ثمن عمري

6

ثمن عمري
بقلمي(ام آيه)

سحر:الدنيا مشايلتني من الفرحه واريد بس يجي باجر حتى اشوف بنتي حبيبتي
واحنا كاعدين واقترح عليه ابو مها اقتراح وشفته مناسب.
ابو احمد:اكلج ام مها احنه بيتنه تقريبا نباع وراح نتكاتب باجر  واستلم الفلوس
وراح يتوزع الورث بيني وبين امل اختي
اني جنت حاط عيني على قطعه بمنطقتنه قريبه من فرن الصمون على الشارع العام كلت اخذهاوابنيها بيت النا
بس هسه علمود راح اغير رأيي وعندي مقترح بلكت يناسبج وانتي اختي وراحتج تهمني ومسؤله مني
سحر:والله انت اخويه المجابته امي غالي ابو حمودي كول اسمعك
ابو احمد:باوعي اني اشوف لو تعرضين بيتج للبيع وناخذ احنه وياج قطعه 300 متر ونبنيها مشتملين فد شكل ،علمودتصيرين قريبه من عدنه وميضل بالي وبال خواتج عليكم
سحر:والله ياريت يوم المنى خوش مقترح
امشي بفالك ابو احمد وتوكل بالله
واني باجر راح اروح واعرض البيت يم الدلال وانطيهم رقم البيت مالتكم وانت امشي بالموضوع
احمد:طبعا جتي السالفه من يمي وفرحت ومها هم فرحت،
احمد:اي بابا اني اعرف اكو قطعه بالشارع الي ورانه لزك على بيت صديقي ماهر مساحتها 300 متر وديريدون يبيعوها
شتكول اذا نشوفها موقعها كلش حلو
رقيه:غمزت لسحر وضحكنا على احمد ابني
ابو احمد:ان شاءالله باجر نروح نشوفها ونشوف منو صاحبها وحتى لو اشتريها من فلوس بيتنا وابدي اشتغل شويه بالكاع بين مينباع بيت ام مها
ام مها:والله لو اخويه ابن امي وابويه ميحرص علينه مثلك،الله يديمك ابو احمد وميحرمنا منك
ابو احمد:انتي وزينب غلاتكم من غلاة الغاليه ام حمودي
زينب وسحر:الله يديمكم لبعض ولايحرمكم من الثاني
سحر:ثاني يوم كعدنا وطلعنا ساعه7 الصبح ذبيت البنات بيتنا وبوجهي لبيت الدكتوره و وصلت على الوكت
سحر:صباح الخير
ام سالي:صباح النور اتفضلي ام مها
سحر:زاد فضلج ستنا الدكتوره
ام سالي:عيوني ام مها اني ماحب الرسميات،اني دكتوره بالمستشفى ،بس بالبيت اني ربه بيت عاديه وام سالي فقط
سحر:ان شاءالله ام سالي،حبيت تواضعها لهالانسانه
سحر:حبيت البيت والمره وشفتها حبابه وحبيبتي سالي ورده وشطوره
سحر:كمت اتقرب من بنتي وحضنتها لاول مره واحساسي مينوصف
كلبي مفرفح بين فرحانه وبين ابجي على عمرها الي ضيعته بغلطه وجهل بالتصرف مني
جان بودي افتح كلبي واحطها بي ،كل وحده مضيعه ضناها راح تحس بااحساسي ،اوف الله لايحرم كل ام من عزيز كلبها
الله يرحمج يمه هسه ياله فهمت ليش جانت دائما تكول
(الله ليراويني بيكم يوم اسود وان شاءالله من عمري على عمركم)
اثاري الضنه غالي وفراكه يمرد الكلب مرد
سحر:انعجبت ام سالي بشغلي وامنت بيه
ام سالي:ام مها صارلها اسبوعين يمي ومشفت منها العيبه،بس حبها لسالي مو طبيعي
اهتمامها وخوفها حيل قالقني
واني اخاف على بنتي خاف ناويتلها نيه لان ماكو هيج اهتمام مبالغ حتى العفو قيطان الحذاء تربطه
سحر:مرت اسبوعين واني طايره بغير عالم وبنتي قريبه عليه وبدت تتعلق بيه..
ومره من الايام صاحتني ام سالي
ام سالي:ام مها عيوني كملي شغلتج وتعالي نسولف شويه
سحر:جنت مكمله كلشي وباقي بس داضرب اوتي بقميص الدكتور
سحر:نعم ام سالي اسمعج
ام سالي: عيوني ام مها اني باجر  راح يبدي دوامي
وحايره بنتي شلون تبقى وحدها من ترجع من الدوام لذالك قررت اخلي خطها يجيبها مباشرة للمستشفى عليه
وانتي بهيج حاله راح نستغني عنج وراح احتاجج بس بيوم أوفي وبيوم الجمعه
سحر:انصدمت من حجيها ،مااكدر اتحمل ماشوف بنتي يوم ،كمت ابجي بلاوعي
ام سالي:لتخافين ماقصر وياج الراتب مستمر
سحر:مو على الراتب
ام سالي:على شنو لعد
سحر:اريد احجي وخايفه من ردة فعل الدكتوره اخر شي اتجرئت وحجيت
سحر:ام سالي انطيني الامان اشكيلج همي
ام سالي:تفضلي اسمعج
سحر:اني طبيت لبيتج مو علمود الشغل
ام سالي:حجت حجايتها وبقيت صافنه،علمود شنو لعد كملي
سحر:اني جنت مزوجه رجال مريض نفسي ومدمن كحول تعبت بحياتي ويا صار عندي منه بنات 2 ومقصرت وياهم بشي كلشي اشتغلت علمود ميحتاجون لأي احد
رحت لاختي الجبيره و ودتني  للمستشفى حتى احط مانع لان هي موظفه هناك،
بس جان فايت الاوان وطلعت حامل شهرين
وبقيت حامل ومااجهضته وزوجي ساومني اذا جبت بنيه لو يطلكني ويذبني على مرت ابويه ومعناها جهالي ميحصلون ضمان من ابوهم
لو يذبحلي الطفله والخيارين جانت قاسيه عليه
و واحد اصعب من الثاني
سحر:رحت وجبت بنتي وبقيت حايره وابجي وبعدين مشيت بخطوه وبقيت ادفع ثمنها غالي لحد يومنا هذا
ام سالي:كلبي لعب وشك،يله كملي
سحر:رحت ذبيت بنتي بالجامع بلكت احد يحن عليها ويطلع احن من ابوها
وجنت عايفه وياها امانه ورقه وكلاده بركبتها وصارلي 11 سنه ادور عليها وهسه لكيتها
ام سالي:شكوكي طلعت بمحلها كمت ابجي،كتلها يعني سالي تصير بنتج
سحر:ابجي بحركه وقهر اي بنتي وقطعه مني بس الزمن قسى عليه والله وبعدها عني
سحر:جانت رده فعل الدكتوره كلش قاسيه عليه
وصدمتني!!!!