#لحظة_عمر
الجزء السادس ...
ضحى ..
بعد ماطلع بيه بالسيارة وهو يمشي سريع ..
سألت الولد الصغير
حبيبي شنو اسمك
احمد
وبابا شنو اسمه
رائد ..
حمودي صاح ابوه بيه اسكت ولا كلمه ..
ابتعد عني الولد
وبدا يباوع على الناس من الجام .. طبكت السيارة بمكان مااعرفة وين ونزل من السيارة ونزلني بس مو بقوة ولا بصياح مثل ماصيح وجرني من شعري من جنت وي سهير ..
ارجوك بس فهمني
شافهمج
اني منو احجيلي
طبي جوة ونتفاهم
دخلت وياه للبيت وهو صار طبيعي مو هذا الي شفته اول مرة عصبي ويصيح وحتى ملامحه هدأت مبين عليه طيب وجان هاديء
سالني واني صافنه على البيت
تريدين اكل
لا اكلت
تريدين جاي
اي اني اسوي
لا كعدي اني متعلم اسوي جاي
بس فهمني احجيلي
شافهمج
اني منو احجيلي
انتي نور زوجتي وهذا ابنا الوحيد
زين منو اهلي وين اهلي ..
امج ماتت قبل ٥ سنوات وابوج ميت من انتي بالمتوسطة
زين اخوتي خواتي
اخوتج بس اثنين ومتزوجين وبالسنه حسنه يسألون عليج ..
زين ليش عايفيني
معايفيج مشاغل الحياة او وضع البلد الناس قليل تطلع تعرفين انتي هالشي ..
صاح على ابنه .. بابا روح نام الوقت تاخر عندك مدرسه الصبح ...
وين غرفته لحمودي خلي احضرله ملابسه وفراشه اساعدة ..
لا كلشي جاهز اله فراش وملابسه
صحت على حمودي وبوسته وحضنته بقوة وكتله روح نام فرجت اسنانك
كال لا
كتله روح نظفهم ونام ..
وكمت ورة رائد ورحت للمطبخ اساعدك
لا كلشي مكمل ماعوف شي ..
زين ليش تحسسني غريبه ..
لا مو غريبه بس انتي مريضه ماالح عليج وانتي هسه طبيتي لبيتج
شبيه مريضه
مو فاقدة ذاكرتج اكيد من صدمه او حادث
بس انت ليش مصدكت بيه كدام سهير ذولي الناس راعوني
اسمعيني انسي الموضوع وخلينا بهمنا
مدا افهم
حمودي همنا هسه ماريد اعرف وين جنتي وشسويتي واني واثق منج
مدا افهم
حمودي مريض لازم نسويله عمليه انتي جنتي متعوفيه ثانيه وتخافين عليه احنا متفرغين اله نورة مو بحال هاي الشغلات وباجر اروح احجز اله علمود السفر و عمليه حمودي .. ..
شبيه شعنده
عندة مشاكل بالقلب وعمليته بعمان نسويها
شكد تكلف
هواي بس اني دبرتها..
زين اجي وياك
شتجين هي اوراقج وين
غير يمك
انتي طلعتي دتسوين الجواز وجيتي مضيعه كل اوراقج الجنطه الصغيره بيها فلوسج ومستمسكاتج
يعني هذا السبب الي جانت جنطتي فارغه من لكاني سرمد
وهو نفس السبب الي طلعتي بيه منا تدورين عليهم وتبجين بعد ماتعاركنا اني وياج وبعد مارجعتي .. لان تاخرت عمليه الولد بسببج
وانت ليش مسافرت من اني غبت انت اول وتالي ناوي تروح وحدك
شلون اسافر جنت ادور عليج وخفت تجين ومتلكينا .. او صار شي عليج جنت متقيد لازم الكاج .. ومن ايست منج فكرت اسافر اسبوع الجاي بس لكيتج الحمدلله جنت يوميه اطلع ادور عليج ...
زين تنجح عمليته لو صعبه..
ان شاءالله سهله كلما نستعجل بالعمليه احسن والدكتور طمني ..
كلشي جان غريب عليه وغامض بس من جنت اباوع على حمودي انقهر ..
فجاه لكيت عندي عائله وبيت وطفل مريض جنت انتظر ارجع لبيتي بس من عرفت عندي ابن مريض انهاريت واحس انقلبت حياتي صدك وتمنيت لو باقيه يم بيت سرمد ولا هاي الحقيقه المرة ..
طبيت لغرفتي اريد انام حسيت بصعوبه شلون راح انام بصفه صعبه عليه مااكدر أتقبل هالشي صح هو زوجي بس مااكدر كلشي ماتذكر من حياتي السابقة ..
بعدين تذكرت سرمد كلت اكيد اتصل بيه لو هو لو سهير فتحت جنطتي تلفوني ماكو وين راح زين شلون راح اعرف اخبارهم وشلون يعرفون اخباري ..
بهاللحظه طب رائد للغرفه اني كمت افتش بكنتوري اريد اشوف ملابسي شفت ملابس عندي قليله وذوقها مو حلو بعدين كلت نفس ماكال رائد اني جنت حايرة بابني وهامله نفسي .. اخذت ملابس وكتله بس اسبح تعبانه اني كلش اريد ارتاح ..
