دموع الحب

1

#دموع_الحب
#الجزء1
بقلم ام آيه

بطله قصتنا
لجين طالبة مرحلة ثالثة اعدادية تمريض متوسطة الطول ولوني خمري وعيوني واسعة يشبهوني بالهنديات...
من عائله بسيطه وعايشين على تقاعد والدي..
يشتغل سايق قطار وطلع تقاعد ،وامي موجوده الله يحفظها ،عندي اخ واحد اسمه مثنى خريج صناعه وعنده محل تصليح مولدات واليجي من المحل ساد احتياجات بيتنه ويه راتب والدي والحمدلله واهم شي بيتنه ملك ولو بسيط .
اخويه مثنى متزوج بنت خالتي واسمها سوسن وعدهم 2 بنات..
حياتي طبيعيه اروح الصبح لداومي ومن ارجع اساعد مرت اخويه بشغل البيت لان اذا اكعد يوم بدون ما اساعدها تحرك مثنى وينكلب البيت بيومها.
امي تخيط وتساعد بمصروف البيت شويه والباقي الي تضمه..
قبل جانت ملابسي كلها خياط بس من كبرت وصرت بالاعداديه واشوف البنات ولبسهم كمت استحي البس خياط..
امي خطيه تخيط وبفلوس الخياط تشتريلي كلشي وممقصره عني..
دراستنه صعبه واغلب كتبنه انكليزي واني من البدايه اساسي ضعيف لان جان الانكليزي على ايامنا يبدون يدرسونيا من صف الخامس الابتدائي مو مثل هالوقت من الاول ابتدائي نشوف الطفل لبلبان..
جنت مكرسه وقتي للدراسة لان حاطه في بالي انجح واساعد اهلي..
دخلت اعدادية التمريض حتى احصل تعين مركزي اول مااتخرج ، لاني من عائله فقيره وماعندي ادفع واسطات علمود اتعين ..
حبيت دراستي وتاقلمت وياها ..

من هنا بدت قصتي....
وصلت المدرسه ولكيت الباب مسدود وجانت ساعة 8:10 تاخرت لان محسيت على المنبه..
صيحت على الحارس..
لجين: عمو سلمان وينك دخيلك افتحلي الباب...
حجي سلمان:ياهووو اليصيح
لجين:اني عمو فدوه الله يخليك افتح الباب والله راحت عليه نومه وهسه جيت ركض..
حجي سلمان:روحي بنيتي كملي نومتج هسه استاذ سيف قفل الباب واخذ المفتاح..
لجين:منو هذا النوبه ، بقيت حايره ماكدر ارجع لان سوسن مرت مثنى خاف تلفقلي سالفه وتسويلي مشاكل بالبيت، ياربي شنو اسوي ..

سيف:
عمري 27 سنه طويل ملامحي شرقيه ودمي حار خريج معهد تمريض ..
صدر امر تعيني باعدادية التمريض للبنات واني ابن اخو المدير ، واليوم اول يوم داومت وعمي انطاني الصلاحية وكلي سمعة المدرسة وانتظامها بأمانتك..
اول شغله سويتها قفلت الباب ساعه 8:00 بالضبط ، وسوينا اصطفاف وطلبت من البنات الالتزام بالزي والانضباط بالحضور وعدم التأخر.
اخذت صف ثالث بمادتين ..دخلت الحصه الاولى والبنات بدن يتلوكن ويتموعن بس اني شايف وشبعان ومتعبر عليه لواتتهن..
سجلنه الغياب وجانت بس بنيه غايبه..طلبت من الجميع عدم الغياب لان سنه اخيره وبكلوريا واي درس يفوت عليهم يأثر ..
كملت الحصه الاولى واخذت غير شعبه وكملت الحصه يعني اخذت حصتين وصارت فرصه ربع ساعه واني بطريقي للاداره شفت شخص كاعد مقرفص على باب المدرسة وجانت الدنيا كلش بارده بشهر الواحد .
صحت حجي سلمان وينك وينك ماكو جواب..
رحت بنفسي وصلت الباب وشفت بنيه كلش جذابه لابسه زي مبينه طالبه من مدرستنا بس مبينه تعبانه من البرد حجيت وياها بدون ماافتح الباب شعندج هنا ليش كاعده بهالبرد اكيد جايه متاخره ، لازم جنتي متواعده...
لجين : بقيت كاعده وكتلني البرد ولمحت شخص اجه عرفته الاستاذ الغبره الجديد من شفته شدني شكله كلش رجولي..
بس من وصل يمي واتهجم بالكلام راسا حقدت عليه وكتله احترم نفس صدك متستحي..
سيف:شكد هجوميه انتي وماعندج اخلاق
لجين:لو مو تصير استاذ بهالمدرسة لو وزير التربية نفسه مااسمحلك تتهمتي وتجرحني..
سيف : يله روحي لبيتكم لو روحي كملي موعدج الغرامي وعفتها ومشيت..

لجين :عصبني ابن اللذين وعافني وراح...
سيف :ظليت كلما ادخل حصه واطلع الكاها بعدها ، شخصيتها قويه بس ليش متاخره لازم عدها شي لان لو كاعده متاخره جان رجعت لبيتهم..
سيف:خلص الدوام والجرس بممر الادارة مقابيل الباب حطيت ايدي على الجرس واباوعلها دكيت الجرس راسا كامت ومشت لبيتهم..
لجين:الله ينتقم منك شسويت بيه اليوم والله ينتقم من سوسن من وراها كتلني البرد..
رجعت للبيت وكلت لاامي لان اخاف احد من الجوارين شايفني ويكوللها كلت خل انطيها علم وهم علمود تكعدني بوقت.