ملكتي قلبي

٥

مرت السنين وصرت مرحله خامسه كليه وصارت ليال صف أول ابتدائي بهاي المرحله عقلي بده ينضج اكثر والحياة صارت احلى بالنسبه ألي صرت قريب من تحقيق حلمي امي الشخص الي ماانسه فضلها عليه نهائيا مو لأن امي وربتني لا امي علاقتها وياي اكثر من أم وابنها علاقتنه بيها نوع من الصداقه بيناتنه ممخلين حاجز والصراحه والأحترام هي سر علاقتنه حته من نطلع اني وياها الي يشوفنه ابد ميضن انو هيه امي يجي ابالهم اختي أو حبيبتي والدتي حيل ناعمه ومهتمه بنفسها وأنيقه وأني چنت طويل وجسمي ضخم بس بالمعقول چنت ملتزم بالرياضه بشكل يومي  لذلك جسمي مرتب..فد يوم نتمشى بالسوگ وصدفه التقينه اني والطبيب الي مسؤل عني بالتدريب چان حيل يحبني لأن متفوق وذكي وچنت احب الشي الي اني وصلتله ومن ادرس واتدرب اركز بالدرس واحب افهم كلشي ومااريد معلومه تفوتني ابساطه چنت احب دراستي وعندي طموح اصير جراح مشهور وچنت بسباق وي الزمن والدروس المهم چنت محبوب للكل بس بالنسبه الزميلاتي الدكتورات يشوفني مغرور وشايف نفسي مع كل هذا وتفكيرهن عني بس چانن يحترمني ويحبني هم وبيهم احس بنضراتهن واعجابهن الي
بهذا اليوم التقينه اني والطبيب المسؤل عني سلمت علي وسلم ع الوالده وباس ليال وكل شخص منه كمل طريقه وانتهه اليوم وثاني يوم داومت طلب مني الطبيب يلتقي وياي بعد الدوام وافقت واني مااعرف شنو السبب التقينه وبقيت انتضره تأخر حوالي عشر دقائق بقت عيني ع الساعه والتفت يمنه يسره شفته اجه اعتذر عن التأخير وسلم
..مرحبا علاء
..اهلا دكتور تفضل
..اني ميحتاج اگلك انت شنو تعني بالنسبه الي واعتبرك من طلابي المتميزين واشوفلك مستقبل گدامك يارب توصله وتحقق احلامك الموضوع الجايك بي ميخص الدراسه ومااعرف شلون ابدي

..اشكرك استاذ وان شاءالله اكون عد حسن ضنك واحقق الي گلته ياريت اعرف بشنو افيدك

..علاء البارحه التقيت وياك وچانت اختك اعتقد او قريبتك وياك واني الصراحه عجبتني وخاصتا لأن اعرف اخلاقك فحبيت اطلب ايدها منك واني حاضر للي تطلبوه واتمنى ماكون ازعجتك بهذا الطلب

..اني انصدمت من الي گاله وسكتت شويه يلله جاوبته بس بقيت هادئ گتله دكتور انت انسان ناجح ومحترم وماكو نقاط سيئه عنك بس غلطان دكتور الي شفتها وياي والدتي مو اختي للأسف ماعندي أخت واعتقد الوالده رافضه موضوع الزواج نهائيا لأن هواي اتقدمولها وترفض بدون تفكير شفته حيل انحرج
..اني اسف علاء والله متوقعتها والدتك ياريت تعذرني اعتقد اني تسرعت هواي بس مثل مگتلك انت اخلاقك تعجبني واتصورتها اختك ياريت تعذرني والله حته الساني انربط مااعرف شنو احچي

..لا مصار شي عادي دكتور اني انسان متفهم وانت انسان واعي بس صدگني الوالده رافضه هالفكره نهائيا
جاوبته هيج بس بداخلي الصراحه ضجت بس اكيد هوه ميعرف بيها امي كلت بداخلي ليش اكبر الموضوع .
بيومها رجعت للبيت وقررت اگل للوالده دخلت
..السلام عليكم
..وعليكم السلام ياهلا بحبيبي شلونك ماما احضرلك الغده
..لا حبيبتي اروح اغسل واجي عندي موضوع وياچ وغمزتلها وضحكت
..يا الله لازم لگيتلك عروسه وقررت تتزوج
..جنت اصعد ع الدرج وسمعتها صحتلها لا حبيبتي عروستي موجوده بس اكو وحده اجاها عريس
..لك علاء بلا سوالفك هاي
..انتضريني ياحلوه اغسل واجي جسمي متكسر
وصلت الباب غرفتي لاكتني ليال طالعه من غرفتي رفعت حاجبي وابتسمتلها لچ شتسوين بغرفتي بس لا لاعبه باوراقي
..هلوو عموو لا مالاعبه والله بس خليتلك مفاجأه
..دنگت عليها شنوو المفاجأه وبستهه
..ادخل وشوفهه
..امري ال الله ادخل واشوف حبيبتي لوله نزلي جوه يم ماما اغسل واجيكم حضروو الغده بين منجي
..صار عموو
..لچ شوكت تلغين العموو خبلتيني والله ضحكت وهيه راحت دخلت للغرفه لگيت ع الميز ورقه مكتوب بيها علاء عامر وراسمه يمه ورد وسماعات طبيب وجنطه ضحكت گايمه تعرف تكتب اسمي وترسم هم صح بسيط الي سوته بس حيل فرحني
غسلت ونزلت شلتها من الكرسي وبستها ياروحي انتي صايره شطوره وتعرفين تكتبين شكرا الچ احلى هديه وصلتني فرحت هيه وبدت امي تسأل
وتخلي الأكل ع الميز
..أي علاء سولف شنو الي ردت تگوله
..يعني عادي اسولف غمزتلها من ليال
..لك انت متجوز من سوالفك اعرفك هسه تطلع مثل سوالف كل مره
..لا والنبي هالمره صدگ
..يا الله يعني قررت تتزوج واخيرا
ليال ..منو يتزوج واني منو يقريني ويلعبني ووين انام ومنو يلعبني عمو راح ينساني اكيد ويصير مثل بابا حته گام ميجيني
..من سمعتها هيچ حچت ضجت ومچنت متوقع طفله مثلها تعرف وتفتهم وباقي كلشي ابالها خاصتا ابوها صح من صارو عنده اطفال التها وياهم وضل ميهتملها بس ابالي هيه هم ممهتمه واني معوضها عن والدها حته امي انصدمت ونضرتلي نضره حسيتها لامتني بيها وتريد تگلي هذا الچنت خايفه منه والبنت تعودت عليك
..كلتلها حبيبتي ليال منو گال اني اتزوج ماما غلطانه وجاي تشاقه مو اكثر اني راح انتضرج تكبرين واتزوجج شفت امي خزرتني مااهتميت وكملت كلامي گتلها اني انتضر هالحلوه تكبر وتصير زوجتي والموضوع مو هيچ وبالنسبه البابا يحبچ ودائما يسألني عنچ ولتگولين عافني انتي ممرتاحه يمنه اني احبچ اكثر من الكل وماما هم تحبچ اجت شبكتني حيل بستها وگعدتها بحضني
بوكتها حته متغديت وبقه كلامها ابالي شويه وكتلهم يلله الحمدلله
..ماما علاء ماأكلت شي
..ماريد يوم شبعت رايح بالصاله من تخلصين نحچي
شويه واجتني أمي
..علاء الموضوع بده يكبر وصار كلشي خارج المعقول شكم مره گتلك لتخلي البنت تتعلق بيك الهالدرجه وتحرمك من اشياء لازم تصير مثل الزواج السنه انت اخر سنه ولازم تتزوج خو متبقه هيچ ..والكلام الگلته الها اكبر غلط شنو تگلها انتضرج هيه طفاه شنوو تفهم
..يوم انتي الي مكبره الموضوع شنو الشي. الخارج المعقول زواج مراح اتزوج غيرها وانتها الكلام بخصوص هالموضوع
..لك انت متوهم علاء اخاف تضيع شبابك تنتضرها ومن تكبر مراح تتقبلك زوج
..الوقتها ألله كريم يوم اني هذا حلمي خليني اني اعيش حياتي واذا صار او مصار المهم تجربه ابالي انفذها
..براحتك يوم بس اخاف يجي يوم تتندم
..صدگيني النتيجه سلبيه او ايجابيه مراح اتندم ليال وين هسه
..راحت الغرفتها تكمل قرايه وجاي تكتب بالكراس
..اها لعد ابدي احچي الموضوع الردت احچي الچ ودخلتيني بمتاهه
..تفضل حبيبي واني اسفه لتعتبره تدخل مني بحياتك بقدر ماهوه خوف عليك وعلى مستقبلك وخوفي على ليال اكثر
يوم تخافين على ليال مني
..مو اخاف منك بس اريدها تعيش طفولتها لتحاول تفرض نفسك عليها بهالطريقه جاي تجبرها تفكر بيك