ملاك من السما

الجزء1

#ملاك_من_السما
الجزءالاول
بقلمي همسات الليل( ام ايه)

في وسط عتمة الحياة وظلم القدر يأتينا شعاع الامل وان كان بصيصا لكنه يضيف لحياتنا النور من جديد ....

حيدر عمري 37 سنه من الحله ،اداوم بغداد في احد سجون النساء ورتبتي ضابط ملامحي شرقيه وشكلي مقبول عندي 2 اخوه و2 خوات واني الجبير....
متزوج بنت عمي ندى وزواجنا تقليدي يعني من احنه صغار بنت العم لاابن للعم ..
اتزوجت بعمر 21 موعلى حب بس هيه البنيه مشفت منها تقصير وعندي منها 3 بنات رواسي وعذراء ورهوفه 5 سنوات
واثناء ولاده رهوفه اتعسرت ندى بالولاده والممرضه ضربتها ابر تزيد الطلق بجرعه زايده ..
وباثرها تدهورت صحتها وصار عدها انفجار بالرحم بس الحمدلله الاطباء تلاحكوا حالتها بعمليه ولو جانت خطره لان نزيفها قوي بصعوبه سيطروا عليه ،،
شرفت رهوفه بس بعد معناه ام رواسي وغلطه ممرضه جاهله ..
وفقدت ندى رحمها وانحرمت من الخلفه مدى الحياه والحمدلله على كل حال ..
صحيح اني تزوجت ندى مو عن حب بس مقدر حبها واهتمامها الي ..
بس باقيه بنفسي حسره يكون عندي ولد،
اتعرض دائماا لضغوط من اهلي واخواني بس مااحب اجرح مشاعرها..
بيت والدي جبير اخويه ابو فاروق اصغر مني متزوج وعنده ولد ااثنين جان عايش ويه اهلي بس هالسنه سافر للبصره لان موظف بالنفط وصار دوامه هناك ..اخذ عائلته وسكن البصره ..
واني من شغلي كمت اسوي سلف براتبي واخذت جزء من حديقه اهلي وبنيتها مشتمل على كد الحال وطلعت من اهلي وعزلت لان جانت ندى تنحرج من احد يكول كدامها حيدر يرادله ولد يشيل اسمه وهم بناتي كبروا.
اخويه الثالث خالد طالب جامعي وديدرس بغداد بعده ويحب طالبه وناوي يزوجها بعد التخرج..
وخواتي اثنينهم متزوجات..
امي الحجيه ام حيدر نبع الحنان حجيه رايحه لبيت الله وتعرف الحلال والحرام مدعبله و بيضه ومربربه وام الخير والبركه...
على عيني عزلت منها ولو مبعدت كاعد بمشتمل بالحديقه..
بس طلعت وهي قدرت طلعتي...
معفتها يعني اجازتي كلها اكظيها يم الحجيه ،ندى تطبخ وناكل وياها..وبالذات من سافر ابو فاروق وبقت وحدها كامت ندى تسوي الاكل ونكظي يومنا كله عند الحجيه...
ومتبات وحدها تبات رواسي بنتي وياها بالايام الي يبقى خالد بغداد
ندى:اني زوجه حيدر كملت سادس ادبي وتزوجت ابن عمي جان حلم حياتي جبت منه 3 بنات وراها انحرمت من الخلفه للابد..
حيدر زوج واب مثالي..قايم بواجباته على حسب الاصول..احسه عايش بحسره الولد وديتعرض لضغوط من امه واهله بس ميبينلي..
عمتي ام حيدر حبابه وحنينه بس تبقى تسمعني لازم حيدر يجيله ولد ويشيل اسمه..
واني هذا الموضوع تعبني وحقه لحيدر بس مو بيدي مااتحمل وحده تشاركني بي..

كافي تعارف نبدي بقصتنه....
حيدر:ندى حضري بدلتي وجنطتي ماشي من الصبح لان صار عدنا حاله طارئه بالسجن وهسه خابرني مدير السجن..
ندى :اوف حيدر والله مليت ماكو تجينا يومين وتروح وتغيب اسبوع اسبوعين يالله تجي..
حيدر:شسوي ياعيني غير شغلي وباب رزقي ،لو مو هالراتب جان لسه كاعدين بغرفه بيت امي ومصاير براسنه خير..دكولي الحمدلله
ندى:ميه مره الحمدلله بس والله فراكك صعب والبنات كبرن ومحتاجيك فوك روسهن..
الله يديمك عليهن ولايحرمنه منك..
حيدر:توكلت بالله الصبح ووصلت بغداد بالظهريه كبل لمكان شغلي..ورجعت على السجن ومشاكله..
حياه ثانيه هناك ومئات القصص مخبايه وره جدرانه..
صديقي ضابط تحسين كلش نسونجي وعنده علاقات ويه السجينات وطبعا مو الكل..
بس ويه الرخيصات الي جايات بقضيه دعاره ودائما احذره اكله ابتعد عنهن ..يكلي مضارب وحده على ايدها ..يجن بكيفهن..
رغم سوالفه المكسره بس ابد ميتعده على وحده الا الي تجي برغبتها..
جنت متصور كل الي بالسجن مذنبات وماكو مظلومه..مجتمعنا الضيق زرع عندي هاي الانانيه..
الى ان اجه يوم من الايام وصادفتني سجينه واختلف رأي بالموضوع..