ملاك من السما

3

#ملاك_من_السما
الجزء الثالث
بقلمي همسات الليل( ام ايه)

سولاف:اصيح بلاوعي تبجين على واحد اعتدى على بنتج انتي شلون ام مايوم حسيت بحنيتج ليش هيج سويتي بيه
الام:اني مو امج ،امج ماتت من ولدتج وابوج تزوجني حتى اربيج وتزوجني لان يعرف اني عقيمه فقدت رحمي بحادث  حتى يضمن اني اكوم احبج بس مايوم حبيتج ولاحبيت ابوج الحافي..
عافج هم على كلبي مكطوع من شجره بس ام عنده وراحت لجهنم اول زواجي..
سولاف:بقيت مصدومه من السويته ومن حجيها،
بهالاثناء الجوارين سامعين الصياح ومبلغين النقطه الي براس الشارع..
واندك الباب وفتحته مرت ابويه وطب الضابط عليه.. الام: تصيح كتلت رجلي بواكه الزلم الله ينتقم منها،الرجال نايم بفراشه وجتي طبرته ودتبوك فلوسه..
الضابط:يابنيه انتي كتلتي؟؟؟
سولاف :ابجي ودموعي تجري وحاسه نار بكلبي والنفس بي جمر عبالك
الضابط:احجي شبيج انتي كتلتي.
سولاف:هزيت راسي يعني اي ،ماشوف غير الكلبجات بيدي وصعدوني بسياره،
ونادوا بالجهاز حتى تجي الشرطه تعاين موقع الحادث والجثه..
سولاف :بقيت مصدومه وبس ابجي شسويت اني ووين جنت عايشه وليش ابويه عافني على مرته الظالمه .
وصلت لمركز الشرطه وذبوني بالسجن ويايه نسوان وبنات ،جنت اتوقع هيج اماكن بس بالافلام نشوفها ..
دخلت غريبه بعالم اغرب خايفه من اليوم وباجر والمجهول
بلحظه خسرت حياتي ومستقبلي ضاع واكتشفت اني مكطوعه من شجره اظلمت الدنيا بعيوني ونسدت كل البيبان
ثاني يوم عرضوني على المحقق واخذ اقوالي،جانت مرت ابويه تاهمتني  اني كتلت رجلها علمود دابوكه..
حجيت للضابط ودابجي وكتله حاول يعتدي على شرفي واني منعته..
بقيت ايام وليالي بالمركز الى ان وصل تقرير المعمل الجنائي وثبتوا الحادث اعتداء من المجني عليه،وانعرضت اوراقي للقاضي وصعدت محكمه وانحكمت 5 سنين لان اعتبروها قضيه شرف ودفاع عن النفس..
والضابط كلي حطي محامي يكدر يخففلج الحكم بس تره كومه دفاتر ياخذ..

سلمت امري لله وطول فتره بقائي بالمركز بقيت ساكته ومااحجي وبس دموعي تجري واصلي وادعي.
اليوم الصبح راح يحولوني لسجن النساء اقضي حياتي،بديل عن كليتي وحياتي الي ادمرت
وبالفعل نقلوني للسجن،
وجانت عندي رده فعل مريبه عن السجون والاعتداء الجنسي بالمسجونات وهذا الخوف ولد عندي رده فعل اقوه صارت بيه حاله نفسيه بس ابجي بدون مااسكت..
وصلت السجن وانفتح الباب الي مخبه ورا اشكال القصص واني اكيد قصتي بالمستقبل راح تنضم الهم..
فتت لمدير السجن حتى يعرضوني  عليه وجان كاعد يمه ضابط منتبهت عليه..
مدير السجن:شنو تهمتج ؟؟
سولاف:ساكته مارد بس ابجي
مدير السجن:شبيج خرسه سدي حلكج وجاوبي على الاسئله..بشنو جايه
سولاف :كتلت رجل مرت ابويه
مدير السجن:مبينه مو قليله، وليش كتلتي
سولاف: بصوت ناصي حجيت راد يعتدي عليه
مدير السجن:هو اخذ اليريده بعد شكو كتلتي
سولاف :زاد بجيي وكتله مخليتي ياخذ شرفي وانهاريت ومكدرت اسكت
مدير السجن: ياسجانه اخذيها ذبيها بقاوشش 3.
حيدر:اني كاعد يم المدير وطبت وحده شكلها يجذب وحسيت الوكت لاعب بيها طوبه والمدير استفزها وبجيها وانهيارها ثار شفقتي حيل...
حيدر:وره يومين..
واكف بالشباك اباوع على السجينات مطلعيهم استراحه العصريه ،وعيني وكعت على البنيه الي اجتي قبل يومين عازله نفسها وتبجي طول الوكت
شنو قصتها؟؟؟؟ اكيد همها جبير..
بقيت يوميه اشوفها كاعده بنفس المكان وبعدها بس تبجي بهدوء ومختلطت بالسجينات..
صادف نزولي ورحت لبيتي ومرتي وبقيت 5 ايام ،
ودائما تجي ذيج البنيه على بالي اول مره اتأثر بشخص وحسيتها مظلومه..
كملت اجازتي ورجعت لداومي وكالعاده واكف بالشباك وعيني على السجينات وعيوني بلا وعي تدور عليها مستغرب تصرفاتي ليش هيج اسوي،
مشفتها طالعه صار عندي فضول رحت لقاوشهم جان مفتوح لان همه بالاستراحه والحمايه مشدده..
فتت وشفتها كاعده على الجربايه ومكرفصه روحها..
ماعرف ليش خطر على بالي ضابط تحسين داز عليها ومتحارش بيها..
بعدين كلت شنو هالاوهام الرجال صح ابو نسوان بس ميغصب سجينه هنه يذبن نفسهن كوه عليه.
تقربت منها وجان تفز وخايفه ودموعها مغوركه عيونها شبعانه بجي..
حيدر:لتخافين اني اريد اساعدج ..بقت ساكته ودموعها تجري...
حيدر:والله اني تعاطفت ويه حالتج وشايفج مثل اختي ،ليش تبجين احجيلي بلكت اكدر اساعدج..
سولاف:حسيت كلامه بي صدق بس اني احس روحي مربطه وعايشه بغير عالم ..
حيدر :براحتج لتحجين بس كومي ويه البنات بره
سولاف:حسيت براحه ويا وكمت لا اراديا وطلعت
حيدر:فرحت من شفتهة كامت وطلعت واني رجعت بغرفتي وبقيت اباوع من الشباك..
شكد جانت حلوه وهادئه بس حاس الدنيا ظلمتها حيل..
مرت ايام واني يوميه اراقبها من الشباك ماعرف شنو ديصير بيه..
قررت اليوم اطلع اكعد يمها واحجي وياها..
سولاف :راح يصير شهر اني هنا وجنت منعزله عن الكل والسجن بي المظلوم والظالم والحمدلله لليوم مشفت احد اعتدى على مسجونه..
بس جانت اكو بنات هنه مو راحه وملعبات يوميه بالليل يرتبن نفسهن وتجي السجانه تاخذهن ويرجعن الفجر..
اني افتهمت فلمهن واطمأنيت ميجون يم وحده الابرضاتها

🌸🌸🌸🌸🌸🌸🌸