الابتسامة تصنع المعجزات

مبسوطة ومش مطمنة

وفى بيت سجد الباب بيخبط
وعمة سجد تفتح وتتفاجئ:مين؟؟؟...احلام
_ازيك يا دعاء مش هاتدخلينى بيتك
_لأ ازاى تعالى يا احلام بس ايه اللى فكرك بيا دلوقت
_بنتى...بنتى هى اللى فكرتنى عايزة اشوفها فين فين سجد يا دعاء
_سجد فى دروسها بنتك فى ثانوية السنة دى ومش حمل اى حاجة يا احلام
_علشان خاطرى عايزة اشوفها ده انا حتى والله جايبة اخواتها معايا يشوفوها وتشوفهم

وتبص دعاء للبنتين....افتكرت سجد وهى صغيرة: سبحان الله شبها وفى نفس براءتها

وفى الشارع
سجد:انت شكلك كده مش هاطلعلهم ولا ايه؟
جابر:هو انا عايز اطلع ومش عايز
_لا والله ده اللى هو انا عايش ومش عايش
_ايه ده انتى طلعتى دمك خفيف طيب خلينا واقفين شوية كمان يلا ياستى م احنا طلعنا قرايب خلاص
_قرايب ده ايه احنا لسة عارفين بعض من نص ساعة
_لأ اقصد يعنى عمتك هى اللى جابت لأخويا العروسة...ده غير طلعتوا جيران لخطيبة اخويا وعمتك برضو حبيبة امى الروح بالروح لا انا كده هانط لرحمة كل يوم شكلى
وسجد تضحك:طيب ممكن نطلع بقا
علشان زمان عمتو قلقانة عليا
_ماشى
سجد وهى طالعة السلم مع جابر كانت مبسوطة جدااا بس فيه حاجة غريبة حاساها ماتعرفش ده ليه ولا من ايه
_يلا بقى خبط
_لأ لما تخبطى انتى الاول
_انا معايا المفاتيح هادخل ع طول
_طيب ادخلى وانا هاخبط
_وبعدين بقا
_طيب اقولك ع حاجة ايه رأيك تدخلى تسلمى ع رحمة وبالمرة تشوفيهم اهو الجيران لبعضيها
_ياسلام وهى الجيران مابقتش لبعضيها غير دلوقت... طيب اوعى كده
وتخبط سجد هى ع الباب(تكتكتكتكتك)
يلا بقا انا داخلة
_ماشى..بس مش داخل
وتضحك سجد من قلبها ع جابر
وتفتح الباب بالمفتاح وتتفاجئ ببنتين قاعدين برة ع السفرة قدام الباب
_ايه ده عندنا ضيوف ولا ايه؟
ازيكوا ايه العسولات دى انتوا توأم
ويتكلموا البنات:ايون احنا توأم
_واسمكوا ايه بقا؟
عمة سجد تخرج من الاوضة ومعاها
احلام والدة سجد
_عمتو مين التوأم دول قمامير ااوى
_سجد..ااا...سجد دووول...دول ياسجد
وتتكلم احلام:دول اخواتك يا سجد يا بنتى وانا امك
_امى ...عمتو دى دددى امى يا عمتو
_ايوة ايوة ياسجد دى امك يا حبيبتى ودول اخواتك ياحبيبتى
_طيب ازاى...وايه اللى فكرك بيا بعد كل ده
ليه سبتينى كل ده اتحرم منك ومن بابا ليه خلتينى حتى مافتكرش ليكى حاجة حلوة جاوبى عليا...وجاية دلوقت تقوليلى انك امى وجايبة اخواتى كمان طيب ليه ليه دلوقت
وبعد وقت قصير جداا من الموضوع وتبدأ سجد تهدى
تكلمها عمتها: اسمعى امك ياسجد امك مظلومة يابنتى اسمعيها
_وتدخل احلام ع سجد الاوضة
_طيب انا هاسيبكوا تتكلموا
احلام تبدأ تتكلم بكسرة قلب:انا عارفة يابنتى انك مكسورة من ناحيتى بس مش مكسورة قد كسرة قلبى عليكى طول المدة دى
ماتعرفيش ايه اللى جرالى ولا حتى كنت مشغولة عليكى ازاى يا حبة عين امك
وعارفة انك مقهورة منى ونفسك اكون جنبك بس والله كان غصب عنى مافيش ام تستغنى عن ضناها بالساهل
واخيرا تتكلم سجد:وانتى ايه اللى خلاكى تسيبينى كل ده..وليه جيالى انهاردة بالذات ليه؟؟
_انا هاحكيلك يا حبيبتى
_تحكى احكى وريحينى
_هاقولك ايه اللى حصلى من ساعت ما ابوكى توفى وسافرت اسكندرية

الحلقة الجاية هاتعرفوا بقيت القصة