قصص رومانسيه

خائنون

قصة_حقيقية_لفتاة_عراقية  

بقلمي ...فينوس آرام    القصة حقيقية وابطالهة موجودين              

اني رنا البنت الثالثة بالعائلة عندي 5 خوات و 5 اخوة  الاخوة اصغر من عدنه احنه البنات اني مواليد 1988 .....لا اني ولاخواتي ولا اخوتي خلصنه دراسة اكثر شي وصلت اختي الاصغر مني بالدراسة للسادس ابتدائي مكدرت تنجح منه نعرف نقرة ونكتب لكن مو بشكل مضبوط .....اني شوي ضبطت القرأة لان جنت ادرس اخوتي الصغار واتعلمت وياهم لكن رياضيات وانكليزي وغيرهة لا مستحيل كلشي ما افتهم بيهة ........عائلتنه ضخمة وجبيرة ربينه بوقت حصار  جان كلشي حسرة علينه ملابس اكل كل شي ابوية من النوع مهتم بأهلة اكثر من عدنه وحتى يحبهم اكثر من عدنه احنه بناتة و ولدة يحب اخوته وبنات اخوته و ولد اخوته جدا والشي الي خلانه نتأكد انو ابوية يحبهم ويفضلهم علينه جان يقصر علينه وياخذله هدايا بمناسبة او بدون مناسبة اذا احد نجح منهم او صار عيد ميلاد احد منهم وهي كلشي ماكو اتنغص الهم بشي واحنة نبقى نباوع ونتحسر وحق الله جانت الهدوم علينه حسرة وطبعا احد اسباب فشلنه بالدراسة المضهر مالتنه ولبسنه الناس مترحم والي بعمرنه يقلد علينه ملابسنه مستهلكه احذيتنه مفتوحه حتى الجنط مالت المدرسة امي جانت تخيطهن من كواني الطحين الي يصير لونهة ابيض وجانت خطية تخيطهن بأيديهة لان ماعدهة مكينه ........خوالي حالتهم تعبانه بس احسن شوي من عدنه وجانو يحاولون يساعدونه .....جانت العالم تتصدق علينه بزكاة الفطرة وباقي الصدقات الي ينطوهة للعالم شكد ما احجيلكم عن حالتنه التعبانه مراح تصدكون....رغم ان ابوية عندة مكتب يبيع.....

قرطاسية بيه صغير ع كد الحال لكن كلما نطلب منه شي يسوي هوسة ويتعارك ويكول مين اجيبلكم انهبلكم مو زين دة اوكلكم واشربكم !!!!! بينما اي شي عند اخوته جان ياخذلهم هداية وينگل الهم ويذكرهم .....اتذكر عمي اتسرح من الجيش اخذلة صينية بقلاوة بكد فتحة ذراع الايد كوة شالوهة 2 زلم بنت اخو نجحت من صف الاول متوسط راحت للثاني اخذله تنورة يسموهة بوقتهة لف( تنورة لف) موديل وقتهة واحنه 5 بنات ماعدنه ولا وحدة بينه هيج تنورة ابن اخوه طهرو وهو طفل انطاهم مبلغ من المال في حين احنه طلبنه منه قبل يومين او 3 كال ماعندي وطبعا مو بس اثناء المناسبات لا مناسبة وبدون مناسبة يذكرهم وحدة منهة اجو يمنه بيت اخو ديطلعون للسوك لان السوك الي يمنة شعبي وشوي ارخص شال فلوس ونطة لبنت اخو واحنه البنات وحتى الاولاد عينه عليه شلون يتصرف وية بنات اخو واحنه بناته لا هو ذاكرنه ولا اخوته يذكرونه .....ربينه بعوز وبحرمان موطبيعي ملابس البيت مالتنه مشككه امي تلزك بيهن تلزك ....اخوتي 2 الصغار ربو على طمع وحرص وبخل صار عدهم حتى اختي الجبيرة هم صارت نفس الحالة نشوف ابونه يصرف ع الناس وعلينه ميبسهة كلش....مرت الايام و امي صار بيهة سرطان من جان عمري 11 سنه وتوفت ورة 6 او 7 اشهر تقريبا......كسرتنه امي من توفت كلش تأذينه جانت نوعا ما ادبر امورنه واحنه اخوة وخوات راس فوك راس مابينه هواي فرق الي يشوفنه يكول توائم جبيرتنه جان عمرهة 13 سنه....ورة كم شهر اتزوج ابوية اجتي مرت ابوية حالهة من حال امي همين خطية لاتحل ولا تربط الشهادة لله اعتنت بينه وهي همين خلفت 5 جهال علمتنه على شغل البيت من بعد امي هي هم الله يرحمهة علمتنه على شغل البيت اخوهة لمرت ابوية اتزوج اختي الجبيرة ابوية بوقتهة...
فرح فرحة احنه بحياتنه ماشايفين ابوية هيج فرحان ...وبدت تجي القسم النه ونتزوج اني اتزوجت من جان عمري 16 سنه زواج تقليدي ناس من منطقتنه شافوني وخطبوني لابنهم اسمه ماجد.... طبعا هو همين ماعندة شهادة يشتغل وية ابوه عندة محل يبيعون جدورة مواعين يعني تجهيزات منزلية....اتزوجت وية العيال ماجد ماعندة اي كلمه وية اهلة بس ذراعه ورجولته يطلعهة براسي ... امه من النوع الي تدخل بكل شي مو بس وياية حتى وية نسوان حمويني نفس الطبع...اتصورو حتى باب غرفتي الخاصة ما اكدر اسدهة لان امه متقبل اذا ردت اشتري شي لازم هي تطلع وياية وتشتري الي على ذوقهة هي اني ونسوان حمويني مالنه حق الاختيار حتى لون النعال تكرمون هي لازم تختارة والله شاهد كل اختياراتهة لاتناسب عمرنه ولا ذوقنه عندي 3 نسوان حموين تزوجنه بوقت متقارب مو هواي بيناتنه حسبة اشهر ......جنت احجي وية ماجد يكولي ذوق امي يخبل وهي تفتهم احسن من عندج انتي بنت الفكر شراح تشترين قابل وتبذرين فلوس على الخالي بلاش نسوان حمويني راحن زعلانات لبيت اهلهم وفعلا مرت حماية الجبير اهلهة بنولة طابق وكعدو يمهم والثانية ساعدوه بالايجار اهل زوجته المهم يخلصون من امهم والثالثة اهلهة سندوهة لبنتهم وكامت متحجي وياهة ابد ولا تدخل بينهم....اني هم تعبت من هالوضعية كتل واهانه وقلة قيمه وحسرة علية اطلب شي رأسا يكولولي بنت الفكر انتي جاية تتشطرين علينه اذا ردت احتياجات عادية لاي بنت اخذلي كتل واهانه وعمتي هي لازم الي تختارهن وتجيبهن وانتو تخيلو بعد هالعيشة شلون تصير...... اني هم وحدة من هالمشاكل لزمني ماجد وخلص عليه بالكتل متركني الا واني جسمي انطعن من الضرب صار ازرك لونه وشفتي ورمت...
بوقتهة وجنت حامل وسبب المشكلة تأخرت بالخبز وامه الخاتونه ميعجبهة اتأخر بشي عبالك مو بشر اني هم صرت مثل نسوان حمويني وكلت اروح لاهلي زعلانه عسى ولعل ابوية او اخوتي يسوون شي انوب ابوية شافني هيج محجة ولا كال ليش ضاربج رأسا حط الصوج بيه وكعد يكولي المراة هي اساس سعادة او تعاسة الحياة الزوجية اومن هالحجي التافه عبالك بس احنه النسوان عايشات بالعالم والرياجيل ملأئكه متبدر منهم العيبة ورة يوم واحد ابوية رجعني وكال لماجد وامه حقكم علينه هي عرفت خطأئها وماراح تعيدة  اني رأسا حجيت كلتلة شنو خطائي يابة مسويت شي بس اتأخرت مخبزت لزمني وضربني كدام ماجد وعمتي كسر عيني كدامهم الله لا يغفرلة ذنوبة ......صرت مداس برجل عمتي اكثر واكثر وماجد اتمادى اكثر كام كدامي يحجي وية الساقطات مالاته ويطلع متعطر ومتهندم من يمي وكلش زين اعرف رايح للساقطات ومهندم نفسة واني بس يدخل للبيت كالب خلقته بوجهي هذا الحجي جبت وصار عندي طفل ومسؤليتي كبرت ...لان بيت وطفل وشغل ميخلص وبيت عيالي عليهم رجل يعني بناتهم عمامهم خوالهم طابين طالعين البيت مستحيل يفرغ ولا يبقى نضيف وعمتي متخليني انام اذا ما الم البيت وانضفه اعترف قصرت بحق زوجي لكن موبيدي اني بشر مو مكينه وهو هم مساندني وحجة وية امه يكولهه هاي بشر تتعب تصخم عدهة رجال لا ابد طابك وية امه وهي اطلعلي شغل من جوة الكاع الله شاهد حتى لو منضفة ورة ساعة ساعتين تجي اطشر شكر بالمطبخ ويبدي عياطهة وصياحهة لو اذا شافتني شوي متعطرة وغاسلة نضيفة تجي وتشمرلي هدوم نضيفة وتعالي غسليهن لو تدخل بغرفتي ودكولي هاي ليش هنا االكومدي شيلي منا وحطي هنا وكلنه تصير بينه يصير اكو شوي وسخ...
ورة الكومدي يبدي تصنيفهة واستهزائهة ورزالتهة انتي وسخة ومدري شنو وتدخل بأبني تحكم عليه شيلي وفتري لاتخلي يبجي وبنفس الوقت تريد شغل مني .....بهاي الفترة ما انكر هملته لزوجي بسبب الهلاك الي جنت اهلكه وهمين من شفته يفضل الساقطات عليه كلتلة اشبع بيهن الوسخ يحب الوسخات لاني تعبت  . جنت اشوف نسوان حمويني نوعا ما ارتاحن واني بعدني حيلي مهدود طبعا السبب الرئيسي
اهلهن ومساندتهم الهن وضبو رياجيلهم اني العندي شاف اهل ماعندي وهمة مطيحين حظي زاد ودبج بيه بالاذية وصلت يكولي اطلكج تنشمرين بالشارع منو يلمج استري على نفسج....واني احترك اشوفه بعيني يصرف عليهن وكام يتقصد يشتري الهن الساقطات ويجيبة للبيت مرة جان مشتري باودر جسم و3 حمر وعطر واجة للبيت حطهن ع الميز ودخل للحمام  ما احجيلكم اني عبالي الي من الفرحة دمعت عيني وبقيت افتش بيهن اجتي امه وشافتني هالامور بيدي اتخبلت سب وعياط واهانه طلع من الحمام اجة ملخني كتل كلي هاي مو الج لصاحبة صديقي امه سكتت بس اني مصدكت كلتلة صاحبة صديقك لو صاحبتك لزم راسي وركعه بالثلاجة .....بقيت ساكته ومفوضة امري ال الله تالي صارت بيه اشكال الامراض من ورة هالنذل كوة انطاني فلوس ورحت راجعت طبيبة كلتلي هيج امراض وحدة من اثنين لو انتي مو زينه لو زوجج اني بقيت اشهك وابجي كلتلهة هاي تاليهة دكولين عليه مو زينه هي صح الطبيبة مجانت تقصد بس اني متحملت حتى صار بيه فالول ناعم شي يشبه الفالول الناعم و صار بيه بلاوي ماريد اذكرهة  حجيت وياه ماكو فايدة وية امه ماكو فايدة دكولي ابني رجال ميلزم كلتله زوجي لان ديصير بيه اني امراض مو بس هو واني اخاف على ابني ..
.هاي اشو مصدكت كومي وزوجي وحدة شهادة وعلم احتركت الف حركه بس مابيدي شي كلت بلكي يجوز واسمه حلال ولا هالوساخة واني الي مبتلشة طبعا هو من راد يتزوج راح اتعالج وصرف على نفسة واني تركني اجدي العلاج جدية ....اتزوج ورة شهرين رجع لسوالفة ولحيونته مبقت زوجته الثانية وياه اهلهة خوش اهل صح مجان يضربهة بس صارت بيهة امراض ومن عرفت هو السبب طلبت الطلاك طلكهة ورة فترة وحتى ابنهة اخذته منه لان جانت حامل...الحمد لله عرفت اني مبية خلل الخلل والعيب منه هو لان مثل الحيوانات ميشبع....رجع عليه بطلايبة ولعبان النفس مالته ....امه بقت تلح عليه خلفي بعد شنو ماعندج بس واحد غيرج خلفن 3 و 4 كلتلهة مديصير عندي هو صدك جان ميصير عندي اطفال ورة ابني واني كيفت وسكتت لان محد يصرف علينه وابوه زبالة ....اخذتني لطبيبة بالكرادة تفتهم صدك وراهة حبلت وجبت ولد ثاني ...

...سنه 2014 عرفت اكو شي اسمه نت ومواقع تواصل كلتلة لماجد جيبلي خل افتح نت نفس كلامه بنت الفكر تريد تترقى وتصير بشر ؟؟ مجان معتبرني بشر اني هم ما جذبت خبر رحت لامي (مرت ابوية ) وكلتلهة تاخذلي تلفون بالاقساط واني انطيهة كل شهر ....كمت ابوك من ماجد ولو مو دائما لان ينتبه على فلوسة بس كمت اخذ الي ولاولادي مرت الايام وزوجي وامه نفس الطبع من سيء الى اتعس بهالفترة اتعلمت على التلفون وسوولي بي انترنت ع الشريحة وسوولي فيس وصادقت بي اشكال الوان بالبداية ....وكمت احجي وية الشباب وية زلم كبار كمت اشوف اكو حجي حلو وكلام طيب اني مسامعته لا من رجال ولا من اب ولا من اخ ما انكر انجرفت وية التيار جان واحد من الشباب الي....
مصادقتهم يحب سولف وياية واني هم يعجبني اسولف وياه سئلني اكثر من مرة انتي وين جنت اخاف اجاوب حتى كذبت بكل شي شكلي عائلتي نكرت اني متزوجه عشت وياه بغير دنيا بس ماوصلنه للحرام ...بصراحة مشفت هالامر خطاء لان اعتبرته انتقام لنفسي من هالعفونه الي اسمه زوجي .....جان يكولي دائما ماجد انتي وين وصاحباتي وين رقة انوثة نزاكه جلدهن ناعم مو مثلج جلد تمساح ليش اني شنو الي كلب خلقتي هيج غير فكرك وعوزك عليه وحرمانك حتى للحفافة مجنت اروح لان مينطيني فلوس حفافة واني مثل الحمار 24 ساعة اكرب اكيد يصير جلدي جلد تمساح من جنت بنية مو هيج جلدي خشن لو رجلي خشنة جان يلزمني ويكتلني كلما هيج احجي ويكلي بنت الفگر اطالب بحقوقهة ويضحك ويمشي.... ما اخفيكم ابد ما متندمه ع خيانتي لزوجي بالعكس اعتبرهة رد اعتبار الي ..والحمد لله لا فاتحة كاميرا ولا دازة صورة الي يعجبة يسولف خل يسولف معاجبة طز يروح واحد يجي الف غيرة هذا جزاة الي ماعدهة اهل ورجال بي خير صح مرات ابجي واتمنى اغير نفسي بس مدة اكدر اشوف ع النسوان واتحسر ليش مو مثل فلانة وليش مو مثل علانه وارد ارجع اسولف واحجي وية هالولد رغم اعرف بيهم ملعبين وميفرقون عن ماجد بس ادمنت هالامر وصار ارضاء لغروري والى يومنا هذا اني هيج طبعا كنكت ع الجوارين لان هواي ايام ماعندي رصيد ومن يصير عندي انطيهم لجواريني هاي قصتي وخل يسمعون ويقرون الي حاسبين نفسهم زلم ويسترجل على زوجته وهو يم الساقطات جريدي يصير.... اتمنى اغير نفسي اتمنى اخذ ولدي واعيش ابيت لوحدنه وارجع ع طبيعتي وارجع لصلاتي ارجع للتزامي ....ادعولي الله يقويني وابطل اسولف وية الشباب
.
رفقا_بالقوارير  الي يخون زوجته ويبهذلهة خل يتقي يتقي الله بيهة اذا متريد زوجتك ليش اتزوجتهة واتذكر الحياة دين كما تدين تدان..النهاية 

بقلم  Venus Aram