دموع الحب

9

#دموع_الحب
#الجزء التاسع
بقلمي همسات الليل(ام آيه)

سيف:فرح خسرت الطفل ومشت الايام وبعدني بعيد عنها ..ومره اني بالمدرسه ودكت ام عمار مرت اخويه وبس تبجي ..
ام عمار:فدوه سيوفي الحكلنا سوينا حادث اني وابو عمار ذبينا الجهال بمدارسهم وطالعين دنروح للمستشفى دنسوي فحوصات الكلى مالت ابو عمار
وهسه ناس جابونا واخوك مخطر.
سيف:لخاطر الله انتو وين ،اخذت العنوان ورحتلهم كبل للمستشفى..
ام عمار جانت بس رضوض وخدوش بس اخويه متاذي الضربه من جهته بقه 4 ساعات بالعمليات وراها طلع جانت ايده مكسوره ورجله بيها كسر وتلف بالعصب وخياط بالجمجمه..
طلع الحمدلله من العمليه وكلنا ملتمين فوك راسه اني واخويه ابو انس وفرح والكل والحمدلله بده يفيق ويصحصح من البنج بس جانت آلمه حيل قويه لان الضربه والثكل عليه بس الحمدلله عدت على خير..
جنا خايفين عليه من السكر خاف مرتفع ويآثر على عمليته..
خطيه من قهر امي ومرضها وابويه عافنه واحنا صغار شال المسؤليه بوقت ومن قهره على امي صار عنده سكر وضرب كليته وكل فتره لازم يسوي فحوصات..الحمدلله على كل حال..
سيف:ياجماعه الحمدلله اطمئنينه على ابو عمار راح اروح اجيب اكل من المطعم وناكل لان لازم نقوي نفسنه علمود نداري بالايام الجايه...
لجين:اجاني الدكتور وكلي لجين تعالي نشوف المريض بغرفه 9 المسوي حادث..
لجين:صار دكتور ورحت ويا..من طبينا شفنه مرافقين هوايه ويا ،والدكتور طلب يطلعون ميصير يبقون لان تعب على المريض وبده يفحصه الدكتور واني ويا ومن الفحص اكتشف الطبيب رجله ام العصب التالف متتحرك وحجه ويايه بالانكليزي وفهمني حالته وكلي من باجر تبدين علاج طبيعي ويا بس بالاطراف ..
كملنا وطلعنا ويم الغرفه شفت البنيه الي اجهضت ابنها قبل فتره وهي ضلت بالي..سلمت عليها وعرفتني وسولفنه كتلها زوجج المدعوم ،جاوبتني لا حمايه وحبيت اشوف زوجها المكروه من باب الفضول وكالت زوجي راح يجيب اكل..
اتحمدتلهم على سلامه المريض ورحت ،خلص دوامي بيومها ورجعت للبيت..
سيف:دز علينا الدكتور اني وابو انس وكالنا وضعيته وانوا صار عنده بوحده من رجليناته شلل مؤقت بس طمنه كال بمرور الوكت تتحسن..وراح يطول بقاءه بالمستشفى 10 ايام ولازم نتناوب عليه اني واخويه..
رجعت جبتلهم اكل وبتت ويا والكل راحو وفرح راحت لبيت ابو عمار دتبات وياهم..
وثاني يوم اجه ابو انس ورحت كتلهم اسبح واروح اداوم كم درس واجيكم..
لجين:طلب مني الطبيب اتابع حاله المريض الي سوه حادث وصار عنده شلل مؤقت برجله ورحتله الصبح بقيت ساعه اسويله تمارين ونغزات وتعب وكملت الجلسه وكتله باجر نكمل ان شاءالله..
سيف:داومت واجيتهم الظهر وطلبت من ابو انس يروح هسع ويجي بالليل يبات ويا..
وبقيت لليل وناوب اخويه بدالي ورحت للبيت وثاني يوم الصبح رحت للمدرسه وكملت الدوام وطلعت بوجهي للمستشفى ..
سيف:شلون صرت ابو عموري
ابو عمار :والله سيوفي رجلي دتموتني والنوبه من تجي المعالجه الفيزيائيه نفسيتي تتعب لان ماكو استجابه
سيف:حبيبي ابو عمار طلعت من الموت وربك ميكطع والعافيه درجات والله كريم..