قصص رومانسيه

حب تحت الصفر

بيوم تخرجي كنت فرحانه وسعيده رغم حزني على فراك جماعتي وكليتي واساتذتي..حياة الجامعه حلوه بكل تفاصيلها...

المهم هذي الدنيا تنقلنا كل يوم من حال الحال...

اهلي كلهم موجودين ماعدا مازن اخويه جان مسافر...

رجعنا للبيت امي هدتلي سوار ذهب وابويه انطاني فلوس...اني اخر العنكود وكلها مهتمه بيه...

اخويه مهند واختي حنين هم انطوني هداياهم...

بقت علاقتي بصديقاتي ..طلعاتنه سوه ...

حياتي جانت حلوه..وسط اهلي .. اهلي وضعهم المادي زين...والدي مدرس وامي معلمه..

واني تخرجت من قسم علم النفس...

وره فتره طلع تعييني بوحده من المحاكم التابعه الوزارة العدل ....واستلمت وظيفتي...

بالبدايه ماكنت متعلمه عالدوام واخذت وقت الى ان تعلمت...المحاكم بيها مراجعات هوايه وناس هوايه...

اني طبعي مرحه اتشاقه واضحك ومن جنت بالكليه هوايه رادوني بس كلبي مو يمهم...

تعلمت عالدوام وصرت شاطره ومديري يعتمد عليه ...

مره كاعدين بغرفتنا دخل شاب مرتب وحلو لابس قاط وانيق...وسالني على موظف ...كتله امشي ويايه اوديك الغرفته...اني جنت صدفه دااطلع للغرفه اللي بصف غرفة هذا الموظف..

هو يمشي ويكولي تعبتج ... كتله لا بالعكس...

وديته عالموظف اللي سال عليه...وكفت سلمت عليه وتشاقيت ويا هو ظل يباوع عليه...

رجعت الغرفتي...وره شويه اجا عليه مره لخ...اتشكر مني كلي ان شاءالله نتشاوف هوايه لان شغلي هم صار هنا...

سالته شنو تشتغل كال محامي..

كمت اشوفه هوايه بالمحكمه...وابقى اسولف ويا...وتعلقت بي كلش...وهو هم كام يجي يوميه اول مايفوت للمحكمه يجي يسلم عليه..

عرفت انه مصارله هوايه من متخرج...واشتغل ويه محامي وهسه بده هو يشتغل...

صارت بيناتنه علاقه قويه وحبيته كلش.. كمنا نتخابر ونسولف...وجنت احجي الاختي عليه..

اختي بهالفتره انخطبت واني هم جانو يخطبوني بس كلبي يم صفاء حبيته وصار جزء من حياتي وعايش ويايه بكل لحظه...

فد يوم خابرته...جنا متفقين على وقت اخابره ...هذا قبل الموبايل..جاوبتني مره ...سالتها على صفاء ...كالتلي نايم منو انت؟ ؟ ؟