGGGGG!!!"
Trus sayu balik suara dia "Cuuuuu... mari ikut nenek plang... Cuuuuu... ikut nenek plangggg...... mari laa ikut nenek plang"
Tba2 macam aunty M.I kasi sembur air dari blakang sa, 2 kali ah dia sembur trus dia pingsan.
Sa tidak brani mau tinguk blakang. Yang len2 sa nampak kuar2 suda air mata.
Skali sa tinguk blakang, mingkulatai aunty M.I sna lantai.
"Oooooo... oooo.... Oluuuuuuu... napa ko kasi tinggal sa. Luuu... napa ko kasi tinggal sa...... huhuhuuuuuu... sa takutt ni Luuuu" ternangis trus sa sebab sa tau sepa yang cakap tu.
"Andyyyyyy... huhuhuuuu.." nangis2 sa cakap nama dia.