الابتسامة تصنع المعجزات

هل حبيب قديم ام هو ماضى بلا حبيب

سجد تتكلم بخوف:يلا يلا يا سلمى من هنا بسرعة
_لا يا سجد استنى
_يا سلمى احترمى نفسك ويلا بينا نروح اى سوبر ماركت تانى
سلمى بنبرة زعل:طيب
وبعد ماخرجوا من السوبر ماركت
سلمى:هو انتى ازاى كده يخربيت برودك
_كده اللى هو ازاى؟
_يعنى باردة
_طب خلاص ماتزعليش نفسك وامشى يلا عايزين نلحق علشان نروح
سلمى بغيظ:هاتشل هاتشل
كان نفسى اعرف هى مين اللى معاه جوة دى هو انتى يا سجد عادى كده شوفتيه مع واحدة زى دى وعادى ولا بان عليكى اى تغيير
_اه عادى
_طب ازاى؟بس ان...
وتقاطعها سجد:انا هافهمك ده بقى بالنسبالى ماضى..يعنى هوب بح
_هوب وبح
_آه..بح
_ماشى..وبعدين تعالى هنا انتى بقالك كام يوم مش مظبوطة
ومن هنا تتكلم سجد بسخرية:مش مظبوطة ازاى يعنى مثلا بفكر ان قبل منام كل يوم اتغطى كويس ازاى
سلمى بفهم:آها قوليلى بقى انِك بتفكرى لسة فى الحلم اياها
_لأ طبعا مش بفكر ده انا لسة حاكياهولك انهاردة الصبح هلحق افكر فيه امتى
وبعدين يلا بقى علشان عمتو زمانها مستنيانا علشان تعمل الاكل
وفى احلى بيت على احلى سفرة بأحلى لمة بيملاها الدفئ والحنان والضحك والفرح بس ناقصها شخص والشخص ده اللى القدر باعته علشان يجمع سجد بجابر
الحاج صالح والد جابر:ياه ياولاد الواحد بقاله زمن ما اتجمعش كده معاكم ربنا يديمها علينا نعمة يارب ويحببكوا فى بعض ياولاد
ايمان اخت جابر:يارب يابابا بس اللمة دى ناقصها محمد هو صح هاينزل من الجيش امتى
_ع اول رمضان كده يابنتى وماتنسيش انه اترقى وبقى ملازم اول ربنا يقويه هو وزمايله على حماية البلد
_طب ورحمة خطيبته اخبارها ايه؟؟
ومن هنا والدة جابر اتكلمت:والله انا بقالى فترة ما زورتهاش ولا هى ولا امها عايزة اروحلهم فى مرة لحسن دى تكون عيبة فى حقنا
_ماشى وانا هاجى معاكى يا ماما
_وانت ياجابر تبقى تيجى معانا لحسن اخوها هايموت ويشوفك ده تعبان وبيحبك ااوى يابنى
_انشاء الله يا امى
والد جابر:ايه خلاص حددتوا زيارتكوا للناس يلا بقا كلوا وريحونا
وتبدأ اصوات الضحك تعلى كأن سقف البيت والحيطان اللى محاوطاه من كل جانب نفسها ترقص من الفرحة كأن اهل البيت ماضحكوش بقالهم كتير كده

وفى بيت سجد
_يالهوى يا سجد الشنط تقيلة
_معلش ياسلمى م انا شايلة زيك بالظبط
وتخرج بنت زى القمر المنور من باب شقة جنب باب شقة سجد
ابتسامتها مالية وشها
_ازيك يا سجد
_ازيك يا رحمة عاملة ايه
_ايه يابنتى اللى عامل فيكى كده ما كنتى تقولى لعم عبد السلام
_لأ ماخلاص بقا جيبنا الحاجة وبعدين سلمى صاحبتى معايا
_آه ازيك يا سلمى
_الحمد لله
وبعد نزول جارة سجد بخمس دقايق
سلمى:مين القمر دى؟
_دى رحمة ساكنة جانبينا
_دى مرتبطة
_لا مخطوبة..لظابط فى الجيش وعمتو هى اللى جايبهاله
_آه
عمة سجد فتحت الباب
_واقفين بتتودودوا ف ايه؟
_لا يا عمتو اصل الشنط تقيلة علينا
_طيب ناولونى عنكوا شوية
وبعد مالغدا خلص سلمى وسجد راحوا للمقر الخاص بيهم(البلكونة)
سلمى:ها احكيلى بقا
سجد:احكيلك ايه؟
_قوليلى انتى بزمتك مازعلتيش لما شوفتيه مع بنت فى السوبر ماركت طب ليه
_علشان انا....

*الحلقة الجاية بقى سجد هاتحكيلكوا عن ماضيها ده كان ايه واتمنى بأن الرواية تعجبكوا لآخرها انشاء الله