قصص رومانسيه

شهوده

جانت لعبتي المفضلة اوكف بنص الصالة واغمض عيني وافتح ايديه الثنتين واظل افتر افتر ويفتر نفنوفي وياية وكصايبي تظل تطاير لحد ما ادوخ واوكع بحضن ابوية .. ابوية راسن يلزمن ويصيح احبيبة وكعت ويكعد يفرك براسي من اريد اكوم يلزمني ويكعد يدغدغ بيه واني اظل بس اضحك .. كل مرة نفس السيناريو ينعاد وابوية جان يعرف احب هالموقف وابد ما يمل مني من العب لعبتي ..ابوية جبير اخوته وجان اغنى واحد بيهم يشتغل بالتجارة وكلش كريم مو بس ويا اهله حتى ويا اهل امي .. احنا عائلة جبيرة عندي ٦ اخوة و٣ اخوات .. الجبيرة نادية مواليد ٦١ متزوجة وزوجها استشهد بحرب ايران وبنتها نفس عمري سجى ثنينا مواليد ٨٣ وكلش صديقات اني وسجى .. وهديل مواليد ٦٩ هم متزوجة وعدها ٥ اطفال واختي الثالثة مواليد٨٠ بس ما جنا كلش قريبات .. وعندي ٦ اخوة الجبير ٦٥ مواليده .. بهاي الفترة مجانو الولد متزوجين وجانت حرب ايران ودك قصف ع جنودنا .. عمامي جانو عايشين ويانا ٣ همه وعوائلهم بس واحد منهم راح مفقود منعرف عايش لو ميت وابنه حاتم اتذكره جان بالرابع الابتدائي نفس عمر اخوية مهدي ثنينهم جانو مواليد ٧٨ .. حياتي جانت مثل اي طفلة يكتلها الفضول من يجي خطار اظل اتفحص الوجوه حتى احفظهم واروح اكعد بحضن ابوية .. كلش جنت متعلقة بابوية وهو هم نفس الشي .. امي من اضيعها اعرف مكانها بالمطبخ ٢٤ ساعة تطبخ خطار رايح وخطار جاي ..ما اتذكر بيوم اجتمعنا كعائلة وحدنا لازم اكو خطار .. خلصت الحرب وسمعنا انتصرنا وكلها فرحت بس مرت عمي ام حاتم خانكتها العبرة ما تكدر تفرح مثل كل الناس .. ظليت اتفحص وجهها شفتها مبتسمة بس عيونها مدمعة .. اجة حاتم عليها وحضنها ومشاعرهم كلها لهفة وشوق لعمي ابو حاتم .. انتبهت ع ابوية عيونه مدمعة وهم مليانة شوق ولهفة بس ابوية من النوع ما يظهر مشاعره بقوة مثله مثل اي اب عراقي .. ورا تقريبا ٣ سنوات او اربعة ما اتذكر بالضبط شكد قرر اخوية الجبير محمد يتزوج وابوية اختارله نديمة بنت عمتي مجانو ساكنين ابغداد كاعدين بغير محافظة واهلها بابة عرب عدهم كلشي عيب للبنية .. ما جنا نعرف نديمة زين بس من اتزوجت محمد شفناها شلون وكحة وعرمة والسانها طويل وتغار من الكل حتى مني رغم جنت صغيرة صف ثاني ابتدائي ومو كلش ناضجة بس جنت اشوف شلون تتصرف حتى مرت عمي ام حاتم ما خلصت منها كل يوم مشكلة لحد ما ملت المراة واخذت ابنها وراحت للبصرة عد اهلها .. بس حاتم ما طول كم شهر ورجعلنا متعلم علينا ما قبل يبقى ابيت جده .. من راحت مرت عمي ام حاتم كامت تحير ويا منو تتعارك لو الحايط يحجي جان هم تعاركت وياه .. جانت تشوفني البس بجاما وتصيح:- عمت عينها للثقافة الي تخلينا نبدل لبسنا ونلبس بجامات ..ما جنت اهتم الها والبسها دائماً .. فد يوم واحد من ولد عمتي الثانية اجة ع ابوية وكله وحدة كرايبهم تدرس بالجامعة المستنصرية وكاعدة بسكن طلابي وماعاجبهم الوضع بنية تكعد بسكن الطلابات وابوية ما قصر واستقبل البنية ابيتنا .. اجتي وفاء عدنا وكلش حبيتها حبابة وخلوقة ومعاملتها كلش تختلف مو مثل نديمة .. مرة من مرات صدفت عطلة الصيفية ووفاء رادت تروح لاهلها وتاخذني وياها ازور اهلها .. نديمة من سمعت تخبلت ومن كل عقلها وكفت تتعارك وياية ما تروحين ويا وفاء .. اني هم ما قصرت وياها وخشيت بنص عينها وكتلها:- ليش منو انتي وتحكميني؟ اني عندي ابوية هو الي يحكمني مو انتي مدري منو حاسبة روحج
-والله ما اخليج تروحين لو شميصير
-دروحي
:::--- ظلت تدردم عليا واني ما اهتميت الها اخذت موافقة ابوية ورحت ويا وفاء للبصرة ... اهلها جانو كاعدين بشقة وعدها اخت اكبر منها بعمر اختي ام سجى ووحدة مواليد ٨٠ و٨٣ و٨٦ و٨٨ اعمارنا متقاربة وصرنا صديقات واخوانها حسام مواليد٧٢ ورزاق ٧٤ وسلام٧٦ ..عائلتهم كلش بسيطة واريحية وشقة وضحك بيناتهم عادي مرة من المرات وحدة من البنات كعدت تركص كدام اخوتها وهمه يضحكون عادي .. جنت رابع او خامس ابتدائي تقريبا وصغيرة مو كلش ناضجة بس حسام جان يلفت انتباهي كل ما اشوفه .. حسام جان طوله حلو واسمراني ومسويله شوارب جنت احس باشعاعات بداخلي من اشوفه بس مجنت اعرف شنو هذا الي ديصير بيه ...