قصص رومانسيه

بعد الحب

الكاتبه
ام فاطمة

وقفت في الشارع امرأة أنيقة بملبسها وبمشيتها تنتظر سائقها بعدما أكملت خطبتها في المؤتمر الخاص بالدفاع عن حقوق المرأة ، ركبت في السيارة

السائق : ست شذى وين نروح ؟
شذى : للبيت

خلعت شذى نظاراتها الشمسية ومسحت دموعها الممتزجة بكحلتها السوداء واطلقت تنهيدة طويلة تزامنت مع صوت كاظم الساهر بعدما شغل السائق راديو السيارة ..

بعد الحب وبعد العشرة ..
نلتقي مثل الأغراب ..
واحدنا مايعرف الثاني ..
ولاكإننا أحباب ..

.
.

ازداد بكاء شذى فطلبت من السائق محارم ورقية اضافية ولأنه لايوجد لديه مايكفي في السيارة توقف امام السوبرماركت لشراء مايحتاجه

شذى : عمو جيبلي وياك بطل مي ..
السائق : حاظر ست ..

بقيت شذى لوحدها في السيارة تستمع الى تكملة اغنية كاظم الساهر وبينها وبين نفسها ..

هذي الاغنية كنت دائما اسمعها ، لكن اليوم حسيت بيها وكأنها تتحدث عني وعن حياتي وكانه كاتب الاغنية خصصها اليه .. متوقعت بعد كل هذه السنين التقي بالانسان اللي حبيته لسنوات ، وأبد متخيلت لقاءنا يكون بهذي البرودة شوفته رجعتني لخمس سنوات راحت يوم اللي افترقنا بيه اللي كان هو اسوء يوم بحياتي ...
.

قبل عشرة سنوات
.
كان عمري بوقتها 18 سنة حبيت ابن خالتي ضرغام .. اذا سألتوني شوكت حبيتيه فمااعرف لان فتحت عيوني عالدنيا والكل يگول ضرغام لشذی وشذی لضرغام .. كبرت وكبر حبي لضرغام عشقته حد الجنون والحمد لله كان شعور متبادل من كلا الطرفين ، لان دائما كان يلمح لي انه يحبني ودائما يجيبلي هدايا ووية الهدايا رسائل كلها كلام غزل و..
(هههههه هاي الشغلات ميعرفون بيهة الحدايق )

احنه عائلتنا متكونه من امي اسمها هناء ربة بيت ووالدي اسمه عامر مدرس انگليزي وعندي اخوة اثنين حسن ومحسن ...

حسن اخوية الجبير عمره 25 سنة متزوج من بنت خالتي وبنفس الوقت تصير اخت ضرغام اسمها استبرق وعدهم ثلاث اطفال رقية وعلي وحسين اخوية حازم خريج علوم حاسبات ويشتغل ضابط بالجيش ...

محسن عمره 22 سنة يدرس هندسة خارج العراق ومحصل الجنسية الامريكية وميقبل يرجع للعراق(لتحطن عينجن عليه لانه ماله دور بقصتي).

قبل عشر سنوات كنت طالبة سادس ادبي .. كملت امتحاناتي ومنتظرة استلام النتيجة وضرغام ميقبل اكمل دراسة .. يعني سادس وبس بالرغم اني اتمنی اكمل قانون بس كلشي لعيون الحوب يهون ( جتي عالوزن والقافية 😌 )

بعد فترة استلمت نتيجتي وطلعت ناجحة ومعدلي 74.5 (اهم شي النص لاعبالكم انساه ههههه) المهم اني بوقتها جنت كلش سعيدة لان بعد اسبوعين راح اتزوج ضرغام .. طبعا ضرغام شاب صاك كلش والف وحده تتمناه عمره 27 سنة الفرق بيناتنا تسع سنوات خريج علوم بايو ومكمل ماجستير يشتغل الصبح بالمستشفی والعصر يشتغل بمختبر ويتمنی يحول من وزارة الصحة لوزارة التعليم حتی يصير استاذ بالكلية فديته للكبد ماتي ..