ملكتي قلبي

٣

علاء ..
..عقيل حبيبي شلونك الحمدلله على سلامتك
..حبيبي علاوي بخير انت شلونك مشتاقلك
..الله يخليك اني اشوق عقيل اريدك بموضوع مهم فوت وياي للبيت
..خو ماكو شي قلقتني يمعوود
..هسه تعرف اتفضل ارتاح واني احچي كلشي
سولفت العقيل كلشي وشلون شفت ليال وهيه تصرخ
..كل هذا صاير واني مااعرف معقوله تغريد بهالحقاره ليش هيچ تتصرف وي الطفله بعد هالكلام مراح اخليها دقيقه بالبيت
ام علاء ..
..عقيل طول عمري معتبرتك اخ الي ومرات احسك ابني حالك حال علاء ياريت تتقبل كلامي
..الچ كل التقدير ام علاء اخت غاليه الله يشهد عليه
..الله يخليك مرتك حامل وابنك جاي بالطريق لتحاول تخرب بيتك ليال امها وصتنه عليها واني تعرف غلاتها عندي خليها يمنه وانت مو بعيد عليها
واعتقد انت تعرف علاء شنوو وتعرف حرصه وخوفه عليها
..كل هذا اعرفه ومقدره الكم بس صعبه اخاف البنت تنساني واني اشوف امها بيها حيل متعلق بليال مااعتقد اكدر اخليها تنام بعيده عني
علاء..
..عقيل انت اكثر وقتك بالدوام واحتمال هالسبب الگلته انك تشوف امها بيها خلت تغريد تشيل بگلبها ع الطفله ونست هيه لاحول ولاقوه
ياريت تنطيني فرصه اثبتلك حرصي وخوفي عليها وشلون راح تكون بأيادي امينه يمي ويم الوالده
واتعهدلك مراح اخليها تنساك ودائما اخليك على بالها
بس ياعقيل وصية حوراء الهسه ابالي واني هم من الله سبحانه وتعالى مااعرف ليش هالطفله صارت روحي بيها
..مدام هيچ هذا هوو خلوها يمكم اني وياك واحد علاوي
..حبيبي عقيل تسلم ان شاءالله نكون گد هالثقه ونكون عد حسن ضنك انت وليولتي
بعدنه نسولف اجت ليال
..بابا بابا
..حبيبة بابا شلونچ ياروحي تعالي بحضني تعالي
شفت ليال شمرت نفسها على حضن ابوها وجانت فرحانه
..بابا حبببتي مرتاحه هنا تبقين يم عمو علاء وعمه لو تجين وياي
جنت مركز بوجها وخايف خاف تروح وي ابوها شفتها هزت راسها بنعم ابقه من گلها ترحين وياي هزت راسها بمعنى لا حسيت مي بارد ونزل على گلبي
بقه شويه عقيل يمها وطلع
عقيل ..
حيل ضجت من تصرفها واني چنت مأمن بيها صح البنيه ماحبيتها من گلبي بس ممقصر وياها بشي
ولا منتقص منها بديت اعيد ذاكرتي يمكن لأن مخلي غرفة حوراء مثل ماهيه وچنت بعض الأيام انام بيها واشم بملابسها وابجي وارتاح
يمكن هاي تصرفاتي سكتت عنهن بوقتها وعكستها ابنتي زين بنتي شنوو ذنبها ليش مواجهتني
وليش تواجهني اصلا هالشي من حقي مو من حقها تغار من انسانه متوفيه وهيه تعرف هالأنسانه شنو چانت بالنسبه الي
كل هالأمور مرت ابالي دخلت للبيت
تلكتني باوستني سلمت ابرود
گعدت ع التخم انتجيت على اديني خليتهن وره راسي ومنتضرها تحچيلي ارد اسمعها شراح تگول .
بقيت تقريبا نص ساعه ماحچيت شي وهيه تتهرب اخر شي گلتلي
..عقيل اني سكتت الخاطرك والله اجيت اروح لهلي
اني مو تايهه ويجي علاء يتهدد عليه شنو علاقته هوه وليش يدخل بينه احنه بيت واحد ليش ناطي مجال انت
..جاوبتها ابرود شبي علاء شسوالچ
..دفعني وتهجم عليه واخذ ليال مني وحيل مشتاقتلها
تحول الهدوء الى بركان باوعتلها بغضب
..مشتاقتلها موو لچ انتي بشر انتي
عبالچ مااعرف سوالفچ لج شلون هيچ مشوهه ايدها
..عقيل افهم والله قصدي اعلمها واربيها
..لج ربي نفسچ بالأول لو انصحچ تتعالجين انتي ابد مو انسانه
..عقيل اكيد هذا علاء كذب هالكذب انت ليش تصدگه
گمتلها فرگت حلگها حيل
.. اش سكتي الموضوع انتهى ليال يم علاء تبقه وانتي اني اعرف شلون اتعامل وياج