دموع الحب

8

#دموع_الحب
الجزء  الثامن
بقلمي همسات الليل( ام آيه)

لجين:بديت اداوم والحمدلله مرتاحه بس من جان يصير عندي خفر تكلب الدنيا سوسن بالبيت ،كامت امي سوده عليه تجي تبات ويايه حتى كمت احس بالاحراج ويه زميلاتي لان مصايره بالدنيا وحده تجيب امها تبات وياها بمكان عملها..
وصلت السالفه للمدير ودز عليه وحجه ويايه واني ميته خجل ،بس جان رجال جبير ومتفهم حجيتله سالفتي وتفهمها وساعدني،
وكالي بيوم الخفر لتجين تباتين بس لازم بيومها تكملين دوام ل8 يعني تجريها من 8 الصبح الى 8 بالليل، قبلت وشكرته وكلت اتحمل هي مره بالاسبوع..والحمدلله خلصت من سوسن..
والله جنت من استلم راتب كل شهر انطي بناتها 25 الف واكلها اشتريلهم ملابس وجانت تكيف وتصير زينه ويايا قبل موعد الراتب بيومين وره الراتب بيومين و وراها ترجع تكلب عليه..شسويلها هيه وعقلها....
لجين:حبيت شغلي وحطوني بقسم العلاج الطبيعي  وسيف مراح من بالي،كلبي يحنله بس عقلي رافضه لان عافني بنص الطريق...
سيف:بقيت ادور عليها وحاولت اوصللها وهي ماكو وبيوم قررت ادك باب بيتهم وشيصير خل يصير..
نزلت دكيت الباب وطلعتلي وحده اكبر من لجين عرفتها مرت اخوها وشكلها خبيث ..سويت نفسي داسال على جماعه وكالت ماكو احد بهذا الاسم خاف بالشارع الورانه تشكرتها وطلعت وجانت اخر فرصه الي..
مرت 7 اشهر واني روحي تتعذب ومشتاقلها ورايد قربها ..ومداكدر اتاقلم ويه فرح مع العلم حبابه وبس تريد ترضيني وحاولت اكثر من مره تتقربلي وصديتها لان مو باارادتي حب لجين بدمي..
من وراها حتى شرب شربت..ومره رجعت شارب ومعمق فتحتلي الباب فرح وحلت بعيني واتخيلتها لجين وصار الي مو على بالي..كعدت الصبح شفت وضعيتنا مخربطه وفرح مبين عليها الفرح والخجل ،باركتلها وطبيت للحمام وبجيت مثل النسوان اني شنو سويت بروحي هذا الي صار معناها خسرت لجين للابد..
فرح:وره وفاه امه بقى غريب عليه واني حاولت اتقربله وهو يصدني واني عاذرته لان جان متعلق حيل بخالتي وفاتها سببتله صدمه جبيره..
وحتى شرب كام يشرب ،وبيوم رجع شارب بس مو مثل كل مره جان مزيد العيار فتحتله الباب وفاتلي ملهوف ويحضن بااشتياق ويكولي دورت عليج هوايه والله ماعوفج حبيبتي،استغربت لان جان نار ويموت واني صار شهور صابره عليه ..اتجاوبت ويا وعفته براحته ...كعد الصبح اني ميته خجل وهو باركلي باابتسامه ودخل للحمام..
سيف:وره الي صار بذيج الليله عفت الشرب وابتعدت عن فرح نفسي مو بيها وهيه حاسه عليه بس شي خارج عن ارادتي..
فرح:تقربلي مره وراها عافني مدافتهم وضعه وره شهر بده يتخربط وضعي وكمت ادوخ وصار عندي لعبان نفس كلت لسيف وداني للطبيبه وطلبت تحاليل وحللت وكالت مبروك انتي حامل بس انتبهي تره الحمل ضعيف..فرحت من كلام الطبيبه حسيت هذا الشي راح يقربني لسيف..
سيف:من سمعت بيها طلعت حامل انصدمت ،وضجت لان اني مكافي عليه ظالمها انوبه اظلم الطفل وياها..
سيف:من سمعت بحمل فرح  وحجي الطبيبه وان حملها مهدد حبيبت اكفر عن ذنبي بديت اداريها واساعدها بالبيت بس ابد متقربتلها ..
كملت شهرين حمل ومره كعدنه من النوم وفرح تبجي وتتلوه وديتها للمستشفى وفحصوها الطفل مابي نبض وسولها عمليه ونزلو ..
كلش فرح اتاذت بوقتها لان خسرت الطفل واني بعيد عنها وممتقربلها بس بليلتها..
حسيت نفسي حقير واناني وحاولت اتجاوب وياها بس مو باارادتي ماكدر انسى لجين..
لجين:اني بقسم العلاج الطبيعي بس اكثر صديقاتي بالنسائيه..ومره اني يمهم وجتي وحده تطلع بعمري وميت الطفل بطنها وديسوولها كرتاج البنات..
ظلت بس تبجي وتتوسل الله يخليكم شوفوا بلكت الطفل مميت والله اخسر ابو اخر شي يربطني بي..
اني كلش انقهرت وتعاطفت وياها بس  مكدرت ادخل بخصوصياتها وكلت شكد نذل لعد علمود طفل يعوفها..راحت البنيه ومشفت رجلها بس بقت بالي لان خطيه جانت كلش تقهر

للقصة بقيه